1-2. (a) Ephesians 6:16 bikʼehgo haʼátʼíí biniyé ‘oodląʼ achʼą́ą́h naalyéii’ nitsaaígíí nihee hólǫ́ǫ doo ní? (b) Haʼátʼíí baa nídadíitʼįįł?

NIÍSH éí ‘oodląʼ achʼą́ą́h naalyéii’ nitsaaígíí nee hólǫ́? (Ephesians 6:16 yíníłtaʼ.) Bééhózinígo nee hólǫ́ǫgo shı̨́ı̨́ átʼé. Nitsaago achʼą́ą́h naalyéii éí bineʼ naʼadziʼígi átʼéego éí doo yáʼádaashxóonii, atéʼélʼı̨́, índa doo dadiyinii ádaatʼéii bitsʼąą neʼoodląʼ yaa áhályą́.

² “Nihoogháahjįʼ yoołkáałgo” biiʼ kééhwiitʼı̨́, áko niheʼoodląʼ bee nanihíhonitaahgo hoolzhish doo. (2 Tim. 3:1) Neʼoodląʼ bee achʼą́ą́h síníłʼánígíí éí haitʼéego bidziilgo íínísin doo? Haitʼéego yéigo bąąh dah sínítı̨́į doo? Díí baa nídadíitʼįįł.

3. Siláo nidaabaahii éí bibee achʼą́ą́h naalyéii haitʼéego yaa ádahalyą́ą́ ńtʼééʼ? Éí haʼátʼíí biniyé?

³ Ałkʼidą́ą́ʼ siláo nidaabaahii bibee achʼą́ą́h naalyéii éí akał bikʼídaastiʼ ńtʼééʼ. Éí akʼah yee nideiłtłahgo akał tʼáá bee dadinaʼ áádóó béésh bee ályaaígi doo ńdiniichxíih da biniyé yaa ádahalyą́. Bitsʼą́ą́ʼ yíchxǫʼgoda éí tʼáá bí hashtʼéidoodlííł, áko ałkʼi náájiijéeʼgo tʼáá íídą́ą́ʼ bá hashtʼeetʼée doo. Díí éí haitʼéego neʼoodląʼ bił ahídéétʼiʼ?

4. Neʼoodląʼ bee achʼą́ą́h naalyéii haʼátʼíí biniyé baa áhólyą́ą doo? Éí haitʼéego baa áhólyą́ą doo?

⁴ Siláo nidaabaahii nahalingo ni ałdóʼ nibee achʼą́ą́h naalyéii baa áhólyą́, áko bee hashtʼedíínítʼée doo. Oodlání ídlı̨́įgi éí níłchʼi danilı̨́įgo doo yáʼádaashxóonii bił daʼahiigą́.  (Eph. 6:​10-12) Niheʼoodląʼ bee achʼą́ą́h naalyéii éí doo náánáłaʼda nihá yaa áhályą́ą da doo. Niheʼoodląʼ bee nihídahodínóotah, éí haitʼéego biniyé hashtʼeʼádíínílzin doo? Áłtsé éí, Diyin shíká anílyeed bidiiʼníigo bichʼįʼ sodiilzin doo. Áádóó Diyin Bizaad bee ádinínílʼı̨́įgo Diyin íinízinígi átʼéego daastiʼ bee ánítʼé. (Heb. 4:12) Diyin Bizaad ání: “Nijéí tʼáá átʼé bee Bóhólníihii [Jiihóvah] baa dzíínílí; tʼáá ni nił bééhózinii éí tʼáadoo baʼíínílíhí.” (Prov. 3:​5, 6) Áko tʼah ániid nił hooʼaʼ yę́ęgi baa nitsíníkees éí haitʼéego hashtʼeinilaa? Béeso daastiʼ bee nichʼįʼ hodiisnááʼ? Hebrews 13:5 ání: “Tsʼídá doo nihikʼi dínéeshchéeł da; tsʼídá doo yóóʼanihidideeshʼáał da.” Díísh baa nitsíníkees łeh? Tʼáásh aaníí Jiihóvah shíká adoolwołgo átʼé nínízin? Ákwíinínízingo éí neʼoodląʼ bee achʼą́ą́h naalyéii bidziilgo íinisingo átʼéé lá.

