KIN dahshijaaʼgi bił kééhwiitʼíinii ląʼígo bízhiʼ bééhojísin łeh, áádę́ę́ʼ ałdóʼ hwéédahósin łeh. Tʼah ííníshtaʼgo doo łah áhánéeh da. Óltaʼ tʼáá bił ałhąąh bił hadaʼjiiłtááh yę́ę tʼáá éí bił nidaʼjiiłtááh.

Liberty binaagóó dáʼákʼeh ádaałtsʼíísígo naaznil, éí naadą́ą́ʼ íiyisíí kʼéédadilyéh. Shiʼdizhchı̨́įgo shizhéʼé éí ákweʼé kʼééʼdídléehii łaʼ bá nijilnish. Teenager nishłı̨́įgo chidí naaʼnaʼí áádóó dáʼákʼeh binaʼanishgi bóhoołʼą́ą́ʼ.

Shiʼdizhchı̨́įgo shizhéʼé éí doo ániid naagháa da, éí 56 binááhai, shimá éí 35 binááhaigo shishchı̨́. Ákótʼée ndi shizhéʼé éí ayóó ábóodziil dóó ayóó biinéí ńtʼééʼ. Yéigo naʼanish bił ayóó átʼéé ńtʼééʼ, áádóó baʼáłchíní tʼáá ákódaatʼée dooleełgo yee neineeztą́ą́ʼ. Doo ayóó béeso ííłʼı̨́į da ńtʼééʼ, ndi hooghan nihá yisʼą́, nihiʼééʼ dahólǫ́, dóó chʼiyáán doodı̨́įłii dahólǫ́. Áádóó tʼáá áłahájįʼ nihá jizdáá ńtʼééʼ. Shizhéʼé éí 93 binááhaigo nihitsʼą́ą́ʼ ádin. Shimá éí 86 binááhaigo ádin. Tʼáá áłah éí tʼáadoo Jiihóvah yá naasʼaʼ da. Ndi 1972dóó wóshdę́ę́ʼ shitsilí łaʼ elder baʼahódlíii nilı̨́.

Shimá éí ayóó churchgóó naagháá ńtʼééʼ. Tʼáá damóo náʼoodleeł Baptist churchgóó  áłnáánihijiʼish. 12 shinááhaigo Trinity bínaʼniltin tʼóó áłtsé baa hodisétsʼą́ą́ʼ. Áko shimá ábidishní: “Haash yitʼéego Jesus éí tʼáá łahjįʼ Ayeʼ dóó Azhéʼé jílı̨́?” Ánáshidooʼniid yę́ęgi ayóó bénashniih: “Shiyáázh, éí doo bééhózin da. Doo bikʼidiʼdootı̨́įłii átʼé.” Áko tʼáá aaníí doo bikʼiʼdiishtįįh da. Ákótʼée ndi, 14 shinááhaigo tó nílı̨́ı̨́ léiʼ biiʼ baptize áshiʼdiilyaa. Táaʼdi tó biyiʼ góyaa bééshiʼdeeltı̨́, éí łaʼ Azhéʼé bá, łaʼ éí Ayeʼ bá, áádóó łaʼ éí níłchʼi diyinii bá!

High school yíníshtaʼgo shikʼis łaʼ naʼahízníltsʼinjí yee atah nilı̨́, áko bínítááh shidííniid. Áko bíhooshʼaahgo baa nídiisdzáago Golden Gloves wolyéego bidiiyá. Doo bee nishłı̨́į da, tʼáá díkwíhídi łaʼ bił áheeshgą́ą́ʼ áádóó tʼóó bitsʼá níyá. Tʼahádóó éí siláotahdę́ę́ʼ shiʼdéékeed, éí Germany hoolyéégóó ashiʼdoolʼaʼ. Áadi naasháago bá naashʼaʼí éí siláołtsooí bá óltaʼgóó ashííłʼaʼ, éí yáʼátʼéehgo naʼaʼeeshii dííleełgo átʼé shidóʼníigo biniinaa. Siláołtsooí jílı̨́į doo dashóʼníí ńtʼééʼ. Ndi doo tʼáá siláołtsooí nishłı̨́į da doo nisin, áko naaki nááhaijįʼ bíighah áshłaago 1956 yę́ędą́ą́ʼ bitsʼá níyá. Díí bikéédóó tʼáadoo hodíínaʼí łah átʼéé léiʼ siláo bitah níyá.

