1, 2. (a) Jesus éí God bibee hazʼáanii haitʼéego yaa nitsíkees ńtʼééʼ? (b) Bee hazʼáanii yíndaʼniłtinii dóó Férisiiz haitʼéego doo ákótʼéégóó bee hazʼáanii yikʼeh ádaatʼéé ńtʼééʼ?

JESUS ayóó hoł nílı̨́įgo baa nitsíjíkeesii éí Jiihóvah. Éí Mózes biniitʼaa bee hazʼáanii ályaa yę́ę ayóóʼájóʼní, háálá éí Hazhéʼé bitsʼą́ą́dóó. Psalm 40:8 éí Jesus kótʼéego ayóóʼáyóʼníi doogo yaa chʼíhoníʼą́: “ShiDiyin God nílíinii, íinínízinii baa nideeshaałgo baa shił nihoozhǫǫh. Nibee hazʼáanii shijéí biiʼ hólǫ́.” Jesus éí tʼáá aaníí áníigo yiʼiilaa, éí God bibee hazʼáanii tsʼídá nizhónígo hadilyaa, áká adoolwoł, dóó tʼáá ałtso biiʼígíí bohodoolnííł.—Matthew 5:​17-19.

² Jesus éí bee hazʼáanii yíndaʼniłtinii dóó Férisiiz hanááł Hazhéʼé bibee hazʼáanii yę́ę doo ákótʼéégóó yee nidaʼnitingo biniinaa bikʼee doo ákójítʼée da. Éí kóbijiní: “Chʼil, tólchiin áádóó dil índa kómin daolyéhígíí neeznáá daníjoolígíí éí tʼááłáʼígo shijool [tenthgo] Diyin God baa nídahidohʼaah.” Díí áníigo bee hazʼáanii yę́ę tsʼídá tʼáá áłtsʼísíjįʼ baa dajistiʼgo bikʼehgóó ádajítʼé. Áko éí haitʼéego doo ákótʼéégóó ádajiłʼı̨́? Jesus ání: “Nidi bee hazʼáanii biyiʼdóó aláahgo ádaatʼéii tʼáá óʼólneʼ góneʼ átʼéii áádóó aa aʼááh hasin índa oodlą́ éí doo  baa áńdahodółtʼı̨́į da.” (Matthew 23:23) Férisiiz éí biniyé bee hazʼáanii átʼéegi doo dayooʼı̨́į da, diné bilááh áníshtʼé danízin. Ndi Jesus éí biniyé bee hazʼáanii átʼéegi dóó tʼááłaʼí nítínígo éí Jiihóvah átʼéegi yee ííshjání ííłʼı̨́įgi yaa ákonízin.

3. Haʼátʼíí baa nídadíitʼįįł?

³ Nihí Oodlání ídlı̨́įgi, Mózes biniitʼaa bee hazʼáanii yę́ę doo bikʼehgóó yiikah da. (Romans 7:6) Haʼátʼíí biniyé Jiihóvah bibee hazʼáanii Bizaad yiiʼ yiyííʼą́? Éí “aláahgo ádaatʼéii” baa ákoniidzin índa bikʼeh ániitʼée doo biniyé, bee hazʼáanii biniiyée ályaagi áhyiłní. Kintahjįʼ biniitʼaa aʼniichéehii ályaagi haʼátʼíí bitsʼą́ą́dóó bóhooʼaah? Ajiisxı̨́įgo bikʼee nazhnichéhígíí ázhdooníiłgi baa ídahwiilʼą́ą́ʼ. Kʼad éí kintahjįʼ biniitʼaa aʼniichéehii ályaa yę́ę binahjįʼ Jiihóvah átʼéiigi áádóó bedaʼiilʼı̨́į dooígi baa ídahwiidiilʼááł. Díí baa nídadíitʼįįł: Kintahjįʼ biniitʼaa aʼniichéehii ályaago éí Jiihóvah bibee ajoobaʼgi haitʼéego ííshjání ííłʼı̨́? God éí iiná yaa nitsíkeesgi haitʼéego yee naʼnitin? Tʼáá ákogi yee átʼéii haitʼéego ííshjání yee ííłʼı̨́? Díí tʼáá átʼé bitsʼą́ą́dóó haitʼéego yáʼąąshiidę́ę́ʼ nihizhéʼé Jiihóvah beʼiilʼı̨́į doo.—Ephesians 5:1 yíníłtaʼ.

