1983 yihah góneʼ shiʼdizhchı̨́. Tʼáadoo átʼéhígóó shiyaa hooʼaʼ. Neeznáá shinááhaigo shitsʼíís tʼáá átʼé ayóó átʼéego neezgaigo hahoolzhiizh. Áádóó naaki nááhaigo shijáád chʼééh hidishnááh áádóó doo bidziil da. Éí bijı̨́ı̨́dóó doo naasháa da sélı̨́ı̨́ʼ áádóó doo náádínésą́ą da. Dííshjı̨́įdi áłchíní áníłtsooígi áníshtʼé.

Shąąh dahooʼaʼ dóó díkwíí shı̨́ı̨́ nídeezidgo tʼáá hooghangi sédáago Jiihóvah Yá Dahalneʼé naaki nihaa níʼáázh. Łaʼda nihaighahgo, bitsʼąą nídíshtʼįįh, ákondi nihaa níʼáazhgo tʼáadoo ákósdzaa da. Éí asdzání Paradise yaa halneʼgo, ashdlaʼ shinááhaigo disétsʼą́ą́ʼ yę́ę bénááshniiʼ. Íídą́ą́ʼ missionary Jethro wolyéego, Surinamedę́ę́ʼ, łaʼ nínádíziʼgo nihaa nádááh. Shizhéʼé Diyin Bizaad yee neineeztą́ą́ʼ. Jethro éí ayóó shaa joobaʼgo bínéshdin. Shinálí ałdóʼ tʼáá áłah Jiihóvah Yá Dahalneʼé áłah náʼádleehgóó bił ałnánáshkah ńtʼééʼ. Díí sáanii nihaa níʼázhígíí łaʼ Florence wolyé, éí łahgoósh bínááhwiidííłʼááł shidííniid. Áko aooʼ, dííniid.

Florence dóó bahastiin Justus yił shaa níʼáazhgo, Diyin Bizaad yee nashinítingo hahoolzhiizh. Naaltsoos doo yíníshtaʼgi yaa ákoniizı̨́ı̨́ʼ, áko shíká anáhiʼnilchéehgo bíhoołʼą́ą́ʼ. Tʼahádóó tʼáá shí naaltsoos yíníshtaʼ. Łah, shaa níʼáazhgo éí Suriname hoolyéégóó nihiʼdoolʼaad níigo shił hoolneʼ. Áko Oreallagi Diyin Bizaad yee ninááshidínóotįįłígíí tʼáá ádin. Áko éí baa yínííł nisin. Ndi, Jiihóvah doo shaa yoonéeh daaígi tʼáá íiyisíí baa shił hózhǫ́.

Tʼáadoo hodiinaʼí Floyd, pioneer nilı̨́įgo, Oreallagi níyá. Hooghan tahgóó nahojilneʼgo nihighangi jiníyá. Diyin Bizaad bee naʼnitin álʼı̨́įgi bee shił hojilneʼgo baa dloh niizı̨́ı̨́ʼ. “Haʼátʼíí biniyé yidloh?” shizhdííniid. Naaltsoos Haʼátʼíísh éí God Nihá yee Hoołʼaʼ? tʼáá íídą́ą́ʼ bíhoołʼą́ą́ʼ áádóó naaltsoos Knowledge That Leads to Everlasting Life éí bíhooshʼaah ńtʼééʼ dishní. * Bíhooshʼaah yę́ę neʼ kólyaaígíí bee bił hweeshneʼ. Áko Floyd éí Knowledge book neʼ kólyaa yę́ędóó yee nashineeztą́ą́ʼ. Ákondi hó ałdóʼ náánáłahgóó hoʼdoolʼaad, áko Diyin Bizaad yee nishidínóotı̨́įłii tʼáá ádingo hooʼaʼ.

2004go Granville dóó Joshua, naaki special pioneers nilı̨́įgo, Oreallagi níʼáázh.  Hootahgóó nahalneʼgo shikʼi níʼáázh. Diyin Bizaad daatsʼí bíhwiideeshʼááł nínízin shidííniid, áko baa dloh niizı̨́ı̨́ʼ. Díí Knowledge book tʼáá átʼé bee nashidínóohtįįł bidííniid. Tʼáá íídą́ą́ʼ bíhoołʼą́ʼígíí daatsʼí tʼáá ákótʼéego bee nashizhdínóotįįł nisin. Granville éí kwii hooghan sinilígi áłah náʼádleehgo átʼé shiłní. Azhą́ hooghągi sédáago neeznáá nááhai ndi, áłah náʼádleehgóó deeshááł nisin. Áko Granville shaa níyáago wheelchair yiiʼ dah shineesdáago Kingdom Hallgóó shił azhníłbą́ą́z.

