DANIEL DÓÓ MIRIAM éí September 2000 yę́ędą́ą́ʼ naaltsoos bikʼehgo ałhéʼáskéh bá hadilyaa dóó Barcelona, Spaindi beʼiinaʼ nizhónígo kééhatʼı̨́. Daniel ání: “Nihinaanish binahjįʼ restaurants daʼílínígi íídą́ą́ʼ, náánáłahgo kéyah chʼaaneiitʼaash, dóó ééʼ daʼílínígíí nahiilniih ńtʼééʼ. Nahwiilneʼgóó tʼáá áłahjįʼ atah niidlı̨́ ńtʼééʼ.” Ákondi beʼiinaʼ łahgo átʼéego ádzaa.

2006 tágí jı̨́ áłah náʼádleehgi, Daniel łaʼ haneʼ jidiiztsʼą́ą́ʼ: “Tʼáá ániitʼéiish wołíbee diné ‘kʼadę́ę nidabidiʼtseedii’ bíká anídeijahgo iiná doo ninítʼiʼii yíká nidahakááh.” (Proverbs 24:11) Díí baa hóóneʼígíí éí Diyin Bizaad biiʼ baa haneʼígíí bee náhodiinihgo binahjįʼ diné dahiináa doo. (Acts 20:​26, 27) Daniel yaa ákoniizı̨́ı̨́ʼ, “Jiihóvah éí shichʼįʼ yáłtiʼ lá.” Baa hóóneʼígíí ałdóʼ ání Jiihóvah áłtségo bá neiilʼaʼgo nihił hózhǫ́ǫ dooleeł. Miriam ayóó bił hózhǫ́ǫgo alą́ąjįʼ nahalneʼii jílı̨́įgo biniinaa Daniel díí tʼáá aaníí ákótʼée lá hoł bééhoozįįd.

Díí baa hóóneʼígíí Daniel nabidiisnáaʼgo hweʼiinaʼ łahgóó átʼéego baa tsízdeezkééz. Honaanish áłchʼı̨́dígo ájiilaago alą́ąjįʼ nahalneʼígíí jizlı̨́ı̨́ʼ, áádóó bí dóó Miriam kéyah nááná háadida nahaneʼ bídį hóyéeʼgi haitʼéego hoł hózhǫ́ǫ dooleełgo yaa ákoniizı̨́ı̨́ʼ.

May 2007 yę́ędą́ą́ʼ, Daniel dóó Miriam hanaanish bitsʼá níʼáázh dóó Panamagóó ajííná. Ląʼígo táyiʼdę́ę́ʼ kéyah hadaasʼáagi Bocas del Toro Archipelago, Caribbean Seadi éí nídahalnihgóó bee hadilyaa. Áadi kéédahatʼínígíí éí Ngabe dineʼé danilı̨́. Daniel dóó Miriam éí Panamadi tseebíí nídeezidjįʼ nijiʼaashgo béeso bá hashtʼeʼ nijiiznil yę́ę bíighah daatsʼí daniizı̨́ı̨́ʼ.

Tsinaaʼeeł dóó dziʼizí bee kéyahgóó tázhdíʼaash. Áłtséhídi dziʼizí hoł deeswod yę́ędą́ą́ʼ éí ayóó deesdoigo 20 miles dah daaskʼid bitahgóó tázhdííʼáázh, tʼahdii bééjílniih. Daniel tʼáá íiyisíí chʼééh déyáago kʼasdą́ą́ʼ naaʼajíígoʼ. Ngabe bizaad łaʼ bee yájíłtiʼgo binahjįʼ dahooghan hazʼánígíí ayóó baa ádahwiinítʼı̨́. Áko tʼáádóó hodinaʼí, 23 Diyin Bizaad yídahoołʼaahígíí bee hazlı̨́ı̨́ʼ.

Habéeso ásdįįdgo bikéédóó haa hoodzaa? Daniel ání: “Nihinákʼeeshtoʼ háálı̨́įgo, Spain nídiitʼáazhgo baa nitsíikees. NihiDiyin Bizaad yíhoołʼaahígíí bitsʼą́ą́ʼ dah diitʼáazhgo baa nihíniʼ.” Ndi łaʼ nídeezidgo, haneʼ nizhónígíí yidiiztsʼą́ą́ʼ. Miriam ání: “Special pioneers doołeeł, nihiʼdiʼníigo nihíʼdéekeed. Dooládóʼ nihił hózhǫ́ǫgo tʼáá kǫ́ǫ́ ninááhwiilneʼ doo!”

Organization biiʼdóó łah ánáánátʼéego áhoodzaago, biniinaa 2015 yihahgo Daniel dóó Miriam special pioneers ábiʼdiilyaa yę́ę ninítʼiʼ. Ákoshąʼ kʼad haa jidoonííł? Psalm 37:5 yee ádee haadzííʼ yę́ę yaa joosdliʼ: “Díníyáágóó Bóhólníihii baa diníʼaah, áádóó ałdóʼ baa dzíínílí, áko tʼáadoo leʼé ná yiʼoolíił doo.” Naanish bikʼízhnítą́ą́ʼ, áko éí bee regular pioneer há bohónéedzą́ sílı̨́ı̨́ʼ, dóó kʼad áłah náʼádleeh Veraguas, Panamadi atah jílı̨́.

Daniel ání: “Tʼahádóó Spaindę́ę́ʼ dah diitʼáazhgo, niheʼiinaʼ daʼníłtłʼaii tʼáágéedgo daatsʼí hiniiʼnáago ńtʼééʼ. Dííshjı̨́įdi éí nihił bééhoozingo tʼáadoo bídin niidlíní da.” Haʼátʼíísh bee bił aláahgo dahóózhǫǫd? Éí ádaaní: “Diné aʼohgo ádaa nitsídaakeesígíí Jiihóvah yídahołʼą́ąʼgo éí aláahgo ił hózhǫ́, doo łaʼ bináłtʼéhí da!”