1. Łaʼda Jiihóvah yitsʼą́ąjįʼ dah diiyáá ńtʼéeʼgo éí haa nádzáago haitʼéego haa nitsékees?

JIIHÓVAH éí yáʼátʼéehgo dibé yaa áhályáanii nahalinígi áníshtʼé níigo baa nídasíitʼįįd. Éí dibé tʼáá átʼé ayóóʼáyóʼní. Łaʼda bitsʼą́ąjįʼ dah diiyáago hainitáa łeh. Jiihóvah éí Ízrel dineʼé łaʼ bitsʼą́ąjįʼ dah diiyáago “shaa nánóhkááh, shí ałdóʼ nihaa náhodeeshłeeł,” yidííniid. Jiihóvah éí tʼahdii tʼáá ákótʼéego nitsékees. Háálá ání: “Doo łahgo átʼéego ánáóshʼnééh átʼée da.” (Mal. 3:​6, 7) Jesus áníigo Jiihóvah yitsʼą́ąjįʼ dah diiyáá ńtʼéeʼgo éí baa nádzáago Jiihóvah dóó diyingo ndaalʼaʼí ayóó bił dahózhǫ́.—Luke 15:​10, 32.

2. Haʼátʼíí baa nídadíitʼįįł?

² Jiihóvah yitsʼádahaaskaii éí tááʼ ałʼąą átʼéego Jesus haneʼ áyiilaaígíí binahjįʼ bíká aalwod. Éí dibé łaʼ yóóʼííyáá ńtʼéeʼgo Jiihóvah yaa nádzáago éí haitʼéego bíká adiilwołgi baa nídadíitʼįįł. Jiihóvah yaa nídoodáałgi bee bíká adiilwołgo tʼáá ákónéehee doo.

3-4. Luke 15:​8-10 bikʼehgo asdzání léiʼ béésh łigaii yóóʼayííłneʼgo haʼátʼíí biniyé hazhóʼó haineeztą́ą́ʼ?

³ Jiihóvah baa nídeeshdááł nízinii éí yéigo bíká niitáa doo. Luke binaaltsoos biyiʼdę́ę́ʼ éí asdzání léiʼ béésh łigaii yóóʼayííłneʼgo chʼééh hainitá níigo Jesus yaa halneʼ. Díí éí asdzání béésh łigaii yóóʼayííłneʼígíí yéigo yíká átʼı̨́įgo haineeztą́ą́ʼ níigo yaa halneʼ.—Luke 15:​8-10 yíníłtaʼ.

⁴ Jesus bíyoołkááł yę́ędą́ą́ʼ Jew dineʼé amá éí bichʼéʼé iiyehgo béésh łigaii 10go yaa deiilnił ńtʼééʼ. Éí díí łaʼ átʼéé ńtʼééʼ shaʼshin. Béésh łigaii neʼjįʼ náníídeeʼ jiniizı̨́ı̨́ʼ. Áko bee hoolʼiní jidiiłtłahgo nazhnitáh, ndi ádin. Bee hoolʼiní éí doo hazhóʼó bee niʼdeezdíin da. Áádóó haghan góneʼ tʼáá  átʼéé ńtʼééʼ nahojishóóʼ. Ńtʼééʼ łeezh biyiʼgi béésh łigaii bitsʼádiʼnílíidgo jiiłtsą́. Béésh łigaii náázhdiiʼą́ągo baa hoł hózhǫǫdgo hakʼis índa hakʼéí bee bił hojoolneʼ!

