Sara * ání, “Ayóó yánísin, doo ádaa jííníshdlíi da ńtʼééʼ. Diné háádahinoolwołii bitah honishłǫ́ǫgo doo shił yáʼátʼéeh da. Ákondi diné aʼohgo ádaatʼéii bíneeshdlı̨́įgo bitah honishłǫ́ǫ łeh. Shikʼis yáʼádaatʼéehii éí doo bichʼįʼ niʼ nishłı̨́ı̨́góó, shidaʼdiiłʼáhígíí bee bichʼįʼ yáshtiʼ łeh.”

Saragi átʼéego, aʼohgo ániitʼéego éí akʼis diidleeł. Jiihóvah éí diné aʼohgo ádaatʼéii yaa bił hózhǫ́. Diyin Bizaad ání: “Aʼohgo ádaʼdíínółzin.” (Col. 3:12) Haʼátʼíísh óolyé aʼohgo éʼétʼé? Haash yitʼéego Jesus aʼohgo áʼdólzin ńtʼééʼ? Haash yitʼéego aʼohgo éʼétʼéii niheʼiinaʼ baa hózhǫ́ǫgo íidoolííł?

Aʼohgo ájítʼéego éí hoł hodéesyéel doo. Diné aʼohgo átʼéii éí baa áhwiinítʼı̨́ʼí dóó bichʼįʼ anáhóótʼiʼ yileehgo bił hashtʼehodítʼé.

Aʼohgo éʼétʼéii hadziil áhósin. Gríikjí saad “aʼohgo éʼétʼé” éí łı̨́ı̨́ʼ yízhǫǫdígíí nahalin ní. Łı̨́ı̨́ʼ nizhónígo yízhǫǫd ndi tʼahdii ayóó ábóodziil łeh. Aʼohgo éʼétʼéii nihee hólǫ́ǫgo, doo yáʼátʼééhgóó íitʼįįł yę́ę nahgóó nididiitʼááł dóó diné hazhóʼó bił kʼé ahidiiʼníi doo.

‘Doo aʼohgo áníshtʼée da,ʼ shı̨́ı̨́ nínízin. Nihináágóó diné doo daatsʼíid da éí biniinaa aʼohgo ázhdólzingi tʼáá nantłʼa. (Rom. 7:19) Aʼohgo ázhdólzingi ayóó binaʼanish, ndi Jiihóvah biníłchʼi diyinii nihíká análwoʼgo łaʼ diilnííł. (Gal. 5:​22, 23) Haʼátʼíísh biniyé aʼohgo ázhdólzingi yéigo bineilnish doo?

Aʼohgo éʼétʼéii diné bił danilı̨́. Saragi átʼéego, nihí ałdóʼ diné aʼohgo ádadólzinii bił honiidlǫ́ǫgo nihił yáʼátʼééh. Jesus ayóó baa áhwiinítʼı̨́ dóó aʼohgo áʼdólzin ńtʼééʼ. (2 Cor. 10:1) Áłchíní yázhí Jesus doo yéédahósin da ndi ayóó bídaneedlı̨́ı̨́ ńtʼééʼ.—Mark 10:​13-16.

Nihí dóó bił honiidlónígíí aʼohgo éʼétʼéii nihaa áhályą́. Ákójítʼéego doo tʼáadoo hooyání háháchįįh da. (Prov. 16:32) Háida tʼáá naʼníleʼdii bichʼįʼ haidzihgo bikʼee doo ákóniitʼée da łeh—łaʼ ayóóʼájóʼnínę́ę da  bihozhdidoołtʼih. Aʼohgo éʼétʼéii éí diné bił kééhwiitʼíinii yaa áhályą́ągo baa hą́ą́h niidzin.

Jesus naanish ląʼí bąąh siláa ndi, tʼáá ałtso diné yichʼįʼ aʼohgo áʼdólzin ńtʼééʼ. Nihookááʼgi naaghá yę́ędą́ą́ʼ, diné dziil bigháanii dóó biyéél dandaazii éí hááʼíyı̨́ı̨́h deinízin. Jesus kótʼéego hachʼįʼ haadzíiʼgo yee hadaʼoosnı̨́ı̨́’: “Shaa hohkááh, . . . háálá aʼohgo ádííʼníszin áádóó ádaa hojiinishbáʼí!”—Matt. 11:​28, 29.

