Bilagáanakʼehjí saad “amen” éí “tʼáá ákótʼée doo” doodaiiʼ “hoł tʼáá aaníigo” jiníigo óolyé. Saad “amen” éí Hííbrewdę́ę́ʼ íiyisíí saad yiltsʼiłii óolyéegi éí “yinídlą́” índa “baa jíínílí.” Díí saad éí łahda ánihwiitʼaah bił nahazʼą́ą́ góneʼ chooʼı̨́. Éí łaʼda yadidiilnihgo ádee hadoodzíiʼgo éí “amen” niih. Éí bee hazdoodzíʼígíí tʼáá aaníígóó ádíshní, áádóó ázhdííniidígíí bitsʼą́ą́dóó áhodooníiłgi éí tʼáá shí bá naashtłizh jiníi doo. (Num. 5:22) Kótʼéego diné binááł “amen” jidííniidgo bidziilgo bee ádee hadzoodzííʼ.—Neh. 5:13.

Deuteronomy wóltaʼ 27 góneʼ éí “amen” choozʼįįd. Ízrel dineʼé éí kéyah hóóʼ dooleeł dahodooʼniid yę́ę biih jookaidóó bikʼijįʼ éí dził Ííbal dóó dził Gérazim bitaʼgi áłah jidooleełgo bee hazʼáanii hachʼįʼ yídóoltah. Éí doo tʼóó deízhdóołtsʼįįł da, ndi éí bee hazʼáanii nídadiilyá dazhdidooniił. Éí bee hazʼáanii hachʼįʼ wóltaʼ, áádóó doo bikʼeh hóʼı̨́ı̨́góogo éí kótʼée dooleeł haʼníigi náoltahgo éí “tʼáá ákótʼée doo,” nídazhdiʼniih doo. (Deut. 27:​15-26) Tsʼídá tʼóó ahayóí hastóí, sáanii, dóó áłchíní áłah silı̨́įʼgo “tʼáá ákótʼée doo” daaníigo dadilwosh! (Josh. 8:​30-35) Kódazhdííniid yę́ę tʼáadoo baa dajiyooznah da. Ízrel diné éí tʼáá aaníígóó ádazhdííniid, kótʼéego bikʼi niiʼnil: “Ízrel dineʼé éí [Jiihóvah] yá nidaalʼaʼgo Jáshowa bíiníłką́, áádóó aląąjįʼ naazíinii bídeiníłkánígíí éí Jáshowa bilááh ánízáágóó dahináá nítʼééʼ áádóó [Jiihóvah] yaa naayáhígíí átʼéegi tʼáá ałtso bił béédahózin nítʼééʼ.”—Josh. 24:31.

Saad bee haʼoodzíiʼgo éí bikééʼdóó “amen” haʼníi łeh, éí tʼáá aaníígóó haʼníigo áháʼní. Ndi Jesus éí saad “amen” łah átʼéego  choyoosʼįįd. Éí saad (bilagáanakʼehjí “truly” wolyé) “tʼáá aaníígóó” níigo alą́ąjįʼ ninéíʼááh ńtʼééʼ. Éí “tʼáá aaníí, tʼáá aaníígóó ándishní,” níigo choyoosʼįįd. (Matt. 5:18; John 1:51) Áko kótʼéego yee haadzihgo éí dabíistsʼą́ʼígíí díí tʼáá aaníígóó ání danízin doo. Jesus kótʼéego yáłtiʼ, háálá éí God yee ádee hahasdzííʼ yę́ę bihozhdoolíiłgo hąąh niilyá.—2 Cor. 1:20; Rev. 3:14.

Ízrel dineʼé éí náádaʼiiłniihgo Jiihóvah yichʼįʼ sodadilzingo “tʼáá ákótʼée doo” daaníí ńtʼééʼ. (Neh. 8:6; Ps. 41:13) Sohodizįįh bikééʼdóó “tʼáá ákótʼée doo” jiníigo éí shí ałdóʼ tʼáá ákótʼéego sodiszin jiní. Tʼáá ájíłtso sodazdoolzin nahalin, áko éí bee Jiihóvah bichʼįʼ hodílzingi baa hózhǫ́. Naatʼáanii David éí Jiihóvah bitsitsʼaaʼ dílzinii Jerúsalemdi nidootʼááł nínę́ędą́ą́ʼ ákódzaa. Kótʼéego ádaʼjiilaadóó bikʼijįʼ David éí sin ayóó naʼiiłnáago bee sozdilzingo ájiilaa, éí 1 Chronicles 16:​8-36 góneʼ bikʼiniiʼnil. David kótʼéego sodoolzingo ákwii “diné tʼáá ałtso ádadííniid, Tʼáá ákótʼée leʼ, áádóó Bóhólníihii [Jiihóvah] yaa dahaznih.” Łáʼí bee dajílı̨́įgo Jiihóvah bichʼįʼ dahozdósingo baa hoł dahózhǫ́.