5. Jiihóvah yitsʼá dinoodzáhígíí bikʼídíʼnóotáałgi haʼátʼíí biniinaa nanitłʼah?

⁵ Jesus díí haneʼ áyiilaaígíí baa nitsíikeesgo tʼáadoo leʼé yóóʼeeldéelgo náázhdidoodléełgo ayóó binaʼanish. Nahaneʼ índa áłah náʼádleehgi yitsʼá dinoodzáhígíí łaʼ bikʼinidiʼnóotááł hwiindzingo ałdóʼ ayóó binaʼanishgo átʼé. Ląʼí shı̨́ı̨́ nááhai kʼad nihitsʼá dinoodzá. Brothers dóó sisters doo yééhósingi áajįʼ shı̨́ı̨́ íínáago átʼé. Áko kʼad Jiihóvah yitsʼá dinoodzáhígíí bééhózinígo éí baa nídeeshdááł nízingo nitsékees. Jiihóvah bá nináánashʼaʼ doo nízingo shı̨́ı̨́ átʼé. Brothers dóó sisters ałdóʼ yaa nitsékees. Ndi bíká oʼoowodgo tʼéiyá bá bohónéedzą́ą doo.

6. Nahaneʼgi índa áłah néidleehgi doo nádáah da silı̨́ʼígíí haʼnítáagi haitʼéego atah áká aníjílwoʼ doo?

⁶ Nahaneʼgi índa áłah néidleehgi doo nádáah da silı̨́ʼígíí, háí éí díí atah hazhdínóotaał? Tʼáá áníiltso áká anéiilwoʼgo atah naniitáa doo. Nihikʼisda doodaiiʼ nihikʼéída, éísh łaʼ nahaneʼgi índa áłah néidleehgi doo nádáah da silı̨́ı̨́ʼ? Nahólneʼgo daʼ éísh łaʼ bikʼííníyá? Łaʼ bikʼííníyáago biaddress doodaiiʼ biphone numberda éí elders łaʼ ná baa deestsos bididíiniił.

7. Thomas áníigi haʼátʼíí bitsʼą́ą́dóó bíhooʼaah?

⁷ Elders éí Jiihóvah baa nídeeshdááł nízinígíí bikʼádiʼnootaałgi éí hó íiyisíí hąąh naazlá. Éí haitʼéego ádaʼałʼı̨́? Spaindę́ę́ʼ naagháago Thomas * elder nilı̨́įgo éí 40dóó baʼaan Jiihóvah Yá Halneʼé danilı̨́įgo congregationjįʼ nináhaaskaigo yee yíká eelwod. Éí ájíní: “Áłtsé éí brothers dóó sisters nidabídíshkid łeh, éí nahaneʼgi índa áłah náʼádleehgi doo nádáah da silı̨́ʼígíí háadi łaʼ bighan doodaiiʼ háí lá ałdóʼ doo nihaa nádáah da silı̨́ı̨́ʼ? Kótʼéego nidabídíshkidgo yaa bił dahózhǫ́, háálá éí łahdóó atah áká adeeshwoł danízin. Tʼahádóó nahaneʼgi índa áłah néidleehgi doo nádáah da silı̨́ʼígíí beisháahgo éí baʼáłchíní doodaiiʼ bikʼéída ałdóʼ bináʼadishkiʼ. Háálá éí áłah náʼádleehgi baʼáłchíní nídeíʼíshgo éí nahalneʼé shı̨́ı̨́ danilı̨́ı̨́ ńtʼééʼ. Éí bí ałdóʼ Jiihóvah yaa nídoodááł hwiindzingo bee bíká aʼdoowołgo átʼé.”

8. Luke 15:​17-24 éí ayeʼ yóóʼííyáagi baa haneʼígíí azhéʼé éí biyeʼ haitʼéego yaa tsídeezkééz?

⁸ Jiihóvah baa nídeeshdááł nízinii haʼátʼíí bee ániitʼéego bíká adiilwoł? Ayeʼ nilı̨́įgo hooghan yitsʼą́ąjįʼ dadiiyá níigo Jesus yaa halneʼígíí bitsʼą́ą́dóó bídahwiidiilʼááł. (Luke 15:​17-24 yíníłtaʼ.) Éí ayeʼ doo áháshyą́ą da lá nízingo ádaa ákoniidzı̨́ı̨́ʼ áádóó hooghangóó nídeeshdááł niizı̨́ı̨́ʼ níigo yaa halneʼ. Azhéʼé éí ayóóʼánííníshʼní níigo biyeʼ yidááh yílwodgo yinázhchid. Ayeʼ ájíítʼįįdígíí ayóó bąąh hániʼ. Doo yeeʼ ayeʼ náájódleʼ átʼéégóó ádaa tsídeezkééz. Kótʼéego nitsíjíkeesgo hazhéʼé bił hojoolneʼ. Ákondi hazhéʼé haa aʼááh niizı̨́ı̨́ʼ. Naalʼaʼí doo jidooleeł da hóʼníigo shiyeʼ nilı̨́ hodííniid. Áko bá niʼjisʼah dóó ééʼ yáʼátʼéehii bee hazhdiilaa. Háálá hayeʼ hashtʼeʼnitsínáníkééz.

