1. Diyin Bizaad éí haʼátʼíí yee naʼnitin?

JIIHÓVAH nanihinitinígíí bee tʼáadoo leʼé bee achʼįʼ anáhóótʼiʼí łaʼdeilʼı̨́į doo. (Job 36:22) Diyin Bizaad éí “tʼáá ałtsojįʼ yáʼátʼééh ájooníił doo biniyé hashtʼeʼázdólzin” dooleełgi yee áká análwoʼ. (2 Tim. 3:17) Éí binaʼnitin bikʼehgóó yiidáałgo “nihokááʼ dineʼé bibee hódzáanii” bikʼehgóó deínóhkááh daaníinii bilááh átʼéego honiidzą́ diidleeł.—1 Cor. 3:19; Ps. 119:​97-100.

2. Haʼátʼíí bídahwiidiilʼááł?

² Diné bibee hódzáanii éí bidáhonooníinii ádaatʼéii bee hadítʼé. Áko éí biniinaa nitsíikeesgi dóó íitʼįįłgi nihá nantłʼa. Éí biniinaa Diyin Bizaad ání: “Łaʼda nihokááʼ dineʼé bił ééhózinígíí bikʼehgo akʼiʼdiitįįhii índa tʼáadoo nánídlínígóó anótʼááh nilíinii yee danihółnééh lágo.” (Col. 2:8) Naakigo yoochʼííd Séítan áyiilaaígíí ayóó woodlą́ silı̨́įʼgi hazhóʼó dadíníilʼįįł. Áádóó tʼáá áłah bitsʼą́ą́dóó éí diné bihódząʼ doo áháyą́ átʼéegi dóó Diyin Bizaad éí alááh átʼéego hódząʼ átʼéegi baa ídahwiidiilʼááł.

3-4. 1900 yihah bikééʼdóó éí diné ádaatʼįįłgi dóó sex baa nitsáhákeesgi haitʼéego łah átʼé silı̨́ı̨́ʼ?

³ 1900 yihah bikééʼdóó éí sex baa nitsáhákeesígi łah átʼé silı̨́ı̨́ʼ. Yówehdą́ą́ʼ éí bee hazʼáanii bikʼehgo ahéʼáskéegi tʼéiyá sex bee bá hazʼą́ągo baa nitsáhákees, áádóó hasłą́ągi doo baa yátiʼ da. Ndi kʼad éí doo ákótʼée da.

⁴ 1920s yę́ędą́ą́ʼ Roaring Twenties wolyéego éí diné bił dahóshǫ́ǫ dooígíí áádóó béeso tʼéiyá alą́ąjįʼ ádayósin daazlı̨́ı̨́ʼ. Łaʼ naʼałkaahii nilı̨́įgo ání, “Stage playsda,  ndaʼalkidgi, sin ádaatʼéii, naaltsoos daóltaʼgi, ídaʼoolkąąhgi tʼáá átʼé sex bił danítʼiʼgo ádaalyaa.” Íídą́ą́ʼ sex baa nitsáhákeesgo daʼazhishgo ádaalyaa, áádóó ééʼ astínę́ęgi doo yáʼátʼééhgóó ééʼ astı̨́ silı̨́ı̨́ʼ. Diyin Bizaad ánínígi átʼéego nihoogháahjįʼ ahoolzhiizhgo diné éí “honeenida yíchą́dayídéelniʼ doo.”—2 Tim. 3:4.

5. 1960’s yę́ędą́ą́ʼ dóó wóshdę́ę́ʼ haʼátʼíí tʼáá yéigo baa haʼooldeeʼ?

⁵ 1960’s yę́ędą́ą́ʼ éí bee hazʼáanii bikʼehgo ahéʼáskéegi, diné doodaiiʼ asdzánída tʼáá hó ahaa ninájíldeeh, índa ałtsʼáʼítʼaashgi yéigo baa haʼooldeeʼ. Anááł ndaalkid yę́ęgi éí sex aláahdigo nideiłkid silı̨́ı̨́ʼ. Ániidídóó ákótʼéego baa ooldahígíí atíʼoolíiłgo bee baa ákohoniidzı̨́ı̨́ʼ. Łaʼ ání, “Sex yáʼátʼéehgo baa nitsáhákees yę́ęgi kʼad doo ákótʼée da” silı̨́įʼgo éí hooghan hazʼą́ągi yidiyiiłtááh, tʼáájíłáʼígo áłchíní dazhnisé, yínííł ádaʼaleʼ, pornography nélʼı̨́įgo baa ninázhdinidááh yileeh, índa kódaatʼéii bitsʼą́ą́dóó tiʼhooʼniih. Éí bitsʼą́ą́dóó naałniih ádaatʼéii, AIDS tʼáá bił, díí bee bééhózingo diné bihódząʼ éí doo áháyą́ átʼé.—2 Pet. 2:19.

