1, 2. (a) Oodlání ániid ndaakaii haitʼéego Séítan dóó demons yikʼeh dadidlı̨́? (Áłtsé naashchʼąąʼígíí níníłʼı̨́.) (b) Haʼátʼíí baa nídadíitʼįįł?

YILʼAADII Paul éí Oodlání naabaahii danilı̨́ nahalingo chʼíiníʼą́. Anaaʼ daʼniitah áádóó nihiʼanaʼí tʼáá aaníí hólǫ́! Ndi anaaʼ doo bílaʼashdlaʼii bił da, éí Séítan dóó demons bił anaaʼ hólǫ́. Ląʼí nááhai naabaahii danilı̨́įgo, áko ahigą́ ayóó dayiichįįh. Díí baa nitsáhákeesgo doo bikʼeh hodidoodleeł da hwiindzin, íiyisíí éí ániid neidáago doo bíniilʼą́ą da nahalin. Ániid ndaakaii kótʼéego ayóó átʼéego anaaʼí dabidziilgo tʼáásh yikʼeh dadidoodleełgo átʼé? Aooʼ bíighahgo átʼé, kʼad akʼeh dadidlı̨́įgo átʼé. Háálá Jiihóvah bibee adziilii yee ádaatʼı̨́. Áádóó naabaahii ayóó átʼéego nabidiʼneestą́ąʼii nidahalingo “béésh ééʼ bee naʼabaahii Diyin God” bitsʼą́ą́dóóígíí tʼáá átʼé yee hadadineʼ. Áko anaaʼ yiniyé hashtʼedadítʼé.​—Ephesians 6:10-12 yíníłtaʼ.

² Paul shı̨́ı̨́ Rome bisiláo béésh ééʼ yee hadadítʼéé ńtʼééʼ yę́ę yaa nitsíkeesgo kótʼéego naabaahii yaa halneʼgo áʼiilaa. (Acts 28:16) Díí baa ídahwiidiilʼááł. Áádóó ániid ndaakaii  bee bichʼįʼ anídahwiiztʼiʼígíí yee ádaa dahalneʼ áádóó béésh ééʼ tʼáá átʼé bee ééʼ astı̨́įgi haitʼéego áká análwoʼgi baa nídadíitʼįįł.

3, 4. Diyin Bizaad biiʼ tʼáá aaníinii bínaʼniltin haitʼéego Rome bisiláo sis chodayoołʼı̨́ı̨́ ńtʼééʼ yę́ęgi nahalin?

³ Ephesians 6:14 yíníłtaʼ. Rome bisiláo éí sis chodayoołʼı̨́ı̨́ ńtʼééʼ yę́ę éí béésh bikááʼ bikʼéstiʼ, éí binííʼ gónaa bichʼą́ą́h silá dóó bijéítsʼiingi nidaazgo bichʼą́ą́h dah sitánígíí yee dah yootįįł. Łaʼ éí diltłish dóó bééshtsoh ndabiilzhah doo biniyé ayóó bitsxeʼgo bąą naaznil. Sis yéigo binííʼ gónaa bináztʼiʼgo éí diné bił dah ahishgą́ągo kʼad bíighah nízin łeh.

⁴ Díí sisígi átʼéego, Diyin Bizaad biiʼ tʼáá aaníinii bídahwiilʼą́ʼígíí éí doo tʼáá aaníígóó bínaʼniltin bitsʼąą nihaa áhályą́. (John 8:31, 32; 1 John 4:1) Tʼáá aaníinii Diyin Bizaad yee naʼnitinígíí ląʼígóó baa íhwiilʼą́ąʼgo doo nihá nantłʼagóó Diyin bibee hazʼáanii bikʼehgóó yiidáał doo. Éí “béésh ééʼ nihijéítsʼiin” bichʼą́ą́h dah sitą́ągo bee neiidá. (Psalm 111:7, 8; 1 John 5:3) Áádóó éí tʼáá aaníinii bínaʼniltin bikʼidiʼyiitįįhgo nihiʼanaʼí bee bikʼeh diidlı̨́į doo.​—1 Peter 3:15.

