1, 2. (a) Haʼátʼíísh éí íiyisí ílı̨́įgo Jesus beʼiinaʼ yee naashnish, dóó haʼátʼíí biniyé? (b) Haitʼéego “God bił deíníilníísh” yáʼátʼéehgo ádiilnííł?

JESUS CHRIST éí kin ííłʼíní jílı̨́ı̨́ ńtʼééʼ. Áádóó bikʼijįʼ God biNahatʼaʼ bee nazhnitingo baa nízhdiidzá. (Mark 6:3; John 13:13) Tʼáá áłah jiichįįhgo ajíłʼı̨́. Bee naʼanishí tsin bikʼijįʼ chojoołʼı̨́įgo bóhojoołʼą́ą́ʼ. Nazhnitin jílı̨́įgo, yíhoołʼą́ʼígíí bee nazhnitin éí díí saad dahnaazhjaaʼígíí diné yee yíká eelwod yikʼidadiʼdoohtʼı̨́ı̨́ł tʼáá aaníí God Bizaad átʼé. (Matthew 7:28; Luke 24:​32, 45) Jesus 30 binááhai yę́ędą́ą́ʼ éí kin ííłʼínę́ę neʼ kóyiilaa. Tʼáá ákwii jı̨́ God biNahatʼaʼ bee nazhnitin. Díí íiyisí ílı̨́įgo naanish áyiilaa bił bééhózin. Ájíní díí tʼááłaʼí biniyé God nahasdzáán bikáaʼjįʼ ádashííłʼaʼ. (Matthew 20:28; Luke 3:23; 4:43) Haneʼ yáʼátʼéhígíí yaa nahalneʼ Jesus tʼáá bidziilígíí choyoołʼı̨́. Nihí ałdóʼ tʼáá ákódeiitʼı̨́į doo.—Matthew 9:​35-38.

² Doo éí łaʼ kin ádeilʼı̨́į da ndi tʼáá áníiltso God biNahatʼaʼ haneʼ yáʼátʼéhígíí baa dahwiilneʼ. Díí naanish God tʼáá íiyisí yíneedlı̨́. “God bił deíníilníísh” ákótʼéego bee nihidojí. (1 Corinthians 3:9; 2 Corinthians 6:4) Diyin Bizaad akʼeʼashchínígíí átʼéego nitsídeikees, háísh ání: “Nizaad tʼáá  átʼé éí tʼáá aaníí.” (Psalm 119:​159, 160) Jiihóvah bizaad éí tʼáá aaníí. Éí biniyé tʼáá íiyisí díí bee átʼé “saad tʼáá aaníinii tsʼídá tʼáá ákogi átʼéego choiníłʼı̨́.” (2 Timothy 2:15 yíníłtaʼ.) Diyin Bizaad tʼáá bíhwiilʼaahígíí bee yiichįįh yiidleehgo baa nahwiilneʼ éí biniyé tʼáá nihí bee naʼanishí biiʼ siʼą́ą́ náánáłahjįʼ bee naniitin Jiihóvah, Jesus, dóó biNahatʼaʼ ííshjání íilʼı̨́. Náánáłaʼ bee nidoonishígíí Jiihóvah tʼááłaʼí ídlínígíí nihaidiníʼą́ náánáłahjįʼ nihíká análwoʼgo bee naʼniitin. Éí ałdóʼ bohodííłʼáałgo choiníłʼı̨́į doo. Díí bee naʼanishígíí éí nihiToolbox Bee Naʼnitinii biiʼ hólǫ́.