6. Diné éí sex yaa nitsídaakeesgi haitʼéego Séítan tsʼídá ákódajítʼée doo nízin?

⁶ Diné éí sex yaa nitsídaakeesgi Séítan tsʼídá ákódajítʼée doo nízin. Diyin éí ahéʼáskéegi áádóó sex hazhóʼó chooʼı̨́į dooleełgo ainílá. Ákondi ainíláhígíí doo hazhóʼó chooʼı̨́į daaígi Séítan yaa bił hózhǫ́. (Eph. 2:2) Kótʼéego baa ooldahgo éí áłchíní bee ááhaʼníiłgo átʼéegi Jiihóvah yee ainíláagi doo hoł danilı̨́į da. Áádóó ahoyéelʼáágóó iiná doo hóóʼ dadooleeł da.—1 Cor. 6:​9, 10.

7-8. Diyin Bizaad éí sex hazhóʼó chooʼı̨́įgo haitʼéego yee naʼnitin?

⁷ Diné bihódząʼ nídeidiiláhígíí éí yáʼátʼééhjí oodáałgi Diyin Bizaad yee naʼnitinígíí yikʼijįʼ yádaałtiʼ. Éí yeeʼ doo tʼáá aaníi da daaní. Łaʼ ádaaní: ‘Diyin éí sex niidzingo ánihijiilaa, áko haʼátʼíí biniyé tʼáadoo ákódaatʼíní nihijiní?’ Díí ádajiníigo éí tʼáá haʼátʼíí shı̨́ı̨́ jinízinígíí bikʼehgóó ájoonííł. Ndi Diyin Bizaad áníigo éí haʼátʼíí shı̨́ı̨́ doo yáʼátʼééhgóó áʼdoolníiłgi bikʼeshdidlı̨́į doo. (Col. 3:5) Jiihóvah éí hastiin dóó asdzání ahainínilgo éí ahéʼáskéegi biiʼ góneʼ tʼéiyá sex bee hazʼą́ągo  áyiilaa. (1 Cor. 7:​8, 9) Áko díí binahjįʼgo éí ahastiin dóó eʼasdzą́ą́ jílínígíí yínííł bąąh ádingo hazhóʼó sex chooʼı̨́į doo.

⁸ Doo diné binaʼnitin átʼéhígi átʼéego, Diyin Bizaad éí sex nihaa yáʼátʼéehgo yee naʼnitin. Éí áníigo sex hazhóʼó chooʼı̨́įgo baa hózhóonii átʼéego átʼé. (Prov. 5:​18, 19) Diyin Bizaad áníigo éí: “Tʼááłaʼí nootínígo nihitsʼíís dadíínóhsingo éí bidáhodínóoniiłii bee ádaa ádahołyą́, éí doo Jew dineʼé danilíinii Diyin God doo yéédahósinii ádaatʼínígi átʼéego tʼáá hazááká ił ashtéézh tʼéí biniyé áhátʼı̨́įgo éí dooda.”—1 Thess. 4:​4, 5.

9. (a) Jiihóvah bidineʼé éí haitʼéego Diyin Bizaad bikʼehgóó deínóhkáah doo bidooʼniid? (b) 1 John 2:​15, 16 haitʼéego hódząʼ yee naʼnitin? (c) Romans 1:​26, 27 éí haʼátʼíí bitsʼąą ániitʼée doo nihiłní?

⁹ 1900 yihah bikééʼdóó diné éí “yáʼátʼéehgo oodááł yę́ęgi bee ádaadin,” ndi Jiihóvah bidineʼé éí díí yaa ákodaniizı̨́ı̨́ʼ. (Eph. 4:​19, New World Translation) Áko Jiihóvah yee hasʼáanii wołí bee yikééʼ naazı̨́ı̨́ ńtʼééʼ. Watch Tower, May 15, 1926 ályaa yę́ę áníigo éí “hastiin doodaiiʼ asdzánída éí hontsékees índa ájooníiłgi bee ádaa áhojilyą́ą doo, éí opposite sex bił nijildeehgi íiyisíí.” Haʼátʼíí shı̨́ı̨́ nihináágóó baa ooldah ndi, Jiihóvah bidineʼé éí Diyin Bizaad ayóó átʼéii hódząʼ bee siʼáanii yikʼehgóó ádaatʼé. (1 John 2:​15, 16 yíníłtaʼ.) Diyin Bizaad ayóó átʼéego baa ahééh daniidzin! Jiihóvah ałdóʼ bichʼįʼ ahééh daniidzin, éí tsʼídá tʼáá ákóneʼé baa náhwiilzhíishgo binaʼnitin nihichʼįʼ kwííłʼı̨́. Éí diné bihódząʼ doo nídidiilyééł daaígi yitsʼą́ąjįʼ kónihósin. *—Romans 1:​26, 27 yíníłtaʼ.