5. Haʼátʼíí biniyé áłahjįʼ tʼáá aaníígóó hwiilneʼ doo?

⁵ Tʼáá aaníinii bínaʼniltin ayóó nihił danilı̨́, áko Diyin Bizaad ánínígíí bikʼehgóó ádaniitʼé áádóó áłahjįʼ tʼáá aaníígóó dahwiilneʼ. Séítan éí yoochʼííd ayóó átʼéego yee naabaah. Yoochʼííd éí diné biyoochʼíidii yee atíndilʼı̨́, áádóó yoochʼííd yoosdląądígíí yee atííłʼı̨́. (John 8:44) Tʼáá áníiltso nidaʼiyiilzíih ndi, wołí bee doo yoochʼííd ádeilʼı̨́į da. (Ephesians 4:25) Díí éí ayóó nantłʼa. Abigail, 18 binááhai, ání: “Tʼáá aaníígóó hojilneʼgo nantłʼa shı̨́į ndi, yoochʼííd ájiiłʼįįhgo éí tʼáá áká iilwoʼ hwiindzin.” Áko haʼátʼíí biniyé tʼáá aaníígóó hojilneʼ łeh? Kójíní: “Tʼáá aaníígóó hashneʼgo Jiihóvah bidááhdóó shíniʼ siláagi bee hashtʼedítʼé. Áádóó shizhéʼé dóó shimá índa dashikʼis bił béédahózingo doo shiyoochʼíid da.” Victoria, 23 binááhai, ání: “Tʼáá aaníígóó hojilneʼgo hweʼoodląʼ yéigo bá jizı̨́įgo biniinaada diné hódaʼatsʼih łeh, ndi áká iilwoʼgo átʼé: Éí áhánígo Jiihóvah bił jílı̨́ áádóó hadziil jileeh, índa ayóóʼádahóʼnínígíí ił ídlı̨́ yee dahonéłʼı̨́į łeh.” Tʼáá áłahjįʼ “tʼáá aaníinii bee áká dasoołzaazgo [nináztʼiʼgo]” ílíinii átʼéegiísh baa ákonínízin?

6, 7. Haʼátʼíí biniyé tʼáá ákogi éʼétʼé éí ajéítsʼiin dah sitánígíí bił aheełtʼéego ályaa?

⁶ Rome bisiláo éí bijéítsʼiingi dah sitánígíí béésh naaniigo bąą dah naaztą́ągo yee ndaakaigo ádaalyaa. Éí nizhónígo bijéítsʼiin gónaa dabíighahgo bá ádaalyaa. Díí béshígíí éí akał bee ahídahaastłʼǫ́. Biwos gónaa ałdóʼ akał bee ahídahaastłʼǫ́. Díí béésh ééʼ ajéítsʼiingi dah sitą́ągo nantłʼa, áko tʼáá ahąąh bééʼjitłʼooh doo. Díí éí hajéí dóó atsą́ siláii diltłish dóó kʼaaʼ yee hachʼą́ą́h hólǫ́!

 ⁷ Jiihóvah tʼáá ákogi bibee éʼétʼéii éí béésh ééʼ ajéítsʼiingi dah sitánígíí nahalin. ‘Nihijéí,’ éí ániitʼéiigi, yaa áhályą́. (Proverbs 4:23) Siláo éí béésh ééʼ hajéítsʼiin bichʼą́ą́h sitánígíí éí béésh doo bidziilii ééʼ bee ályaaígíí doo bił ałnázhdoonił da. Tʼáá ákótʼé, Jiihóvah tʼáá ákogi bibee éʼétʼéii éí shí shikʼehgo yáʼátʼééh hwiindzingi éí doo bił ałnáádííʼnił da. Tʼáá nihí nihijéí baa ádahwiilyą́ągi doo baa dahoniidzą́ą da. (Proverbs 3:5, 6) Éí biniinaa “béésh ééʼ nihijéítsʼiin” dah sitánígíí nihijéí tʼáá yichʼą́ą́h hólǫ́ǫ doogo éí yéigo baa áhwiilyą́ą doo.