4, 5. (a) Doo tʼáá ákónééhgóó iisxíinii éí kintahjįʼ yisdádínóochééł biniyé haitʼéego bá éʼélyaa? Haʼátʼíí biniyé? (b) Díí binahjįʼ haʼátʼíí bee Jiihóvah átʼéiigi yee nanihinitin?

⁴ Jiihóvah éí hastą́ągo kintahjįʼ biniitʼaa aʼniichéehii doo nahonitłʼagóó baa honítʼiʼ doo, dííniid. Ízrel dineʼé éí Jórdan tooh nílínígíí ałtsʼą́ą́hjí kin haalʼáii táaʼgo áda ádahodoohłííł, ałdóʼ yidííniid. Haʼátʼíí biniyé? Jó éí doo tʼáá ákójínééhgóó iisxíinii éí tsı̨́įłgo doo nanitłʼagóó áajįʼ yisdázhdínóochééł. (Numbers 35:​11-14) Díí kintahjįʼ bichʼįʼ adahwiiztʼiʼígíí baa ádahayą́ą́ ńtʼééʼ. (Deuteronomy 19:3) Ízrel dineʼé ádaʼáłínígíí bikʼehgo éí doo tʼáá ákójínééhgóó iisxíinii Ízrel bikéyah biiʼ kintahjįʼ yisdáʼniichéehii naaznil, éí daʼnítiingóó bá dah naʼaztą́ągo yee yikʼi hakááh ńtʼééʼ. Áko Ízrel dineʼé nilı̨́įgo doo tʼáá ákónééhgóó iisxı̨́įgo éí déʼéyóní bikéyahgóó doo adínóochéeł da. Háálá áájígo azhnííchą́ąʼgo éí Jiihóvah bitsʼą́ąjįʼgo yóóʼabidiʼnóotʼah.

⁵ Diné iisxíinii éí bidiʼyoolyéełgo Jiihóvah yee hasʼą́. Ndi łaʼda éí doo tʼáá ákónééhgóó iisxı̨́įgo éí baa aʼáhí hwiindzingo baa áháyą́ą doogo yá áyiilaa. Diyin  Bizaad scholar nilı̨́įgo łaʼ ání: “Díí éí tʼáá átʼé bikʼehgo dooleełii doo nantłʼagóó ályaa.” Jiihóvah éí bá ndaalʼaʼí atíidoolíiłgo yíká déezʼı̨́įʼgo á nihwiiʼaahii doo yitsʼíidii átʼéhígi doo átʼée da. Ndi, Bí “ayóó átʼéego nihaa aʼááh” nízin.—Ephesians 2:4.