Tʼahádóó Granville éí Theocratic Ministry School atah díínááł shiłní. Kójíní: “Nitsʼíís bąąh dahazʼą́, ndi yáníłtiʼgi éí doo bee nichʼįʼ anáhóótʼiʼ da. Náasdi háadi shı̨́ı̨́ public talk ádíílííł. Éí tʼáá aaníí ákóhodoonííł.” Kótʼéego saad yee shichʼįʼ yájíłtiʼígíí bee haʼííníshníí ńtʼééʼ.

Granville bił hootahgóó nahwiilneʼgo baa nídiitʼáázh. Nidaʼaztiin éí wheelchair doo bá yáʼátʼéeh da. Áko Granville éí wheelbarrow shił nabíníyil doo bidííniid. Kótʼéego éí nizhónígo hootahgóó nahosiilneʼ. April 2005go baptize áshiʼdiilyaa. Tʼáadoo hodiinaʼí Kingdom Hallgi congregation binaaltsoos dóó sound system baa áháyą́ągi brothers yee nidashineeztą́ą́ʼ.

2007go shizhéʼé nihitsʼą́ą́ʼ ádin. Éí tsinaaʼeeł biyaa ajíítłizhgo hwiisxı̨́. Nihighan hazʼą́ą́dóó tʼáá íiyisíí yínííł biih níideeʼ. Granville nihá sodolzin áádóó Diyin Bizaad biiʼdę́ę́ʼ saad bee haʼóníinii nihichʼįʼ yółtaʼgo bee hadaʼííníilní. Naaki nááhaigo, tʼáá ákótʼéego ayóó átʼéego yínííł náhásdlı̨́ı̨́ʼ. Granville tłʼéeʼgo tsinaaʼeeł hoł tá tłʼááh yiltsʼidgo ájídin.

Congregationgi doo niidląʼí da, áko yínííł biih níideeʼ. Elders nihee ádin áádóó ministerial servant éí tʼááłaʼí. Granville ádin bikʼee shijéí tʼáá íiyisíí neezgai, háálá ahánígo shikʼis jílı̨́ı̨́ ńtʼééʼ. Jiihóvah ahánígo bił kʼéʼahidishníigi áádóó haʼátʼíí shı̨́ı̨́ bídin nishłínígíí ałdóʼ bee shíká aníjílwoʼ ńtʼééʼ. Ájídin bikéédóó łah Watchtower Study álnéehgi íídííłtah shiʼdooʼniid. Paragraphs tʼáá naakihígo yíłtaʼgo ayóó cha shiiʼ deiyáago shinákʼeeshtoʼ náálı̨́įgo nahjįʼ dah diiyá.

Náánáłaʼ congregationdę́ę́ʼ brothers nihichʼįʼ adabiʼdiisʼaʼ. Éí bee shitah tʼáá yáʼáhootʼééh náhásdlı̨́ı̨́ʼ. Branch officedę́ę́ʼ ałdóʼ Kojo, special pioneer nilı̨́įgo, nihichʼįʼ biʼdoolʼaad. Tʼáá íiyisíí baa shił hózhǫ́ǫgo shimá dóó shitsilí ałdóʼ Diyin Bizaad yíhoołʼą́ąʼgo baptize ábiʼdiilyaa. March 2015go ministerial servant áshiʼdiilyaa. Éí bikéédóó tsʼídá áłtsé public talk áshłaa. Éí bijı̨́ Granville ałkʼidą́ą́ʼ áshidííniid yę́ę bénááshniiʼgo dloh niizı̨́ı̨́ʼ áádóó shił hózhǫ́ǫgo shinákʼeeshtoʼ deeznaʼ: “Náasdi háadi shı̨́ı̨́ public talk ádíílííł. Éí tʼáá aaníí ákóhodoonííł.”

JW Broadcasting^® biiʼdę́ę́ʼ Jiihóvah Yá Dahalneʼé tʼáá shígi ádaatʼéii éí ląʼí bitsʼą́ą́dóó bíhoołʼą́ą́ʼ. Azhą́ bichʼįʼ anídahaztʼiʼ ndi, bił dahózhǫ́ǫgo beʼiinaʼ nizhónígo ádeiłʼı̨́. Ádeeshłííł nisinii ááshłííł. Tʼahdii dziil shee hólónígíí bee Jiihóvah bá naashʼaʼ doo nisingo regular pioneer sélı̨́ı̨́ʼ. September 2019go tʼáadoo naólníinii bee shił hóoneʼ! Congregationgi 40 publishers dah yikahígíí elder bá nilı̨́į doo shiʼdooʼniidgo nishiʼdeeltı̨́.

Brothers dóó sisters ayóóʼádashóʼníigo Diyin Bizaad yee nidashineeztą́ą́ʼ áádóó shíká anájahgo Jiihóvah bá nisisʼaʼgi tʼáá íiyisíí baa ahééh nisin. Ndi aláahdi baa ahééh nisinígíí éí Jiihóvah doo shaa yooznah da.