1, 2. Haʼátʼíí naanish nitsaaígíí Jáshowa baa deetʼą́?

JIIHÓVAH éí Jáshowa ííłní: “Mózes shinaalʼaʼí yę́ę daaztsą́; éí bąą nílááh, Jórdan tooh haʼnaagóó dohnééh; díí dineʼé tʼáá ałtso éí kéyahígíí baa dideeshʼáałgo Ízrel dineʼé bííʼ átʼé.” (Joshua 1:​1, 2) Jáshowa éí Mózes bá nijilʼaʼgo 40 nááhai. Kʼad éí naanish łah átʼéhígíí haa deetʼą́!

² Mózes éí Ízrel dineʼé nijiʼeeshgo ląʼí nááhai. Kʼad éí Jáshowa díí hąą niilyá. Íiznízin shı̨́ı̨́, diné daatsʼí dashíistsʼą́ąʼ doo. (Deuteronomy 34:​8, 10-12) Naaltsoos léiʼ Diyin Bizaad yaa halneʼgo ályaa, éí Joshua 1:​1, 2 yeinítʼı̨́įgo áníigo ooʼishii łaʼ nináánáltéehgo nantłʼa índa yéeʼgo hooʼaah.

3, 4. Jáshowa éí Jiihóvah baʼjólíigo haitʼéego hakʼihasdliʼ? Haʼátʼíí bínaʼídíilkid doo?

³ Jáshowa éí diné kótʼéego baa nitsíjíkeesgi nihił béédahózin. Ákondi Jiihóvah yaʼólíigo, ábiʼdooʼniid yę́ę tsı̨́įłgo  yiʼiilaa. (Joshua 1:​9-11) Jiihóvah baʼjólíigo biniinaa hakʼihasdliʼ. God éí diyingo naalʼaʼí łaʼ choyoołʼı̨́įgo Jáshowa dóó Ízrel dineʼé yíká análwoʼgo tázhdookai. Díí diyingo naalʼaʼí éí tʼáá bééhózinígo Jiihóvah biYeʼ áłtsé bá yizhchíinii, Saad bidiʼníinii átʼı̨́.—Exodus 23:​20-23; John 1:1.

⁴ Jáshowa éí naʼaʼeeshii áhoʼdilyaago Jiihóvah éí Ízrel dineʼé łahgi átʼéego ádajiłʼı̨́į dooleełgi yee yíká análwoʼ ńtʼééʼ. Dííshjı̨́įdi ałdóʼ tʼáá ákótʼé. Jiihóvah íinízinígi átʼéego bidineʼé dahikahígi náás yigááł. Ooʼishii nihá niiltínígíí Jesus, éísh badaʼííníidlíi doo? (Matthew 23:10 yíníłtaʼ.) Díí bééhodoozįįł biniyé, Jiihóvah éí ałkʼidą́ą́ʼ bidineʼé booʼishii táidiiʼeezh yę́ęgi hazhóʼó dadíníilʼįįł.

5. Jériko bíighahgi Jáshowa háí yikʼíníyá? (Áłtsé naashchʼąąʼígíí níníłʼı̨́.)

⁵ Ízrel dineʼé éí tooh Jórdan haʼnaa nijikai. Ńtʼééʼ Jériko bíighahgi Jáshowa éí hastiin léiʼ diltłish dah yootı̨́įłgo bikʼízhníyá. Áádóó ábijiní: “Daʼ nihichʼijíísh nílı̨́, doodaiiʼ nihiʼanaʼí daatsʼí bichʼijí nílı̨́?” Jiihóvah “bisiláo dah deínéehii binanitʼaʼí” nishłı̨́ níigo ádééhooszįįdgo Jáshowa tʼóó bikʼee tsízdoolyiz. Áko áháłníigo God bidineʼé kʼad bíká iishyeed. (Joshua 5:​13, 14 yíníłtaʼ.) Diyin Bizaad biiʼ náánáłahgo éí Jiihóvah tʼáá bí Jáshowa yichʼįʼ haadzííʼ ní. Nihił béédahózingo God éí diyingo naalʼaʼí chooʼı̨́įgo bílaʼashdlaʼii yichʼįʼ yáłtiʼ ńtʼééʼ.—Exodus 3:​2-4; Joshua 4:​1, 15; 5:​2, 9; Acts 7:38; Galatians 3:19.