Tʼáá aaníinii bínaʼniltin tʼah doo bíhooshʼaah yę́ędą́ą́ʼ éí íiyisíí diné ídlı̨́įgi doo ákótʼéégóó baa nitséskees ńtʼééʼ. Éí ndaalkidígíí dóó shinaagóó diné ádaatʼéegi biniinaa ákwíínisin ńtʼééʼ. Hastóí éí Diyin Bizaad baa nidahojilneʼgo doo tʼáá aaníí diné dajílı̨́į da nisin ńtʼééʼ. Ndi łahgóó baa íhooshʼaahgo doo kótʼéego nitséskees da sélı̨́ı̨́ʼ. Kintah góyaa shichidí łichííʼ ayóó ánoolin léiʼ shił yilwoł, ńtʼééʼ sáanii ániid naaʼaash léiʼ hágo níigo shichʼįʼ dah nidilnííh. Éí shádí bá hastiin bideezhí átʼı̨́, tʼáá áłah éí Jiihóvah Yá Halneʼé nilı̨́. Díí éí łah Watchtower dóó Awake! binaaltsoos sheinínil, ndi The Watchtower éí bikʼidiʼdootı̨́įłgi tʼáá nantłʼa. Kʼadígíí éí Congregation Book Studydi nihaa díínááł shiłní. Díí éí bighangi áłtsʼísígo áłah náʼádleehgo Diyin Bizaad baa íhooʼaah. Éidí áłtsé, baa nitsídeeskos bidííniid. Tʼóó shichʼįʼ chʼídeeldloʼgo áshíłní, “Daʼ tʼáá aaníí ádíní?” Áádóó ádííniid, “Aooʼ, tʼáá aaníí ádíshní.”

Haʼátʼíí lá biniyé aooʼ dííniid lá nisin, ndi tʼáá íídą́ą́ʼ bee ádee haasdzííʼ. Áko éí bitłʼééʼ áłah aleehgóó niséyá. Dooládóʼ shı̨́ı̨́ áłchíní éí Diyin Bizaad ayóó átʼéego bił béédahózin! Azhą́ shı̨́ı̨́ tʼáá damóo náʼoodleeł bikʼeh shimá éí churchgóó ałnáánihiʼish ńtʼééʼ ndi Diyin Bizaad doo ayóó shił bééhózin da. Áko kʼad éí Diyin Bizaad hazhóʼó bee nidashinohtin dííniid. Tsʼídá áłtsé bóhoołʼą́ʼígíí éí Diyin Ayóo Átʼéii bízhiʼ éí Jiihóvah lá. Díkwíí nááhai yę́ędą́ą́ʼ shı̨́ı̨́ shimá éí Jiihóvah Yá Dahalneʼé bee bínábidééłkid, ńtʼééʼ ání, “Éí yeeʼ hastiin sání léiʼ Jiihóvah wolyéego yichʼįʼ nidahałá.” Áko kʼad shinááʼ aa ádzaa nahalin!

