1-2. Proverbs 4:25 haitʼéego bikʼeh ániitʼée doo? Łaʼ chʼíníʼaah.

TÁJÍLTʼÉEGO haa dahaneʼ. Sister náás silı̨́įʼii ániid naagháago yáʼátʼéehgo áátʼįįd yę́ę yaa nitsékees. Azhą́ hachʼįʼ nahwiiʼnáa ndi, Jiihóvah tʼahdii yéigo bá joolnish. (1 Cor. 15:58) Ayóóʼájóʼníinii éí tsʼídá hózhónígo ánáhoolyaago áadi bił kééhashtʼı̨́į doo jiníigo baa nitsíjíkees. Náánáłaʼ sister éí congregationgi bił yah aníjíjahígíí łaʼ doo yáʼátʼéhígi áhoolaago biniinaa bikʼee jideeznih. Ndi, éí doo baa nitséskeesí doo jinízin. (Col. 3:13) Nááʼákóneʼ éí brother łaʼ niʼjiisííʼ yę́ęgóó bééjílniih, ndi kʼad éí yéigo Jiihóvah bá áshtʼı̨́į doo jinízin.—Ps. 51:10.

² Díí tájíltʼéego haʼátʼíí bee áhédajíłtʼéh? Éí nahdę́ę́ʼ hoł ádahóótʼįįd yę́ę béédajilniih, ndi doo áłahjįʼ baa nitsídajíkees da. Ákondi tʼáá ahą́ą́h ‘náásgóó kʼéhézdon dazhdeezʼı̨́įʼgo’ nitsídajíkees.—Proverbs 4:25 yíníłtaʼ.

3. Haʼátʼíí biniyé “náásgóó kʼéhézdon” adéestʼı̨́įʼ doo?

³ Haʼátʼíí biniyé “náásgóó kʼéhézdon” adéestʼı̨́įʼ doo? Łaʼda tʼáá ahą́ą́h nátʼą́ą́ʼ nidétʼįįhgo doo tʼáá kʼéhézdongóó yigáał da doo. Tʼáá ákótʼé, tʼáá ahą́ą́h tʼą́ą́ʼ nídiniitʼįįhgo Jiihóvah bá naʼaʼaʼgi doo bee náás didiidáał da.—Luke 9:62.

4. Haʼátʼíí baa nídadíitʼįįł?

⁴ Náásgóó kʼéhézdon díníitʼı̨́įʼ dooleeł yę́ęgi éí tááʼ áłʼąą átʼéego adínóołtłʼahii ádaatʼéii baa nídadíitʼįįł. Éí (1) ákonááhootʼée leʼ, (2) ánáháchįįh, áádóó (3) yéigo bąą yíníiłii. Díí tʼááłaʼí níʼánígo Diyin Bizaad binahjįʼ bee naʼnitinii éí haitʼéego “nahdę́ę́ʼ danilíinii” doo ayóó baa nitsíikees da, ndi “nihilą́ąjįʼ dahólóonii” tʼéí bíká yiildził dooleełgi yee nihíká adoolwoł.—Phil. 3:13, NW.

5. Ecclesiastes 7:10 éí haʼátʼíí tʼáadoo diiʼníní doo nihiłní?

⁵ Ecclesiastes 7:10 yíníłtaʼ. Naatʼáanii Sálaman éí nahdę́ę́ʼ yoołkááł yę́ę yáʼátʼééh ńtʼééʼ tʼáadoo dadohníní níigoósh ání? Ndagaʼ. Éí áníigo nahdę́ę́ʼ yę́ę kʼad áhootʼéhígíí bił ahąąh naaʼnilgo doo áháyą́ átʼé. Tʼáá aaníí nahdę́ę́ʼ Jiihóvah bá nisiilʼaʼ yę́ęgóó baa nitsáhákeesgo bee ił yáʼáhootʼééh, ndi dííshjı̨́įdi nihił áhootʼéhígíí bił ahąąh neiʼnilgo naʼníłtłʼáii átʼé. Diyin Bizaad náánáłaʼ saad bee ánályaaígíí ání: “Doo kótʼéego naʼízhdíłkid da, ‘Haʼátʼéego shąʼ nahdę́ę́ʼ yáʼátʼéehgo áhootʼéé ńtʼééʼ?’ Díí doo áháyą́ą́góó naʼídíkid átʼé.”