6. Férisiiz, éísh Jiihóvah aʼáhí nízingi bedaʼjiłʼı̨́ı̨́ ńtʼééʼ? Łaʼ chʼíníʼaah.

⁶ Férisiiz doo tʼáá kʼad diné yaa aʼáhí daniizı̨́įʼ da. Ízrel dineʼé ádaaníigo łaʼda tʼááłáʼígíí yee táaʼdidóó baʼaan náʼiisihgo Férisiiz doo tʼáá kʼad há yóóʼanéididooʼáał da. Jesus éí doo ákótʼéégóó ádajítʼéegi hoł ííshjání íidoolííł biniyé Férisii éí tax nahalyéii yá sidáii yíighahgi sodilzingo haneʼ łaʼ áyiilaa. Férisii kóní ní: “Nichʼįʼ ahééh nisin, shí doo diné łaʼ ádaatʼéhígi áníshtʼée da, aghadaʼiiʼníiłii, doo tʼáá ákogi ádaatʼíinii, daʼdiléii, índa díí tax nahalyéhígíí yiniyé sidáii.” Jesus áníigo Férisiiz éí “diné náánáłaʼígíí deijoołáii [doo daʼjílı̨́į da]” áádóó aʼáhí hwiindzingi doo nihídadéétʼiʼ da danízin.—Luke 18:​9-14.

7, 8. (a) Jiihóvah aʼáhí nízingi haitʼéego bedaʼiilʼı̨́į doo? (b) Á yóóʼanáhidíʼaahgo haʼátʼíí biniyé ayóó áníshtʼé doo jinízin da doo?

⁷ Jiihóvah bedaʼołʼı̨́, Férisiiz éí dooda. Aʼáhí danohsin dóó dajiinohbaʼ. (Ephesians 4:32 yíníłtaʼ.) Tʼáadoo nantłʼaaí íínísingo á yóóʼanáhidíʼaah. (Luke 17:​3, 4) “Azhą́ łaʼda ląʼídi shíniʼ yiyiiłʼaʼ ndi, tʼáásh ákǫ́ǫ́ tsı̨́įłgo tʼáadoo bá nantłʼaaígo íínísingo bá yóóʼanáhidishʼaah? Áádóó tsı̨́įłgoósh bił kʼé nidideeshniił nisin?”

⁸ Á yóóʼanáhidíʼaahgo éí ayóó áníshtʼé doo jinízin da doo. Férisiiz éí diné bilááh ádaniitʼé danízin ńtʼééʼ, éí biniinaa á yóóʼanídidootʼáałgi doo ádeinízin da. Oodlání niidlı̨́įgi éí aʼohgo ádííníilzingo “náánáłaʼ nihiláahdi ádaatʼéego baa nitsídaahkees” áádóó ałhá yóóʼanídahidiitʼaah doo. (Philippians 2:3) ‘Jiihóvah aʼohgo nitsíkeesígi átʼéegoósh áníshtʼé?’ Aʼohgo ádaa nitsíikeesgo łahdę́ę́ʼ doo bá ndanitłʼagóó bił kʼé náhodoodleeł áádóó nihí ałdóʼ nátʼą́ą́ʼ tʼáá ákótʼée doo. Tsı̨́įłgo kʼé náʼííłeeł dóó tʼáadoo hání síníłʼání.—Ecclesiastes 7:​8, 9.

9. Ízrel dineʼé iiná ílíinii átʼéegi baa ákodazhnízin doogo haitʼéego Jiihóvah yee háká eelwod?

⁹ Kintahjįʼ biniitʼaa aʼniichéehii éí iiná ílíinii átʼéego Ízrel dineʼé baa ákodazhnízin doo biniyé ályaa. (Deuteronomy 19:10) Jiihóvah iiná ayóóʼáyóʼní, diné naaltseed yijoołxá. (Proverbs 6:​16, 17) Tʼáá ákogi átʼéii Diyin éí diné doo tʼáá ákónééhgóó iisxíinii doo tʼóó ákótʼée da doo. Łaʼda doo tʼáá ákónééhgóó diné yiyiisxı̨́įgo éí baa hwiijiidoobaał.  Ndi ákójiidzaago éí áłtsé alą́ąjįʼ naazíinii bichʼįʼ ádaa nahozhdoolnih. Alą́ąjįʼ naazíinii éí díí doo tʼáá ákónééhgóó diné yiyiisxı̨́ı̨́ lá, dadííniidgo éí kintahjįʼ biniitʼaa azhnííchą́ą́ʼ yę́ęjįʼ nízhdoodááł. Éí aláahdi nááʼiiłniihii daaztsą́ąjįʼ tʼáá ákwii kééhojitʼı̨́į doo. Ákwii tʼáá kééhojitʼı̨́įgoda ahwíidoołkááł. Kótʼéego ályaagi éí Ízrel dineʼé iiná ílíinii átʼéego baa ákodazhnízin doo biniyé. Iiná Einíláii baa haʼniih doo biniyé, iiná baa dajistiʼ doo.

