1. Neʼiinaʼ siláagi haʼátʼíísh ayóó nił ílı̨́?

NEʼIINAʼ siláagi haʼátʼíísh ayóó nił ílı̨́? Jiihóvah bidineʼé éí bił ałkʼis niidlı̨́įgo tʼáá íiyisíí bił nilı̨́. Doo éí tʼáá haʼátʼíhída bił ałnádoolyeeł da. Tʼáá aaníinii Diyin Bizaad biiʼdę́ę́ʼ ayóóʼííníiʼníigo, éí Jiihóvah bikʼis niidlı̨́į dooígíí bee nihá ahóótʼiʼ.—Colossians 1:​9, 10.

2. Haʼátʼíísh tʼáá aaníinii nihił nilı̨́, dóó haʼátʼíí biniinaa? (Áłtsé adahaskidígíí níníłʼı̨́.)

² Jiihóvah éí Nanihinitiní nilı̨́. Diyin Bizaad choyoołʼı̨́įgo tʼáá aaníinii yee nihínootı̨́ı̨́ł. Éí binahjįʼ bízhiʼ dóó beʼayóóʼóʼóʼniʼ bíhwiilʼaah, nááná hódząʼ, tʼáá ákogi éʼétʼéii, índa adziilii. Bíhwiilʼą́ą́ʼ ayóóʼánihóʼnínígíí binahjįʼ biYeʼ ayóóʼáyóʼníigo nihá ninéidiníʼą́. Jiihóvah éí biNahatʼaʼ biYeʼ binahjįʼ yee nanihinitin. Haʼahóní nihá yee hasʼą́, éí yáʼąąshdi anoint ádaalyaaígíí doodaiiʼ nahasdzáán bikáaʼgi ayóó áhonóolingi “dibé náánáłaʼ.” (John 10:16) Jiihóvah éí iiná yee nanihinitin. Tʼáá aaníinii bíhwiilʼą́ą́ʼígíí éí óola nahalin  háálá éí Ánihiilaii áhą́dígo bikééʼ yiidáałgo nihíká eelwod. Éí akʼidiʼdiitı̨́ı̨́ł yee nihíká análwoʼgo iiná ádiilnííł.

3. Jiihóvaásh tʼáá aaníinii béeso bą́ą́h ílı̨́ nihiłní?

³ Jiihóvah éí bił hadleeʼ. Tʼáá íiyisíí bił hadleeʼgo biYeʼ nihá ninéidiníʼą́. Jiihóvah éí bílaʼashdlaʼii tʼáá aaníinii danízinígíí haintá. Yikʼihinitah, áádóó tʼáá aaníinii yił ííshjání ádeileʼ. Tʼáá aaníinii bíhwiidiilʼáłígíí doo béeso bą́ą́h ílı̨́ nihididooniił da. Ałkʼidą́ą́ʼ, łaʼ hastiin léiʼ Sáíman joolyéego éí yilʼaadii Peter kǫ́ǫ́ béeso bizhdííniid níłchʼi diyinii łahjįʼ diné bichʼįʼ kónílééh jiníigo. Peter áháłní ákótʼéego nitsíníkeesgo éí doo ákótʼée da, hałní: “Nibéeso tʼáá bił ánídįįh, háálá Diyin God eidiyiiʼaahii béeso bikʼé nidííléełgo tsídíníkééz!” (Acts 8:​18-20) “Tʼáá aaníinii nahíłniih” haʼátʼíísh óolyé?