Tʼáá tsı̨́łígo iisisdląąd, háálá tʼáá aaníinii bínaʼniltin bikʼi níyá nisin. March 1957, tʼóó áłtsé áłah aleehgi níyáhą́ą́dóó náhástʼéí nídeezidgo baptize áshiʼdiilyaa. Hazhóʼó nitséskees sélı̨́ı̨́ʼ. Íiyisíí diné ídlı̨́įgi óolyéhígíí Diyin Bizaad yee nanitingi bíhoołʼą́ąʼgi baa shił hózhǫ́. Jesus éí diné doo niʼiisíihii nilı̨́ı̨́ ńtʼééʼ. Bí éí adziilii ayóó átʼéii bee hólǫ́ǫ́ ńtʼééʼ, diné doo łaʼ hwénałtʼée da. Tʼáadoo ndi łaʼda bikʼijiilwod da. Ndi, tʼáá áhoʼdooʼniid yę́ęgi átʼéego “achʼįʼ nahwiiʼná ádaazhdeetʼą́.” (Isaiah  53:2, 7, New World Translation) Bóhoołʼą́ąʼgo éí Jesus yikééʼ yigáałii éí “diné tʼáá ałtso bichʼįʼ há áhwiinítʼı̨́ʼí doo.”​—2 Timothy 2:24.

1958 yihahgo pioneer éʼéshʼı̨́įgo hahoolzhiizh. Ndi tʼáadoo hodíínaʼí neʼ áshłaa. Haʼátʼíí biniyé? Éí Gloria deeshxeh niizı̨́ı̨́ʼ, éí sáanii nidiltʼéego áłah aleehgóó nihaa díínááł shidííniid yę́ę łaʼ átʼı̨́! Tʼáá ákónéehee éí séyeh lá nisin. Gloria éí íídą́ą́ʼ asdzání ílíinii jílı̨́, áádóó kʼad tʼahdii asdzání ílíinii jílı̨́. Nitłʼiz ałtaasʼéí daʼílíinii biláahgo ílíinii jílı̨́, áádóó ayóó baa shił hózhǫ́ hoséyeh! Kʼad éí bí ádaa halneʼ doo:

“Shí éí 16 bił haijééʼ. Shimá éí Jiihóvah Yá Halneʼé nilı̨́ı̨́ ńtʼééʼ. 14 shinááhaigo ájídin. Áádóó éí bikéédóó shizhéʼé Diyin Bizaad yíhoołʼaahgo yaa nídiidzá. Nihimá ádingo biniinaa shizhéʼé éí óltaʼdi principal nilínígíí yił kótʼéego ííníiltaʼ doogo nihá áyiilaa. Shádí niʼdołtahjįʼ tʼááłaʼí nááhai háłdziih, áko shádí bił ałnááhiitʼashgo ííníiltaʼ doogo nihá yíyííkeed. Áko łaʼ éí tʼáá hooghandi siidáago bił haijééʼ tʼah ádaałtsʼísígíí baa áhojilyą́ą doo. Áádóó ałdóʼ shizhéʼé naalnishdę́ę́ʼ nináhádáahgo tʼáá áníiltso chʼiyáán bá hashtʼedítʼée doo. Óltaʼdi principal yee lą́ asłı̨́ı̨́ʼ, áádóó tʼáá kótʼéego ádaʼiilʼı̨́įgo shádí niʼniłtaʼ. Jiihóvah Yá Halneʼé łaʼ Diyin Bizaad yee nihídahoołʼą́ą́ʼ, éí 11 niiltʼéego Jiihóvah Yá Halneʼé dasiidlı̨́ı̨́ʼ. Azhą́ ayóó yánísin ndi hootahgóó nahaneʼ ayóó bineshdlı̨́ı̨́ ńtʼééʼ. Shichʼooní Sam, níléédę́ę́ʼ díí yee shíká eelwod.”

February 1959 Gloria dóó shí ahisiigeh. Pioneer íʼiilʼı̨́įgo ayóó bíniidlı̨́ı̨́ ńtʼééʼ. World headquartersdi nidíílnish niidzin, áko July 1959 biniyé haʼdiilyaa. Brother Simon Kraker interview ánihiilaa. Ńtʼééʼ éí ahindaaskehígíí kʼad doo bá ahóótʼiʼ da nihidííniid. Tʼáá íiyisíí Bétheldi nidíílnish niidzin, ndi ląʼí nááhaigo índída áadi niitʼáázh.

