DÍÍSHJĮ́ĮDI “nihogháajįʼ yoołkáałgo” tʼáá áníiltso deiniidlą́ągo Jiihóvah éí bidineʼé yooʼishgo áhánígo shił danilı̨́į doo nízingo neinitin. (2 Tim. 3:1) Tʼááłáʼí niitínígo Jiihóvah bikʼeh honiilʼı̨́į doo. Ałkʼidą́ą́ʼ Ízrel dineʼé honoojíidi tádíkááhą́ądą́ą́ʼ éí dilní nídiitsʼı̨́įhgo akʼeh dahojíłʼı̨́ı̨́ ńtʼééʼ. Nihí dííshjı̨́įdi tʼáá ákótʼé nahalin.

Jiihóvah éí Mózes béésh łigaii hashtʼeʼnibíʼdííłniiłgo dilní bee íʼdílzoołí naakigo ádíílííł yidííniid. Éí bikʼehgo “áłah nádleeh doo áádóó dah nídiiʼnéeh doo.” (Num. 10:2) Náádaʼiiłniihii éí ałʼąą átʼéego dilní bee áńdazhdiʼniihgo binahjįʼ Ízrel dineʼé ánááʼdooʼníiłgi bił béédahózin ńtʼééʼ. (Num. 10:​3-8) Dííshjı̨́įdi Diyin bidineʼé kótʼéego ánááʼdoolníiłgi ałʼąą átʼéego bił ííshjání ádaalneʼ. Ałkʼidą́ą́ʼ dilní bee áháʼníigo ályaa yę́ę éí tááʼ ałʼąą átʼéego bééhániih. Éí Diyin bidineʼé nitsaago áłah náʼádleehgóó nihaa díínááł dabidiʼní, elders nidabiʼdinitin, índa haʼátʼíí shı̨́ı̨́ ániidígo ánáádaalyaaii doodaiiʼ hashtʼéédaalyaaii congregation bił chʼídaatʼaʼ.

Jiihóvah éí “tʼáá ałtso” dah oonéłígíí níbaal biiʼ hodílzinii haʼaʼaahdę́ę́ʼ bichʼéédą́ąʼgi áłah nádleeh doo biniyé náádaʼiiłniihii bee íʼdílzoołí naakidi bee áńdadiʼniih doo. (Num. 10:3) Tʼáá ałtso dah oonéłígíí níbaal biiʼ hodílzinii yinaagóó dı̨́ı̨́ʼ ałʼąą dah oonéłígíí díí deidiitsʼı̨́įhgo tʼáá bééhózíní. Áyídígóó dah oonéłígíí éí tʼáá íídą́ą́ʼ yikʼehgóó ádaʼiiłʼįįh. Nízaadi dah oonéłígíí éí tʼáá bee dah hodinaahgo índa neheekah. Azhą́ áyídídę́ę́ʼ doodaiiʼ nízaadę́ęʼ ndi, Jiihóvah éí tʼáá ájíłtso áłah ádazhdoonííł áádóó háká adeeshwoł nízin.

Nihí éí níbaal biiʼ hodílzingi doo áłah néidleeh da. Ndi, Diyin bidineʼé ahíikáahgo nihił ííshjání ánálʼįįh. Éí regional conventions dóó łahgo áłah aleeh nináánátʼáahgo ákwii haneʼ łaʼ nihił chʼínáádaatʼááh. Tʼáá náhwiistʼą́ą́góó Jiihóvah bidineʼé tʼááłáʼíígíí naʼnitin bee nidabiʼdinitin. Ákwii nídaakahígíí bił dahózhǫ́. Łaʼ ayóó ánízáádę́ę́ʼ yiniyé nídaakah. Áko tʼáá ákónéehee níyáá lá danízin łeh.

Ákoshąʼ nízaadi dah yikahígíí? Éísh nízaadi nitsaago áłah azłı̨́ʼígíí bíká análwoʼ? Aooʼ, tʼáá íídą́ą́ʼ atah honishłǫ́ danízin. Háálá modern technology binahjįʼ tʼáá éí bee naʼnitinii bíká análwoʼ. Sahara Desertgi haʼagééd biniyé kin dah shijaaʼgo Arlit, Niger hoolyéegi headquartersdę́ę́ʼ łaʼ níyáago éí Benin  branchdóó program transmit ádayiilaa. Éí ákwii 21 brothers dóó sisters áádóó binaadę́ę́ʼ áłah daazlı̨́ı̨́ʼ. Azhą́ nízaadi hoł hazʼą́ą ndi, łahjí 44,131 áłah silı̨́ʼígíí bił dahoniidlǫ́ dazhnízin. Nihibrother łaʼ kóníigo íʼiilaa: “Kótʼéego nihá ádaʼoołaagi tsʼídá nitsaago ahéheeʼ. Éí bee bééhózingo ayóóʼádanihíínóhʼníí lá.”

Nááʼiiłniihii éí dilní łaʼ bee ázhdííniidgo “aląąjįʼ naazíinii éí miilgo yinanitʼaʼí” tʼéiyá níbaal biiʼ hodílzingi áłah dooleeł. (Num. 10:4) Éí hodineʼé bikʼi dazhdéezʼı̨́įʼgo baa ádahojilyą́ą doo biniyé ákwii Mózes hoł náhálnih dóó nináhonitı̨́ı̨́h. Áko ni łaʼ aląąjįʼ naazíinii nilı̨́įgo ákweʼé áłah aleehgi nánídáahgo níká adoolwoł.