6. Nahdę́ę́ʼ ádahootʼéé ńtʼééʼ yę́ę haʼátʼíí biniyé tʼáadoo ayóó baa nitsáhákeesí doo? Łaʼ chʼíníʼaah.

⁶ Nahdę́ę́ʼ ádahootʼéé ńtʼééʼ yę́ę haʼátʼíí biniyé tʼáadoo ayóó baa nitsáhákeesí doo? Kójítʼı̨́įgo éí nahdę́ę́ʼ yáʼátʼéehgo ádahootʼéhę́ę tʼéí bééhániih doo. Nihichʼįʼ nahwiisʼnááʼ yę́ęgi doo béneilniihgóó ánihósin doo. Ałkʼidą́ą́ʼ Ízrel dineʼé Ííjipdę́ę́ʼ chʼínákaigo éí hachʼįʼ nidahwiisʼnááʼ ńtʼééʼ yę́ęgi tʼáadoo hodiinaʼí baa dajiyooznah. Éí chʼiyáán dajiyánę́ę baa nitsídajíkeesgo ádajiní: “Béédeiilniihii éí Ííjip kéyahdi tʼáá nííkʼeh łóóʼ, taʼneeskʼání díkʼǫ́zhígíí, chʼééh jiyání, chʼil daadánígíí, tłʼohchin índa chʼil díchʼíʼígíí deidą́ą́ nítʼééʼ.” (Num. 11:5) Tʼáásh aaníí “tʼáá nííkʼeh” dajiyą́ą́ ńtʼééʼ? Ndagaʼ. Naalteʼ yeeʼ dajílı̨́įgo Íijip dineʼé naanish yídahoniłkaʼgo ádił nidajilníísh ńtʼééʼ. (Ex. 1:13, 14; 3:6-9) Áko bee hachʼįʼ nidahwiisʼnáaʼii tʼahádóó baa dajiyooznahgo bidáhonooníinii nátʼą́ą́ʼ baa nitsínídajíkees. Éí “ałkʼidą́ą́ʼ yę́ę” tʼéí baa nitsídajíkees. Jiihóvah yáʼátʼéehgo há áátʼįįd yę́ę éí ndagaʼ. Áko biniinaa Jiihóvah doo yaa bił hózhǫ́ǫ da.—Num. 11:10.

7. Sister łaʼ haitʼéego nahdę́ę́ʼ yę́ę doo ayóó baa nitsíjíkees da ńtʼééʼ?

⁷ Haʼátʼíí biniyé éí nahdę́ę́ʼ hoł áhootʼéhę́ęgi ánáhootʼée leʼ tʼáadoo hwiindziní doo? Sister łaʼ 1945 yę́ędą́ą́ʼ Brooklyn  Bétheldi chʼíjilnish. Tʼáá ákwii brother łaʼ naalnishgo tʼahádóó jizyehgo Bétheldi bił nijilnishgo ląʼí honááhai. 1976go hahastiin bitsíís baa dahooʼaʼ. Éí beʼiinaʼ nidootʼihgo átʼéego bił bééhózingo éí yáʼátʼéehgo saad bee haʼjólníi dooleełii yee hachʼįʼ haadzííʼ, jiní. Éí áháłní: “Nihił hózhǫ́ǫgo tádiitʼáázh. Ląʼí diné doo ákótʼéego beʼiiná dahólǫ́ǫ da. Nahdę́ę́ʼ íítʼįįd yę́ę baa yoonééł lágo, ndi tʼáadoo ayóó baa nitsíníkeesí. Nił hodeeshzhiizhgóó nił hózhǫ́ nídíídleełgo átʼé. Díí kóniʼdiilyaaígíí biniinaa tʼáadoo naa nááhákaʼí. Nizhónígo Jiihóvah bá nisiilʼaʼgi baa nił hózhǫ́. Bee éédahaniihii éí Diyin ainíláii átʼé.” Díí tsʼídá yáʼátʼéehgo saad bee haʼahóníinii átʼéego bee achʼįʼ haʼoodzíiʼii átʼé.

8. Sister éí bahastiin yee hachʼįʼ haadzíiʼii haitʼéego beʼjiilaa?

⁸ Sister éí bahastiin yee hachʼįʼ haadzíiʼii beʼjiilaa. Éí ájíní: “Nátʼą́ą́ʼ nánéshʼı̨́įgo 63dóó baʼaan full-time Jiihóvah bá naashʼaʼgo iiná baa hózhǫ́ǫgo níyá. Brothers dóó sisters éí nahasdzáán bikááʼ honóoshónígo ánályaago tʼáá éí bił kééhashtʼı̨́į doogo átʼéegi éí íiyisíí iiná baa hózhǫ́. Ayóó Átʼéii Ánihiilaii Jiihóvah éí tʼáá Bí tʼéí Diyin nilíinii hoolʼáágóó dadíníilzin doo.” * Sister éí Jiihóvah tʼáá bá nijilʼaʼgo 92jįʼ honááhai. Jiihóvah yee hahaadzíiʼii díí sister éí yíká déezʼı̨́įʼgi ląʼígóó bitsʼą́ą́dóó íhooʼaah!