Nidahalneʼii bídin hóyééʼgóó nihidółʼá diiʼníigo world headquarters bichʼįʼ íʼiilyaa. Tʼááłáhígo nihichʼįʼ chʼídeezʼą́: Pine Bluff, Arkansas. Íídą́ą́ʼ Pine Bluffdi naakigo Oodlání áłah nádleeh. Łaʼ bilagáana nidahalneʼé dóó łaʼ naakaii łizhinii nidahalneʼé áłah nádleeh. Naakaii łizhinii áłah nádleehígíí bichʼįʼ nihiʼdoolʼaad, éí tʼáá 14 nidahalneʼé dah yíká.

Jiihóvah Yá Dahalneʼé haʼátʼíí biniyé naakaii łizhinii dóó bilagáana nidahalneʼé áłʼąą yá anájah ńtʼééʼ shı̨́ı̨́ nínízin. Íídą́ą́ʼ áhootʼéhígíí biniinaa tʼáadoo óolneʼé da. Bikágí áłʼąą ádaatʼéii doo ałhił naaldeeh dago bee hazʼą́ą́ ńtʼééʼ, dóó tʼáá íiyisíí diné atíʼdaʼahilʼı̨́įgo hazʼą́. Ląʼí nahazʼą́ą́góó nihibrothers bikágí ałʼąą ádaatʼéii tʼááłáhígi dahozdísingo yá anájahgo biniinaa haKingdom Hall hatsʼą́ą́ʼ atídoolníiłgi béédadzildzid ńtʼééʼ. Kódahóótʼįįdgo átʼé. Jiihóvah Yá Halneʼé naakaii łizhinii nilı̨́įgo bilagáana kééhatʼı̨́ı̨́góó nahalneʼgo biniinaa awáalyaa bąą ílı̨́ dóó biniinaa yéigo atíbiʼdiilʼįįh. Áko nidahwiilneʼgo bee hazʼáanii bikʼehgóó ádaniitʼé, doo kóhootʼée da doo laanaa hwiindzin.

Nidahwiilneʼgóó tʼáá nantłʼa ńtʼééʼ. Naakaii łizhinii bitahgóó nidahwiilneʼgo łahda tʼáadoo baa ákoniizįįhí bilagáana bidáádilkał naazhníłtsʼįįh. Tʼáá akǫ́ǫ́ tsı̨́įłgo tsízdíkos: Tʼóósh tsı̨́įłgo Diyin Bizaad łaʼ bił chʼízhdooʼááł doodaiiʼ tʼóósh apologize ázhdoolíiłgo łahjįʼgo dah náázhdidoodááł? Íídą́ą́ʼ nidahwiilneʼgo kótʼéé ńtʼééʼ.