10. Bee hazʼáanii yíndaʼniłtinii dóó Férisiiz éí diné bibeʼiinaʼ doo bił danilı̨́į dago yaa nitsídaakeesgi haitʼéego Jesus ííshjání áyiilaa?

¹⁰ Bee hazʼáanii yíndaʼniłtinii dóó Férisiiz éí diné bibeʼiinaʼ doo bił danilı̨́ı̨́góó yaa nitsídaakees, Jiihóvah átʼéhígi doo ádajitʼée da. Jesus kóháłní: “Óhooʼaah bibee ąą ńdítı̨́hí yóóʼadasootą́; tʼáá nihí nidi doo yah ahisoohkai da, índa łaʼ yah ahidookahígíí ałdóʼ dasinoołtłʼah.” (Luke 11:52) Jesus haʼátʼíí níigo ání? Diyin Bizaad bee nidazhdínóotįįł dóó iiná doo ninítʼiʼii diné baa dah doolyéełgi bee bíká azhdoojahgi hąąh naazlá. Diné éí “Yisdáʼiiníiłii” Jesus yikééʼ dah dahididoohkah yę́ęgi yitsʼą́ąjįʼ kódeiłʼı̨́. (Acts 5:31) Áko doo yáʼáhootʼéeh góneʼ adayiiʼéésh. Áádóó ayóó ádaa deijódlíigo tʼáá bí tʼéiyá ádaa nitsídaakees, índa diné doo yaa dajoobaʼ da. Doo daatsʼíídgóó ayóóʼóʼóʼní biiʼ ádaadin!

11. (a) Jiihóvah éí iiná bił nilı̨́įgo yaa nitsíkeesgo yilʼaadii Paul ałdóʼ haitʼéego ákótʼéé ńtʼééʼ? (b) Paul éí nahalneʼgi ayóó yíneedlı̨́ı̨́ ńtʼéeʼgi, haʼátʼíí nihíká adoolwołgo ákóniitʼée doo?

¹¹ Haitʼéego Jiihóvah bedaʼiilʼı̨́įgo bee hazʼáanii yíndaʼniłtinii dóó Férisiiz ádaatʼéhígi doo ániitʼée da doo? Éí iiná ílíinii átʼéego nihił nilı̨́į doo. Yilʼaadii Paul ákótʼéego God biNahatʼaʼ nizhónígo baa haneʼgi diné ląʼígóó yee neineeztą́ą́ʼ. Éí bąą kóní: “Diné tʼáá ałtso bidił doo bee shaa náhódóotʼįįł da.” (Acts 20:​26, 27 yíníłtaʼ.) Paul éí doo bee shaa náhódóotʼįįł da nízingi doodaiiʼ Jiihóvah áháłníigi, biniinaásh diné bił nahojisneʼ? Ndagaʼ. Paul éí diné ayóóʼáyóʼní. Éí diné bibeʼiinaʼ ílı̨́įgo, dóó iiná doo ninítʼiʼii baa dah doolyéełgo yá yaa nitsíkees ńtʼééʼ. (1 Corinthians 9:​19-23) Nihí ałdóʼ Jiihóvah iiná yaa nitsíkeesígi átʼéego iiná baa nitsíikees doo. Jiihóvah éí diné tʼáá ałtso hashtʼeʼnináhizhdookah nízin áko hoolʼáágóó dajiináa doo. (2 Peter 3:9) Jiihóvah beʼiilʼı̨́į doogo diné ayóóʼííníiʼníi doo. Aʼáhí bee ániitʼéego bíniidlı̨́įgo diné bił nahwiilneʼgo nihił hózhǫ́ǫ doo.

