SHIZHÉʼÉ dóó shimá éí 1910go daatsʼí, Tbilisi, Georgia hoolyéédóó Canada hoolyéejįʼ niná. Eʼeʼaahjígo Canada hoolyéedi, Pelly, Saskatchewangi áłtsʼísígo dáʼákʼehgi hooghango biih haghan. 1928go shiʼdizhchı̨́, hastániiltʼé, shí akéédę́ę́ʼ naashá. Tʼah doo shiʼdichíígóó shizhéʼé ádin, áádóó shimá éí tʼah awééʼ nishłı̨́įgo ájídin. Tʼáadoo nááhodooʼnááʼí, shádí Lucy wolyé éí 17 honááhaigo ájídin. Áko shidáʼí Nick bił háíjééʼ bił nihaa áhojilyą́ą́ ńtʼééʼ.

Tʼah ánístsʼísígo, łı̨́ı̨́ʼ bitseeʼ sésiłgo dashijiiłtsą́. Tʼóó bikʼee hoł dahóóyééʼ, łı̨́ı̨́ʼ shidootał dazhnízingo nahjįʼ dajiníigo shineʼdę́ęʼgo chʼééh shichʼįʼ dazhdilwosh. Tʼáadoo disétsʼą́ąʼ da. Ndi tʼáadoo atíshiilaa da. Íídą́ą́ʼ shijaaʼ doo bee adiitsʼaʼ da lágo nihił béédahoozin.

Áko nihikʼis nilı̨́įgo ání, bijaaʼ doo yee daʼdiitsʼaʼii bá óltaʼgóó binih doogáałgo áadi ółtaʼ doo nihidííniid. Áko shidáʼí Nick éí Saskatoon, Saskatchewan óltaʼgi nishiníłtı̨́. Díí óltaʼígíí ayóó ánízáád, áko násdzid, dóó índída ashdlaʼ shinááhai. Holidays nídaʼadleehgo dóó shı̨́įgo tʼéiyá hooghangóó nináháshdááh. Álaʼ bee yátiʼ bíhoołʼą́ą́ʼ áádóó áłchíní bił nidaashnéego shił baa honeeni.

1939 yihahgo shádí Marion éí Bill Danylchuck yizyeh, áádóó shádí Frances dóó shí nihaa áhályą́ągo hahoolzhiizh. Éí bí nihighandóó tsʼídá áłtsé Jiihóvah Yá Dahalneʼé Diyin Bizaad yił yídahołʼaahgo yaa nídiitʼáázh. Shı̨́įgo óltaʼdę́ę́ʼ nináháshdáahgo, Diyin Bizaad biiʼdę́ę́ʼ bíhojiiłʼaahígíí bee nináshizhnítįįh. Yílá bee yátiʼ doo hoł bééhózin dago biniinaa ałchʼįʼ yádeiltiʼgi nihá ndanitłʼah. Azhą́ ákótʼée ndi Jiihóvah tʼáá íiyisíí baa íhwiideeshʼááł nisingi éí shá baa ákozhnízin. Nahojilneʼgóó hoł tádíshkááh, háálá bíhooshʼaahgo éí Diyin Bizaad ánínígíí bił nítʼiʼ. Áko baptize áshidiʼdoolnííł niizı̨́ı̨́ʼ. September 5, 1941 bijı̨́ Bill éí tó hahadleeh biiʼdę́ę́ʼ tó ayóó átʼéego sikʼazgo béésh ásaaʼ biih jiizką́ągo biiʼ góneʼ baptize áshijiilaa!

1946 shı̨́įgo óltaʼdę́ę́ʼ nánísdzáago Cleveland, Ohio hoolyéedi nitsaago áłah aleehgóó nisiikai. Tʼóó bee hahoolzhiizhgo baa yádaatiʼii hazhóʼó shił bééhózin doo biniyé shádí éí naaltsoos bikáaʼgi shá bikʼeʼjiłchı̨́ı̨́ ńtʼééʼ. Naaki jı̨́ aleeh góneʼ, ayóó baa shił hóozhǫǫd, ákwii éí bijaaʼ doo yee daʼdiitsʼaʼii bá ataʼ haneʼgo hólǫ́ǫ́ lá. Áko kʼad índída Diyin Bizaad yee naʼnitingi nizhónígo bikʼiʼdiishtįįh!