8. Haʼátʼíí biniyé Jiihóvah bikʼehgo oodáałii bikʼehgóó ániitʼée doo?

⁸ Łahdaásh kwíinínízin łeh, Jiihóvah bikʼeh oodáałgi shí ádeeshnííł nisin yę́ęgi shitsʼąą kwííłʼı̨́? Daniel, 21 binááhai, ání: “Bádaʼóltaʼii índa bił daʼííníshtaʼígíí tʼóó shaa daadloh, háálá Diyin Bizaad bikʼehgo yishááł. Áko biniinaa doo bíneeshdlı̨́į da dóó yínííł sélı̨́ı̨́ʼ.” Kʼad éí haitʼéego baa nitsíjíkees? Kójíní: “Baa ákoniizı̨́įʼgo Jiihóvah bikʼehgo oodáałgi shá yáʼátʼééh lá. Nikʼis daniidlı̨́ daanínę́ę azeeʼ tsiʼndaʼiiłáhígíí chodayoołʼı̨́įgo yaa nídiikai; óltaʼ yitsʼá heeskai. Beʼiinaʼ doo yáʼátʼééhgóó bił nahazʼą́. Jiihóvah éí yéigo nihaa áhályą́.” Madison, 15 binááhai, ání: “Jiihóvah bikʼehgo oodáałgi bikʼehgóó yisháał dooígi, áádóó bił ahąąh nidaashkaígíí bidádahonooníinii ádaatʼéii bił ádaʼdoolíiłgi bitsʼąą áníshtʼée dooleełígi ayóó shá nantłʼa.” Áko haa níjiitʼįįh? “Jiihóvah bízhiʼ bee shééhoʼdílzin índa adáhonooníinii éí Séítan yee shółtʼóóh nisingo bénashniih. Díí bikʼeh nídíshdleehgo bee ádił honishǫ́.”

9, 10. Oodlání éí ké haitʼéhígíí yee kééh dadeesʼeez?

⁹ Ephesians 6:15 yíníłtaʼ. Rome bisiláo éí anaaʼ haleehgo bikeeʼ doo tʼáágééd atah yílyeed da. Díí ké éí akał tááʼ ałkʼi sikaadgo bee ályaa, áko ayóó ditsʼid. Éí nizhónígo yilzhólígo bee naʼadá índa doo yídéeltǫʼ da.

¹⁰ Rome bisiláo éí anaaʼgi akʼeh hodidoodleeł biniyé kééh dadeesʼeez ńtʼééʼ. Nihí éí “haneʼ yáʼátʼéehii bee kʼé hwiindzinii” baa chʼídahwiyiitʼaahgo kééʼ nísiitʼeez nahalin. (Isaiah 52:7; Romans 10:15) Łahda éí tʼáadoo nídzílzidígo nahojilneʼ łeh. Bo, 20 binááhai, ání: “Bił daʼííníshtaʼígíí Diyin Bizaad bee bił hodeeshnihgi ayóó násdzid ńtʼééʼ. Baa yánísin daatsʼí ńtʼééʼ. Nátʼą́ą́ʼ nídéshtʼı̨́įʼgo, haʼátʼíí shı̨́ı̨́ biniyé ákóníshtʼéé ńtʼééʼ. Kʼad éí shił hózhǫ́ bił ahąąh nidaashkaígíí Diyin Bizaad bee bił dahashneʼ.”