9. Leviticus 19:18 bikʼeh ádiiʼníiłgi haʼátʼíí biniyé łahda nantłʼago átʼé?

⁹ Leviticus 19:18 yíníłtaʼ. Brother doodaiiʼ sisterda, akʼis nilíinii, doodaiiʼ akʼéida łaʼ hániʼ yiyiiłʼaahgo áádóó tʼáadoo bikʼee háháchįʼí dooleełgi tʼáá nantłʼago átʼé. Nihisister łaʼ éí náánáłaʼ sister béeso shee níníʼı̨́ı̨́ʼ jiníigo bikʼíhojizʼah. Ńtʼééʼ tʼahádóó doo yeeʼ ákótʼéégóó ashtʼı̨́  jinízingo baa ákozhniizı̨́ı̨́ʼ, áko hasister bił kʼé náʼahizhdooʼniid. Ndi, sister bikʼíhástʼahgo yikʼee báhóóchįįdgo doo yaa yoonééh ádzaa da. Łahísh tʼáá ákóniʼdiilyaa? Azhą́ kótʼéego tʼah doo łaʼ bee nihikʼíhátʼaah da ndi, ląʼí niiltʼéego éí łaʼda nihíniʼ yiyiiłʼaahgo bikʼee niháháchįįhgo doo baa yiiʼnéeh da yiidleeh.

10. Łaʼda nihíniʼ yiyiiłʼaahgo bikʼee niháháchįįhgo, haʼátʼíí nihíká adoolwołgo doo ániitʼée da doo?

¹⁰ Łaʼda nihíniʼ yiyiiłʼaahgo bikʼee niháháchįįhgo, haʼátʼíí nihíká adoolwołgo doo ániitʼée da doo? Bénéiilniihgo Jiihóvah tʼáá ałtsoní yooʼı̨́. Haʼátʼíí shı̨́ı̨́ biiʼ yiidáałii doo ákótʼéégóó ánihiʼdilʼı̨́į ndi ałdóʼ yaa ákonízin. (Heb. 4:13) Bikʼee tiʼdahoyiiʼníihii Bí ałdóʼ yikʼee tiʼhoonííh. (Isa. 63:9) Yee hadoodzíiʼgo éí bikʼee tiʼdahoyiiʼníihii ałtso nahjįʼ kódeeshłííł nihiłní.—Rev. 21:3, 4.

11. Yíniʼ yiilʼaahgo éí tʼáadoo bikʼee áhóóchįįdgóogo haitʼéego nihíká adoolwoł?

¹¹ Yíniʼ yiilʼaahgo éí tʼáadoo bikʼee áhóóchįįdgóogo éí nihitah yáʼátʼéehgo áyósin. Éí sister tʼáá ádzaagóó bikʼíhástʼah yę́ę díí yee ádaa ákoniidzı̨́ı̨́ʼ. Áko hakʼíhástʼahgi bikʼee háhóóchįįd yę́ęgi hasister bá yóóʼanizhdiiʼą́ągo Jiihóvah ałdóʼ há yóóʼanéidiiʼą́ągo átʼéegi baa ákozhniizı̨́ı̨́ʼ. (Matt. 6:14) Hasister doo ákǫ́ǫ́ áhóółʼįįd ndi, áháchįʼ nahjįʼ kójiilaa. Áko hoł hózhǫ́, áádóó Jiihóvah bá nijilʼaʼjí tʼéiyá áłtségo ájósin.

12. 1 John 3:19, 20 bitsʼą́ą́dóó haʼátʼíí bóhooʼaah?