6-8. (a) Diyingo naalʼaʼí ánínę́ęgi haʼátʼíí biniinaa bikʼee tʼóó hoł adahóóyóí? (b) Kótʼéego hoʼdooʼniid yę́ęgi haitʼéego baa hódząʼ átʼéé lá? (Footnote ałdóʼ níníłʼı̨́.)

⁶ Diyingo naalʼaʼí éí kódaʼoołaago Jériko bikʼeh dadidoodleeł hałní. Éí siláo tʼáá ałtso bąąh náhidínóolgish hoʼdooʼniid. Áko díí bikʼee tʼóó hoł adahóóyóí. Kódahoʼdiilyaago éí diné bił ahigą́ągi doo há dabíighah da doo. Anaaʼ hodooleeł bichʼįʼ hoolzhish, ákoósh hąąh nídahidínóolgishgo yáʼátʼééh?—Genesis 34:​24, 25; Joshua 5:​2, 8.

⁷ Ízrel bisiláo shı̨́ı̨́ ádeiznízin, ‘Dah yinéełgi haaléitʼéego nihighan hazʼą́ą́dóó anaaʼí bitsʼąą baa ádahwiilyą́ą doo?’ Ńtʼééʼ tʼáadoo kótʼéʼílíní Jérikodóó hastóí łahgo átʼéego tsíndadeezkééz. Éí nídaasdzíidgo Ízrel dineʼé tʼáádoo yikʼiijéeʼ da. Yíníiltaʼgo ání: “Ízrel dineʼé biniinaa Jériko kin haalʼáhígíí yéego dáʼdeelkaal; doo łaʼda chʼígháhí da, doo łaʼda yah iigháhí da.” (Joshua 6:1) Ízrel dineʼé díí yaa dah hodiiztsʼą́ąʼgo, Jiihóvah áníigi yadaʼoozlííʼ!

⁸ Diyingo naalʼaʼí éí Jáshowa ííłníigo Jériko doo bikʼiidoojah da. Nidi Jériko kin haalʼáhígíí hastą́ą́ jı̨́ tʼááłáhídi binínáhkah doo, áádóó tsostsʼid jı̨́ aleeh góneʼ tsostsʼidi binídoohkah. Siláo danilínígíí daatsʼí ádeiznízin: ‘Yáadilá, tʼáádoo biniyéhígóó díí bąąh niʼídáah doogo átʼé!’ Jiihóvah hooʼishgi doo dajooʼı̨́į da, ndi Bí éí tʼáá íídą́ą́ʼ ádooníiłgi bił bééhózin! Kótʼéego hałnínígíí bikʼehgóó ádajitʼı̨́įgo, Ízrel dineʼé hweʼoodląʼ bidziilgo áyiilaa. Jériko tʼáadoo  bikʼi jiijéeʼ da.—Joshua 6:​2-5; Hebrews 11:30. * (Footnote níníłʼı̨́.)

9. Haʼátʼíí biniinaa God kótʼé nínígíí bikʼeh honiilʼı̨́į doo? Łaʼ baa chʼíhoníʼaah.

⁹ Díí haʼátʼíí bitsʼą́ą́dóó bíhwiidiilʼááł? Jiihóvah biorganization łahda ániidígíí yee ánáádaʼiiłʼįįh. Áko díí łahda biniinaanii doo bikʼizhdiitįįh da łeh. Éí áłah néidleehgi, nahaneʼgóó doodaiiʼ tʼáá nihí Diyin Bizaad neilkaahgo éí electronic devices chooʼı̨́įgi doo nihá yáʼátʼéeh da niidzin shı̨́ı̨́ ńtʼééʼ. Kʼad baa ákohwiindzingo éí díí yéigo áká análwoʼii ádaatʼéé lá. Kótʼéego nihidiʼníigi bikʼeh honiilʼı̨́įgo niheʼoodląʼ haitʼįįh? Éí bidziil yileeh, áádóó nihibrothers dóó nihisisters łáʼí bił niidlı̨́į doo.