4. Tʼáá aaníinii éí haʼátʼíísh bíhwiidiilʼááł?

⁴ Proverbs 23:23 yíníłtaʼ. Diyin Bizaad biyiʼdóó tʼáá aaníinii bíhwiidiilʼááł éí tsʼídá yéigo bíká neiilnish doo. Neʼiinaʼ siláagi shı̨́ı̨́ tʼáá haʼátʼíhída ninádidííʼáałgo tʼáá aaníinii choidííłtʼeeł. Tʼáá aaníinii ‘nahidííłnih.’ Díí éí bíhwiidiilʼáałgo ííłní. Díí éí ‘doo nahóniih da’ doodaiiʼ tʼáá aaníinii kʼehgo iiná íníłʼį tʼááká nahjįʼ kóólééh. Haitʼéego Diyin Bizaad biyiʼdę́ę́ʼ tʼáá aaníinii ‘nahidííłnih’? Díkwíísh bą́ą́h ílı̨́? Díí naʼídíkid bíhwiilʼaahgo tʼáá aaníinii nihił nilı̨́įgo nihíká adoolwoł. Tʼáá aaníinii yéigo niłdzilgo bee sínízı̨́į doo áádóó ałdóʼ doo ninádidííʼáał da. Jiihóvah bitsʼą́ą́dę́ę́ʼ tʼáá aaníinii ílíinii tsʼídá hazhóʼó bikʼidiʼdiitı̨́ı̨́ł.

5. Haitʼéego béeso tʼáágééd tʼáá aaníinii nahidííłnih? Łaʼ baa chʼíhoníʼaah.

⁵ Azhą́ shı̨́ı̨́ doo bikʼeh azláa da ndi éí doo bíká neiilnish da doo. Proverbs 23:23gi Hííbrew saadjįʼ “nahíłniih” éí shójoołtʼeeh ałdóʼ óolyé. Díí saad tʼáá áłah éí diné łaʼda tʼáadoo leʼé ninéidiʼaahgo tʼáá íiyisíí yinízinígíí shóyoołtʼeeh. Díísh haitʼéego óolyé? Díí baa nitsíníkees: Łaʼda akʼáán tʼáá jííkʼe neiniih. Tʼáásh bíniʼdii akʼáán tʼóó hooghandi níłtsooz? Ndagaʼ, akʼáán éí bíká diidááł dóó hooghangóó nidiiltsos. Doo éí béeso bą́ą́h ílı̨́į da ndi nihí éí bíká diidááł dóó nídidííłtsoos. Éigi átʼéego, tʼáá aaníinii bíhwiidiilʼáłíģíí éí ałdóʼ doo béeso bą́ą́h ílı̨́į da, ákondi bíká neiilnishgo shóidííłtʼeeł.

6. Haitʼéego tʼáá aaníinii nihíká adoolwoł?

⁶ Isaiah 55:1 yíníłtaʼ. Díí saad dashijaaʼígíí bitsʼą́ą́dóó bíhwiilʼą́ą́ʼígíí éí Jiihóvah tʼáá aaníinii nahíłniih, nihiłní. Jiihóvah éí tʼáá aaníinii bizaad éí tó, abeʼ, dóó wáin nahalin. (Isaiah 55:​2, 3) Dibááʼ jílı̨́įgo, tó sikʼaz éí hatah yáʼáhootʼéehgo áyósin. Tʼáá ákótʼéego, tʼáá aaníinii bíhwiilʼaahgo nihitah yáʼáhootʼéehgo áyósin. Abeʼ éí áłchíní bitsxeʼgo áyósin. Tʼáá ákótʼéego, tʼáá aaníinii Diyin Bizaad biyiʼdę́ę́ʼ Jiihóvah bikʼis niidlı̨́įgi bidziilgo áyósin. Jiihóvah ání, shizaad éí wáin nahalin. Haitʼéego? Diyin Bizaad ání, wáin éí diné bił hózhǫ́ǫgo áyósin. (Psalm 104:15) Jiihóvah ání, ‘wáin nahíłniih’ éí biniinaaígíí bił bééhózin bikʼeh hwiiniilʼı̨́įgo, éí nihił dahózhǫ́ǫ doo. (Psalm 19:8) Jiihóvah éí tó dóó wáin yinahjįʼ yee nanihinitin haitʼéego tʼáá aaníinii bíhwiidiilʼáłígíí nihíká adoolwoł. Kʼad éí saad  ashdlaʼ hazhóʼó bídahwiidiilʼááł binahjįʼ tʼáá aaníinii doo nahjįʼ kódadiilníił da.

