BROOKINGS, SOUTH DAKOTA hoolyéedi, ląʼí nááhai yę́ędą́ą́ʼ ahbínígo ayóó átʼéego deeskʼaazgo béénáshniih. Ayóó átʼéego nihichʼįʼ yiłkʼasgo shił bééhózin. Tłʼoh bighan góneʼ ayóó deeskʼaazgo dah dadiniistsizgo diné łaʼ bił nisézı̨́. Ásaaʼ nitsaa léiʼ tó sikʼazgo bee siką́ągo bichʼįʼ nisiidzı̨́! Áłtsé ádaa hashneʼ, áko haʼátʼíí biniyé kweʼé kótʼéego nisiidzı̨́.

March 7, 1936 góneʼ shiʼdizhchı̨́. Shizhéʼé dóó shimá dı̨́ı̨́ʼ baʼáłchíní ńtʼééʼ, shí ákéeʼdi shiʼdizhchı̨́. South Dakota haʼaʼaahjígo, áłtsʼísígo kʼééʼdílyééh dóó naaldlooshii naniltʼąʼgo bikááʼ danihighan. Kótʼéego iiná ílı̨́įgo baa nitsídeiikees, ndi doo yéigo ílı̨́įgo baa nitsáhákees da. Shizhéʼé dóó shimá éí Jiihóvah Yá Halneʼé nilı̨́įgo 1934 yę́ędą́ą́ʼ baptize ábiʼdilyaa. Tʼáá áłah Jiihóvah yaa ádeetʼą́, áko Jiihóvah íinízinii áłtsé yaa nitsíkees. Conde, South Dakotagi Jiihóvah Yá Dahalneʼé áłchʼídígo yá anájah. Ákweʼé shizhéʼé Clarence, áádóó tʼahádóó shizhéʼé yázhí Alfred, company servant nilı̨́ı̨́ ńtʼééʼ. Díí éí kʼad elder bicoordinator dabidiʼní.

Tʼáá łaʼ danihighandóó meetingóó ałnánéiikah áádóó Diyin Bizaad biiʼdę́ę́ʼ ił chohooʼı̨́įgo baa haneʼgi dahooghangóó baa nidahwiilneʼ ńtʼééʼ. Shizhéʼé dóó shimá nihinááł ááníiłgi áádóó binaʼnitin yee Jiihóvah ayóóʼádeiyíníiʼníigo ánihiilaa. Shádí Dorothy dóó shí índída hastą́ą́ nihinááhaigo God biNahatʼaʼ baa nahaneʼgi atah idiitʼáázh. 1943 yę́ędą́ą́ʼ Theocratic Ministry School índída tʼóó bee háátʼiʼígo atah níyá.

Convention dóó assembly ayóó ílı̨́įgo baa nitsídeiikees. 1949 yę́ędą́ą́ʼ, Sioux Falls,  South Dakotadi convention baa naʼaldeehgo bénashniih. Brother Grant Suiter díí yee nihichʼįʼ haadzííʼ: “Nihodoogáałjįʼ Yeeʼ Bichʼįʼ Hoolzhish!” Díí ííshjání áyiilaa, tʼáá ałtso Jiihóvah yaa ádadeestʼánígíí God biNahatʼaʼ baa nidahojilneʼ doo. Díí bikééʼdóó Jiihóvah baa ádinishtʼą́. Circuit assembly baa naʼaldeehgo, Brookings hoolyéedi, November 12, 1949 yę́ędą́ą́ʼ baptize áshiʼdiilyaa. Éí díí tłʼoh bighan góneʼ dah dadiniistsiz dishnínę́ęgi baptize áshiʼdiilyaa. Dı̨́niiltʼéego akééʼ nisiidzı̨́įgo ásaaʼ béésh biiʼ baptize ádanihiʼdilyaa.

Áádóó pioneer deeshłééł niizı̨́ı̨́ʼ. January 1, 1952, índída 15 shinááhaigo pioneer sélı̨́ı̨́ʼ. Diyin Bizaad ání: “Diné dahóyáanii bił jookahii éí hojíyą́ą doo,” áko bił dashighanígíí ląʼí dahóyáanii danilı̨́įgo pioneer sélı̨́įʼgi baa bił dahóozhǫǫd. (Proverbs 13:20) Shí dóó shizhéʼé yázhí 60 binááhaigo Julius wolyé, bił nahasneʼgo táhodoolzhiizh. Azhą́ ląʼí nááhaigóó shilą́ąjįʼ nijigháa ndi, nahaneʼgi ayóó bíniidlı̨́įgo táhodoolzhiizh. Tʼóó ahayóígóó hatsʼą́ą́dóó íhoołʼą́ą́ʼ. Shádí Dorothy ałdóʼ pioneer sílı̨́ı̨́ʼ.