Ałkʼidą́ą́ʼ Oodlání yę́ę ałdóʼ “tʼáá ákótʼée doo” daaníigo yee Jiihóvah yaa dahaniih ńtʼééʼ. Diyin Bizaad yikʼedaʼashchínę́ę kótʼéego yiih nídayíizoh. (Rom. 1:25; 16:27; 1 Pet. 4:11) Revelation biiʼ éí yáʼąąshdi dahináanii ałdóʼ kódaaníigo Jiihóvah yaa dahaniih: “Tʼáá ákótʼée doo! Bóhólníihii baa dahohnii.” (Rev. 19:​1, 4) Ałkʼidą́ą́ʼ daʼoodlání yę́ę éí áłah náʼádleehgi sohodizįįhdóó bikʼijįʼ “tʼáá ákótʼée doo” daaníi łeh ńtʼééʼ. (1 Cor. 14:16) Ndi díí saad éí doo tʼóó bééjílniihgo bee ájíníi doo biniyé saad átʼée da.

Kʼad éí “amen” óolyéegi índa chooʼı̨́ı̨́ ńtʼéeʼgi nihił béédahoozin, sodizin “amen”  bee nínájíłtʼihgo ílíinii átʼé. Nihisodizin “amen” bee nínéiltʼihgo binahjįʼ tʼáá aaníí ádíshní diiʼníigo ádiiʼní. Áko “amen” diiʼníigo, éí azhą́ tʼáá nihiyiʼídi ndi, doodaiiʼ łaʼda nihá sodoolzingo, éí shí ałdóʼ tʼáá ákótʼé diiʼníi doo. Kodóó łaʼ nááná haʼátʼíí biniyé “amen” diiʼníigi ílı̨́įgo átʼéegi baa nídadíitʼįįł.

Jiihóvah bichʼįʼ hodíníilzingi bee ádaa ákoniidzin. Sohodizingo ałdóʼ Jiihóvah bee bichʼįʼ hodílzin, doo éí ádiiʼníigi tʼéiyá da, ndi íiʼníiłgi ałdóʼ bee hodíníilzin. Tʼáá aaníí ádíshníigo “amen” dideeshniił niidzingo hazhóʼó baa nitsíikeesgo sohodizingo hazhóʼó yísíníiltsʼą́ąʼ doo.

Łáʼí ídlı̨́įgo sohodizin. Ląʼí jiltʼéego sohodizingo éí tʼáá átʼé áłah nilínígíí tʼááłáʼígíí sodizin dajíistsʼą́ą́ʼ. (Acts 1:14; 12:5) Nihibrothers dóó nihisister bił “amen” dadiiʼníigo éí tʼáá yédígo łáʼí deidleeh. Azhą́ “amen” tʼáá nihiyiʼídi doodaiiʼ tʼáá yédígo ádiiʼníigo éí Jiihóvah bídeíníikeed yę́ęda nihá yeʼdoolííł.

Jiihóvah bee baa haʼniih. Azhą́ áłtsʼísí ndi bee Jiihóvah bichʼįʼ hodíníilzingo nihá yaa ákonízin. (Luke 21:​2, 3) Nihijéí biiʼdę́ę́ʼ baa nitsíikeesii yooʼı̨́. Azhą́ béésh bee haneʼí biiʼdóó íísíníiltsʼą́ąʼ ndi, áádóó “amen” diiʼníigo nihá yaa ákonízin. Éí áłah nilínígíí bił łáʼí niidlı̨́įgo Jiihóvah bee baa dahwiiʼniih.

“Amen” diiʼníigi doo ílı̨́į da shı̨́ı̨́ nahalin ndi, ílíinii átʼé. Bible encyclopedia łaʼ ání: Diyin bá ndaalʼaʼí éí “díí saad tʼááłáʼígíí chooʼı̨́įgo Diyin éí sodizin yididootsʼı̨́įłgo bee woodlą́, bidziilgo há bee lą́ hwiindzin, áádóó ajéí tłʼááhdę́ę́ʼ bee haʼoodzíiʼii átʼé.” Áko tʼáá “amen” nidiiʼníhí bikʼeh Jiihóvah yaa bił hózhǫ́ǫgo ííníilzin doo.—Ps. 19:14.