7. Haʼátʼíísh biniinaa łaʼda tʼáá nizaagóó tʼáá aaníinii bíhwiidiilʼááł?

⁷ Baa ázhditʼaahgo. Haitʼéego tʼáá aaníinii nahizhdołnih? Tʼáá náásgóó haneʼ yáʼátʼéehii yísíníłtsʼą́ą́ʼ, Diyin Bizaad dóó naaltsoos yíníłtaʼ, dóó Diyin Bizaad bóhoołʼaah Jiihóvah Yá Dahalneʼígíí bił. Áłah náʼádleeh dóó bá hashtʼeʼáníʼdiilʼįįh. Tʼáá aaníinii choisiiltʼeʼgo, áłtséédą́ą́ʼ íitʼįįł yę́ę kʼad éí doo ádeitʼı̨́į da. (Ephesians 5:​15, 16 yíníłtaʼ.) Díkwíísh nídidooził łaʼda Diyin Bizaad bitsʼą́ą́dę́ę́ʼ naʼnitinígíí bíhwiideeshʼááł nínízin? Diné éí tʼáá ałʼąą átʼéego íhoołʼaah. Tʼáá áłahjįʼ éí Jiihóvah bee hódzą́, bikʼehgo oodááł, dóó áyiilaaígíí náásgóó bíhwiilʼaah doo. (Romans 11:33) Naaltsoos Watch Tower tsʼídá áłtsé ályaaígíí yaa chʼíhoníʼą́ tʼáá aaníinii éí “chʼilátah hózhǫǫd yázhí” nahalin, áádóó ání: “Tʼááłaʼí tʼáá aaníinii chʼilátah hózhǫǫd ndiísh tʼáá nihił dahózhǫ́ǫ doo, God éí tʼáá átʼé tʼáá aaníinii doo nihaididooʼáał da. Ałtso ałhąąh ályaago, łaʼ hanáázhnitʼaa doo.” Tʼáá nihí ádá naʼídídíilkił, ‘Haash néelą́ą́ʼ Jiihóvah bíhoołʼą́ą́ʼ?’ Azhą́ shı̨́ı̨́ hoolʼáágóó iiná nihee hólǫ́ǫ ndi, tʼóó ahayóí Jiihóvah baa íhwiidiilʼáałgo átʼé. Kʼad éí ląʼí bínááhoołʼáahgo baa ádinítʼaah. Łaʼ kótʼéego baa chʼíhootʼą́.

8. Íhoołʼaahii éísh haʼátʼíí ninádeidiyiiʼaah, dóó éí binahjįʼ éísh haitʼée łeh?

⁸ Mariko, * (footnote níníłʼı̨́) asdzání nooséłí nilı̨́įgo Japandę́ę́ʼ, éí New York City, United Statesgóó jiníná íízhdóołtah biniyé. Nihisister pioneer nilı̨́įgo yáʼátʼéehgo haneʼígíí yee yił hólneʼ, haghandi haa níyá. Mariko tʼáá íídą́ą́ʼ hweʼoodląʼ hólǫ́, ndi Diyin Bizaad bóhwiijiiłʼaahgo baa nízhdiidzá. Bohojoołʼaahígíí hoł nilı̨́įgo, naakidi damóo náʼoodleełgo hazhóʼó íhooshʼaah jinízin. Azhą́ shı̨́ı̨́ Mariko ajółtaʼ dóó naanish yázhí joolnish ndi áłah náʼádleehgo ałnáájídááh baa nízhdiidzá. Tʼáá aaníinii hazhóʼó bíhwiideeshʼááł jiniizı̨́ı̨́ʼ. Áádóó honeeni baa hoł hózhónę́ę éí doo akǫ́ǫ́ nijigháa da silı̨́ı̨́ʼ. Łaʼ éí nahjįʼ kójiilaa, áko Mariko éí Jiihóvah bił áhą́dígo ázhdólzingo jideeyá. Tʼáadoo naa hahí baptize áhoʼdiilyaa. Hastą́ą́ nídeezid dóó bikʼijįʼ, 2006 yihah yę́ędą́ą́ʼ, pioneer jizlı̨́ı̨́ʼ, áko dííshjı̨́įdi tʼah ndi pioneer ajíłʼı̨́.