Tʼah ashkii nishłı̨́įgo, shizhéʼé dóó shimá circuit overseer danilínígíí beʼasdzą́ą́ yił nihighangi nídabiilkááh ńtʼééʼ. Jesse dóó Lynn Cantwell wolyéego ayóó átʼéego shíká ahiʼnoolchxą́ą́ʼ. Ayóóʼáshóʼníigo índa shá yíneedlı̨́ı̨́góó áátʼįįd. Congregation łaʼ nihíighahgóó baa náájítʼashgo, nihił ninááhodíílnih shijiníi łeh ńtʼééʼ. Ayóó átʼéego hóneeshdlı̨́ı̨́ ńtʼééʼ! Jiihóvah yá yilnishígi átʼéego shí ałdóʼ ákótʼéego bá yishnish doo nisin áádóó pioneer.

18 shinááhaigo Bud Miller nihicircuit overseer náánásdlı̨́ı̨́ʼ, beʼasdzą́ą́ Joan yił nihicongregationgi níʼáázh. Ákwii nahalzhiishgo siláotahgóó há hadaʼdileʼgo dah naháaztánígíí bidááhdóó nidíínááł, shiʼdooʼniid. Naanish łaʼ naa didootʼááł, shiʼdooʼniid. Áko Jesus éí bílaʼashdlaʼii binahatʼaʼ bídadéétʼiʼii tʼáadoo bee atah danohłíní nínę́ę bikʼijįʼ ídlı̨́į doo niizı̨́ı̨́ʼ. Ndi God biNahatʼaʼ nizhónígo baa haneʼígíí baa hashneʼ doo nisin. ( John 15:19) Minister nishłı̨́į doogo dishníigo yíkeed.

Baa shił hóozhǫǫd, Brother Miller ákǫ́ǫ́ nił deeshʼash shidííniid. Brother Miller doo  ádeinítʼı̨́į da, áádóó doo náldzid da. Diyin Bizaad ayóó bił bééhózin. Ákǫ́ǫ́ bił níʼáazhgo binahjįʼ doo násdzid da sélı̨́ı̨́ʼ! Shı̨́ ííłnííʼdóó bikʼijįʼ 1954 yihahgo, díí bił áłah sélı̨́ı̨́ʼdóó bikʼijįʼ minister nishłı̨́į doo dííniid yę́ę shá yee lą́ daʼasłı̨́ı̨́ʼ. Áko kʼad éí ląʼígóó Jiihóvah bá naashnish doogo shá ąą ádzaa.

Áádóó tʼáadoo hodíínaʼí Betheldę́ę́ʼ shiʼdéékeed. Éí Watchtower Farm hoolyéé ńtʼééʼ yę́ęjįʼ, Staten Island, New Yorkdi. Ákweʼé tááʼ nááhaijįʼ nishishnish. Tʼóó ahayóígóó íhoołʼą́ą́ʼ, háálá brother dóó sister dahóyánígíí tʼóó ahayóí bił nidashishnishgo béédahosésįįd.

Staten Islandgi kʼééʼdílyééh dóó naaldlooshii naniltʼąʼ áádóó níłchʼi bee haneʼé WBBR wolyéego bá yaʼiiʼáh. 1924dóó 1957jįʼ, níłchʼi bee haneʼé bá yaʼiiʼáhígíí Jiihóvah Yá Dahalneʼé deiyíłyeed ńtʼééʼ. 15dóó 20jįʼ ánéelą́ąʼgo ákwii nidaalnish. Niidląʼígo ániid nideiikai dóó tʼáadoo deiichįįhí da. Ndi Eldon Woodworth, anoint ályaago, bił nideilnish. Nihizhéʼé jílı̨́ nahalingo tʼóó ahayóígóó nanihineeztą́ą́ʼ. Łahda doo hazhóʼó ahił nideilnishgóó, Brother Woodworth kójíníi łeh niʼ, “Azhą́ doo yídaneelʼáanii chojoołʼı̨́į ndi, Jiihóvah ájooníiłgi ayóó átʼé.”