9. Nídeeshdááł nízinii bíká adiilwołgo haʼátʼíí bee ániitʼée doo? (“ Nídeeshdááł Nízinii Kótʼéego Bíká Adiilwoł” níníłʼı̨́.)

⁹ Jesus haneʼ áyiilaii éí azhéʼé nilíinii Jiihóvah átʼı̨́ nahalin. Nahaneʼgi índa áłah néidleehgi doo nádáah da silı̨́ʼígíí  ayóóʼáyóʼní áádóó shaa nídoodááł yóʼní. Jiihóvah bedaʼiilʼı̨́įgo éí baa nídoodáałgi bee bíká adiilwoł. Áko éí bił haʼííníilní, baa aʼááh niidzin, áádóó ayóóʼííníiʼníi doo. Haʼátʼíí biniyé dóó haitʼéego ákóniitʼée doo?

10. Haʼátʼíí biniyé haʼíinilníi doo?

¹⁰ Jiihóvah baa nídeeshdááł nízingo éí bił haʼííníilníi doo, háálá éí tʼáá bee hodinaah. Łaʼ nahaneʼgi índa áłah náʼádleehgi doo nádáah da silı̨́ʼígíí éí elders doodaiiʼ congregationdóó łaʼ díkwíidi shı̨́ı̨́ shaa nádáahgo ákogo índa Jiihóvah bá naashʼaʼ nísísdlı̨́ı̨́ʼ daaní. Nihisister Nancy Southeast Asiadę́ę́ʼ naagháago ání: “Congregationdóó ayóó átʼéego shikʼisgo tsʼídá yéigo shíká eelwod. Shádí nahalingo ayóóʼáshóʼní. Tʼáadoo leʼé ádeilʼínę́ę yééshiyiiłníihgo áshiilaa. Tʼáadoo leʼé bee ádee yáshtiʼgo nizhónígo shił haʼólníigo shíistsʼą́ą́ʼ. Áádóó tʼáadoo tʼą́ą́ʼ nilínígo kótʼéego shiłníigo shichʼįʼ hanádzih. Áko yéigo éí shikʼis nilı̨́. Tʼáá ooleeł bikʼeh shíká análwoʼ.”

11. Haʼátʼíí biniyé aa aʼááh niidzin doo?

¹¹ Aa aʼááh hasinii éí azeeʼ bidziilii nahalin. Éí łaʼda bíniʼ atélyaago néiłdzih. Nahaneʼgi índa áłah néidleehgi doo nádáah da silı̨́ʼígíí congregationdóó łaʼda bíniʼ atíyiilaa ńtʼéeʼgo biniinaa bitah doo ákóhootʼée da, dóó yikʼee báháchįʼ łeh. Áko éí biniinaa Jiihóvah doo baa nídeeshdáał da nízin łeh. Tʼáá íiyisíí doo ákótʼéégóó ashiʼdoolʼįįd nízin łeh. Háí lá hazhóʼó shididootsʼı̨́ı̨́ł dóó shikʼididootı̨́įłgo bichʼįʼ hadeesdzih nízin shı̨́į łeh.  (Jas. 1:19) María éí nahaneʼgi índa áłah néidleehgi doo nádáah da silı̨́ı̨́ʼ, éí ájíní: “Łaʼda hazhóʼó shíídóołtsʼįįł áádóó shaa aʼááh dínóozįįł, áádóó hazhóʼó shichʼįʼ hadoozihgo shíká adoolwoł nisingo nitséskees.”