9. Tʼáá aaníinii bíhwiilʼą́ą́ʼígíí éísh haitʼéego naalyéhé baa nitsíikees?

⁹ Naalyéhé. Tʼáá aaníinii hazhóʼó bíhwiideeshʼááł jinízingo, łaʼ naanish tʼóó ahayóí béeso nidayiileeh yę́ę ninádidiitʼááł. Díí baa nitsíníkees, Peter dóó Andrew łóóʼ hayiileehí nilı̨́ı̨́ ńtʼééʼ áko Jesus, ‘shá nahołneʼ,’ hodííniid. Łóóʼ hahadleeh honaanish yę́ę tʼóó yitsʼą́ąjįʼ dah diiʼáázh. (Matthew 4:​18-20) Tʼáá aaníinii bóhwiiniłʼą́ąʼgo nihinaanish íníłʼínígíí bitsʼą́ąjįʼ dah didiidááł? Ndagaʼ. Diné éí naalnish doo,  háálá bighan hazʼą́ągi hazhóʼó yaa áhályą́ą doo. (1 Timothy 5:8) Ákondi tʼáá aaníinii bóhwiiniłʼą́ąʼgo, naalyéhé ayóóʼííníʼnínę́ę łahgo átʼéego baa nitsíníkees doo. Áłtsé bóhwiiniłʼą́ʼígíí éí neʼiinaʼ siláagi hazhóʼó baa nitsíníkees doo. Jesus ání: “Nahasdzáán bikáaʼgi . . . nihinaalyeʼé daʼílíinii tʼáadoo ádá hashtʼeʼ nidahidohʼníłí.” Ákondi saad haʼahóní yee nihichʼįʼ yáłtiʼ: “Yáʼąąshdi . . . nihinaalyeʼé ádá hashtʼeʼ nidahidohʼnííł.” (Matthew 6:​19, 20) Łaʼ ániid naaghá asdzání Maria wolyéego ákódzaa.

10. Łaʼ atʼééké yázhí nilı̨́įgo éísh haʼátʼíí ninéidiníʼą́, dóó haitʼéego yaa nitsékees?

¹⁰ Maria éí golf ayóó bízhneedlı̨́įgo bee nijiné, tʼah atʼééké yázhí jílı̨́ı̨́ yę́ędą́ą́ʼ. High school ákweʼé tʼóó yówehda nizhónígo jooł bee nijiné. Áádóó wódahgo óltaʼgóó scholarship haa deetʼą́. Áko Maria tʼáá íiyisíí professional golfer nishłı̨́į doo índa béeso tʼóó ahayóí ádeeshłiił jinízin ńtʼééʼ. Diyin Bizaad bóhwiijiiłʼaahgo baa nízhdiidzá. Diyin Bizaad bitsʼą́ą́dóó íhojiiłʼaahígíí ayóó baa hoł hózhǫ́ áádóó hweʼiinaʼ bikʼehgo jideeyá. Ájíní, “Binahjįʼ sheʼiinaʼ siláagi hashtʼeeshłaa Diyin Bizaad ánínígíí bikʼehgo dooládóʼ tʼáá íiyisíí baa shił hózhǫ́ǫ da.” Maria yaa ákoniizı̨́ı̨́ʼ tʼáá nantłʼago Jiihóvah bikééʼ joogáał dooígíí índa daanéʼé baa nijigháhígíí ałdóʼ. (Matthew 6:24) Áádóó professional golfer nishłı̨́į doo jinízin yę́ę éí ninázhdiníʼą́ háálá yáʼátʼéhígíí éí bikʼi níyá. Dííshjı̨́įdi éí pioneer nilı̨́įgo bił hoolzhish áádóó ání, “Shił hózhǫ́, sheʼiinaʼ yishtʼihígíí baa ahééh nisin.”