Éí ákweʼé nahalzhiishgo, naaki góneʼ dah ahijoogą́ą́ʼdóó bikʼijįʼ, diné éí nihikéyah bikééʼ nisiidzı̨́ dahwiinidzin. Nitsaago áłah azlı̨́ı̨́ʼdę́ę́ʼ nánísdzá, áádóó óltaʼgóó nánísdzá, Jiihóvah éí yéigo bikééʼ sézı̨́į doo nisin. Pledge of Allegiance wolyéhígíí, dah naatʼaʼí biyiin, dóó holidays bił nidaaztʼiʼii doo bee anishtah da sélı̨́ı̨́ʼ. Bił daʼííníshtaʼígíí churchgóó bił ałnánáshkah yę́ę ałdóʼ neʼ áshłaa. Bá daʼóltaʼí biniinaa doo bił dahózhǫ́ǫ da, ádee dahooldzíidgo dóó yoochʼííd yee chʼééh łah átʼéego tsínízdookos dashóʼní. Bił daʼííníshtaʼígíí díí yaa ákodaniizı̨́ı̨́ʼ, áko díí binahjįʼ shá ashjaʼiilaago Diyin Bizaad bee bił dahweeshneʼ. Łaʼ éí tʼáá aaníí bee nanintinii nídeidiilá, éí tʼahdii Jiihóvah yá ndaalʼaʼ. Éí kódaolyé, Larry Androsoff, Norman Dittrick, dóó Emil Schneider.

Níléí kin dahnaazhjaaʼgóó tádísháahgo, bijaaʼ doo yee daʼdiitsʼaʼii Diyin Bizaad bee bił dahashneʼ. Montreal hoolyéedi, bijaaʼ doo yee daʼdiitsʼaʼii ahínéekah léiʼgi níyá. Ákwii diné ániid naagháago ahindaʼhiilteehgo náánáʼnéłígíí ajítah, Eddie Tager, Diyin Bizaad bee bił hweeshneʼ. Kóhootʼéédą́ą́ʼ ájídinjįʼ Laval, Quebec hoolyéedi álaʼ bee yátiʼgo bee áłah náʼádleehgi níjídááh ńtʼééʼ. Juan Ardanez ałdóʼ bił ahééhosésįįd. Ałkʼidą́ą́ʼ Beríya dineʼé ádaatʼé yę́ęgi átʼéego, hó éí tʼáá daatsʼí aaníí Diyin Bizaad biiʼdóó bee nanintinii átʼé jinízingo ninájíłkah. (Acts 17:10, 11) Hó ałdóʼ Jiihóvah Yá Halneʼé jizlı̨́ı̨́ʼ, áádóó Ottawa, Ontario hoolyéedi hweʼiinaʼ ninítʼiʼjįʼ áłah náʼádleehgi elder jílı̨́ı̨́ ńtʼééʼ.

1950 yihahgo Vancouver hoolyéégóó niná. Azhą́ bijaaʼ doo yee daʼdiitsʼaʼii éí Diyin Bizaad bee bił dahashneʼgo ayóó bíneeshdlı̨́į ndi, asdzą́ą́ bijaaʼ tʼáá yee adiitsʼaʼ léiʼ, Chris Spicer wolyé, Diyin Bizaad bee bił hooshneʼ. The Watchtower dóó Awake! bá bíká aʼiishłaa, dóó bá hastiin Gary bił ahééhodíilzįįł nisin shidííniid. Áko bighandi baa níyá, áádóó naaltsoos bikááʼ ałchʼįʼ ádaʼiilʼı̨́įgo bee nízaadgóó ahił nidahosiilneʼ. Díí bikééʼdóó tʼáadoo nínáádaʼahiiltséhí ląʼí nááhai. Bikʼee désyiz, Toronto,  Ontariodi nitsaago áłah aleehgi ałʼdaa niikai. Éí bijı̨́ Gary baptize ábiʼdilnééh lá. Kótʼéego áhóótʼiidígíí binahjįʼ yééshiyííłniiʼ, nahaneʼgi doo díníiltłóoł da, háálá doo bééhózin da, háí shı̨́ı̨́ Diyin Bizaad bee bił hwiilneʼ yę́ęda Jiihóvah Yá Halneʼé dooleełgo átʼé.