3. Dííshjı̨́įdi haʼátʼíí biniyé nidahwiilneʼ, dóó haitʼéego Acts 13:48 nihíká adoolwoł ádaʼiilʼı̨́į doo?

³ Toolbox Bee Haneʼii doo wolyée da. Háálá éí “haneʼii” łaʼ bił hojilneʼ áhyiłní. Haʼátʼíísh biniyé Toolbox Bee Naʼnitinii wolyé? Éí “naʼnitinii” hazhóʼó bił hojilneʼgo yikʼidiʼdootı̨́ı̨́łígíí dóó yididootsʼı̨́ı̨́łígíí áhyiłní. Nihodoogáałjįʼ kodę́ę́ʼ nihichʼįʼ hoolzhish. Díí biniinaa kodóó Diyin Bizaad bee nidaʼniitin, diné tʼáá aaníinii deididootsʼı̨́įłgo Christ yikééʼ nidaakai doo. “Iiná doo ninítʼiʼii biniyé nídabiʼdiisdláʼígíí” éí bídaniidlı̨́įgo hadaniitá áádóó Jiihóvah yá nidaalʼaʼgo bíká adiilwoł.—Acts 13:48 yíníłtaʼ.

4. “Iiná doo ninítʼiʼii biniyé nídabiʼdiisdláʼígíí” haitʼéego łaʼ bikʼídíníítááł?

⁴ “Iiná doo ninítʼiʼii biniyé nídabiʼdiisdláʼígíí” haitʼéego łaʼ bikʼídíníítááł? Áłtsé Oodlání danilínę́ę éí diné yikʼidahinitaahgo yił nidahalneʼ ńtʼééʼ. Jesus éí bídahoołʼaahii kwííłní: “Tʼáá haaʼída kin hadaasʼáagi índa kin naazhjaaʼgi nidahohkáahgo, diné bił ílíinii hazhóʼó bíndaʼídółkid.” (Matthew 10:11) Dííshjı̨́įdi nihí ałdóʼ ákódeiitʼı̨́. Jó ákótʼéego baa nitsídeikees: ‘Diné ayóó ádaa dahaʼniih índa God doo deinízin da éí haneʼ yáʼátʼéhígíí doo dayíistsʼą́ąʼ da.’ Diné yáʼátʼéehgo beʼiinaʼ íidoolíłígíí hadaniitá. Diné aʼohgo ádólzinii tʼáá aaníinii íiyisí íhodeeshʼááł nízinígíí hadaniitá. Nídabiʼdiisdláʼígíí hadaniitá éí Jesus kin ííłʼínę́ę yinaashnish nahalin. Bikéédóó Jesus áłtsé tsin nizhónígíí bee ádeeshlííł nízingo chóyoostʼeʼ éí bikááʼadání, dáádílkał, dóó azéédéetání, áádóó tʼáadoo leʼé yee áyiilaa. Áádóó bibee naʼanishí choyoołʼı̨́ yiyiichįįhgo yee éʼéłʼı̨́. Dííshjı̨́įdi áłtsé diné tʼáá aaníí íhodeeshʼááł danízinígíí hadaniitá. Áádóó nihí bee naʼanishí yiyiichįįhígíí ídahoołʼaahii bee bíká adiilwoł.—Matthew 28:​19, 20.

5. Haʼátʼíísh nihił béédahózin díí nihiToolbox Bee Naʼnitinii biyiʼ? Łaʼ baa chʼíhoníʼaah. (Áłtsé adahaskidígíí níníłʼı̨́.)

⁵ Nihitoolbox biyiʼ, ałʼąą ádaatʼéego bee naʼanishí chodeilʼı̨́. Jesus kin ííłʼíní yę́ędą́ą́ʼ bibee naʼanishí choyoosʼįįd éí baa nitsíníkees. * (Footnote níníłʼı̨́.) Díí bee naʼanishí ałʼąą átʼéego choyoosʼįįd bee íʼneelʼąąh, bee akʼeʼelchí, bee hádaʼachʼiishí, bee aghadaʼaʼnilí, bee adiilkǫǫh áko nizhónígo ałhiiyiʼnił éí tsin bee bindoonishgo chojoołʼįįd. Tʼáá ałtso bee naʼanishí éí nihiToolbox Bee Naʼnitinii dabiyiʼ éí nihíká adoolwoł. Díí nihił bééhodoozįįł haitʼéego bee nidaʼanishí choidiilʼįįł.

6, 7. (a) Haitʼéego contact cards choiníłʼı̨́? (b) Nihaa díínááł binaaltsoos haʼátʼíí biniyé choiníłʼı̨́?