12. Jiihóvah haitʼéego ádíchʼįʼ kónihidoolííł?

¹² Diyin Bizaad áníigo Jiihóvah éí bibee ayóóʼóʼóʼniʼ yee ádíchʼįʼ kónihiłʼı̨́. Éí haitʼéego ákótʼé? Nizaagóó ahoodzą́ą́ góyaa adzííníłhaal lá jiní. Áko tʼáá ni áádę́ę́ʼ háádííʼnáhgo éí doo bíighah da. Łaʼda tłʼooł nichʼįʼ ayííłdéelgo tʼéiyá háádííʼná. Jiihóvah éí Ízrel dineʼé bitsʼádahaaskaii yę́ę kwíidííniid: “Ayóóʼóʼóʼní bee átʼááh hweeshʼnil.” (Hos. 11:4) Diyin tʼahdii tʼáá ákótʼéego nitsékees. Éí doo bá ndaalʼaʼ da daazlı̨́įʼii áádóó achʼįʼ nahwiiʼná índa yinííł bikʼeh dadidlíinii ałdóʼ kóyóʼní. Ayóó ánízáád góyaa ahineezdeeʼ nahalin. Ayóóʼánihóshʼní áádóó ádíchʼįʼ kónihideeshłííł yóʼní. Ákódaatʼéii Jiihóvah ayóóʼánihóʼní dabidiʼníi doo.

13. Pablo haitʼéego áʼiilaa?

¹³ Nahaneʼgi índa áłah néidleehgi doo nádáah da silı̨́ʼígíí éí Jiihóvah ayóóʼánóʼní áádóó nihí ałdóʼ ayóóʼádanihííníiʼní dabidiiʼníi doo. Pablo baa chʼíhootʼánę́ę éí nahaneʼgi índa áłah néidleehgi doo nádááhgóó 30dóó baʼaan nááhai. Éí ání: “Łah hooghandóó dah diiyáago sister náás silı̨́įʼii łaʼ shidááh níyá éí nizhónígo shichʼįʼ haadzííʼ. Áádóó áłchíní nahalingo haicha. Jiihóvah shichʼįʼ nííłʼaadgi átʼé bidííniid. Tʼáá akǫ́ǫ́ tsídíkéezgo Jiihóvah baa nídeeshdááł niizı̨́ı̨́ʼ.”

14. Luke 15:​4, 5gi dibé yaa áhályáanii éí dibé yikʼínádzáago haidzaa ní?

¹⁴ Nahaneʼgi índa áłah néidleehgi doo nádáah da silı̨́ʼígíí tʼáá bíká anéiilwoʼ doo. Jesus ayeʼ yóóʼííyáago yaa halneʼ yę́ęgi átʼéego bíniʼ siláagi shı̨́ı̨́ yéigo atélyaa, éí tʼáá hodinaah nádzih. Háálá éí Séítan binahatʼaʼ yiyaají tádígháahgo Jiihóvah áhánígo yił hólǫ́ǫ dooleeł yę́ęgi ádin shı̨́ı̨́ ńtʼééʼ. Áko Jiihóvah yoodlą́ągi bidziil bá ándiilníiłgi bee bíká anéiilwoʼ doo. Dibé yóóʼííyáago Jesus yaa halneʼ yę́ęgi éí ałdóʼ dibé yaa áhályáanii dibé yikʼínádzáago biwosgi dah yoołtéełgo dibé shijéeʼjįʼ néíłtééh. Éí tʼáá hodinaahgo índa dibé yikʼínádááh. Áádóó bił bééhózingo dibé yikʼínádzáhígíí náyoołtéeł doo. Háálá nátʼą́ą́ʼ nídoodáałgi doo yichʼįʼ bidziil da silı̨́ı̨́ʼ.—Luke 15:​4, 5 yíníłtaʼ.