5. Neʼoodląʼ átʼéegi bee ádinínílʼı̨́įgo haʼátʼíí bee ádaa ákodíníizįįłgo átʼé?

⁵ Haa shı̨́ı̨́ nízahjįʼ neʼoodląʼ doo bidziil da lágo, baa ákodíníizįįł. Éí tʼáadoo biniyéhígóó nitsééjíltłiʼgo, woochʼííd, áádóó ąąh nááhákaʼ éí neʼoodląʼ nitsʼą́ą́ʼ yiyííłchxǫʼ lágo baa ákodíníizįįł. Ákódzaago éí tʼóó tséʼádin doo nitsʼą́ą́ʼ doochxǫǫł dago haitʼéego hashtʼedíílííł?

6. Haʼátʼíí baa nitsééjíltłiʼgo yáʼátʼééh?

⁶ Nitsééjíltłiʼgo éí łahda tʼáadoo átʼéhí da. Jiihóvah dóó Jesus bił honiilzhǫ́ǫ doo niidzingo nitsinéiiltłiʼ łeh. (1 Cor. 7:32) Tʼáá yéigo doo ákǫ́ǫ́ íítʼįįdgóogo éí Diyin bił kʼé ahidiʼnínę́ęgi bąąh nihíniʼgo nitsinéiiltłiʼ łeh. (Ps. 38:18) Nihichʼooní bił honiilzhǫ́, áádóó hooghan hazʼą́ągi índa nihibrothers dóó nihisisters baa áhojilyą́ą dooleełgi bichʼįʼ hániʼ ííʼáa łeh.—1 Cor. 7:33; 2 Cor. 11:28.

7. Proverbs 29:25 bikʼehgo haʼátʼíí biniyé diné tʼáadoo binéiildzidí doo?

⁷ Ndi, tʼáadoo biniyéhígóó nitsééjíltłiʼgo éí niheʼoodląʼ nihitsʼą́ą́ʼ yidoołchxǫǫł. Chʼiyáán doodaiiʼ ééʼ bee achʼįʼ anáhóótʼiʼgoda bikʼee nitsééjíltłiʼ łeh. (Matt. 6:​31, 32) Tʼáadoo ayóó bikʼee nitsinéiiltłiʼí doo niidzingo éí naadeełii baa nitsíikeesgo baa nídidíídááł. Doodaiiʼ béeso bíchą́jídéelniʼ jileeh. Kwíitʼı̨́įgo éí Jiihóvah woodlánę́ęgi doo bidziil da dooleeł índa bił kʼé ahidiiʼnínę́ęgi diilchxǫǫł. (Mark 4:19; 1 Tim. 6:10) Doodaiiʼ kótʼéego shaa nitsídaakees niidzingo bikʼee nitsinínáánéiiltłiʼ doo. Jiihóvah doo bił hózhǫ́ǫ́góó ádiilníiłgi binéiildzid łeh, ndi shaa náhátʼı̨́, doodaiiʼ atíshidiʼdoolnííłjída aláahdi binéiildzid doo. Áko biniinaa bee achʼįʼ anídahaztʼiʼii bichʼįʼ haʼííníshníigo oodląʼ bidziilii índa doo nááhádzidii Jiihóvah baa néiniikąąh doo.—Proverbs 29:25 yíníłtaʼ; Luke 17:5.