Brother Frederick W. Franz ałdóʼ nihił naalnishgo nihíká eelwod. Hóyą́ índa Diyin Bizaad ayóó bił bééhózin. Tʼáá łáʼí niitínígo nihaa nitsíkees ńtʼééʼ. Chʼiyáán ííłʼínígíí éí Harry Peterson wolyé. Harry Papargyropoulos joolyée ndi, házhiʼ nantłʼago biniinaa tʼóó Harry Peterson dahodiiniiʼ ńtʼééʼ. Bí ałdóʼ anoint ábiʼdilyaa, nahaneʼgi ayóóʼájóʼní. Brother Peterson éí Bethelgi naʼanish yáʼátʼéehgo ájííłʼįįd, ndi nahaneʼgi doo nahjįʼ kwííłʼı̨́į da ńtʼééʼ. Tʼáá náhidizííd bikʼé ląʼí magazines diné yitaa néiʼnih. Diyin Bizaad ayóó bił bééhózin índa nidabídíilkidgo nizhónígo yee nihił nahalnih.

Watchtower Farmgi tsin bineestʼąʼ dóó chʼil naníseʼ hashtʼedeelʼı̨́ áádóó can ádeelneʼ. Tózis nitsaaígíí tsʼídá daatsʼí 45,000 ánéelą́ągo tʼáá nináháhááh tsin bineestʼąʼ dóó chʼil naníseʼ Bethelgi nidaalnishígíí bá can  ánídeelʼįįh. Łaʼ sister ayóó hóyą́, Etta Huth wolyé, bił naashnish. Éí tsin bineestʼąʼ dóó chʼil naníseʼ bił ádaalʼínígíí ádajileʼ. Sisters tʼáá áádóó nidaakaiígíí nihíká anájah, éí Etta díí bindazhdoolnishígíí há ałkʼee ninéiʼnił. Azhą́ Etta can ádaʼałʼı̨́įgi ayóó hoł bééhózin ndi, brothers nihikʼi dadéezʼı̨́ʼígíí hoł nilı̨́. Díí nizhónígo nihinááł ákójítʼéé ńtʼééʼ.

Angela Romano wolyéego, sister tʼah ániid naagháago nihaa náánádzá. Etta éí Angie nihisister silı̨́įʼgo yíká eelwod. April 1958 yihahgo Angie sheʼasdzą́ą́ sílı̨́ı̨́ʼ, Jiihóvah bá neiilʼaʼgo 58 nááhai. Angie éí yéigo Jiihóvah bíighah jizı̨́įgo, ahísiilkéegi bidziilgo áyiilaa. Ayóó hojíyą́, áádóó tsʼídá bíighahí bee nihichʼįʼ hodiiʼnáahgo ayóó haʼííníshłí.

Brothers éí Staten Islandi WBBR 1957 yihahgo baa nidahaazniiʼgo Brooklyn Betheldi tʼóó kónígháníjįʼ ninááshishnish. Angie sheʼasdzą́ą́ silı̨́ı̨́ʼ, áádóó Betheldóó dadiiyá. Staten Islandgi pioneer íʼiilʼı̨́įgo tááʼ nááhai. Níłchʼi bee haneʼé bá yaʼiiʼáh nihaa nidayiisniiʼ yę́ę tʼóó kónígháníjįʼ bá nishishnish, éí WPOW wolyé.

Angie bił niheʼiinaʼ tʼóó bikiinígo íilyaa, áko háajigoda náánihiʼdoolʼaadgo éí tʼáadoo leʼé doo tʼą́ą́ʼ kónihósin da doo. 1961 yihahgo Falls City, Nebraskadi special pioneer doołeeł nihiʼdooʼniid. Áadi niitʼáazhgo tʼáadoo hodíínaʼí South Lansing, New Yorkgóó tʼáá łáʼí nídeezidjįʼ Kingdom Ministry Schoolgi iidoołtah nihiʼdooʼniid. Díí éí ayóó bóhoneedlı̨́įgo nanihidiʼneestą́ą́ʼ, áádóó Nebraskagóó nídeetʼáázh lá niidzin ńtʼééʼ. Łahjįʼ náánihiʼdoolʼaad, missionary niidlı̨́įgo Cambodiagóó dooʼash nihiʼdooʼniid! Southeast Asia kéyah hózhóní, ląʼígóó tʼah doo deiltséhígíí, diitsʼı̨́hígíí, dóó chʼiyáán ádahalniihgi nihił bééhózin. Ákwii kéédahatʼínígíí God biNahatʼaʼ nizhónígo baa haneʼ bee bił hodiilnih niidzin.

