1-2. Oodlání éí haʼátʼíí biniyé naaltsoos Leviticus bízhneedlı̨́į doo?

YILʼAADII Paul éí Timothy díí saad bee bééjiyííłniiʼ: “Diyin God bizaad bee akʼeʼashchíinii tʼáá ałtso Diyin God ił halneʼgo bee akʼedaʼashchı̨́ . . . éí bíhooʼaah biniyé.” (2 Tim. 3:16) Diyin Bizaad bee akʼeʼashchínígíí éí Leviticus tʼáá bił. Łaʼ diné éí bee hazʼáanii Leviticus biiʼígíí baa dááʼdiildeeʼ daaní.

² Leviticus éí 3,500 nááhai yę́ędą́ą́ʼ bee akʼeʼashchı̨́. Jiihóvah éí “nanihinitin biniyé” díí nihá hashtʼeʼ niiníʼą́. (Rom. 15:4) Jiihóvah nitsékeesgi yaa halneʼ. Leviticus biiʼdę́ę́ʼ bee nídiʼnóotı̨́įłii ląʼí, áko dı̨́įʼgo dadíníilʼįįł.

3. Tʼáá nináháhááh bikʼeh haʼátʼíí biniyé kʼééhoodǫǫłgo nááʼiiniih ńtʼééʼ?

³ Naʼnitin áłtséhígíí: Jiihóvah bił honiilzhǫ́ǫgo tʼéí bichʼįʼ nááhiilniihii nihá yidínóozįįł. Tʼáá nináháhááh bikʼeh kʼééhoodǫǫłgo nááʼiiniih góneʼ Ízrel dineʼé éí naaldlooshii náádajiiłniih biniyé ahíníjiikah. Díí éí bąąhági ádajítʼéii yééhoyiiłnííh áádóó há nahjįʼ kódoolnííł biniyé ánáʼálʼįįh. Aláahgo nááʼiiłniihii naaldlooshii bidił tʼah doo náájiiłniihgóó áłtsé éí łahgo ílíinii átʼéii ázhdoolííł.

4. Leviticus 16:​12, 13 bikʼehgo aláahgo nááʼiiłniihii éí aláahgo hodiyin góneʼ yah iigháahgo haʼátʼíí áłtsé áyiiłʼįįh? (Naaltsoos bikááʼdę́ʼígíí níníłʼı̨́.)

⁴ Leviticus 16:​12, 13 yíníłtaʼ. Kʼééhoodǫǫłgo nááʼiiniih álnéehgo baa nitsíníkees. Aláahgo nááʼiiłniihii  éí níbaal biiʼ sohodizin biiʼ aláahgo hodiyin góneʼ táadi yah ajííyá. Áłtsé yah ajííyáago éí didlidgo łikání halchinii jookááł, łahjí éí ásaaʼ óola bee ályaago tsííd biiʼ hadeezbingo jookááł. Aláahgo hodiyin hazʼą́ą́ góneʼ bichʼą́ą́h aníbaalígíí bidáahgi áłtsé jizı̨́. Áádóó tʼáá íiyisíí hozdísingo yah ajííyá, éí ákóneʼé tsitsʼaaʼ dílzinii siʼánígíí bidááhdóó jizı̨́. Éí ákóneʼé Diyin Jiihóvah hólǫ́ǫgi jizı̨́! Didlidgo łikání halchinii éí tsííd łichxíʼígíí hazhóóʼógo bikʼi yayiiziid, áádóó łid łikání halchingo ákóneʼ hadéébįįd. * Áádóó tʼah yah ánáázhdoodáałgo éí naaldlooshii bidił náádahaazniiʼii aláahgo hodiyin góneʼ yah ázhdookááł. Áłtsé éí didlidgo łikání halchinii álʼįįh áádóó dił nááhániihígíí akééʼdóó álʼįįh.