12. Ádaa hastiʼ dooígi haʼátʼíí biniyé God bidineʼé ílı̨́įgo yaa nitsídaakees?

¹² Jiihóvah iiná yaa nitsíkeesígi átʼéego ádaa hastiʼ baa nitsíikees doo. Naʼiilbąąsgi dóó neiilnishgi ádaa siitiʼ doo. Diné, áádóó ádaa hastiʼ, índa nihitsʼíís bitah átʼéegi éí tsı̨́įłgo áʼdoolníiłgi dóó béeso biláahdi ílíinii átʼé. NihiDiyin God éí tʼáá áłahájįʼ tʼáá ákogi áánííł, áko nihi ałdóʼ ákóniitʼée doo. Aląąjįʼ naazíinii íiyisíí tʼáá hó nijizı̨́įgi dóó łahdę́ę́ʼ ádaa hastiʼgi bá baa ákodazhnízin doo. (Proverbs 22:3) Aląąjįʼ naazíinii éí ádaa hastiʼ dooígi yééniyiiłniiʼgo yíísíníłtsʼą́ą́ʼ. (Galatians 6:1) Jiihóvah iiná yaa nitsíkeesígi átʼéego ádaniitʼée doo, áko diné “bidił doo bee ádidahodidoołtʼih da.”

13, 14. Ízrel yá aląąjįʼ naazíinii éí Jiihóvah aheełtʼéego yee nihodiiʼaahii haitʼéego bedaʼjiłʼı̨́į doo?

¹³ Jiihóvah éí aląąjįʼ naazíinii shibee nihodiitʼaahii bedaʼołʼı̨́ yidííniid. Éí diné sesxı̨́įgi  áłtsé hazhóʼó dazhdínóołʼįįł. Áádóó diné iisxíinii baa hwiijiidoobaał daatsʼígo éí haitʼéego nitsíkeesgi dóó níléídę́ę́ʼ áátʼįįdgi hazhóʼó baa nídazhdóotʼįįł. Diné yiyiisxínígíí daatsʼí yijoołxáago yiyiisxı̨́įgi hazhóʼó baa nídazhdóotʼįįł. (Numbers 35:​20-24 yíníłtaʼ.) Naaki ooʼíinii tʼáá aaníígóó haa hoolneʼgo binahjįʼ hodiʼyoolyééł.—Numbers 35:30.

¹⁴ Íiyisíí áhóótʼįįdígi bééhoozingo aląąjįʼ naazíinii éí diné átʼéegi baa nitsídajikees doo, áátʼįįdígíí tʼéiyá ndagaʼ. Haʼátʼíí biniyé áhóótʼįįdgi hazhóʼó dazhdínóołʼįįł. Íiyisíí áká adoolwołígíí éí Jiihóvah biníłchʼi diyinii. Jiihóvah bihódząʼ, aa aʼááh, dóó aheełtʼéego yee nihodiiʼaahii bedaʼjiłʼı̨́į doo.—Exodus 34:​6, 7. 