15. Jiihóvah baa nídeeshdááł nízinii éí haitʼéego bíká anéiilwoʼ doo? (“ Naaltsoos Tsʼídá Yáʼátʼéehii” níníłʼı̨́.)

¹⁵ Nahaneʼgi índa áłah néidleehgi doo nádáah da silı̨́ʼígíí éí Jiihóvah yaa nídoodáałgi nabinółtłʼaii ádaatʼéii yikʼeh didoodleełgi ayóó binaʼanishii átʼé. Ndi Jiihóvah biníłchʼi diyinii, Bizaad, índa biorganizationdóó naaltsoos ádaalyaii bee bíká anéiilwoʼgo Jiihóvah yił kʼéʼahidiʼníigi bidziilgo bá ánéidoodlííł. (Rom. 15:1) Éí haitʼéego bíká adiilwoł? Elder łaʼ ání: “Nahaneʼgi índa áłah néidleehgi doo nádáah da silı̨́ʼígíí éí Diyin Bizaad bínááhwiizhdoołʼááł.” * Éí tʼáá aaníí Jiihóvah baa nídeeshdááł nízingo nitsékeesgo éí elder łaʼ díí bił study íʼíłʼı̨́į doo niʼdooʼniidgo  baa nił hózhǫ́ǫgo naanish ádaa didíítʼááł. Díí elder ałdóʼ ání: “Diyin Bizaad bee nazhnitinígíí éí tsʼídá yáʼátʼéehgo akʼis jílı̨́į doo. Áádóó yee hoł halneʼígíí baa jistiʼgo doo náánáłahjįʼ baa hojilneʼ da doo.”

16. Diyingo ndaalʼaʼí éí nihíká anídaajahgi haitʼéego nihił béédahózin?

¹⁶ Diyingo ndaalʼaʼí nihíká anídaajahgo díí nahaneʼgi índa áłah néidleehgi doo nádáah da silı̨́ʼígíí éí Jiihóvah baa nídeeshdááł nízingo nitsékeesgo éí diyingo ndaalʼaʼí yee nihíká anájahgo bikʼíhiikááh. (Rev. 14:6) Silvio Ecuadordę́ę́ʼ nagháago nahaneʼgi índa áłah néidleehgi doo nádáah da silı̨́įʼgo łaʼda shíká adoolwoł níigo Jiihóvah yéigo náyookąąh ńtʼééʼ, áko tʼahdii sozdilzingo elders nidiltʼéego haa níʼáázh. Áko háká ahiʼdíʼnóolchéełgi yaa bił hózhǫ́.

17. Bibeʼoodląʼ doo bidziil daazlı̨́įʼii łaʼ bíká íínílwodgo haa nohsin doo?

¹⁷ Bibeʼoodląʼ doo bidziil daazlı̨́įʼii Jiihóvah baa nídeeshdááł danízinii bikʼíhiikáahgo ayóó baa hózhǫ́. Pioneer nilı̨́įgo Salvador éí nahaneʼgi índa áłah náʼádleehgi doo nádáah da silı̨́ʼígíí bíká adeeshwoł jinízin. Éí ájíní: “Ayóó átʼéego baa shił hózhǫ́ Jiihóvah shíighahdóó bił naashnishgo díidi bá ndaalʼaʼí ayóóʼáyóʼníigo Séítan bitsʼą́ąjįʼ chʼéhékáahgo áádóó congregationjįʼ nináhákáahgo yee shíká análwoʼ.”—Acts 20:35.

18. Nahólneʼgi índa áłah náʼádleehgi doo nánídáah da sínílı̨́įʼgo haʼátʼíí baa ákonínízin doo?

¹⁸ Nahólneʼgi índa áłah náʼádleehgóó doo nanináa da sínílı̨́įʼgo baa ákonínízin Jiihóvah tʼahdii ayóóʼánóʼní. Shaa nídiidááł nóʼní. Tʼáá ni Jiihóvah baa nídeeshdááł nínízingo tʼáá ni éí bikʼeh áʼdoolníłígíí binanilnish. Jesus éí azhéʼé yaa hoolneʼ yę́ęgi átʼéego Jiihóvah shaa nídiidááł nóʼníigo nibaʼ átʼé. Áádóó baa néínídzáago ayóó átʼéego yaa bił hózhǫ́ǫ doo.