11. Tʼáá aaníinii bíhwiilʼą́ąʼgo bił ahídineelnánę́ę haash dadoonííł?

¹¹ Náánáłaʼ danihikʼis. Diyin Bizaad bíhwiilʼą́ą́ʼígíí bikʼeh hwiiniilʼı̨́įgo éí nihikʼis doodaiiʼ nihikʼéí nihichʼįʼ łahgo átʼée łeh. Jesus díí yee nihíká eelwod sodoolzingo bikééʼ nidaakaígíí yá: “Nitʼáá aaníinii yee dadiyingo ádanileʼ; nizaad éí tʼáá aaníinii átʼé.” (John 17:17) “Dadiyingo” éí ałtsʼá jiiníiłgo óolyé. Jiihóvah éí łahgo ániitʼée doo nihóʼní, háálá díí nihokááʼgóó dineʼé bił nidahaztʼiʼii doo bikʼehgo ániitʼée da. Biniinaaígíí éí Diyin Bizaad bikʼeh hwiiniilʼı̨́. Azhą́ nihikʼis dóó nihikʼéí ayóóʼííníiʼníi ndi, doo łaʼ nihichʼįʼ kódaatʼée da łeh. Łaʼ ałdóʼ nihikʼijįʼ yádaałtiʼ doo. Díí éí doo tʼóó nihił ahayóí da doo. Jesus ání: “Diné tʼáá hó haʼáłchíní łaʼ hweʼanaʼí danilı̨́į doo.” (Matthew 10:36) Béénílniih: Jesus yee haadzííʼ yę́ę, haa shı̨́ı̨́ néelą́ą́ʼ ninádííníʼą́ą ndi tʼáá aaníinii biniinaa nihí éí tsʼídá biláahgo nihaa nídoolyééł!—Mark 10:​28-30 yíníłtaʼ.

12. Hastiin Jew dineʼé nilı̨́įgo éísh haitʼéego tʼáá aaníinii yee yiizįʼ?

¹² Hastiin éí Aaron joolyé, Jew dineʼé nilı̨́įgo, éí hweʼoodląʼ God bízhiʼ doo dajózhíi da. God tʼáá aaníinii tʼáá íiyisíí bíhwiideeshʼááł jinízin. Ńtʼééʼ, łaʼ Jiihóvah  Yá Dahalneʼé Hííbrew kʼehjí saad dı̨́ı̨́ʼ ałkʼee sinilígíí bitaʼ góneʼé vowels eeʼnilgo, ákótʼéego bízhiʼ “Jiihóvah” bee wójíi lá. Aaron bił hózhǫǫd áádóó synagoguegóó jiníyá, rabbis bił hojoolneʼ! Yaa bił dahózhǫ́ǫ doo jinízingo bił hojoolneʼ tʼáá aaníinii God bízhiʼ bił chʼízhníʼą́ ńtʼééʼ. Doo bił dahózhǫ́ǫ da. Hakʼídahidizheeh dóó chʼídahoneeshchą́ą́ʼ. Aaron haghan hazʼą́ągi doo dahoniizı̨́įʼ da. Ákótʼée ndi tʼáá náásgóó Jiihóvah yíhoołʼaah. Náásgóó hodeeshzhiizhgo Aaron éí Jiihóvah Yá Dahalneʼé jizlı̨́ı̨́ʼ, dóó Jiihóvah bá nijilʼaʼ. Nihí ałdóʼ tʼáá aaníinii bíhwiilʼą́ąʼgo nihikʼéí dóó nihinaagóó łahgo ádoolnííł.