Pioneer áʼjíłʼı̨́į ndi, béeso bikʼeh nijilnishgo bee iináa doo. Tʼááłaʼajı̨́ tááʼ béeso bikʼeh naʼanish. Gloria éí hooghan hashtʼéhálʼı̨́ı̨́jí honaanish ńtʼééʼ. Łaʼ hooghangi ninájílnishgi háká anáshwoʼ, áko éí tʼáá tsı̨́łígo hashtʼééhwiilʼįįh. Bá neiilnishígíí nihaʼnaʼaltsoʼ. Éí tʼah doo dah nídiitʼaashgóó TV dinner deiłnínígíí ałtsʼániʼdiiʼniłgo néídı̨́ı̨́h. Tʼáá damóo náʼádleeh bikʼeh Gloria éí łahgo hooghangi ééʼ yá kʼééʼnineiłdǫh. Shí éí tłʼóoʼdi naniseʼ binaashnish, tsésǫʼ tánásgiz, dóó hooghan binaagóó haʼátʼíí shı̨́ı̨́ bindoonishii binináshnish. Bilagáana łaʼ bighangi tsésǫʼ bá tánínéiigis. Gloria éí wóneʼdę́ę́ʼ tánínéígis, shí éí tłʼóóʼdę́ę́ʼ. Díí tááʼágisgo łaʼ ajı̨́ bíighah, áko nihanaʼaltsoʼ. Gloria éí tʼáá sahdii wóneʼí náʼádı̨́ı̨́h. Shí éí tʼáá tłʼóoʼdi chidí bighan góneʼ náʼáshdı̨́ı̨́h, ndi tʼáá áko nisin. Ayóó łikango náʼáshdı̨́ı̨́h. Díí bá neiilnishígíí ayóó bá ádahwiinítʼı̨́, ndi diné hanaagóó ádaatʼéiigi hó ałdóʼ ákódajítʼé. Łaʼ bénashniih, chidí bitooʼ iih náhákáahgi nihił ílwod. Ałtso atooʼ biih néíką́ągo  ákwii bilagáana naalnishígíí yá andaʼaldahí Gloria choyoołʼı̨́ı̨́góósh tʼáá áko bidííniid. Ńtʼééʼ báháchįʼgo ání, “Dáʼdeelkaal.”

Ákóhootʼée ndi nizhónígo nihibrothers bił dahoniidlǫ́, áádóó nidahwiilneʼgi ayóóʼádeíníiʼní! Pine Bluffdi tʼóó niitʼaazhígo éí brother łaʼ congregation servant nilı̨́įgo bił danihighan. Bichʼooní éí doo Jiihóvah Yá Halneʼé nilı̨́į da, áko Gloria éí Diyin Bizaad yee yíhoołʼaahgo yaa nídiidzá. Áádóó shí éí atsiʼ nilínígíí dóó bichʼooní bił nídíníitą́ą́ʼ. Éí amá dóó achʼéʼé nilínígíí Jiihóvah bá neilʼaʼ doo niizı̨́įʼgo baptize ályaa.

Bilagáana nihibrothers łaʼ ayóó danihikʼis. Bighandi baa neitʼaashgo bił nídaʼiidı̨́ı̨́h, ndi doo łaʼda danihiidoołtséeł da biniyé tłʼéeʼgo bighangóó yiitʼash. Ku Klux Klan (KKK) daolyéego dah yikah, éí náánáłahdę́ę́ʼ dineʼé deijoołá dóó atéʼélʼı̨́ yee naazı̨́. Łah Halloween bitłʼééʼ hastiin léiʼ bighan bichʼéédą́ąʼgi łigaigo hadítʼé dóó bitsiiʼjįʼ bikʼideʼą́ągo dah sidá, éí KKK ákódaatʼı̨́. Doo yáʼátʼééhgóó baa ooldah ndi, nihibrothers éí bá ádahwiinítʼı̨́. Łah shı̨́įgo conventiongóó diitʼashgi nihibéeso bá ádin. Áko béeso bíighah dooleeł biniyé nihibrother łaʼ éí nihichidí 1950 Ford nihaa nayiisniiʼ. Áádóó nídeezidóó bikʼijįʼ hadoh biyiʼ hootahgóó nahwiilneʼ dóó Diyin Bizaad bee naniitingo baa chʼééh deetʼáázh. Hooghandi nániitʼáazhgo tsídeelyiz. Nihichidí yę́ę nihighan bichʼéédą́ą́ʼgóó sizı̨́! Tsésǫʼ bąą naaltsoos léiʼ dah siłtsooz, éí ání: “Nichidí naanánishtʼaah. Nikʼis.”