Ńtʼééʼ Cambodiagi nahatʼaʼ łah ádzaa, áko South Vietnamjįʼgo dah náádiitʼáázh. Áadi naaki nihinááhai, ńtʼééʼ yéigo shitah honiigaii, áłtsé yáʼátʼééh nídeeshdleeł biniyé, tʼóó United Statesgóó dah nídiitʼáázh. Áádóó pioneer íʼiilʼı̨́įgo chʼínáániilnish.

March 1965 yihahgo, congregations bíká anáhiʼniilchéeh doo biniyé bitahgóó nikidiitʼáázh. Éí circuit dóó district binaʼanishgi bíniidlı̨́įgo 33 nááhaijįʼ nihinaanish íilyaa, áádóó convention nídaʼadleehgóó ałdóʼ áká anáhiʼnilchééh ńtʼééʼ. Díí naanish bíneeshdlı̨́įgo nahashzhiizh, háálá convention baa naʼaldeehgo ayóó bóhoneedlı̨́į łeh. New York City binaagóó congregations bitah tádiitʼaashgo ląʼí nááhai, dóó Yankee Stadiumgi ląʼídi convention azlı̨́ı̨́ʼ.

Ląʼígóó naanish ádaaniidígíí dóó ndantłʼaaígíí nihaa hideestʼą́. 1995 yihahgo Ministerial  Training School bee naʼnitin doo, shiʼdooʼniid. Tááʼ nááhaidóó bikʼijįʼ Betheldę́ę́ʼ náánihiʼdéékeed. Kweʼé nánísdzáago baa hózhǫ́, 40dóó baʼaan nááhai yę́ędą́ą́ʼ kodóó special full-time nishłı̨́įgo déshnish. Service Department góneʼ dóó daʼóltaʼgóó nanishtingo shinaanishgo íishłaa. 2007 yihahgo Governing Body éí Theocratic Schools Department ádayiilaa, díí Bethelgi daʼóltaʼgóó bee baa áháyą́ą doo biniyé. Díí bikʼi díníshʼı̨́įgo ląʼí nááhai.

Tʼáá ániidídóó wóshdę́ę́ʼ, Bethelgi daʼóltaʼígíí łahgóó łah ánídaalyaa. 2008 yihahgo éí School for Congregation Elders bee hahoolzhiizh. Éí díí bitsʼą́ą́dóó naaki nááhaijįʼ 12,000dóó baʼaan elders Patterson dóó Brooklyn Bethelgi nidabidiʼneestą́ą́ʼ. Díí óltaʼ éí kʼad ląʼígóó bá nahazʼą́ągo ályaa. 2010 yihahgo éí Ministerial Training School yę́ę Bible School for Single Brothers wolyéego ánályaa, áádóó ániid łaʼ óltaʼ ánáánályaa, éí Bible School for Christian Couples wolyé.

September 2014 yihahgo díí tʼáá áłah óltaʼ ałhiih yiʼnil, áádóó School for Kingdom Evangelizers woosyeʼ. Ákwíí atah íídéeshtah danízinígíí éí ałhijishkehígíí dóó tʼáá sáhí nijigháhígíí bá ahóótʼiʼ. Kéyah daʼníłtsʼą́ą́góó díí óltaʼ dahólǫ́ǫ doo, hodooʼniidgo tʼóó ahayóí baa bił dahóózhǫǫd. Díí ayóó baa hózhǫ́, háálá ląʼí éí díí óltaʼ bichʼįʼ ąą átʼée doo. Áko ląʼí béédahosésįįdgo baa hózhǫ́, éí bibeʼiinaʼ hashtʼeʼ dayiilaago binahjįʼ daʼííłtaʼ.

Tʼah doo tłʼoh bighan góneʼ ayóó íídéeskʼaazgo baptize áshiʼdilnééhgóó dííshjı̨́įjįʼ sheʼiinaʼ baa nitsískeesgo, dahóyáanii bił ahéédahosésįįdgi Jiihóvah bichʼįʼ ahééh nisin. Éí hó dahanahjįʼ Jiihóvah bééhosésįįd dóó yáʼátʼéehgo bá naʼalʼaʼgi yee shíká ííjééʼ. Łaʼ éí shikéédę́ę́ʼ índa shilą́ąjįʼ nidaakai, ląʼí éí bibee ádaʼoolʼįįłii łah ádaatʼée ńtʼééʼ. Azhą́ ákótʼée ndi, ádaaníiłgi dóó nitsídaakeesgi Jiihóvah yee ayóóʼádayóʼní. Baa ahééh nisin, Jiihóvah bidineʼé bitahdę́ę́ʼ dahóyáanii bitsʼą́ą́dóó íhooshʼaah.