Dííshjı̨́įdi congregation elders éí ‘aląąjįʼ naazı̨́įgo’ doo nidantʼáa da. Diyin bidineʼé baa ádahojilyánígíí doo honaalteʼ ádajósin da. (1 Pet. 5:​1-3) Ndi wołí bee ádaatʼı̨́įgo Diyin bidibé yaa ádahalyą́. Bee nináádabidíʼnóotı̨́įłgo tʼáá íídą́ą́ʼ ákǫ́ǫ́ deeshááł danízin. Éí Kingdom Ministry School ádaatʼéii. Ákwii éí congregation bił nidaaztʼiʼii ádaatʼéégóó hazhóʼó biʼoonishgi yídahoołʼaah. Áko éí bitsʼą́ą́dóó elders dóó Diyin bidineʼé yikʼi dadéezʼı̨́įʼii tʼáá átʼé Jiihóvah áhánígo yił dahólǫ́ǫgo ádabósin. Azhą́ shı̨́ı̨́ díidi doo łaʼ atah tádííníyáa da ndi, ákǫ́ǫ́ nidaaskaígíí yídahoołʼą́ʼígíí bitsʼą́ą́dóó níká adoolwołgo átʼé.

Nááʼiiłniihii éí łahda dilní ałʼąą ánááʼníiłgo yee áńdiʼniih. Kótʼéego éí dah oonéłígíí dah nááʼdiʼdooʼnééł níigo ání Jiihóvah. (Num. 10:​5, 6) Éí dah nááʼdiiʼnéehgo tsʼídá nizhónígo ałkééʼ nínilgo dah nídiiʼnéeh. Ayóó shı̨́ı̨́ binaʼanish ńtʼééʼ. Ndi dah nááʼdiʼdooʼnéełgi łaʼ shı̨́ı̨́ doo ádeinízin da łeh. Éí haʼátʼíí biniinaa?

Łaʼ shı̨́ı̨́ éí tʼáá ahą́ą́h áádóó tʼáadoo naólníní dah náádiiʼnééh danízin ńtʼééʼ. Łahda “tʼáá ákwii kʼos dah yildohgo eʼeʼááh dóó náhoolʼįįh.” Áádóó łahda “naaki jı̨́įjįʼ, doodaiiʼ nídíziʼjįʼ, doodaiiʼ náhahjįʼ” náʼádleehgo dah nínáázhdiiʼnééh ńtʼééʼ. (Num. 9:​21, 22) Áko díkwíidi dah nízhdiiʼná? Numbers chapter 33 áníigo 40dóó baʼaandi dah nízhdiiʼná.

Łahda shı̨́ı̨́ éí nizhónígo chahaʼoh hólǫ́ǫgi ninádajíʼnééh. Díí hoł yáʼádahootʼééh shı̨́ı̨́ ńtʼééʼ, háálá ‘tsʼídá ayóó átʼéego áádóó tʼóó bááhádzidgo honoojíigi’ nááníjooʼnééł. (Deut. 1:19) Łahda shı̨́ı̨́ dah náádadiiʼnéehgo tʼáá íiyisíí doo yáʼáhootʼéehgi nináádiiʼnééł hwiindzin ńtʼééʼ.

Ízrel dineʼé dashdiinéehgo łah shı̨́ı̨́ áłtsé abaʼ ádajítʼée dooleełgi há nidantłʼa. Tʼáá ádzíłtso éí dilní ałʼąą ánááʼníiłgo dazdiiztsʼą́ą́ʼ, ndi tʼáá ádzíłtso doo tʼáá łahjįʼ dashdidoonéeł da. Kótʼéego dilní ałʼąą ánááʼníiłgo diitsʼaʼgo éí haʼaʼaahjígo Júdah, Ísakar, dóó Zébyulan dineʼé dah yinéłígíí dashdidoonééł. (Num. 2:​3-7; 10:​5, 6) Éí dashdiináago naaki góneʼ dilní ałʼąą ánááʼníiłgo nááʼiiłniihii yee ánáádíʼniih. Díí shádiʼááhdę́ęʼgo táaʼgo dineʼé dah yinéłígíí dilní bá diitsʼįįh. Nááʼiiłniihii tʼáá ákótʼéego iʼoolíiłgo ałtso dah adiinééh.

Łahgo ánááʼdoolníiłgi ałʼąą átʼéego shı̨́ı̨́ baa nitsíníkees łeh. Ániid díkwíígóó shı̨́ı̨́ hashtʼéédaalyaagóó biniinaa nide áyósin. Éí doodaiiʼ łahgóó shı̨́ı̨́ nił yáʼátʼééh, éí doo łah ádooníił da nínízin. Áko haʼátʼíí shı̨́ı̨́ biniinaa kótʼéego nitsíníkees ndi, haʼíínílníi dooleełgi ná nantłʼa. Łahgo ánááʼdoolníiłgi nihá yáʼátʼééh lágo baa ákodíníidzįįł, díí Jiihóvah yaa bił hózhǫ́.

Mózes bíyoołkááł yę́ędą́ą́ʼ Jiihóvah tsʼídá tʼóó ahayói hastóí, sáanii, dóó áłchíní honoojí tah góneʼ chʼíiníʼeezh. Tʼáadoo yaa áhoosyąądgóogo éí doo yisdájookai da ńtʼééʼ. Dííshjı̨́įdi Jiihóvah éí tʼóó báhádzidgo biiʼ nihídayéełkaah biyiʼ nihooʼish. Éí binahjįʼ áhánígo bił daniidlı̨́ dóó niheʼoodląʼ dabidziil! Áko tʼáá áníiltso kodóó yéigo Ízrel dineʼé ádáátʼįįd yę́ęgi átʼéego akʼeh dahóółʼįįdgo dilní nídadiitsʼı̨́įhgo bikʼehgóó ádaniitʼée doo!