10-11. Diyin Bizaad éí nihoogháahjįʼ yoołkáałgo haa hootʼée doo ní?

¹⁰ Diyin Bizaad éí tʼáá íídą́ą́ʼ áníigo nihoogháahjįʼ yoołkáałgo “diné ayóóʼádadóʼníi doo.” (2 Tim. 3:​1, 2) Díí éí tʼáá aaníigo baa ákodaniidzin, shí tʼéiyá hwiindzingo ádaa nitsáhákees. Naaltsoos łaʼ áníigo éí 1970’s yę́ędą́ą́ʼ “tʼáá hó ádíká azhdoolwoł haʼníigo naaltsoos kʼeeʼąą deeshzhiizh.” Łaʼ éí “yéigo adééhonilzįįh, áádóó ádaa hoʼniih,” daaníigi ádaalyaa. Łaʼ kóní: “Ayóó ánoolinígíí, bóhoneedlínígíí, ayóó baa hodzódlíhígíí ayóóʼííníʼní—éí tʼáá ni.” Ałdóʼ kóní: “Ádaa hojódlíigo tʼáá shí shikʼehgóó ááshníił doo, tʼáá ákóneʼ yishááł dóó díí shił yáʼátʼééh nízingo ádaa nitsékees.”

¹¹ Kóháʼníigiísh tʼáá tsídinítsʼą́ą́ʼ? Séítan éí tʼáá kótʼéego Íiv yichʼįʼ yee haadzííʼ. Éí ‘Diyin Godgi ánítʼée doo; yáʼátʼééhjí índa doo yáʼátʼééhjí nił ééhodoozįįł,’ yidííniid. (Gen. 3:5) Dííshjı̨́įdi ląʼí diné ayóó átʼéego ádaa nitsídaakees. Éí łaʼda shoo, doo ákótʼée da doodaiiʼ tʼáá ákótʼé bididooniiłgi tsʼídá doo deinízin da. Diyin ndi doo dayíistsʼą́ąʼ da. Éí ahéʼáskéegi kótʼé dabidiʼdooʼniił yę́ęgi doo deinízin da.

12. Diné éí ahéʼáskéegi haitʼéego yaa nitsídaakees?

¹² Diyin Bizaad éí ahastiin dóó eʼasdzą́ą́ dajílínígíí áádóó ałchʼįʼ ádee hadzoodzííʼ yę́ęgi bee ahił nóhdlı̨́ hałní. Áádóó tʼááká ałtsʼáotʼaash lágo hałní: “Diné jílíinii hazhéʼé índa hamá bitsʼą́ą́ʼ dashdidoogáałgo hweʼasdzą́ą́ tʼéiyá bił jiináa doo, áko nizhdiltʼé yę́ę atsʼíís tʼááłáʼí jileeh.” (Gen. 2:24) Ndi diné bihódząʼ éí łah átʼéego yaa nitsídaakees, éí ádaaníigo tʼáá nihí  soozı̨́įgi ádaa nitsóhkees. Naaltsoos łaʼ éí ałtsʼáʼítʼaashgi yaa halneʼígíí áníigo, “Iigeh éʼélnéehgo éí ‘tʼáá niheʼiinaʼ ninítʼiʼíjįʼ,’ haʼnínę́ęgi éí kʼad kótʼéego áhání, ‘tʼáá ayóóʼáhííníiʼníníjįʼ,’ dahaʼníigo diné ndaʼiiyeh.” Iigeh doo ílı̨́ı̨́góó óolzingo éí hooghan nahazʼą́ą́góó yidiyiiłtááh áádóó ayóó átʼéego yínííł niyiiłʼaah. Áko tʼáá aaníigo diné bihódząʼ éí ahéʼáskéegi yę́ę doo bił danilı̨́į dago hazʼą́.

13. Haʼátʼíí biniyé Jiihóvah éí ádaa dahojiʼniihii doo yíłdin da?

¹³ Diyin Bizaad ání: “Tʼááłáʼí jinítínígo hajéí bee ádaa dahojiʼniihígíí [Jiihóvah] doo hółdin da.” (Prov. 16:5) Kódajítʼéhígíí haʼátʼíí biniyé Jiihóvah doo hółdin da? Łahgo éí kótʼéego ádaa dahojiʼniihii éí tʼáá Séítan átʼéhígi átʼéego ádaa hojiʼniih. Diyin chohoosʼįįdgo tʼáá ałtsoní áyiilaii éí Jesus. Ndi Séítan ayóó átʼéego ádaa dzódlíigo Jesus shichʼįʼ nitsídidoogoh jinízingo tsízdeezkééz! (Matt. 4:​8, 9; Col. 1:​15, 16) Łaʼda kótʼéego ádaa dzódlíigo nitsékeesii éí diné bihódząʼ doo áháyą́ átʼéego Diyin yinéłʼı̨́įgo átʼé.