¹² 1 John 3:19, 20 yíníłtaʼ. Łahda tʼáadoo leʼé ayóó bąą yínííł ídlı̨́į łeh. Éí łaʼda Jiihóvah tʼah doo yééhoosįįhgóó doo ákǫ́ǫ́ áátʼįįd yę́ę ayóó yaa bíniʼ łeh. Łaʼ éí Jiihóvah yaa ádeetʼą́ągo baptize ályaadóó bikʼijįʼ doo ákǫ́ǫ́ áátʼįįdgóó biniinaa ayóó yaa bíniʼ. (Rom. 3:23) Yáʼádaatʼéehii ádeiiʼníił doo daniidzin, ndi “tʼáá áníiltso ląʼígóó nidaʼayiilzííh.” (Jas. 3:2; Rom. 7:21-23) Tʼáadoo leʼé ayóó átʼéego baa hániʼgo doo yáʼátʼéeh da, ndi áká iilwoʼgo átʼé. Háálá éí hweʼiinaʼ kʼéhézdongo ánáyoodlííł, áádóó doo ánáádeeshníił da hwiindzingo nitsáhákeesgo áʼósin.—Heb. 12:12, 13.

13. Haʼátʼíí biniyé tʼáadoo yéigo yínííł ídlíní doo?

¹³ Azhą́ hashtʼeʼnitsíńjízkéezgo Jiihóvah há yóóʼaneidiyiiʼaah ndi, ájíítʼįįdgi tʼahdii baa hániʼgo éí tsʼídá yéigo tʼóó bąą yínííł ídlı̨́į dooleełgo átʼé. Díí éí doo yáʼátʼéeh da. (Ps. 31:10; 38:3, 4) Éí haitʼéego? Sister łaʼ nahdę́ę́ʼ doo ákǫ́ǫ́ áátʼįįdgi yéigo yąąh yínííł nilı̨́įgo níyá. “Tʼáadoo biniyéhígóó Jiihóvah bá naashʼaʼ, háálá shí yeeʼ doo shá yísdahóótʼiʼ da nisin,” jiní. Ląʼí niiltʼéego kótʼéego nitsídeikees łeh. Áko kótʼéego nitsáhákees bee ádaa áhwiilyą́ą doo. Háálá Jiihóvah tʼahdii ayóóʼánihóʼní, éí bá neiilʼaʼgi neʼ íilyaago Séítan yaa bił hózhǫ́ǫ doo!—Compare 2 Corinthians 2:5-7, 11.

14. Jiihóvah tʼah doo yóóʼanihidiʼaah daaígi haitʼéego nihił béédahózin?

¹⁴ Ndi tʼah kwíiniidzin łeh, ‘Tʼáásh aaníí Jiihóvah tʼah doo yóóʼashidiʼaah da?’ Kótʼéego nitsíníkeesgo bee bééhózingo Jiihóvah éí niʼiidzííhgóó ná yóóʼiidiyiiʼaahgo átʼé. Ałkʼidą́ą́ʼ The Watchtower yę́ę łaʼ ání: “Jiihóvah tʼah doo bééhoniilzįįh yę́ędą́ą́ʼ doo ákǫ́ǫ́ íítʼįįd yę́ę tʼah doo bikʼeh diidleeh da. Ndi tʼáá bikʼeh didiidleełgo átʼé. Bee asésiihígíí Jiihóvah doo á yóóʼiidiiʼaahii átʼé tʼáadoo níníziní. Séítan éí kótʼéego nitsíníkees doo nóʼní. Asínísiihgi bąą níniʼgo éí tʼah yeeʼ yáʼáníshtʼéehii nishłı̨́ áádóó Jiihóvah éí shá  yóóʼanéidiyiiʼaahgo átʼé nínízingo ádaa nitsíníkees. Aʼohgo áʼdíínílzingo Diyin díí shá yóóʼanáhidíʼaah, yáʼátʼéehgo ádaa nitséskeesgo, tʼááká anáánaoshnééh lágo bidiʼníigo bichʼįʼ sodilzin. Azhéʼé éí baʼáłchíní tsʼídá díkwíidi shı̨́ı̨́ nidaʼiisíih ndi bichʼįʼ náánáádáłígi átʼéego Jiihóvah naa joobaʼgo níká análwoʼ.” *

15-16. Jiihóvah tʼáadoo akʼi deeyáa daaígi haitʼéego łaʼ yaa ákodaniizı̨́ı̨́ʼ?