⁶ Contact Cards. Díí ádaałtsʼíísí ndi diné bił béédahodoozįįł háí ádeitʼínígíí dóó tʼáá bí website jw.org yiiʼdadídóoʼįįłgo bíká adoolwoł. Website yiiʼdadídóoʼįįłgo éí hazhóʼó nihéédahodoosįįł dóó Diyin Bizaad bíhodeeshʼááł danízingo dayókeed. 400,000dóó baʼaan diné éí jw.org chodeiyoołʼı̨́įgo Diyin Bizaad bíhodeeshʼááł daaníigo dayókeed. Neeznádiindóó baʼaan éí tʼáá ákwii jı̨́ dayókeed! Tʼáá díkwíigo contact cards náníjah choiníłʼı̨́ diné bichʼįʼ yáníłtiʼígíí baa díítı̨́ı̨́ł.

⁷ Nihaa Díínááł Binaaltsoos. Áłah nídeidleehígíí nihaa díínááł binaaltsoos ání: “Nihaa díínááł Jiihóvah Yá Dahalneʼé bił Diyin Bizaad bóhoołʼaah.” Áádóó kódíínííł “áłah nídaadleehgi” “éí doodaiiʼ łaʼda tʼáá sahdii nandínóotı̨́ı̨́ł,” ní. Éí ádeitʼínígíí dóó diné éí “diyin kʼehgo hojoobaʼ ádaatʼéego ádaa nitsídaakeesii” Diyin Bizaad nihił bohodííłʼááł, ní. (Matthew 5:3) Áłah nídeidleehígíí diné nihaa nídaakahgo azhą́ doo Diyin Bizaad bíhodeeshʼááł daaníi da ndi. Áko áłah nídeidleehgi nihaa jígháahgo éí tʼáá hó jiiłtsééh dóó baa ákozhniizįįh Diyin Bizaad bohojoołʼááh.

8. Haʼátʼíí biniyé diné áłah nídeidleehígíí tʼááłaʼí nihaa doogááł? Łaʼ baa chʼíhoníʼaah.

⁸ Áłah nídeidleehdi nihaa díínááł tʼááłaʼídi ndi éí tʼáá áko. Haʼátʼíí biniyé? Niháí níyáago éí Jiihóvah Yá Dahalneʼé tʼáá aaníí nidaʼnitinígíí éí Diyin Bizaad bitsʼą́ą́dę́ę́ʼ tʼáá bí yikʼidadiʼdootı̨́ı̨́ł. Doo tʼáá aaníí daʼoodląʼ doo bił aheełtʼée da éí bił béédahodoozįįł biniinaa diné éí God yééhodoosįįł bíká adiilwoł. (Isaiah 65:13) Łaʼ nááhai yę́ędą́ą́ʼ ahastiin dóó eʼasdzą́ą́, Ray dóó Linda éí United Statesdę́ę́ʼ, doo tʼáá aaníí daʼoodląʼ doo bił aheełtʼée da yaa ákoniizı̨́ı̨́ʼ. God éí joodlą́ągo, hazhóʼó bééhozhdoosįįł jinízin. Sodizin bá hooghan tʼáá ałtso kin dahnaazhjaaʼgo éí díí naakigo hazhdeezı̨́ı̨́’ éí bizhdidooʼáshígíí biniyé. Áłtsé, bohodííłʼáłígíí jinízin biniyé níjítʼáázh. Naaki góneʼ, yah hanajahígíí God yá ndaalʼaʼ nizhónígo hadadítʼé. Tʼóó ahayóí sodizin bá dahooghan tázhdííʼáázh tʼáadoo bóhojoołʼą́ąʼ da dóó diné doo hazhóʼó hadadítʼée da, doo bił daʼílı̨́į da tʼóó biniinaa haa nahóókaad. Tsʼídá akéeʼdi sodizin bá hooghan jiníʼáázh, Linda éí naalnishgóó ííyá dóó Ray éí hooghangóó anáádzá. Hooghangóó níjoodáałgo Kingdom Hall yiyiiłtsą́. Haaʼíyeeʼ, ‘Ákóneʼ haʼátʼíí baa naʼaldeeh yideestsééł jiniizı̨́ı̨́ʼ.’ Díí tʼáá íiyisíí bił yáʼíítʼééh! Tʼáá ájíłtso Kingdom Hallgi baa ádahwiinítʼı̨́, dóó kʼé daaní, dóó nizhónígo hadadítʼé. Ray éí tsʼídá áłtsé alą́ąjįʼ dashineesdá, bóhojiiłʼą́ʼígíí hoł ayóóʼánóolnin! Díí béénílniih yilʼaadii Paul yaa nahasneʼ yę́ę diné léiʼ łaʼ áłah haleehii tsʼídá áłtsé níyá dóó kóní: “Tʼáá aaníí Diyin God nihitahgóó hólǫ́ǫ́ lá!” (1 Corinthians 14:​23-25) Bikéédóó Ray éí tʼáá ałtso áłah náʼádleehgo ałnáájídááh. Linda ałdóʼ áłah náʼádleehgo ałnáájídááh jizlı̨́ı̨́ʼ. Dóó azhą́ 70 honááhai  ndi Diyin Bizaad bóhojoołʼą́ą́ʼ áádóó baptize áhoʼdiilyaa.