Tʼahádóó Saskatoongóó nánishʼná. Ákwii asdzą́ą́ léiʼ bichʼéʼé naakií nilı̨́įgo doo bijaaʼ yee adiitsʼaʼ da, Jean dóó Joan Rothenberger wolyé, Diyin Bizaad shá bee nidiníítı̨́ı̨́ł shidííniid. Díí atʼééké éí ííłtaʼ yę́ędi ajółtaʼ lá. Tʼáá íídą́ą́ʼ, díí atʼééké éí Diyin Bizaad biiʼdę́ę́ʼ bíhojiiłʼaahígíí bił ajółtaʼígíí bee bił hojilneʼ. Áko ashdlayiltʼéego bił daʼjółtaʼígíí Jiihóvah Yá Dahalneʼé daazlı̨́ı̨́ʼ. Łaʼ éí Eunice Colin wolyé. Hó éí tʼahdii ákwii ííníshtaʼ yę́ędą́ą́ʼ hwééhosésįįd. Íídą́ą́ʼ ałkʼésdisí áłtsʼísígo łaʼ sheiníʼą́ áádóó tʼáásh áko shikʼis nilı̨́įgo, shizhdííniid. Tʼahádóó éí sheʼasdzą́ą́ jizlı̨́ı̨́ʼ!

Eunice éí Diyin Bizaad bíhojiiłʼaahgi hamá bił bééhoozingo óltaʼgi principal nílínígíí díí neʼ ánílééh bididííniił yiłní. Azhą́ díí principal ákójiidzaa dóó naaltsoos binahjįʼ baa íhojiiłʼaahígíí hatsʼą́ą́ʼ nahjįʼ kwíyiilaa ndi, Eunice éí yéigo Jiihóvah bikééʼ sézı̨́ nízin. Baptize áshidiʼdoolnííł jiniizı̨́įʼgo hazhéʼé dóó hamá ahałní, “Jiihóvah Yá Dahalneʼé sínílı̨́įʼgo éí hooghandóó chʼídíínééł!” Áko 17 honááhaigo chʼízhnínáago Jiihóvah Yá Halneʼé nilı̨́įgo bił yah ajííná. Diyin Bizaad bíhojiiłʼaahgo tʼáadoo neʼ ájiilaa da, áádóó baptize áhoʼdilyaa. 1960 yihahgo ahísiigehgo hazhéʼé dóó hamá tʼáadoo nihaa níʼáazh da. Ndi, náás hodeeshzhiizhgo, niheʼoodląʼ dóó nihaʼáłchíní yáʼátʼéehgo nilzéegi biniinaa yáʼátʼéehgo nihaa nitsíjíkees jizlı̨́ı̨́ʼ.

Azhéʼé dóó amá bijaaʼ doo yee adiitsʼaʼii niidlı̨́įgo áádóó 7 ashiiké bijaaʼ tʼáá yee daʼdiitsʼaʼgo jiniséego nanitłʼah. Ákótʼée ndi, álaʼ bee yátiʼ bídahwiizhdoołʼááł niidzin, áko bee ałchʼįʼ yádeiltiʼ doo, índa tʼáá aaníinii bee ndahodíníitı̨́ı̨́ł. Nihibrothers dóó nihisisters bił áłah néiidleehígíí ayóó átʼéego nihíká ííjééʼ. Łah éí naaltsoos léiʼ nihaiyíltsooz, áníigo éí Kingdom Hall góneʼ niheʼawééʼ łaʼ saad tʼóó baaʼihii yee yáłtiʼ. Díí tʼáá ákǫ́ǫ́ tsı̨́įłgo hashtʼeelyaa. Dı̨́įʼgo shiyeʼ, James, Jerry, Nicholas, dóó Steven elders danilı̨́ dóó dabighandóó yił Jiihóvah yá ndaalʼaʼ. Nicholas éí beʼasdzą́ą́ Deborah yił Britain branchdi álaʼ bee yátiʼ bee ataʼ nahaneʼ biʼoonishgi áká anáhiʼnilchééh. Steven éí beʼasdzą́ą́ Shannan yił United States branchdi álaʼ bee yátiʼ bee ataʼ nahaneʼ biʼoonishgi ajítah.