Haash yitʼéego Jesus aʼohgo áʼdólzin yę́ę beʼíłʼı̨́į doo? Diyin Bizaad neilkaahgo, Jesus diné yił naaldeehgi dóó nantłʼago hooʼaah ndi haitʼéego hashtʼeyiiłʼįįhgi baa íhwidiilʼááł. Áko aʼohgo ániitʼéegi nabóhoʼdinitaahgo nihí ałdóʼ tʼáá Jesus beʼiilʼı̨́į doo. (1 Pet. 2:21) Jesus aʼohgo áʼdólzingi táaʼgo baa chʼíhootʼánígíí baa nitsíníkees.

Jesus baʼétʼé ádin. Jesus ání, “Aʼohgo ádííʼníszin áádóó ádaa hojiinishbáʼí.” (Matt. 11:29) Aʼohgo éʼétʼéii dóó haʼátʼeʼ ádingo éí ahánígo ahídéétʼiʼ ní Diyin Bizaad. (Eph. 4:​1-3) Haash yitʼéego nihił bééhózin?

Doo aláahgo ádaa nitsíikeesgóó, éí doo ayóó nihináháshchʼíiʼ da doo. Diné “dibidii” dóó “adláanii nilı̨́ı̨́ lá” dabiłnínígíí, Jesus haitʼéego nátʼą́ą́ʼ hanáádzííʼ? Jesus áátʼįįdígíí éí bééhózinígo doo ádaa dzódlíi da. Áádóó Jesus ání, “Hódzą́ éí yee ááníiłii binahjįʼ tsʼídá tʼáá ákogi átʼéego bee bééhózin.”—Matt. 11:19.

Háiida tʼáadoo baa tsíhodeeskéézgóó ádóoneʼé jílı̨́įgi, hagender, doodaiiʼ hayaa hooʼaʼgi yínahodééłkidgo haash yitʼéego hazhóʼó nátʼą́ą́ʼ háádíídzih? Peter South Africadi elder nilı̨́įgo, ání: “Shináháshchʼííʼ yileehgo, ‘Haash yitʼéego éí Jesus ádoonííł ńtʼééʼ?’ baa nitséskees.” Áádóó ánáádíʼní: “Tʼáadoo ayóó ádaa nitséskeesí dooleeł nisin.”

Jesus bílaʼashdlaʼii nidaʼiisíihgi bił bééhózin. Jesus bídahoołʼaahii yáʼátʼéehgo ádaʼdoolíiłgi bił béédahózin, ndi nidaʼiisííh biniinaa bá ndanitłʼa. Jesus ádin dooleeł bitłʼééʼ Peter, James, dóó John shił honohłǫ́ yidííniid yę́ę tʼáadoo bidaʼjiilaa da. Biniinaa daʼjiiłhaazhígíí Jesus bił bééhózin, áko ádííniid “nitsáhákees éí lą́ nízin, ndi atsʼíís éí doo bidziil da.” (Matt. 26:​40, 41, NW) Jesus bídahoołʼaahii nidaʼiisíihgi yaa ákonízin, ndi Jesus doo biʼdiiłʼáa da.

Nihisister Mandy éí diné ayóó yaa nátʼı̨́ı̨́ ńtʼééʼ. Kʼad Jesus aʼohgo áʼdólzin yę́ę yeʼełʼı̨́. Kóní, “Diné nidaʼiisíihgi baa ákonisin. Jiihóvah nahalingo, diné yáʼátʼéehgo ádaaníiłii bee néshʼı̨́į łeh.” Béénílniih, Jesus ajoobaʼ yee diné yinéłʼı̨́. Jesus aʼohgo átʼéegi beʼíłʼı̨́įgoósh níká análwoʼ?

Jesus éí God yaʼólíí ńtʼééʼ. Nihookááʼ naaghá yę́ędą́ą́ʼ, Jesus éí diné bíighahí ádabííłʼįįd. Ląʼí diné dabijoołá dóó tídabiilaa ndi, tʼáadoo báhóóchįįd da, “nidi Diyin God tsʼídá tʼáá ákogi átʼéego ánihwiiʼaahii yaa ádeetʼą́.” (1 Pet. 2:23) Jesus bił bééhózin, Bizhéʼé Jiihóvah bíká adoolwoł áádóó doo yáʼádaashónígíí atíidoolííł.

Doo yáʼátʼééhgóó ánihiʼdiilyaago doo bikʼee nihá hodoochįįł da, niháhóóchįįd ládą́ą́ʼ, tʼah yówehgo ádiilnííł. Diyin Bizaad ánihiłní: “Diyin God tsʼídá tʼáá ákogi átʼéego yinahaʼáhígíí éí diné biʼáháchįʼ doo yee łaʼyidoolíił da.” (Jas. 1:20). Azhą́ yáʼátʼéehii biniinaa náhóóchįįd ndi, niʼiidzííh doo yóóʼanihidínóoʼah da.