9, 10. (a) Haʼátʼíí biniyé naaltsoos yázhí doo nantłʼagóó chooʼı̨́? (b) Naaltsoos yázhí God biNahatʼaʼshąʼ Haʼátʼíí Átʼé? choidííłʼįįł baa chʼíhoníʼaah.

⁹ Naaltsoos yázhí. Nihitoolbox éí tseebíí naaltsoos yázhí biyiʼ. Éí doo nantłʼagóó chooʼı̨́. Diné bee bichʼįʼ yéiiltiʼgo nihíká análwoʼ. Díí áłtsé naaltsoos yázhí éí 2013 yihah yę́ędą́ą́ʼ 5,000,000,000go ályaa! Díí naaltsoos yázhí éí tʼáá aheełtʼéego hadilyaa. Díí łaʼ bóhojoołʼą́ąʼ doo éí chojoołʼı̨́ bikéédóó tʼáá ałtso chojoołʼı̨́į doo! Diné bichʼįʼ yájíłtiʼgo haash yitʼéego naaltsoos yázhí chojoołʼı̨́?

¹⁰ Naaltsoos yázhí éí God biNahatʼaʼshąʼ Haʼátʼíí Átʼé? daatsʼí choidííłʼįįł. Éí díí bidahdę́ę́ʼ naʼídíkidígíí bichʼįʼ ííshjání ádíílííł, áádóó ání: “Łaʼdaásh God biNahatʼaʼ baa nitsíníkees łeh? Daʼ kódidííniiłísh . . . ?” Áádóó nabidídííłkił, “Díí táaʼgo háidíígíishąʼ?” Áádóó naaltsoos yázhí bichʼįʼ ąą ádíílííł ákóneʼé éí “Diyin God Bizaad éí Kóní,” Revelation 11:14 dóó Isaiah 9:6 saad dashijaaʼígíí bichʼįʼ yídííłtah. Ałtso bichʼįʼ yíníłtaʼ, bíniʼdę́ę́ʼ biyaagi naʼídíkidígíí éí “Díí Baa Nitsíníkees Doo”: “God biNahatʼaʼ hooʼáałgo haa hootʼéego kéédahoniitʼı̨́į doo?” Díí naʼídíkidígíí éí náánísdzáago nił hodeeshnih. Éí bíhwiidooʼáłígíí 7 góneʼ, God Bitsʼą́ą́dę́ę́ʼ Nizhónígo Haneʼ! nichʼįʼ ííshjání ádeeshłiił, bee naʼanishí biyiʼ éí Diyin Bizaad bíhooʼaahígíí bee bił hólneʼ doo.