Baa yínííł, ahísiilkéegi tʼáá łáʼí nídidooził hadziihgo 40 nídoohahgo, Eunice éí cancer bitsʼą́ą́dóó ájídin. Bikʼee hachʼįʼ nahwiiʼnáago, nááʼdiijeeh joodlą́ągo binahjįʼ bee hadziilgo ahoolzhiizh. Náhwiideestséełgo bíká dinishʼı̨́ı̨́ʼ.

February 2012 yihahgo shikʼaiʼ kʼínítʼı̨́. Tʼáá sáhígo doo bííníshghah da  niizı̨́įʼgo, shiyeʼ dóó beʼasdzą́ą́ łaʼ bił yah ííná. Kʼad álaʼ bee yátiʼgo áłah náʼádleeh Calgary hoolyéegi atah yah anéijah, ákwii elder nishłı̨́. Díí tsʼídá índída álaʼ bee yátiʼgo áłah náʼádleehgi anishtah! Bilagáana bizaad bee áłah náʼádleehgi náshdáahgo hoolzhiizh, áko haitʼéego éí Jiihóvah bił kʼéʼahidishníigi bidziilgo íínísin ńtʼééʼ? Jiihóvah shíká eelwod. Ádee haadziihgo éí áłchíní bizhéʼé ádaadinii bíká anáshwoʼ doo nínę́ę yeʼiilaa. (Psalm 10:14) Naaltsoos bikááʼ shá akʼedaʼjiłchíigo, álaʼ bee yátiʼ bídahojiiłʼaahgo, dóó tʼáá bídazhneelʼánígi shá ataʼ dahojilneʼgo hoolzhiizh, díí tʼáá ájítʼé hachʼįʼ baa ahééh nisin.

Haʼátʼíí shı̨́ı̨́ dahaʼníigo łahda doo bikʼiʼdiishtįįh da, doodaiiʼ bijaaʼ doo yee daʼdiitsʼaʼii bíká aʼdoowołgi doo hoł béédahózin da nisin łeh niʼ. Kótʼéego tsídískosgo éí tʼóó bikʼidideeshááł néiniisdzįįh, ndi Peter, Jesus íidííniid yę́ę baa nitsískees łeh: “Bóhólníihii, háísh ałdóʼ bichʼįʼ dah náádidiikah? Ni tʼéí saad binahjįʼ iiná doo ninítʼiʼii hodooleełii nee hólǫ́.” ( John 6:​66-68) Nihibrothers dóó nihisisters bijaaʼ doo yee daʼdiitsʼaʼii tʼáá níléédę́ę́ʼ Jiihóvah yikééʼ naazı̨́įgo bił dahwéelzhishígíí ádaatʼéhígi átʼéego, haʼahóní bóhoołʼą́ą́ʼ. Jiihóvah dóó bidineʼé łáʼí dah yiikahígíí baʼííníshłíigo bíhoołʼą́ą́ʼ, áko ayóó átʼéego shíká eelwod. Kʼad éí tʼáá shí shizaad, álaʼ bee yátiʼ, Jiihóvah binaʼnitin ląʼí bee ádaalyaago dahólǫ́. Áádóó ayóó baa shił hózhǫ́, álaʼ bee yátiʼ chooʼı̨́įgo bee áłah náʼádleehgóó ałnánáshdááh. Jiihóvah, nihiDiyin ayóó átʼéii, bá naashʼaʼgo hoolzhiizhgi baa hózhǫ́ǫgo iiná yáʼátʼéehii sheílyá.