Náánáłaʼ aa ajoobaʼ yéigo shidiisnááʼ. 1962 yihahgo Kingdom Ministry School South Lansing, New Yorkdi baa íídííłtah shiʼdooʼniid. Díí éí tʼááłaʼí nídeezidjįʼ áłah náʼádleehgi circuits, dóó districts akʼidadéezʼı̨́įʼii daʼółtaʼ. Íídą́ą́ʼ doo naashnish da, nihibéeso áłchʼídí. Ndi Pine Bluffgi béésh bee haneʼí deíłyeedígíí naanish łaʼ biniyé interview ádashiilaa. Bá déshnishgo éí shí tsʼídá áłtsé naakaii łizhinii nishłı̨́įgo bá deeshnish. Ńtʼééʼ nihá dilnish dashidííniid. Áko haa deeshnííł? New Yorkgóó deesháałgi shibéeso ádin. Tʼáá íiyisíí baa tsídékéezgo éí naanish nidideeshłeełgo íídííłtah shiʼdooʼniid yę́ę tʼóó nahjįʼ kódeeshłííł niizı̨́ı̨́ʼ. Béthelgóó naaltsoos ádeeshłiił niizı̨́ı̨́ʼ ńtʼééʼ, ndi doo baa yooshnééh léiʼgi áhoodzaa.

Éí nihisister łaʼ bił yá anéijah, éí bichʼooní doo Jiihóvah Yá Halneʼé nilı̨́į da. Éí tʼah abíínígo dáádílkał néineestsʼingo naaltsoos léiʼ sheiníłtsooz. Ńtʼééʼ béeso biiʼ sinil lá. Éí baʼáłchíní łaʼ yił tʼah abíínígo náádiijahgo nidikʼąʼ bidáʼákʼehgóó chʼil nichxǫ́ʼí nideiʼnish lá. Díí éí béeso bíighah ádoolníiłgo New Yorkgóó deeshááł biniyé kodáátʼįįd lá. Éí kóshiłní: “Óltaʼgóó dínáahgo yéigo íhoołʼaah, áádóó áádę́ę́ʼ nídíídáałgo nánihidíníitı̨́ı̨́ł!” Tʼahádóó béésh bee haneʼí deíłyeedígíí bichʼįʼ hooshneʼ, éí 5di damóo azlı̨́įʼgo índída nihá deeshnish bidííniid. “Dooda!” dah shidííniid. Ndi tʼáá áko nisin.  Tʼáá íídą́ą́ʼ óltaʼgóó déyá nisin. Baa shił hózhǫ́ éí naanish tʼáadoo nídiiláa da!

Pine Bluffdi nihighan yę́ędą́ą́ʼ Gloria yénálniihgi yee nihił halneʼ: “Kweʼé nahwiilneʼgo shił ayóó átʼé! 15dóó 20jįʼ ánéelą́ą́ʼ diné éí Diyin Bizaad bee nidanishtin ńtʼééʼ. Éí abínígo hootahgóó nahwiilneʼ łeh, áádóó bikʼijįʼ Diyin Bizaad bee naniitin łeh, éí łahda 11:00góó anéíłkááh. Díí ayóó bóhoneedlı̨́! Tʼáá ákwii shighango shił yáʼátʼéeh doo ńtʼééʼ. Tʼáá aaníí ádíshníigo éí łaʼ átʼéhígíí binaʼanish dóó circuit binaʼanish dooleełgi doo hózhǫ́ íinisin da, ndi Jiihóvah éí łaʼ átʼéego nihá nitsékees.” Aooʼ tʼáá aaníí.