11. Nihinaaltsoos haitʼéego choideilʼı̨́į doo, áádóó haʼátʼíí biniyé bá ádaalyaa?

¹¹ Naaltsoos. Bee Haʼídéesʼı̨́įʼii dóó Chʼééńdzííd! éí aláahdi daʼníłtsʼą́ą́dę́ę́ʼ dabizaad bee ádaalyaago dahólǫ́! Kéyah nahazʼą́ągo diné tʼóó ahayóí díí deiyołtaʼ. Díí naaltsoos éí tʼáá átʼé diné yídaneedlı̨́įgo deiyołtaʼ biniyé ádaalyaa. Naaltsoos choiníłʼı̨́įgo éí diné beʼiinaʼ baa nitsíníkees bee bíká adiilwoł. Éí bee haitʼéego Jiihóvah bił yáʼátʼéeh doo. Díí naaltsoos háida bá ádaalyaaígíí nihił béédahodoozįįł. Éí binahjįʼ hazhóʼó bichʼįʼ choidiilʼįįł.

12. (a) Chʼééńdzííd! háí bá ályaa, dóó haitʼéego nihíká adoolwoł? (b) Díí bee naʼanishígíí diné bee bíká anídeilwoʼígíí łaʼ baa chʼíhoníʼaah.

¹² Chʼééńdzííd! éí diné Diyin Bizaad áłtsʼíísígo bił béédahózinii doodaiiʼ doo bił béédahozin daígíí bá ályaa. Jesus naʼneeztą́ą́ʼ yę́ę doo hoł béédahózin da daatsʼí. Diyin Bizaad doo bił béédahózin da éí nihíká adoolwołgo átʼé. Chʼééńdzííd! bikʼeʼashchínígíí éí nihíká adoolwoł yidíídląął God hólǫ́ díníidzįįł. (Romans 1:20; Hebrews 11:6) Díí bikʼeʼashchínígíí éí Diyin Bizaad bitsʼą́ą́dę́ę́ʼ diné deidoodląąłgo bíká adoolwoł éí díí “tʼáá aaníí Diyin God bizaad átʼé.” (1 Thessalonians 2:13) 2018 naaltsoos ályaaígíí éí: “Chʼééná Ídlı̨́įgi Bee Áká Adoowołii.”

13. (a) Public edition Bee Haʼídéesʼı̨́įʼii háíshąʼ bá ályaa? (b) Díí bee naʼanishígíí diné bee bíká anídeilwoʼígíí łaʼ baa chʼíhoníʼaah.

¹³ Public edition Bee Haʼídéesʼı̨́įʼii éí God dóó Bizaad bee naʼnitinígíí éí diné tʼáá íídą́ą́ʼ łaʼ yídaneedlı̨́įgo biniyé bá  ályaa. Łahdóó shı̨́ı̨́ Diyin Bizaad bił béédahózin ndi bee naʼnitin doo yikʼidiʼdiitįįh da. (Romans 10:2; 1 Timothy 2:​3, 4) 2018 naakigo naaltsoos biiʼdę́ę́ʼ naʼídíkid baa chʼíhootʼáanii: “Náasdishąʼ Haa Hootʼée Doo?”, dóó “Godísh Tʼáá Naa Nitsékees?”

14. (a) Dı̨́įʼgo ndaʼalkidígíí nihiToolbox Bee Naʼnitinii biyiʼ éí haʼátʼíísh biniyé ályaa? (b) Díí ndaʼalkidígíí diné bee bíká anídeilwoʼígíí łaʼ baa chʼíhoníʼaah.

¹⁴ Ndaʼalkidígíí. Jesus naaghá yę́ędą́ą́ʼ, hálaʼ bee naʼanishí tʼéiyá hólǫ́ǫ́ ńtʼééʼ. Kʼad éí atsiniltłʼish bee nidaʼanishí dahólǫ́. Dííshjı̨́įdi nidahwiilneʼgóó naaltsoos bee akʼedaʼashchínígíí doo tʼáá éí tʼéí dahólǫ́ǫ da. Ndaʼalkidígíí ałdóʼ nizhónígo chodeiłʼı̨́. Dı̨́įʼgo nihitoolbox biyiʼ éí: Diyin God Bizaad Haʼátʼíí Biniyé Bíhwiidííłʼááł?, Diyin Bizaad Binaʼnitingi éí Haitʼéego Ánáʼálʼįįh?, Kingdom Hallgi Áłah Náʼádleehígíí éí Haitʼéego Ánáʼálʼįįh?, dóó Jiihóvah Yá Dahalneʼé—Háí Ádeitʼı̨́? Ił haneʼ áłtséhígíí éí naʼalkidígíí naaki dahalzhin bíighahgo bichʼįʼ ííshjání ádíílííł. Baa nínáájídáahgo nizaagóó naʼalkidígíí bichʼįʼ ííshjání ádíílííł tʼáá bíighahdą́ą́ʼ. Díí nizhónígo bee nidaʼanishí łaʼda bee bíká adiilwoł Diyin Bizaad yíhodoołʼááł biniyé áádóó áłah néidleehdi nihaa doogááł.