11. Diyin Bizaad baa nahwiilneʼgo haʼátʼíí éí doo nihá nantłʼagóó áyósin doo?

¹¹ Ląʼí Oodlání ániid ndaakaii éí Diyin Bizaad yaa nidahodoolnihgi tʼáá bilą́ąjįʼ yiniyé hashtʼéédadiitʼįįhgo doo bá ndanitłʼa da. Nish éí haitʼéego biniyé hashtʼedidíínííł? Julia, 16 binááhai, ání: “Naaltsoos binahjįʼ Diyin Bizaad bee  naʼnitinii éí óltaʼgóó azis báhígíí biih náshʼnił. Bił daʼííníshtaʼígíí yaa nitsídaakeesii dóó dayoodlánígíí yíísínístsʼą́ąʼ łeh. Áádóó éí binahjįʼ bee bíká adeeshwołii baa nitséskos. Biniyé hashtʼéédiishtʼįįhgo éí íiyisíí bíká adoolwołígíí bee bił hashnih.” Makenzie, 23 binááhai, ání: “Há áhwiinítʼı̨́įgo hazhóʼó ájíistsʼą́ąʼgo éí bił dajółtaʼígíí bee bichʼįʼ anídahwiiztʼiʼígíí bee baa ákozhniizįįh. Ániid ndaakaii naaltsoos bá ádaalyaaígíí ałtso néiníshtah. Áko Diyin Bizaad doodaiiʼ jw.org biiʼdóó łaʼ bee bíká anáshwoʼ.” Tsʼídá hazhóʼó biniyé hashtʼéédiitʼįįhgo éí “ké” nizhónígo hwíighahgo bee nijighá nahalin.

12, 13. Haʼátʼíí “bideezlaʼ [kʼaaʼ] diltłiʼii” Séítan yee ółtʼóóh?

¹² Ephesians 6:16 yíníłtaʼ. Rome bisiláo éí ayóó áníłtsxogo dikʼą́ągo heeneezígíí áchʼą́ą́h naalyéii neiʼáa łeh. Éí biwosdóó bigodjįʼ áníłtsxo, áádóó éí diltłish, tsiidétáán dóó kʼaaʼ ádaatʼéii yee áchʼą́ą́h neiʼá.

 ¹³ Haʼátʼíí “bideezlaʼ [kʼaaʼ] diltłiʼii” Séítan yee nółtʼóóh? Éí shı̨́ı̨́ Jiihóvah yaa biyoochʼíidgo yee naatiih nádááh. Séítan éí Jiihóvah índa łaʼda doo ayóóʼánóʼníi da nínízin doo, nóʼní. Ida, 19 binááhai, ání: “Jiihóvah doo áhánígo shił hólǫ́ǫ da índa doo Hakʼis deeshłeeł da shóʼní nisin ńtʼééʼ.” Kótʼéego nitsíjíkeesgo haa níjiitʼįįh? “Áłah néiidleehígíí yéigo sheʼoodląʼ yíká análwoʼ. Tʼóó áadi náshdáahgo doo comment éʼéshʼı̨́į da, bee hadeesdzihígíí doo łaʼ shá yididootsʼı̨́įł da nisingo nitséskees łeh. Kʼad éí áłah náʼádleeh biniyé hashtʼéédiishtʼįįh, naakidi doodaiiʼ táaʼdida comment ánáʼáshʼįįh. Nantłʼa ndi, kótʼéego ánáʼáshʼįįhgo bee shitah yáʼáhootʼééh. Brothers dóó sisters ayóó áká anájah. Áłah náʼádleehdóó chʼínáshdáahgo Jiihóvah ayóóʼáshóʼníí lá nisin łeh.”