13. Tʼáá aaníinii bíhwiilʼą́ąʼgo éísh haitʼéego nitsíikees dóó íitʼįįłígíí łahgo átʼée dooleeł?

¹³ Tʼóó baaʼihgo nitsáhákeesígíí dóó íʼiilʼı̨́ı̨́łígíí. Tʼáá aanínígíí bíhwiilʼaahgo Jiihóvah bibee hazʼáanii baa nitsíikeesgo dóó bikʼehgo ániitʼé. Yilʼaadii Peter ání: “Áłchíní akʼeh hółʼínígi átʼéego Diyin God bikʼeh dahonołʼı̨́. Jesus tʼah doo béédahonohsįįh yę́ędą́ą́ʼ nihił adáádahaníí nítʼéeʼii tʼáadoo bikʼehgo dahinohnání.” Ánáádooʼniid: “Tʼáá ałtsojįʼ diyingo dahinohnáa doo.” (1 Peter 1:​14, 15) Ałkʼidą́ą́ʼ kin dahshijaaʼ éí Kórinth wolyéedi ląʼí diné doo ákótʼéégóó ádaʼoolʼįįł. Ákwíí kéédahatʼínígíí éí tʼóó baaʼihgo yaa naakai yę́ę nahjįʼ kódayiilaa, Jiihóvah bikʼis daniidlı̨́į doo daniizı̨́ı̨́ʼ. (1 Corinthians 6:​9-11) Dííshjı̨́įdi ałdóʼ ląʼída beʼiinaʼ łahgo átʼéego ádeiyiilaa. Peter kótʼéego yaa chʼíhoníʼą́: “Nihí łah doo Jew dineʼé danilíinii ádaatʼínígi ádaahtʼı̨́ı̨́ nítʼééʼ, baaʼihgo tsiʼnidaahkai nítʼééʼ, adádanoołníí nítʼééʼ, wáin daahdlą́ą́ nítʼééʼ, adlą́ nihił dahoneełni nítʼééʼ, tʼáá naʼníleʼdii nidaʼsoohdląʼ, índa eʼelyaii doo daaldinii bichʼįʼ nidahohłáá nítʼééʼ.”—1 Peter 4:3.

14. Łahgo átʼéego yaa nitsékeesígíí dóó oʼoolʼníłígíí, łaʼ baa chʼíhoníʼaah.

¹⁴ Devynn dóó Jasmine éí ajidlą́ągo ląʼí nááhai. Devynn éí nizhónígo bookkeeper baa áhojilyą́ bee hwééhoʼdílzin áko naanish tʼáá hatsʼąą naalyiz ajidlą́ągo biniinaa. Jasmine ałdóʼ hazáhochʼı̨́ dóó diné bikʼee jiilwoʼgo bee hwééhoʼdílzin. Hoł naa honeezdo ńtʼééʼ naaki Jiihóvah Yá Dahalneʼé missionaries atiingi haa níʼáázh. ‘Diyin Bizaadísh bíhwiidiilʼááł?’ hodííniid. Náá damóo dóó bikʼijįʼ haa níʼáázh ńtʼééʼ Jasmine dóó Devynn hoł naa honeezdo. Missionaries éí haa nánítʼáazhgo tʼóó hoł ahayóí tʼáá aaníí ayóóʼánihóʼníi lá, jiní. Missionaries naa nítʼáázh ńtʼééʼ łaʼ átʼéego hoł hazʼą́. Jasmine dóó Devynn éí tʼáá aaníinii óhwiidiilʼááł niizı̨́ı̨́ʼ, tʼáadoo hodinaʼí yíhoołʼaahígíí yikʼeh áánííł silı̨́ı̨́ʼ. Tááʼ nídeezid, doo ajidlą́ą da jizlı̨́ı̨́ʼ, hazhóʼó ahéʼéské binaaltsoos há ályaa. Kééhojitʼı̨́įgi diné yee há ákodaniizįįʼ Jasmine dóó Devynn éí iinaʼ łahgo átʼéego chʼízhníłtʼiʼ, éí binahjįʼ ląʼída ałdóʼ Diyin Bizaad yídahoołʼaahgo hahoolzhiizh.