15. Tʼáá hó hazaadígíí łaʼ ndaʼalkidígíí jiníłʼı̨́įgo, haitʼéego diné yaa nitsídaakees łeh? Łaʼ baa chʼíhoníʼaah.

¹⁵ Nihisister léiʼ éí asdzání Micronesia aadę́ę́ʼ jiníná yichʼįʼ haadzííʼ. Éí bimá bizaadígíí Yapese kʼehjí yee yáłtiʼ. Nihisister éí Yapese bizaad Diyin Bizaad Nanihinitingo Átʼé bichʼįʼ ííshjání áyiilaa. Naʼalkidí yichʼįʼ yee naazneʼgo ájíní: “Díí shizaad. Dooládóʼ nizhóní da! Yáłtiʼígíí bee hosésįįd éí shikéyahdę́ę́ʼ naagháá lá. Shizaad yee yáłtiʼ!” Bikéédóó ájíní kodóó éí shizaad jw.org tʼáá ałtso ííníshtaʼ dóó náníshʼįįh doo. (Compare Acts 2:​8, 11.) Náánáłaʼ nihisister léiʼ United Statesdę́ę́ʼ hayáázh éí náánáłahdi kéyahdi naaghá. Link naʼalkidígíí tʼáá bí bizaadígíí yichʼįʼ áyiilaa. Naʼalkidígíí yinééłʼı̨́ı̨́ʼ dóó bichʼįʼ e-mail áshłaa: “Doo yáʼáshóonii bibee adziilii nahagizgo yiyiiłwoł éí baa ákoniizı̨́ı̨́ʼ. Áádóó, Diyin Bizaad bíhodeeshʼááł biniyé haʼdiishłaa.” Kééhojitʼínídi éí nidahwiilneʼígíí baa hóchįʼ!

16. Naaltsoos ádaałtʼą́ʼígíí bá ályaa baa chʼíhoníʼaah: (a) God Yíísíníłtsʼą́ą́ʼ áko Hoolʼáágóó Hinínáa Doo. (b) God Bitsʼą́ą́dę́ę́ʼ Nizhónígo Haneʼ! (c) Dííshjı̨́įdi Háísh Éí Jiihóvah Íinízinii Yikʼeh Ádaanííł?

¹⁶ Naaltsoos Ádaałtʼą́ʼígíí. Łaʼ diné doo hazhóʼó óltaʼ yééhósin da doodaiiʼ Diyin Bizaad naaltsoos bee nanitinígíí tʼáá bí bizaad doo bee hólǫ́ǫ́góó éí haitʼéego nadíníitı̨́ı̨́ł? God Yíísíníłtsʼą́ą́ʼ áko Hoolʼáágóó Hinínáa Doo choidííłʼįįł. * (Footnote níníłʼı̨́.) God Bitsʼą́ą́dę́ę́ʼ Nizhónígo Haneʼ! éí nizhónígo bee naʼanishí. Díí naaltsoos choiníłʼı̨́įgo Diyin Bizaad yitsʼą́ą́dóó yíhodoołʼááł. 14go baa dahaneʼígíí  éí díí naaltsoos bíniʼdę́ę́ʼ bichʼįʼ ííshjání ádíílííł. Áádóó nabídídíiłkił, “Háidísh díí nił yáʼátʼééh?” Nanitingo, bíniʼdii yíhodoołʼááł. Díí baa nínáájídáahgoósh bídíníitah? Tááʼ góneʼ naaltsoos ádaałtʼą́ʼígíí nihitoolbox biyiʼ éí Dííshjı̨́įdi Háísh Éí Jiihóvah Íinízinii Yikʼeh Ádaanííł? Díí Diyin Bizaad bíhooʼaahígíí éí tʼááłaʼí ídlı̨́ bá ályaago yee ndaʼnitin. Haitʼéego díí naaltsoos ádaałtʼą́ʼígíí éí Diyin Bizaad bíhooʼaahígíí choidííłʼįįł éí March 2017 Jesus Bedaʼiilʼı̨́įgo Dahiniiʼná dóó Nidaʼniitin—Naaltsoos Bee Íhooʼaah níníłʼı̨́.