5. Kʼééhoodǫǫłgo nááʼiiniihgi éí didlidgo łikání halchinii chooʼı̨́įgo haʼátʼíí bitsʼą́ą́dóó bíhooʼaah?

⁵ Kʼééhoodǫǫłgo nááʼiiniihgi éí didlidgo łikání halchinii chooʼı̨́įgo haʼátʼíí bitsʼą́ą́dóó bíhooʼaah? Diyin Bizaad éí Jiihóvah badaʼolíhígíí bisodizin éí didlidgo łikání halchinii nahalin ní. (Ps. 141:2; Rev. 5:8) Aláahgo nááʼiiłniihii tʼáá íiyisíí hodísin yę́ęgi átʼéego nihí ałdóʼ hodíníilzingo Jiihóvah bichʼįʼ sodiilzin doo. Tʼáá ałtsoní Áyiilaii, éí azhéʼé nahalingo bééhodiilzįįłgi yee nihá hasʼą́ągi índa áhánígo nihił hólǫ́ǫgi tʼáá íiyisíí baa ahééh daniidzin. (Jas. 4:8) Nihidínéelnáago nihikʼis nilı̨́! (Ps. 25:14) Bééhoniilzingo éí tʼáadoo beełtʼéhí da, áko haitʼéegoda doo bił hózhǫ́ǫ́góó ádiilníiłgi baa siitiʼ doo.

6. Aláahgo nááʼiiłniihii áłtsé didlidgo łikání halchinii áyiiłʼįįhgi haʼátʼíí bitsʼą́ą́dóó bíhooʼaah?

⁶ Béédeilniih, aláahgo nááʼiiłniihii éí naaldlooshii bidił náájiisniiʼii God há yidínóozįįłgo, áłtsé éí didlidgo łikání halchinii ázhdoolííł. Kótʼéego éʼélʼı̨́ haʼátʼíí yee nanihinitin? Jesus éí tʼah doo hweʼiinaʼ ninázhdíʼaahgóó, áłtsé éí łahgo ázhʼdoolííł. Kójiidzaago índa bílaʼashdlaʼii yisdázhdoonił. Éísh éí haʼátʼíí? Éí akééʼ asdzı̨́įgi Jesus ázhdoolíiłgo hweʼiinaʼ ninázhdiniʼánígíí Jiihóvah há néididoolééł. Áko biʼjiilaago éí Jiihóvah bikʼehgo iináájí yáʼátʼééh. Éí Hazhéʼé tʼéiyá nahaʼáii nilı̨́įgi ííshjání ájiilaa doo.

7. Jesus beʼiinaʼ neistʼiʼgi éí Bizhéʼé haitʼéego yaa bił hózhǫ́?

⁷ Jesus éí tʼáá ałtsojįʼ Jiihóvah yikʼeh hóółʼįįd. Tiʼhooníihgo dadootsaał índa adáhonooní áádóó achʼįʼ nahwiiʼná bee nabóhoneestą́ąʼ ndi, Bizhéʼé Jiihóvah hooʼááłjí yá ahidíízı̨́ı̨́ ńtʼééʼ. (Phil. 2:8) Bichʼįʼ nahwiiʼnáago Jesus éí “yéego áníigo áádóó binákʼeeshtoʼ náálı̨́įgo” sodilzin ńtʼééʼ. (Heb. 5:7) Bijéí tłʼááhdę́ę́ʼ náʼookąąhgo éí bee akʼeh hóʼı̨́ bidziil bá ánáyoodlííł. Jesus bisodizin éí didlidgo łikání halchinii nahalin, díí éí Jiihóvah bił yáʼátʼééh. Jesus beʼiinaʼ neistʼiʼgi Bizhéʼé yaa bił hózhǫ́ áádóó Jiihóvah tʼéiyá nahaʼáii nilı̨́įgi ííshjání áyiilaa.

8. Jesus beʼiiná neistʼiʼgi haitʼéego beʼiilʼı̨́į doo?

⁸ Nihí ałdóʼ Jesus beʼiiná neistʼiʼgi beʼiilʼı̨́į doo, áko Jiihóvah bikééʼ siidzı̨́įgo bikʼeh honiilʼı̨́į doo. Nihichʼįʼ  hodiiʼnáahgo Jiihóvah néinikąąhgo bichʼįʼ sodiilzin doo, háálá bił hózhǫ́ǫgo ííníilzin doo. Kwíitʼı̨́įgo éí Jiihóvah hooʼáałgi bikééʼ siidzı̨́į doo. Doo ákogi átʼéégóó hiniiʼnáago éí nihisodizin doo nihá yididootsʼı̨́įł da. Jiihóvah yee nihwiizʼáanii bikʼehgóó ániitʼéego éí nihisodizin łikání halchin doo. Doo bitsʼá niidááhgóó índa bikʼeh honiilʼı̨́įgo éí Nihizhéʼé yáʼąąshdi hólóonii bił honiilzhǫ́ǫ doo.—Prov. 27:11.