Germanydi nihisister Cathy, kótʼéego nitsékees ńtʼééʼ, ‘Doo achʼą́ą́h yájíłtiʼgóó, háísh há ádoonííł?’ Ákondi Jiihóvah yaʼólíigo, bíniʼ hashtʼedíítʼeʼ. Kóní: “Kʼad éí doo saad honishłǫ́ǫ da. Jiihóvah tʼáá ałtso hashtʼéidoodlíiłgi shił bééhózingo aʼohgo ádííníszin”. Łaʼda nihikʼijįʼ asiihgo, Jesus éí Jiihóvah yaʼoozlíʼígi  átʼéego beʼíłʼı̨́į doo. Nihí ałdóʼ aʼohgo áʼdííníilzingo níká adoolwoł.

Jesus ííshjání áyiilaago aʼohgo éʼétʼéii éí hwił hózhǫ́ǫgi bídéétʼiʼ. Kóní: “Aʼohgo ádaʼdólzinii bikʼidahojidlí [bił dahózhǫ́].” (Matt. 5:5) Aʼohgo éʼétʼéii nihíká adoolwołgi baa íhwidiilʼááł.

Ahéʼéskéegi aʼoh ázhdólzingo yáʼátʼééh. Australiadę́ę́ʼ nihibrother Robert ájíní, “Ląʼídi sheʼasdzą́ą́ saad tʼáá naʼníleʼdii bee bichʼįʼ hahasdzííʼ. Ákondi doo yáʼátʼééhgóó hahasdzíʼígíí doo nahjįʼ kódooníił da. Bíniʼ yiiłʼaʼígíí baa yínííł nisin.”

Yéiiltiʼ bee “tʼáá áníiltso ląʼígóó nidaʼayiilzííh” dóó tʼáadoo baa nitséhéskéézgóó yéiiltiʼgo ahéʼéskéegi yidínóołtłʼah. (Jas. 3:2) Aʼohgo ázhdólzingo éí hazaad baa áhojilyą́ą doo.—Prov. 17:27.

Robert saad yee yáłtiʼígíí yaa yistiʼgo yee ádaa áhályą́. Haash yitʼéego háká eelwod? Ájíní, “Tʼahdoo saad haleehdą́ą́ʼ, kʼad hazhóʼó yísístsʼą́ą́ʼ, aʼoh ádííníszingo yáshtiʼ dóó doo shide átʼée da. Sheʼasdzą́ą́ bił iiná áshʼı̨́įgi yáʼátʼééh.”

Aʼohgo éʼétʼéii binahjįʼ diné bídíníilná. Diné bináháshchʼíiʼii bikʼis tʼáá díkwíi łeh. Aʼohgo éʼétʼéii éí ‘łáʼí niidlı̨́įgo kʼé bee ahííníitąʼ ádííníilzin’. (Eph. 4:​2, 3) Cathy ałdóʼ ájíní, “Aʼohgo éʼétʼéii binahjįʼ tʼáá ałtso bichʼįʼ kʼé nisdzin, azhą́ łaʼ doo bídínéeshnáa da ndi.”

Aʼohgo éʼétʼéii binahjįʼ hoł hodéezyéél. Aʼohgo éʼétʼéii dóó hodéezyéél éí “yáʼąąshdę́ę́ʼ bee hódzáanii” bił ahídéétʼiʼ ní Diyin Bizaad. (Jas. 3:​13, 17) Aʼohgo áʼdólzinii “ajéí hashtʼedítʼéii” bee hólǫ́. (Prov. 14:30) Martin éí aʼohgo áʼdólzingi yéigo yinaalnish. Éí ání, “Kʼad éí áda ákoniidzı̨́ı̨́ʼ, binahjįʼ shił hodéezyéél dóó shił hózhǫ́.”

Łahda aʼoh ádólzingi nihá nantłʼa łeh. Łaʼ brother ání, “Łahda tʼáá íiyisíí áháchįʼ shiiʼ háádíbı̨́ı̨́h.” Tʼáá nihá nantłʼa ndi, Jiihóvah aʼohgo ádííníilzingi yee nihíká adoolwoł. (Isa. 41:10; 1 Tim. 6:11) ‘Tʼáá ákogi ániitʼéego’; dóó bee ‘niildzilgo’ ánihidoolííł. (1 Pet. 5:10) Paul ání, “Christ bee shaʼátʼeʼ ádinii índa bee shá áhwiinítʼı̨́ʼíii” nishłı̨́. Nihí ałdóʼ ákótʼéego niheʼiinaʼ íilʼı̨́į doo.—2 Cor. 10:1.