17. (a) Haitʼéego éí díí naakigo naaltsoos daditánígíí chozhdoołʼı̨́ı̨́ł? (b) Baptize áhoʼdiilyaago bikééʼdóó haʼátʼíísh ázhdoolííł, dóó haʼátʼíí biniyé?

¹⁷ Naaltsoos Daditánígíí. Naaltsoos ádaałtʼą́ʼígíí bee bił nahólneʼgo, aa haa doo shı̨́ı̨́ łaʼ éí Diyin Bizaad Nanihinitingo Átʼé bee bił nahólneʼ doo. Díí bee naʼanishígíí diné éí Diyin Bizaad bitsʼą́ą́dóó ląʼí yídahodoołʼááł. Ółtaʼí ałtso naaltsoos yiyííłtaʼgo éí náánáłaʼ naaltsoos How to Remain in God’s Love yiiʼdóó náánéiidóółtah. Díí bee naʼanishígíí nabineeztą́ąʼgo Diyin Bizaad bikʼehgo oodáłígíí yee beʼiinaʼ íidoolííł. Béénílniih, azhą́ baptize ábiʼdilyaa ndi, tʼáá náás nazhʼnitin doo, tʼáá áłah ałtso jííłtaʼjįʼ. Díí bóhojoołʼą́ʼígíí binahjįʼ hadziilgo Jiihóvah baʼjólí dóó bikʼeh honíłʼı̨́.—Colossians 2:​6, 7 yíníłtaʼ.

18. (a) 1 Timothy 4:16 góneʼé haʼátʼíísh yee nihił halneʼ, áádóó haʼátʼíísh bóhwiilʼą́ą́ʼ? (b) Haʼátʼíísh éí nihiToolbox Bee Naʼnitinii biyiʼ hólónígíí bee ííshjání íilʼı̨́į doo?

¹⁸ Jiihóvah Yá Dahalneʼé éí diné nidaʼniitin bee nihóhólníih doo nihaa silá “saad tʼáá aaníinii, haneʼ yáʼátʼéehii” éí iiná doo ninítʼiʼii biniyé ádeitʼı̨́. (Colossians 1:5; 1 Timothy 4:16 yíníłtaʼ.) Toolbox Bee Naʼnitinii biyiʼdóó bee nideilnishígíí éí nihíká adoolwołgo chodeilʼı̨́. (“ Toolbox Bee Naʼnitinii” níníłʼı̨́.) Bee naʼanishí hazhóʼó chodoałʼı̨́. Tʼóó ahayóí bee naʼanishí ndi doo tʼááłaʼí tʼéí chojoołʼı̨́į da. Tʼáá háí shı̨́ı̨́ jinízinígíí chozhjoołʼįįł. Nihił béédahózingo éí díí naaltsoos doo tʼóó nideeʼniih da. Diné bił nidahwiilneʼgo doo danihíistsʼą́ʼígíí naaltsoos doo baa dahiiʼníił da. Diné tʼáá aaníí danízinígíí, aʼohgo nitsékees, dóó tʼáá íiyisí God bééhodeesįįł danízin éí ídahoołʼaahígíí ádeilneʼ. “Iiná doo ninítʼiʼii biniyé nídabiʼdiisdláʼígíí” éí hadaniitá.—Acts 13:48; Matthew 28:​19, 20.