9. Ahééh hwiindzingo nááʼiiniih haʼátʼíí biniyé ánáʼálʼįįh ńtʼééʼ?

⁹ Naʼnitin naaki góneʼ: Jiihóvah bichʼįʼ ahééh daniidzin, éí biniinaa bá nideilʼaʼ. Ałkʼidą́ą́ʼ Ízrel dineʼé éí ahééh hwiindzingo nááʼiiniih deiłníigo ánídayiiłʼįįh yę́ę hazhóʼó bikʼidiʼdootı̨́ı̨́ł biniyé dadíníilʼįįł. * Naaltsoos Leviticus biiʼdóó bídahwiilʼą́ąʼgo éí Ízrel dineʼé łaʼ “ahééh nízingo” nááʼiiłnih. (Lev. 7:​11-13, 16-18) Díí éí tʼáá bí íinízingo átʼı̨́, háálá biDiyin Jiihóvah ayóóʼáyóʼní. Nááʼiisniiʼii, bikʼéí, índa náádaʼiiłniihii éí naaldlooshii nááhaazniiʼii bitsįʼ dajiyı̨́ı̨́h. Ndi łahdóó atsįʼ éí Jiihóvah bichʼįʼ nááhánih. Éí háidíígíí?

10. Leviticus 3:​6, 14-16 ahééh hwiindzingo nááʼiiniih yaa halneʼígíí haitʼéego Jesus éí Jiihóvah yá naasʼaʼgi bił aheełtʼé?

¹⁰ Naʼnitin tááʼ góneʼ: Jiihóvah ayóóʼádeíníiʼníigo bąą tʼáá ałtsoní bíniilʼáanii  bá íilʼı̨́. Jiihóvah éí naaldlooshii bikʼah aláahdi bił yáʼátʼééh. Bitsą́ siláii, bitsą́ áshkʼazhí tʼáá áłah, éí ílı̨́įgo yaa nitsékees. (Leviticus 3:​6, 14-16 yíníłtaʼ.) Ízrel dineʼé łaʼ kótʼéego nááʼiisniiʼgo éí aláahdi ílíinii Jiihóvah bichʼįʼ nááhideeshnih nízingo átʼı̨́. Jiihóvah éí díí Ízrel dineʼé tʼáá bí íinízingo ádzaaígíí yaa bił hózhǫ́. Tʼáá ákótʼéego Jesus tʼáá bí íinízingo tʼáá ałtsoní yíneelʼáanii bee Jiihóvah yá áátʼįįd. Áko ayóóʼáyóʼníigo yá naasʼaʼ. (John 14:31) Jesus éí Jiihóvah bibee hazʼáanii ayóóʼájóʼnínígíí binahjįʼ hoł hózhǫ́ǫgo Hazhéʼé íiníziníí biʼjiilaa. (Ps. 40:8) Jiihóvah éí Jesus tʼáá bí íinízingo há naasʼaʼgi baa hoł hózhǫ́.

11. Jiihóvah bá neiilʼaʼgi éí haitʼéego ahééh hwiindzingo nááʼiiniih nahalin, áádóó haitʼéego baa nitsíikees doo?

¹¹ Ahééh hwiindzingo nááʼiiniihgi átʼéego, tʼáá nihí Jiihóvah ayóóʼííníiʼnínígíí bikʼehgo bá neiilʼaʼ. Nihijéí tʼáá átʼé bee ayóóʼádeíníiʼní, áko tʼáá ałtsojįʼ bídaniilʼą́ągo bá nideilʼaʼ. Ląʼí mííl ánéelą́ągo dabidósinii éí ayóóʼádabóʼníigo bá ndaalʼaʼ! Díí shı̨́ı̨́ tʼáá íiyisíí bił yáʼátʼééh. Haʼátʼíí shı̨́ı̨́ ádeeshnííł niidzinii índa íiʼníiłii nihá yaa ákonízingi bee haʼííníilní. Náás sínílı̨́įʼgo Jiihóvah bá nanilʼaʼ yę́ę doo tʼáá ałtsojįʼ bíninilʼą́ą da shı̨́ı̨́, ákondi bá ádeeshnííł nínízingi éí ná yaa ákonízin. Jiihóvah ayóóʼííníʼnínígíí binahjįʼ tʼáá bíniilʼánígi bá ááníłígíí yaa bił hózhǫ́. Díí éí aláahdi átʼéii baa dííníʼą́ą doo.