14. Ida éí haʼátʼíí bitsʼą́ą́dóó baa ídahwiilʼą́ą́ʼ?

¹⁴ Rome bisiláo áchʼą́ą́h naalyéii doo łah ánéeh da, tʼáá ákóníłtso łeh. Ndi Ida bitsʼą́ą́dóó ídahwiilʼą́ąʼgo éí niheʼoodląʼ doo ákótʼée da. Niheʼoodląʼ éí dínóosééł doodaiiʼ ałhandoogááł, bidziil doodaiiʼ doo bidziil da dooleeł. Díí tʼáá ní bee níhólnííh. (Matthew 14:31; 2 Thessalonians 1:3) “Niheʼoodląʼ nihinaageʼ [achʼą́ą́h naalyéii]” ádeíníilzingo nihaa áhályą́ą doogo éí nitsaago bidziilgo íilníił doo!

15, 16. Nihił chodahooʼínígíí haitʼéego béésh chʼah nahalin?

¹⁵ Ephesians 6:17 yíníłtaʼ. Rome bisiláo éí béésh chʼah yee naagháago bitsiitsʼiin, bikʼos dóó biniiʼjįʼ yee yichʼą́ą́h hólǫ́ǫ łeh. Béésh chʼah éí bee naatʼááh dooleełii łaʼ bee dahólǫ́, áko éí siláo bichʼah yee néíʼáah łeh.

¹⁶ Siláo éí béésh chʼah bitsiighąąʼ bichʼą́ą́h hólónígi átʼéego “yisdáʼiildééh bíká ił chohooʼíinii” éí nitsíikeesgi nihá yichʼą́ą́h hólǫ́. (1 Thessalonians 5:8; Proverbs 3:21) Ił chohooʼı̨́ éí God yee ádee hadoodzííʼ yę́ę baa nitsídeikees dóó nihichʼįʼ nidahwiiʼnáa ndi, doo bikʼee nihąą nidahwiikaad dago ánihósin. (Psalm 27:1, 14; Acts 24:15) Áko tʼáá aaníí ił chohooʼı̨́ éí nihichʼą́ą́h hólǫ́ǫ doo niidzin doo. “Béésh chʼah” danihichʼah doo, tʼáadoo tʼóó neitʼáhí doo!

17. Séítan éí haitʼéego nihidoolohgo béésh chʼah nihikʼideʼánígíí akʼidadidiitʼááł?

¹⁷ Séítan éí haitʼéego nihidoolohgo béésh chʼah nihikʼideʼánígíí akʼidadidiitʼááł? Jesus áyííłʼįįd yę́ęgi baa nitsíníkees. Jesus éí bílaʼashdlaʼii yinaatʼáanii dooleełgi Séítan bił bééhózin. Ndi Jesus éí áłtsé tiʼhwiizhdoonihgo índa dazhdootsaał. Áádóó abaʼ ájítʼéego Jiihóvah kʼad hodííniidgo índa Naatʼáanii jidooleeł. Áko Séítan éí Jesus kʼad naatʼáanii dííleełgi naa dinishʼaah hodííniid. Éí tsʼídá tʼááłáhídi shichʼįʼ nitsidíínígoʼgo tʼáá akǫ́ǫ́ bílaʼashdlaʼii binaatʼáanii ándeeshłííł hodííniid. (Luke 4:5-7) Séítan ałdóʼ bił bééhózingo Jiihóvah hadoodzíiʼgo éí ániidígo chʼééʼdooldahgo tsʼídá nizhónígo bílaʼashdlaʼii yá áʼdoolííł. Díí éí tʼáá aaníí áhodooníiłgo bibaʼ ádaniitʼée doo, áko kʼad éí nihichʼįʼda nidahwiiʼnáa doo. Séítan éí kʼad yeeʼ nizhónígo nił hasihgo neʼiiná yíłtʼih doo nihiłní. Éí tʼáá nihí nihił hasihgo yiidáał doo, God biNahatʼaʼ akééʼdóó ííníilzin doo nihóʼní.​—Matthew 6:31-33.