15. Jesus éí diné bąąhági ádaaníiłii yaa nitsíkeesgi, Férisiiz éí haitʼéego doo ákódajítʼée da?

¹⁵ Férisiiz éí aa aʼáhí doo yee nidahoyiiʼaah da. Éí diné áátʼįįdígíí tʼéiyá deinéłʼı̨́, diné átʼéiigi éí ndagaʼ. Łah Matthew bighangi Jesus éí bídahoołʼaahii yił dah ayą́ągo Férisiiz dabiiłtsą́. Éí ádaaní: “Haʼátʼéegoshąʼ nanihizhnitinígíí tax nahalyéhígíí yiniyé naazdáii índa bąąhági ádaaníiłii bił daʼjiyą́?” Jesus ánídooʼniid: “Diné doo bąąh dah nidahazʼánígíí azeeʼ ííłʼíní doo yichʼįʼ dadikáah da, nidi bąąh dah nidahazʼánígíí tʼéiyá. Nidi nihílááh, díí ááhyiłníinii nihił béédahoozįįh, Aa aʼááh hasin éí nisin, nááhániihii éí dooda. Háálá tsʼídá tʼáá ákogi ádaatʼéii doo bíká ádideeshniił biniyé níyáa da, nidi bąąhági ádaaníiłii, . . . biniyé níyá.” (Matthew 9:​9-13) Ákosh Jesus éí bąąhági ádaaníiłii yichʼą́ą́h yáłtiʼgo ání? Ndagaʼ. Éí hashtʼeʼnináhizhdookah hóʼní. Jó éí íiyisíí biniyé nahojisneʼ. (Matthew 4:17) “Tax nahalyéhígíí yiniyé naazdáii índa bąąhági ádaaníiłii” éí łaʼ hashtʼeʼninádeeshdááł danízingi Jesus bił bééhózin. Éí Matthew bighandi tʼóó daʼdiidı̨́ı̨́ł doo danízin da, éí yeeʼ Jesus yikééʼ deiikai. (Mark 2:15) Jesus éí diné yaa nitsíkeesígi átʼéego Férisiiz doo ákódajítʼée da. Éí diné bąąhági átʼéii nilíinii yeeʼ doo hashtʼeʼninádoodáał da, danízin. Jiihóvah éí aheełtʼéego aa nitsíkeesgi dóó joobaʼgi tsʼídá doo ákódajítʼée da.

16. Judicial committee haʼátʼíí baa ákodazhnízin doo?

¹⁶ Aląąjįʼ naazíinii éí “tʼáá ákogi ááníiłii” ayóóʼáyóʼníinii Jiihóvah bedaʼjiłʼı̨́į doo. (Psalm 37:28) Áłtsé éí “bíndaʼídółkidgo áádóó hadanohtáago haleebee bíndaʼídídóołkił” áko tʼáá daatsʼí aaníí asdziihgo bąąhági áhóótʼįįd. Tʼáá aaníí ákóhóótʼįįdgo éí Diyin Bizaad bikʼehgóóígíí bikʼehgo ádazhdoolííł. (Deuteronomy 13:​12-14) Łaʼda tʼáá yéigo ádił asiihgo áádóó hashtʼeʼninádeeshdááł doodaiiʼ doo íinízingóoda éí judicial committee hazhóʼó baa ákodazhnízin doo. Díí éí nantłʼaii átʼé. Hashtʼeʼninádeeshdááł jinízingo éí bąąhági ájíítʼįįdgi bąą hániʼ łeh áádóó haitʼéego baa nitsíjíkees doo. (Revelation 3:3) Tʼáá íiyisíí hashtʼe ninádeeshdááł jinízingo éí haa hwiijiidoobaał. *—Footnote níníłʼı̨́.

17, 18. Diné ádił asiihgo éí aląąjįʼ naazíinii haitʼéego bił bééhózin éí tʼáá aaníí hashtʼeʼ ninádeeshdááł nízin doo? (Áłtsé eelkidígíí níníłʼı̨́.)