15. Tʼáá aaníinii bíhwiilʼą́ąʼgo haʼátʼíísh éí tʼáá íiyisíí nihá nanitłʼah dooleeł, dóó haʼátʼíí biniinaa?

¹⁵ Kééhwiitʼı̨́įgi ádaʼoolʼįįłígíí. Ákódaatʼéhígíí éí Jiihóvah doo bił yáʼátʼéeh da, doo béézhdiilwoʼ da nihá ndanitłʼah ndi. Jiihóvah yídahoołʼą́ą́ʼ ndi łaʼ tʼah ndi bá ndanitłʼah nahjįʼ kódeidoolíłígíí. Bighan hazʼą́ągi, yił nidaalnishii,  dóó bikʼis danilínígíí haaléitʼéego shaa nitsídaahkees danízin. Łaʼ ádaʼoolʼįįłii ayóó bóhoneedlı̨́ dóó baa honeeni éí doodaiiʼ ayóóʼádeíníiʼníi ndi Jiihóvah éí yijoołxá. Łaʼ háida bitah honeezgaigo hataałii bichʼįʼ choiniilʼı̨́įgo, díí tʼáá íiyisíí Jiihóvah yijoołxá. (Deuteronomy 18:​9-13) Haʼátʼíísh éí nihíká adoolwoł bee nihidziilgo Jiihóvah bikʼeh hwiiniilʼı̨́į doo? Ałkʼidą́ą́ʼ Oodlání éí Éfesasdi kéédahatʼínę́ę éidíígíí átʼéego ádaʼoolʼįįłígíí doo akʼeh ádaaníił da silı̨́ı̨́ʼ. Nihí ałdóʼ éí bitsʼą́ą́dóó íhwiidiilʼáałgo átʼé.

16. Éfesasdi éísh haʼátʼíí ninádeideezʼą́?

¹⁶ Ałkʼidą́ą́ʼ Éfesas kin dashijaaʼígi ákweʼé nidahałáago yaa naakai níłchʼi diyinii áká adoolwoł biniyé. Tʼáá aaníinii yídahoołʼą́ą́ʼ, Oodlání haash daadzaa? Diyin Bizaad yaa halneʼ: “Diné naʼadloʼ bee nidahojiłáii ląʼí handaaltsoos áłah ádajiilaago diné tʼáá ałtso dabinááł dazhdííłid, áko bą́ą́h ílı̨́ı̨́ nítʼééʼ yę́ę dajííłtaʼ, nítʼééʼ béésh łigaii ashdladiindi mííl bą́ą́h ílı̨́ı̨́ nítʼééʼ lá. Áko Bóhólníihii [Jiihóvah] bizaad bilááh yileełgo aláahdi átʼéii silı̨́ı̨́ʼ.” (Acts 19:​19, 20) Oodlání binaaltsoos ałtso nahjįʼ kódayiilaa. Áko Jiihóvah bikʼijisdliʼ.

17. (a) Haʼátʼíishąʼ łaʼ ninádííníʼą́ tʼáá aaníinii choisiiltʼeʼ doo? (b) Haʼátʼíísh ndaʼídíkidígíí baa nínáádadíitʼįįł?

¹⁷ Nishąʼ éí haʼátʼíí ninádííníʼą́ tʼáá aaníinii bíhwiiniłʼą́ą́ʼ? Tʼáá áníiltso ádeehadiidzííʼ Jiihóvah hazhóʼó bitsʼą́ą́dóó íhwiidiilʼááł diiʼní. Nihí shı̨́ı̨́ ałdóʼ naanish łaʼ nahjįʼ anídahidiitʼą́ azhą́ tʼóó ahayóí nahalyéii ńtʼééʼ ndi. Náánáłaʼ ałdóʼ danihikʼis doodaiiʼ bił haijééʼ bitsʼą́ąjįʼ dahidiikai. Náánáłaʼ nitsíikeesígíí dóó íitʼįįłígíí łahgo átʼéego ádeiilyaa. Ádaʼoolʼįįłígíí łaʼ bitsʼą́ąjįʼ dahidiikai háálá Jiihóvah doo bił yáʼátʼéeh da. Nihił bééhózin tʼáá aaníinii éí Diyin Bizaad bitsʼą́ą́dę́ę́ʼ ayóó ílı̨́įgo átʼé, tʼáá haʼátʼíí shı̨́ı̨́ ninádahidiitʼánígíí biláahdi ílı̨́. Éí biniinaa Jiihóvah bił ahą́dí niidlı̨́įgo, háálá éí tsʼídá ílı̨́įgo niheʼiinaʼ siláagi. Baa nitsíníkees tʼáá átʼée ńtʼééʼ yáʼátʼéehii nee hólǫ́ǫgo átʼé díí tʼáá aaníinii shóisíníłtʼeʼígíí biniinaa. Haʼátʼíísh biniyé haa ‘nahidoonih’? Haitʼéego ákódoonííł? Haitʼéego éí tʼáá aaníinii doo nihaa ‘nahidoonih’ da? Díí bikéédóó baa nídadíitʼįįł.