12. Ahééh hwiindzingo nááʼiiniih éí Jiihóvah haitʼéego yaa nitsékees áádóó haitʼéego bee haʼahóní?

¹² Ahééh hwiindzingo nááʼiiniih éí haʼátʼíí bitsʼą́ą́dóó bíhooʼaah? Naaldlooshii bitsįʼ aláahdi yáʼátʼéehii ałtso díílidgo éí bilid dego bił iʼiijoołgo Jiihóvah bił yáʼátʼééh. Baa ákonínízin, tʼáá sínízı̨́ı̨́ ńtʼééʼ índa bínindlı̨́įgo Jiihóvah bá nanilʼaʼígíí yaa bił hózhǫ́ǫgo ninéłʼı̨́. (Col. 3:23) Naa bił hózhǫ́ǫgo baa nitsíníkees. Ayóóʼííníʼníigo bá nanilʼaʼígíí, azhą́ kóníshéhé ndi, ahoyéelʼáágóó bił nilı̨́įgo yénálniih doo.—Matt. 6:20; Heb. 6:10.

13. Leviticus 9:​23, 24 bikʼehgo Jiihóvah éí náádaʼiiłniihii ádaalyaagi bił yáʼíítʼéehgi haitʼéego ííshjání áyiilaa?

¹³ Naʼnitin dı̨́ı̨́ʼ góneʼ: Jiihóvah éí bidineʼé yikʼijidlí. 1512 B.C.E. yę́ędą́ą́ʼ Dził Sáínai bitsı̨́įgi níbaal biiʼ sohodizinii siʼą́. (Ex. 40:17) Mózes éí kwii Éran dóó biyeʼké náádaʼiiłniihii ádajileʼgo baa áłah ílı̨́. Ízrel dineʼé binááł díí nááʼiiłniihii ádabiʼdiilyaaígíí éí naaldlooshii nááhániih tsʼídá áłtsé ádeidoolííł biniyé áłah jílı̨́. (Lev. 9:​1-5). Díí náádaʼiiłniihii ádaalyaagi Jiihóvah bił yáʼátʼéehgi éí haitʼéego bééhoozin? Éran dóó Mózes éí diné áłah nilínígíí bikʼijisdliʼgo, yáʼąąshdę́ę́ʼ kǫʼ bee Jiihóvah éí náádahaazniiʼii ałtso iidííłkʼą́ą́ʼ.—Leviticus 9:​23, 24 yíníłtaʼ.

14. Éran bitsʼą́ą́dóó oochíiłii náádaʼiiłniihii ádabiʼdiilyaago éí haitʼéego Jesus bił ahídéétʼiʼ?

¹⁴ Aláahdi nááʼiiłniihii ályaagi éí haʼátʼíí bee łaʼ hoodzaa? Jó, éí Éran dóó biyeʼké nááʼiiłniihii ádabiʼdiilyaaígíí éí Jiihóvah bił yáʼátʼééh. Ízrel dineʼé ałdóʼ díí yaa ákodaniizı̨́ı̨́ʼ, áko náádaʼiiłniihii ádabiʼdiilyaaígíí yikééʼ niikai.  Díísh nihídéétʼiʼgo átʼé? Aooʼ! Ałkʼidą́ą́ʼ náádaʼiiłniihii yę́ę éí tsʼídá yáʼátʼéehgo nááʼiiłniihii dadooleełii bichahaʼoh dajílı̨́. Christ éí tsʼídá Aláahdi Nááʼiiłniihii nilı̨́ áádóó 144,000go náádaʼiiłniihii danilı̨́įgo éí Jesus yił yáʼąąshdi ndaalʼaʼ doo.—Heb. 4:14; 8:​3-5; 10:1.

15-16. Jiihóvah éí “baʼahódlíigo índa hóyą́ągo naalʼaʼí” haitʼéego yaa bił hózhǫ́?