8. Woochʼííd éí haitʼéego baa nitsíikees doo?

⁸ “Woochʼííd yizhéʼé” nilíinii Séítan éí diné łaʼ choyoołʼı̨́įgo Jiihóvah índa nihibrothers dóó nihisisters éí woochʼííd yee yaa nidahalneʼ. (John 8:44) Éí apostates danílíinii Internet, níłchʼi naalkidí áádóó daʼníłtsʼą́ą́ʼdę́ę́ʼ haneʼ bee ádaalneʼii biiʼdóó Jiihóvah bidineʼé tʼáá ádzaagóó yaa nidahalneʼ. Díí woochʼííd ádaatʼéii éí Séítan “bideezlaʼ [bikʼaaʼ] diltłiʼii” átʼé. (Eph. 6:16) Łaʼda kótʼéego woochʼííd yee nihichʼįʼ haadzihgo haa diiʼnííł? Doo yísíníiltsʼą́ąʼ da doo! Háálá Jiihóvah índa  nihibrothers deiniidlą́. Apostates doo bił ałchʼįʼ yádeiltiʼ da. Doo bił saad honiidlǫ́ǫ da doo, éí doodaiiʼ haitʼéego lá ááhyiłní, ndi doo niidzin da doo.

9. Haʼátʼíí biniinaa nihąąh nááhákaʼ łeh?

⁹ Ąąh nááhákaʼgo éí niheʼoodląʼ doo bidziil da íidoolííł. Bee nihichʼįʼ anáhóótʼiʼii éí tʼóó nahjįʼ kwíilʼı̨́įgo éí doo áhwiilyą́ą́góó ákwíitʼı̨́į doo. Tʼáá aaníí éí łahda nihąąh nááhákaʼ łeh. Bee nihichʼįʼ anáhóótʼiʼii éí tʼáadoo áłahjįʼ baa nitsíikeesí doo. Ákwíitʼı̨́įgo éí Jiihóvah yee ádee haadzííʼ yę́ę beidiyiiʼnah. (Rev. 21:​3, 4) Áádóó doo nihidziil da ánihidoolíiłgo biniinaa Jiihóvah bitsʼá diidááł. (Prov. 24:10) Ndi doo éí ákódiiʼníił da.

10. Nihisister naaltsoos áyiilaaígíí haʼátʼíí bitsʼą́ą́dóó bíhwiiniłʼą́ą́ʼ?

¹⁰ Nihisister łaʼ United Statesdóó naagháago éí bahastiin tʼáá yéigo bąąh dahasʼą́ągo yaa áhályą́. Jiihóvah Yá Dahalneʼé biheadquartersgóó áʼiilaago ání: “Yínííł bikʼee łahda tʼáá yéigo bee nihił náhooʼaah, ndi nihił chohooʼı̨́įgi yéigo bidziil. Tʼáá ałtsoní Jiihóvah yee nanihinitinii éí niheʼoodląʼ bidziil ánáyoodlííł áádóó bee haʼííníilní. Díí tʼáá íiyisíí bídin niidlı̨́. Éí Jiihóvah tʼáá bá nideilʼaʼgo ánihósin áádóó Séítan nihikʼijįʼ ayiiłtłʼiidii bee bikʼeh diidlı̨́.” Nihisister kóníigo binahjįʼ akʼeh dadiidlı̨́! Éí haitʼéego? Bee naʼíʼnítaahii éí Séítan bitsʼą́ą́dóó átʼéii átʼéego níníłʼı̨́. Jiihóvah éí bee nihiyiʼ hááhwiildóohii nilı̨́. Áko binaʼnitin nihichʼįʼ kwííłʼínígíí baa ahééh niidzin doo.

11. Niheʼoodląʼ daastiʼ bidziilgi, haʼátʼíí bee ádaa nitsíikees doo?

¹¹ Neʼoodląʼísh éí haaʼígida doo bidziil dago baa ákonínízin? Tʼah ániidídóó wóshdę́ę́ʼ, tʼáadoo biniyéhígóó bikʼee nitsééʼáltłiʼii éísh nikʼeh deesdlı̨́ı̨́ʼ? Apostates yoochʼííd ádeiłʼíinii, éísh bitsʼą́ąjįʼ kwíinidzaago tʼáadoo bił saad hosiníłı̨́įʼ da? Ąąh nááhákaʼ, éísh bikʼeh didlı̨́? Ákótʼée ládą́ą́ʼ neʼoodląʼ bidziil lá. Azhą́ ákótʼée ndi, Séítan éí łahgo yee atíʼáłʼíinii nihikʼijįʼ chonáánéidoołʼįįłgi bíká haʼísííd. Éí łaʼ baa nídadíitʼįįł.