¹⁷ Jiihóvah dóó Jesus éí diné bijéí yee yaa nitsíkeesii bił bééhózin. Ndi aląąjįʼ naazíinii éí doo ákódaatʼée da. Áko aląąjįʼ sizíinii nilı̨́įgo łaʼda tʼáá aaníí hashtʼeʼ ninádeeshdááł nízingo haitʼéego  bee bééhózin doo? Áłtsé éí hódząʼ dóó hazhóʼó bee akʼidiʼyiitįįh bíká sodidíílzįįł. (1 Kings 3:9) Nááʼákóneʼ éí Diyin Bizaad dóó naalʼaʼii baʼahódlíinii naaltsoos ádayiilaaígíí choidííłʼįįł. Éí “nihokááʼjí kʼehgo yínííł danilı̨́įgo” dóó “Diyin God bíniikʼehgo yínííł ídlı̨́” éí bee tʼáá aaníí hashtʼeʼninádeeshdááł hwiindzingi yee nił ííshjání ííłʼı̨́į doo. (2 Corinthians 7:​10, 11) Diyin Bizaad biiʼdę́ę́ʼ, hashtʼeʼnináhéeskaii dóó tʼáadoo daaígíí haitʼéego tsídadeezkéezgi áádóó ádaʼiilaagi łaʼ dínííłʼįįł.

¹⁸ Tááʼ góneʼ éí diné ádił asiihígíí baa nitsíníkees, áátʼįįdígi tʼéiyá ndagaʼ. Haʼátʼíí biniyé ákójítʼé? Haʼátʼíí biniyé ákótʼéego ádá hozhdeezʼą́? Haʼátʼíí bee bichʼįʼ anáhóótʼiʼ dóó yiʼoh neelʼą́? Diyin Bizaad áníigo éí Oodlání yá aląąjįʼ sizíinii Jesus éí “dayiiłtseʼígíí bikʼehgo doo einítʼı̨́į da doo, índa yidiitsʼaʼii bikʼehgo doo ánihwiiʼaah da doo, nidi badahojoobáʼíii tsʼídá tʼáá ákwii átʼéego yikʼi hadidoodzih, áádóó nahasdzáán bikááʼgóó doo adááh yádaałtiʼii tʼáá ákogi átʼéego yá hadoodzih.” (Isaiah 11:​3, 4) Aląąjįʼ nisoozı̨́įgo ádanihiʼdilyaaígíí, Jesus éí Oodlání baa ádahołyą́ą doo biniyé ninihiníłtı̨́, áko aheełtʼéego dóó aa aʼáhí bee á nidahodiyooʼaahgi yee nihíká análwoʼ doo. (Matthew 18:​18-20) Ayóó átʼéego baa ahééh daniidzin, aląąjįʼ naazíinii nihaa ádahályą́! Áádóó aheełtʼéego aa nitsáhákees dóó aa aʼáhí hwiindzingi yee nihíká anájah.

19. Kintahjįʼ biniitʼaa aʼniichéehii bitsʼą́ą́dóó naʼnitinii háiidígíí lá bikʼeh áníshtʼée doo nínízin?

¹⁹ Mózes biniitʼaa bee hazʼáanii yę́ę éí “tʼáá yíní átʼéegi índa tʼáá aaníinii nił bééhózin” biiʼ hólǫ́. Éí Jiihóvah átʼéiigi dóó binahjįʼ bibee naʼnitin yee nanihinitin. (Romans 2:20) Kintahjįʼ biniitʼaa aʼniichéehii éí bee naʼnitingo aląąjįʼ naazíinii éí “tʼáá ákogi átʼéego” yee nidahodiyiiʼaah. Áádóó tʼáá áníiltso éí “dajiinohbaʼ índa baa aʼáhí danohsin” danihidiʼní. (Zechariah 7:9) Azhą́ shı̨́ı̨́ Mózes biniitʼaa bee hazʼáanii yę́ę doo bikʼehgóó ádeiʼníił da ndi, Jiihóvah doo łah ánáʼnéeh da. Aheełtʼéego aa nitsáhákees dóó aa aʼáhí hwiindzingi tʼahdii ílı̨́įgo yaa nitsíkees. Diyin kótʼéii haDiyingo baa hózhǫ́. Áko yee átʼéii bedaʼiilʼı̨́įgo binahjįʼ biyaa hasihgi dahoniidlǫ́ǫgo nihaa áhályą́ą doo!