¹⁵ 1919 yę́ędą́ą́ʼ Jesus éí brothers anoint ádaalyaago, áłchʼı̨́dígo éí “baʼahódlíigo índa hóyą́ągo naalʼaʼí” yiłníigo niinínil. Díí brothers éí nahaneʼgi alą́ąjįʼ yá naazı̨́, áádóó Christ yikééʼ deíkáahii “tʼáá áajįʼ anáhwiilzhíishgo yanáʼáltsoʼ.” (Matt. 24:45) Jiihóvah éí baʼahódlíigo índa hóyą́ągo naalʼaʼí yaa bił hózhónígíísh tʼáá bahatʼaadí?

¹⁶ Baʼahódlíigo índa hóyą́ągo naalʼaʼí bindaanish yę́ę Séítan índa bikééʼ naazíinii éí bitsʼą́ą́ʼ neinółtłʼahgo ádayósin. Áko éí binaanish doo łaʼ deidoolíił da nahalingo yitsʼą́ą́ʼ áyósin. Naakidi daʼahijoogą́ą́ʼ, atéʼélʼı̨́ doo neʼ kónéeh da, béeso bee achʼįʼ anidahwiiztʼiʼ, índa doo aheełtʼéégóó aa nitsáhákees. Ndi baʼahódlíigo índa hóyą́ągo naalʼaʼí éí doo neʼ kódaanééhgóó Christ yikééʼ deíkáahii Diyin bínaʼniltin yee yanídaʼałtsoʼ. Díí naʼnitin éí doo áłchʼı̨́dí da, doo bąąh ílíní da, índa 900dóó baʼaan saad ałʼąą ádaatʼéego dahólǫ́! Bahatʼaadígo Diyin bikééʼ sizı̨́. Nahaneʼgi ałdóʼ Jiihóvah yikʼijidlí. “Nahasdzáán nidahoneesʼą́ą́góó,” haneʼ yáʼátʼéehii baa haneʼ. (Matt. 24:14) Jiihóvah éí bidineʼé yikʼijidlí índa yichʼįʼ bił hadleeʼgo yooʼish.

17. Jiihóvah biorganization bikééʼ siidzı̨́įgi haitʼéego ííshjání íilʼı̨́į doo?

 ¹⁷ Díí baa nitsíníkees: ‘Jiihóvah bidineʼé dah yikahígíí bił anishtahgi, éísh baa ahééh nisin?’ Mózes dóó Éran bíyoołkááł yę́ędą́ą́ʼ éí náádaʼiiłniihii ádaalyaago yáʼąąshdę́ę́ʼ kǫʼ yee lą́ asłı̨́ı̨́ʼ yę́ęgi átʼéego, éí kʼad bidineʼé dah yikahígíí choyoołʼı̨́. Éí bąą ląʼígóó baa ahééh hwiindzin. (1 Thess. 5:18) Jiihóvah biorganization éí bikééʼ siidzı̨́įgi haitʼéego ííshjání íilʼı̨́į doo? Éí publications biiʼjįʼ índa áłah néiidleehgóó Diyin Bizaad bitsʼą́ą́dóó bee naʼnitingo ádaalyaaígíí bikʼehgóó yiidáał doo. Nahwiilneʼgo ałdóʼ akééʼ siidzı̨́įgi ííshjání íilʼı̨́į doo.—1 Cor. 15:58.

18. Nish éí haʼátʼíí ádíínííł?

¹⁸ Leviticus bitsʼą́ą́dóó bídahwiilʼą́ʼígíí bikʼehgóó ádaniitʼée doo. Kwíitʼı̨́įgo éí nááhiilniihii Jiihóvah yaa bił hózhǫ́. Bichʼįʼ ahééh niidzingo bá neiilʼaʼ doo. Nihijéí tʼáá átʼé bee Jiihóvah ayóóʼííníiʼníigo tʼáá ałtsoní bíniilʼáanii bá íilʼı̨́į doo. Tʼáadoo neʼ kwíiʼnéhé Jiihóvah biorganization choyoołʼínígíí bikééʼ siidzı̨́į doo, háálá éí yikʼijidlí. Jiihóvah Yá Halneʼé niidlı̨́įgo éí tʼáá íiyisíí nihił nilı̨́įgo ííníilzin doo!