Pine Bluffdi pioneer íʼiilʼı̨́įgo special pioneers biniyé haʼdiilyaa. Tʼáá íiyisíí éí nánihidiʼdooʼnił niidzin. Haʼátʼíí biniyé ákwíiniidzin? Jó éí district overseer nihá nilínígíí Texasdi special pioneer niidlı̨́įgo łaʼ áłah nádleehígíí bíká áhidiʼníilchééł nihóʼní. Díí nihił yáʼíítʼééh. Áádóó nihichʼįʼ ánáʼálʼįįhjįʼígíí biiʼ ádin, chʼééh bibaʼgo nihił náhodoonih chʼééh niidzin. Ńtʼééʼ naaltsoos łaʼ nihaa nálwod. Éí atah nídadikahgo akʼidadéezʼı̨́įʼii biʼoonishgi nihaa deetʼą́. Díí éí January 1965 yę́ędą́ą́ʼ. Brother Leon Weaver éí circuit overseer ałdóʼ ábiʼdiilyaa, éí United States Branch Committee kʼad yá coordinator nilı̨́.

Circuit overseer áshiʼdiilyaagi bikʼee shił yeeʼ. Tʼááłaʼí nááhaidóó bikʼijįʼ yę́ędą́ą́ʼ district overseer nilı̨́įgo James A. Thompson, Jr. bíneeshʼánígi yinééłʼı̨́ı̨́ʼ. Bá áhwiinítʼı̨́ʼígo éí circuit overseer áʼdoodleełgi hazhóʼó binanilnishgo yee níká adoolwoł, shidííniid. Díí circuit biʼoonishgi tʼóó bidéshnishígo díí koshiʼdooʼniid yę́ę tʼáá ákónéehee lá niizı̨́ı̨́ʼ. Circuit overseer áshiʼdiilyaadóó éí Brother Thompson áłtsé district overseer nilı̨́įgo bił déshnish. Éí ayóó átʼéego bitsʼą́ą́dóó íhoołʼą́ą́ʼ.

Íídą́ą́ʼ circuit overseers doo yéigo nidabidiʼnitin da. Overseer łaʼ áłah náʼádleehgi binaanish ííléehgo háísid, áádóó shí áłah náʼádleehgi shinaanish áshłéehgo hánááshiisid. Éí kótʼéego shiłníigo shichʼįʼ haadzííʼ. Ndi éí bikéédóó éí tʼáá sáhí. Bénáshniihgo Gloria ábidishní, “Kʼadísh nihitsʼą́ą́ʼ dah nizhdiidaah?” Ndi tʼahádóó łaʼgo bee ádaa ákoniizı̨́ı̨́ʼ. Nihibrothers ląʼígóó nihíká adoojahii dahólǫ́ǫgo átʼé, ndi tʼáá nihí éí bíniʼdii shíká adoolwoł niidzin doo. J. R. Brown éí íídą́ą́ʼ atah nídídáahgo akʼidéezʼı̨́įʼii nilı̨́ı̨́ ńtʼééʼ, dóó Fred Rusk Bétheldi naalnishii nilı̨́įgo díí tʼáá áłah ayóó átʼéego shíká ahiʼnoolchą́ąʼgi doo baa yooshnéeh da.

Íídą́ą́ʼ náánáłahdę́ę́ʼ dineʼé joodláago hazʼą́ą́ ńtʼééʼ. Łah éí Tennesseedi neitʼaashgo KKK daolyéhígíí kintah góyaa chʼíníná. Áádóó náánáłah éí  hootahgóó nahwiilneʼgo áádóó daʼjiyánígi tʼóó tsı̨́įłgo íídą́ą́ʼ. Yá andaʼaldaah góneʼ yáʼiiyá, ńtʼééʼ hastiin ayóó báháchįʼ léiʼ náánáłaʼ dineʼé joodláago bee bikʼeʼashchı̨́įgo shikééʼ yah eelwod. Ńtʼééʼ bilagáanago shibrother łaʼ, éí nitsxaaz, yah eelwod. “Brother Herd, yáʼánítʼééhísh?” shiłní. Hastiin yę́ę tʼóó tsı̨́įłgo chʼínálwod. Níléídę́ę́ʼ baa ákoniizı̨́įʼgo éí náánáłahdę́ę́ʼ dineʼé joodláagi íiyisíí biniinaanii éí doo diné bikágí átʼéiigi da, ndi doo yáʼátʼéehii danihiiʼígíí biniinaa. Áádóó baa ákoniizı̨́įʼgo ałdóʼ azhą́ nihikágí áłʼąą átʼée ndi, éí akʼis ídlı̨́į doo índa ná dadeestsaał nízin doo.