¹⁵ Jiihóvah bidineʼé ląʼí bił béédahózingo Jiihóvah tʼáadoo bikʼi deeyáa da. Tʼah ániidídóó brother łaʼ “The Bible Changes Lives” wolyéhígíí jííłtaʼgo hodiisnaaʼ. Éí díí biiʼ áníigo sister łaʼ doo yáʼádaatʼéehii ájíítʼįįdgo biniinaa Jiihóvah doo ayóóʼáshóʼníi da doo jiniizı̨́ı̨́ʼ. Éí azhą́ baptize áhoʼdiilyaa ndi, kótʼéego nitsíjíkeesgo ląʼí nááhai. Áko Jesus nihá nááʼádiisniiʼgi yéigo baa nitsíjíkeesgo Jiihóvah ayóóʼáhóʼníigo átʼéegi joosdląąd. *

¹⁶ Sister kótʼéego ádaa halneʼgo brother haitʼéego bíká aalwod? Éí ájíní: “Ániid naasháhą́ądą́ą́ʼ pornography baa ninádinishdáahgo chʼééh nahjįʼ nidinishʼaah ńtʼééʼ. Ániidídóó pornography néshʼı̨́įgo baa nínáádiisdzá. Elders shíká iijeehgo bikʼeh déshdlı̨́ı̨́ʼ. Diyin ayóóʼánóʼní áádóó naa joobaʼgo átʼé dashidííniid. Ndi, łahda doo yáʼátʼééhgóó ádaa tsínáádískos, Jiihóvah yeeʼ doo ayóóʼáshóʼníi da nisin łeh. Díí sister ádaa halneʼgi yéigo shíká aalwod. Diyin yeeʼ doo shá yóóʼanéididooʼáał da nisingo éí biYeʼ nááʼádiisniiʼgi shí niʼiiyésííʼgóó doo ałtso shá bikʼídooltih da dishní nahalin. Sister baa hóoneʼ yę́ę, éí doo yáʼátʼééhgóó ádaa tsíńdískosgo néinishtahgo nabikʼítséskees biniyé haiłgizh.”

17. Paul éí haitʼéego doo ayóó yínííł jílı̨́į da ńtʼééʼ?

¹⁷ Kótʼéego ádaa dahaneʼgóó ádaalyaaígíí éí yilʼaadii Paul yee yéénihiyiiłnííh. Éí tʼah doo Oodlání yileehgóó tsʼídá doo yáʼádaatʼéehii ląʼígóó áátʼįįd. Ájíítʼįįd yę́ęgóó bééjílniih, ndi  doo áłahjįʼ baa nitsíjíkees da. (1 Tim. 1:12-15) Jesus nááʼádiisniiʼgi éí shá niilyáii átʼé jinízin. (Gal. 2:20) Áko Paul éí doo yáʼádaatʼéehii áátʼįįd yę́ę doo ayóó bąą yínííł jílı̨́į da, ndi Jiihóvah yéigo bá ashtʼı̨́į doo jinízin.

18. Haʼátʼíí bídahwiilʼą́ą́ʼ?

¹⁸ Haʼátʼíí ndaʼnółtłʼaii baa nídasíitʼįįd? (1) Yáʼádaatʼéehii bééhániih dooleełii Jiihóvah ainíláii átʼé; nahdę́ę́ʼ tsʼídá yáʼátʼéehgo shı̨́ı̨́ niidzá, ndi ániidígo náhodeesdzáago éí tsʼídá biláhídi yáʼátʼéehgo yiidáał doo. (2) Łaʼda shı̨́ı̨́ nihíniʼ yiyiiłʼaah, ndi tʼóó bá yóóʼanáhidiitʼaahgo tʼóó neʼjįʼ yiidáał doo. (3) Yéigo yínííł ídlı̨́įgo éí Jiihóvah bá naʼaʼaʼgi baa hózhǫ́ǫ dooleeł yę́ęgi neinółtłʼah doo. Áko Paul nitsékees yę́ęgi átʼéego Jiihóvah éí shá yóóʼanéidiyiiʼaahgo átʼé niidzin doo.

19. Ániidíii ánáhoolyaago éí nahdę́ę́ʼ bąą yíníłígi átʼéego ádahóótʼįįd yę́ę doo bééhániih da dooleełgi haitʼéego nihił béédahózin?

¹⁹ Hoolʼáágóó hiniiʼnáa dooleełgo átʼé. Diyin éí ániidíii ánáhoodlaago nahdę́ę́ʼ bąą yíníłígi átʼéego ádahóótʼįįd yę́ę doo bééhániih da doo. Diyin Bizaad ání: “Áłtséédą́ą́ʼ yę́ę doo bééhániih da” doo. (Isa. 65:17) Baa nitsíníkees: Jiihóvah bá nideilʼaʼgo są́ biih heekai, ndi ániidíii ánáhoolyaago ániid neidáh nídadiidleeł. (Job 33:25) Áko nahdę́ę́ʼ ádahóótʼįįd yę́ę tʼáadoo ayóó baa nitsídeiikeesí doo. Ndi, ániidíii ánáhodoolníłígíí kʼéhézdon bíká díníʼı̨́įʼgo yinááł!