12. Naadeełii ádaatʼéii éí ayóóʼííníiʼníigo haa nihidoolííł?

¹² Naadeełii ádaatʼéii ayóóʼííníiʼníigo éí niheʼoodląʼ doo bidziil da doo áádóó Jiihóvah bá naʼaʼaʼ yę́ęgi biʼoh íilʼı̨́į doo. Yilʼaadii Paul ání: “Diné łaʼ siláo nilíinii éí siláo ábiilaii yił hóshǫ́ǫ dooleełgo yidiilkaal łeh, doo siláo ídlı̨́ı̨́jí baa naʼaldeehii doo yee ádiníltłʼa da doo.” (2 Tim. 2:4) Rome bisiláo éí náánáłahjįʼ naanish índa bidínóołtłʼahii doo bee bá hazʼą́ą da ńtʼééʼ. Áko siláo éí bá bee hazʼáanii doo yikʼeh hółʼı̨́ı̨́góogo haa biʼdiilʼįįh?

13. Siláo éí haʼátʼíí biniyé naanish doo bíjíyoołwoł da doo?

¹³ Díí baa nitsíníkees: Siláo éí abínígo training yaa naakai, ńtʼééʼ łaʼ doo atah da. Éí kintahdi chʼiyáán baa nahaniih. Iʼííʼą́ągo siláo éí béésh ééʼ hashtʼedeilééh áádóó bidiltłish háádayiikʼaash. Ndi, chʼiyáán baa nahaniih yę́ę éí biiskání chʼiyáán baa ninááhidoonihígíí hashtʼeeléehgo yaa naaghá. Biiskání tʼáadoo hooyání anaʼí bikʼiijééʼ. Háidíígíí siláo tʼáá íídą́ą́ʼ hashtʼedítʼée doo, áádóó éí binaatʼáanii haa bił hózhǫ́ǫ doo? Háísh éí níighahdóó sizı̨́į doo nínízin? Siláo hashtʼeʼ áʼdólzinígíí doodaiiʼ ádineestłʼahígíí daastiʼ?

14. Christ bisiláo ídlı̨́įgi haʼátʼíí aláahdi ílı̨́įgo baa nitsíikees?

¹⁴ Siláo yáʼátʼéehgo ádaʼiilaaígi átʼéego nihiBóhólníihii Jiihóvah dóó Jesus nihaa bił hózhǫ́ǫ doo niidzingi haʼátʼíhída tʼáadoo nihiníłtłʼaaígóó ííníilzin doo. Díí éí Séítan bił hoogáłígíí biiʼdóó nídidoolyéełii tsʼídá biláahdi ílíinii átʼé. Jiihóvah bá neiilʼaʼgi bá hosiilʼą́ągo ííníilzin. Áádóó oodląʼ bee achʼą́ą́h naalyéii índa Diyin bitsʼą́ą́dę́ę́ʼ bee hadadíníitʼéii baa áhwiilyą́.

15. Paul éí haʼátʼíí nihiłní? Éí haʼátʼíí biniyé?

¹⁵ Tʼáá áłahájįʼ ádá haʼiilzíid doo! Háálá yilʼaadii Paul áníigo “adeeshtʼįįł danízinii” éí “naʼnitin woodláanii yitsʼábidínóoʼah.” (1 Tim. 6:​9, 10, NW)  Yitsʼábidínóoʼah níigi éí naadeełii ádaatʼéii nishóhwiiltʼeehgo baa nídidiidáałgo nihidinółtłʼa. Áko “doo hódzą́ą́góó nitsáhákees áádóó bił bidáádahaníinii” biih diitłish. Kódaatʼéii bidániilníinii éí bee atíʼdoolíiłii átʼé.