Circuit biʼoonishjí 12 nááhai áádóó 21 nááhai district biʼoonishjí nihinaanishgo íilyaa. Éí ayóó átʼéego bitsʼą́ą́dóó nihaʼnídéél, baa hózhǫ́ǫgo tádiitʼáázh. Ndi łahgo nihanááʼdoodiłgo bibaʼ. August 1997 yihahgo tsʼídá niidzin yę́ę tʼáá aaníí sílı̨́ı̨́ʼ. United States Bétheldę́ę́ʼ nihiʼdéékeed. Éí Béthelgóó biniyé haʼdiilyaa yę́ędóó 38 nááhaigo índída. September 1997 Bétheldi deelnish. Ákweʼé brothers danilínígíí tʼóó kóníshgháníjįʼ hanii nihíká adiilwoł dashiłniih nisin, ndi doo ákódzaa da.

Service Department góneʼ áłtsé déshnish. Tʼóó ahayóígóó íhoołʼą́ą́ʼ! Ákóneʼ nihibrothers nidaalnishígíí elders dóó circuit overseers danilínígíí ląʼígóó naʼídíkid nidantłʼaii bichʼįʼ ádaalneʼ. Nihibrothers ákóneʼ nidaalnishígíí shił hadaʼólníigo yéigo nídashineeztʼą́ąʼgi baa ahééh nisin. Ákóneʼ náádéshnishgo éí nihibrothers ákóneʼ nidaalnishígíí ląʼígóó bitsʼą́ą́dóó ínááhwiideeshʼááł.

Gloria dóó shí Béthelgi nihighango ayóóʼííníiʼní. Tʼah abíínígo náádiitʼash, áko éí Bétheldi niitʼáazhgo doo nihá nantłʼa da. Áádóó łaʼ nááhaidóó bikʼijįʼ, Governing Body of Jehovah’s Witnesses yá Service Committee danilínígíí bíká anáshwoʼgo áshiʼdiilyaa. 1999 yihahgo éí Governing Body atah náshiʼdiiltı̨́. Díí binaʼanishgi tʼóó ahayóígóó íhoołʼą́ą́ʼ. Ndi tsʼídá aláahdi bíhoołʼą́ʼígíí éí Oodlání yá alą́ąjįʼ sizíinii éí Jesus Christ, doo éí diné łaʼ da.

Sheʼiinaʼ siláagi baa nitséskeesgo łahda éí God yá halneʼé Éímas yę́ę nahonishłin łeh. Jiihóvah éí naʼniłkaadii tsin síkamor bineestʼąʼ áłah ííłʼíinii nilíinii yaa ákonízin. Díí aneestʼąʼ éí diné baa dahojoobaʼíii dabichʼiyąʼ. Éímas ákójítʼéé ńtʼééʼ, ndi God yá halneʼé jílı̨́įgo áhoolaa, áádóó ayóó átʼéego naanish ílíinii yee yikʼihasdliʼ. (Amos 7:14, 15) Tʼáá ákótʼé, Jiihóvah shaa ákoniizı̨́ı̨́ʼ, Liberty, Indianadę́ę́ʼ baa hojoobaʼíii kʼééʼdídléehii biyeʼ. Jiihóvah éí ayóó átʼéego naanish ílíinii yee shikʼihasdliʼ, doo jółtaʼ ánéelą́ąʼ da. (Proverbs 10:22) Shaa hojoobaʼígo shı̨́ı̨́ sheʼiinaʼ háátʼiʼ ndi, kʼad éí ayóó átʼéego ashtʼı̨́įgo bee nihoolzhiizh nisin!