14. Romans 12:3 éí ádaa nitsáhákees dooleełígi haitʼéego bee ádaa áhwiilyą́ą doo ní?

¹⁴ Diyin Bizaad éí tʼáá hó jizı̨́įgi ayóóʼázhdóʼníigi bee ádaa áhólyą́ nihiłní. Jesus ání: “Tʼáá ni ádííʼníʼnínígi átʼéego bił kééhótʼíinii ayóóʼííníʼní.” Díí binahjįʼ baa nitsáhákeesgo éí tʼáá nihí ayóóʼíʼdííníiʼníi doo. (Matt. 19:19) Ndi Diyin Bizaad ałdóʼ áníigo shí éí náánáłaʼ biláahdi ayóó áníshtʼé tʼáadoo danohsinígo ádaa nitsídaakeesí nihiłní. Éí kóní: “Ałchʼą́ą́h naʼaʼnaʼ áádóó ádaa hodzódliʼ bee tʼáadoo haʼátʼíhída baa nidaahkaaí, nidi aʼohgo nitsáhákees bee náánáłaʼ nihiláahdi ádaatʼéego baa nitsídaahkees.”—Phil. 2:3; Romans 12:3 yíníłtaʼ.

15. Diyin Bizaad éí ádaa nitsáhákeesgi yee naʼnitinígíí haitʼéego áká adoolwoł?

 ¹⁵ Diné tʼóó ahayóí éí dahojíyą́ dahodiʼníinii, Diyin Bizaad tʼóó ání, dajiní. Éí ádaaníigo náánáłaʼ shilááh ájítʼé jinízingo nitsíjíkeesii éí doo hadziil da, índa diné tʼóó hakʼi naakaigo bá ájósin. Ndi Séítan yikééʼ adahideezíinii nitsídaakeesgi bitsʼą́ą́dóó kʼad haitʼéego nihił hazʼą́? Haʼátʼíí baa ákonínízin? Diné t’áá bí tʼéí ádaa nitsídaakeesii, éísh bił dahózhǫ́? Hooghan hazʼą́ągiísh ił dahózhǫ́? Yáʼádaatʼéhígíísh áhánígo dabikʼis? Áhánígoósh Diyin yee dahósin? Díí baa ákonínízinígíí binahjįʼgo háiidígíí lá, diné bihódząʼ doodaiiʼ Diyin Bizaad hódząʼ yee naʼnitinii daatsʼí yáʼátʼéehgo bitsʼą́ą́dóó hazʼą́?

16-17. Haʼátʼíí baa ahééh daniidzin, éí haʼátʼíí biniyé?

¹⁶ Díí ayóó hóyą́ dabidiʼníinii diné yikééʼ deíkáhígíí, éí chʼaa nídadikahígíí łaʼ yóóʼííʼáázh áádóó háajįʼgo lá níigo naʼíhídílkidígíí nahojílin. Jesus bíyoołkááł yę́ędą́ą́ʼ diné dahóyáanii yę́ę kótʼéego yaa haadzííʼ: “Doo daʼooʼı̨́ı̨́góó nidaʼaʼeeshígíí ádaatʼı̨́. Áko diné doo ooʼíinii náánáłaʼ diné doo ooʼíinii yoolóosgo, tʼáá áłah aʼą́dínóodah.” (Matt. 15:14) Tʼáá aaníí Diyin éí diné bihódząʼ doo áháyą́ átʼéego yaa nitsíkees.

¹⁷ Diyin Bizaad hódząʼ yee naʼnitingi éí tʼáá aaníigo “naʼnitin biniyé, adidooteh biniyé, kʼéhézdon ninádoodlóós biniyé, índa tʼáá ákogi éʼétʼé bóhooʼaah biniyé chooʼı̨́.” (2 Tim. 3:16) Jiihóvah bichʼįʼ ahééh daniidzin, éí bidineʼé dah yikahígíí choyoołʼı̨́įgo nihookááʼ dineʼé bihódząʼ yitsʼą́ąjįʼ nihaa ádahályą́! (Eph. 4:14) Binaʼnitin nihichʼįʼ kwííłʼı̨́įgo bee danihidziilgo Bizaad yee hasʼáanii bąąh dah shiijééʼ. Ayóó átʼéego baa hózhǫ́, Jiihóvah éí Bizaad yee ayóó baa hódzáanii nihainílá!