18. Séítan éí tʼah doo yóóʼanihiniʼáah daaígi haitʼéego ííshjání ádiilnííł?

 ¹⁸ Ląʼí Oodlání ániid ndaakaii Séítan tʼah doo yóóʼadabiniʼah da. Kiana, 20 binááhai, ání: “Shił bééhózingo tʼáá ałtso bee nihichʼįʼ nidahwiiʼnánígíí éí God biNahatʼaʼ tʼéiyá nihá hashtʼeidoolííł.” Nitsíjíkeesgi dóó hweʼiinaʼ joołtʼihgi éí hoł chohooʼı̨́įgi haitʼéego bił ahídéétʼiʼ? Éí binahjįʼ díí nihił hoogáłígíí tʼóó kóníshgháníjįʼ hólǫ́ǫgi bééjílniihgo áhósin. Díí nihił hoogáłígíí doo beijólíi da, ndi wołí bee Jiihóvah bá nijilʼaʼ.

19, 20. Diyin Bizaad hazhóʼó choiniilʼı̨́į dooígi haitʼéego ayóó yiichįįh dooleeł?

¹⁹ Rome bisiláo éí diltłish chodayoołʼínígíí 20 dah alzhindi áníłnééz. Éí diltłish chooʼı̨́įgo ayóó átʼéego dayiichįįh háálá tʼáá ákwíí jı̨́ hazhóʼó chooʼı̨́įgi yídahoołʼaah.

²⁰ Yilʼaadii Paul áníigo Diyin Bizaad éí diltłish nahalin. Jiihóvah éí díí nihainílá. Éí hazhóʼó chooʼı̨́į dooígi bíhwiidiilʼáałgo niheʼoodląʼ bee bichʼą́ą́h neitʼá doodaiiʼ nitsíikeesgi nihá hashtʼééyoodlííł. (2 Corinthians 10:4, 5; 2 Timothy 2:15) Haitʼéego éí hazhóʼó choiníłʼı̨́į doo? Sebastian, 21 binááhai, ání: “Diyin Bizaad tʼáá néíníshtah bikʼeh tʼááłaʼí saad dashijaaʼígíí naaltsoos bikááʼ ádaashłeʼ. Kótʼéego shił yáʼádaatʼéhígíí ałkééʼ yishnił.” Áko Jiihóvah bintsíkees hazhóʼó baa íhojiiłʼaah. Daniel ałdóʼ ání: “Shí ałdóʼ Diyin Bizaad yíníshtaʼgo nahashneʼgóó díí łaʼda bíká adoolwoł nisingo saad dahnaazhjaaʼígíí bitah hashłáah łeh. Diné bíká ajilyeedígíí éí Diyin Bizaad ayóó bił nilı̨́ı̨́ lá danízingo haa tsídadíkos áádóó bił daʼílı̨́įgo dahwíistsʼą́ąʼ łeh.”

21. Haʼátʼíí biniyé Séítan dóó demons tʼáadoo béédeiildzidí doo?

²¹ Ániid ndaakaii ádaa dahalneʼgo bitsʼą́ą́dóó ídahwiilʼą́ąʼgo éí Séítan dóó demons tʼáadoo béédeiildzidí doo. Tʼáá aaníí éí ayóó ádabóodziil, ndi Jiihóvah éí haláahdi ayóó ábóodziil. Áádóó hoolʼáágóó doo dajiináa da doo. Éí aʼáán doo nihoodzą́ą́ góneʼ iidiyoołtłʼiłgo Jesus 1,000 nááhaigóó hooʼáałgo doo łaʼda atídazhʼdoolíił da. Áádóó éí bikéédóó áhodiʼdooldįįł. (Revelation 20:1-3, 7-10) Nihiʼanaʼí, índa binahagiz, dóó yiniyé átʼı̨́įgi nihił béédahózin. Jiihóvah níká análwoʼgo, danihidziilgo bikʼijįʼ nisiidzı̨́į doo!