16. Luke 18:​18-23 binahjįʼ haʼátʼíí baa nitsíikees doo?

¹⁶ Ląʼígo naadeełii nahidiilnihgo bíniilʼą́ągo shı̨́ı̨́ átʼé. Doo bídin hwiindzinii náhideeshnih jinízingo, éísh tʼáadoo átʼéhí da? Ndagaʼ, ndi díí baa nitsíníkees: Haʼátʼíí shı̨́ı̨́ nahidiilnihgo bíniilʼą́ą́ shı̨́į ndi, baa áháyą́ą dooleełgiísh bíniilʼą́? Tʼáásh éí tʼéiyá ayóóʼííníiʼní diidleeł? Jesus éí dinééh léiʼ shikééʼ yínáałgo tʼáá ląʼígóó Diyin bá nanilʼaʼ doo yidííniid, ndi éí naadeełii ayóóʼáyóʼní, áko nihíísh ákóniitʼé? (Luke 18:​18-23 yíníłtaʼ.) Niheʼiinaʼ tʼóó bikiinígo ííníilzingo éí Diyin íinízinii íiʼnííłjí nihá yáʼátʼééh!

17. Haʼátʼíí tsʼídá doo beidiyiiʼnah da?

¹⁷ Tʼáá ákwíí jı̨́ Séítan bił hoogáłígíí nihichʼįʼ anaaʼ ádeiłʼı̨́įgo bił daʼahiigą́ągo átʼéegi béédeilniih doo, áko biniyé hashtʼeʼádííníilzin doo. (Rev. 12:17) Nihibrothers dóó nihisisters éí niheʼoodląʼ bee achʼą́ą́h naalyéii doo nihá dah deíʼaah da doo. Tʼáá nihí yéigo bąąh dah siitı̨́į doo.

18. Siláo bibee achʼą́ą́h naalyéii haʼátʼíí biniyé yéigo dayótąʼ ńtʼééʼ?

¹⁸ Siláo naabaahii nilı̨́įgo éí doo náldzidgóogo baa haʼniih łeh. Ndi bibee achʼą́ą́h naalyéii tʼáágééd hooghandi nádzáago éí yaa yádínóozįįł. Roman historian Tacitus ání: “Siláo éí bibee achʼą́ą́h naalyéii tʼóó yaa dáádiiyáago éí tʼáá yéigo baa yáhásinii átʼé.” Éí biniinaa siláo bibee achʼą́ą́h naalyéii yéigo dayótąʼ ńtʼééʼ.

19. ‘Oodląʼ achʼą́ą́h naalyéii’ nitsaaígíí haitʼéego bąąh dah siitı̨́į doo?

¹⁹ Kwíitʼı̨́įgo éí nihiʼachʼą́ą́h naalyéii bąąh dah siitı̨́į doo: Áłah náʼádleehgóó tʼáá ałhąąh néiidáah doo, áádóó Jiihóvah bízhiʼ índa biNahatʼaʼ baa nahwiilneʼ doo. (Heb. 10:​23-25) Tʼáá ákwíí jı̨́ Diyin Bizaad yíníiltaʼgo éí bínaʼniltinii bikʼehgóó yisháał doo diiʼníigo sodiilzin doo. (2 Tim. 3:​16, 17) Iiná doo ninítʼiʼii nihaa doolyéełgi, Séítan bibee atéʼélʼíinii nihikʼijįʼ choyoołʼíinii tsʼídá doo nihidídóołniił da. (Isa. 54:17) ‘Oodląʼ achʼą́ą́h naalyéii’ nitsaaígíí bineʼ neidziʼ. Nihibrothers dóó nihisisters bił danihidziilgo nisiidzı̨́. Doo éí tʼáá ákwíí jı̨́ tʼóó akʼeh dadiidlı̨́į da, Jesus éí Séítan índa bikééʼ naazíinii yikʼeh deesdlı̨́įʼgo éí nihił dahózhǫ́ǫgo Jesus bichʼijí nisiidzı̨́į doo.—Rev. 17:14; 20:10.