10. Jerúsalemdi governing body áłah doołeełgo, háí bohónéedzą́ągo áyiilaa?

¹⁰ Doo Jew dineʼé nilı̨́ı̨́góó Korníílyas éí 36 C.E. yihah yę́ędą́ą́ʼ tʼáadoo bąąh náhineeshgizhgóó Oodlání silı̨́ı̨́ʼ. Ndi 13 daatsʼí nááhaigo, Jew Oodlání łaʼ ádaaníigo Oodlání tʼáá ałtso bąąh nídahinilgish doo. (Acts 15:​1, 2) Díí biniinaa Ántiyakdi nihibrothers yee ałghaʼdaʼditʼááh. Áko elders éí Paul Jerúsalemgóó díínáałgo governing body éí ąąh náhinilgishgi hazhóʼó nabídídíiłkił dahałníigo adahasʼaʼ. Ndi háí éí íiyisíí ahóółʼaʼ? Paul ájíní: “Diyin God shił ííshją́ą́ áyiilaii  bikʼehgo ákǫ́ǫ́ níyá.” Jesus Christ éí Jerúsalemgóó Paul ayííłʼaʼ, áko éí ąąh náhinilgishgi governing body hachʼįʼ yee éédahodoosįįł.—Galatians 2:​1-3.

11. (a) Jew Oodlání ąą náhinilgish haitʼéego tʼah dayoodlą́ą́ ńtʼééʼ? (b) Paul éí elders haitʼéego yikʼeh ádzaa? (Footnote ałdóʼ níníłʼı̨́.)

¹¹ Christ éí governing body áyidííniidgo, éí Oodlání doo Jew dineʼé dajílíinii doo bąąh náhiniłgish da doo. (Acts 15:​19, 20) Ndi Jew Oodlání éí beʼashiiké tʼáá ákódeiłʼı̨́įgo ląʼí nááhai. Paul éí bee hazʼáanii Mózes baa deetʼánę́ę doo bił nilı̨́į da haʼníigo Jerúsalemgi elders haa dahodiiztsʼą́ą́ʼ. (Acts 21:​20-26) Paul ádeiłní, diné dı̨́įʼgo éí sodizin bá hooghangóó diiʼish, áko daniiłtsą́ągo éí bee naa haneʼígíí doo tʼáá aaníi da lá hwiidínóodzįįł. * (Footnote níníłʼı̨́.) Paul kózhdidooniił ńtʼééʼ, ‘Yáadilá, haʼátʼíísh íiyisíí biniyé kónínééh dashidohní? Jew Oodlání yeeʼ ąą náhinilgish haʼnínígíí doo yikʼidaʼdootą́ą́ʼ ádaatʼée da.’ Ndi aʼohgo ázhdiilyaago tʼáadoo kótʼéego hajoodzíiʼ da, áádóó elders ádahałnínę́ę bikʼehgóó ájiidzaa. Háálá Oodlání łáʼí danilı̨́į dooígíí éí íiyisíí bíká áhátʼı̨́. Jesus daaztsą́ągo, éí bee hazʼáanii Mózes baa deetʼánę́ę niiníłtʼiʼ. Haʼátʼíí lá biniinaa ąą náhinilgishgo Christ tʼóó yá hasʼą́ągo nidzaago ahoolzhiizh?—Colossians 2:​13, 14.

12. Ąąh náhineeshgizh baa hwiinítʼı̨́įgo haʼátʼíí biniinaa Christ éí tʼóó yá hasʼą́ągo nidzaago ahoolzhiizh?

¹² Haʼátʼíhída índída bínááhooʼaahgo éí tʼáá hodinaahgo bidíʼnóoldı̨́ı̨́ł. Jew Oodlání łaʼ, bee hazʼáanii Mózes baa deetʼánę́ę kʼad doo biyaah jizhjaaʼ daaígíí doo hazhóʼó bikʼidazhdidootı̨́įłgi Jesus bił bééhózin. (John 16:12) Ąąh náhineeshgizh wolyéii éí God bidineʼé jílı̨́įgi ííshjání áyósin dazhnízin ńtʼééʼ. (Genesis 17:​9-12) Doo ąąh náhineeshgizhgóogo biniinaa Jew dineʼé doo Oodlání nilínígíí atíshíłʼı̨́į doo danízin ńtʼééʼ. (Galatians 6:12) Christ hachʼįʼ haʼólníigo éí kótʼé hałníigo Paul choyoołʼı̨́įgo naaltsoos hachʼįʼ ííłʼı̨́ı̨́ ńtʼééʼ.—Romans 2:​28, 29; Galatians 3:​23-25.

13. Christ nihooʼishgi bikʼéé siidzı̨́įgo haʼátʼíí yee nihíká análwoʼ?

¹³ Dííshjı̨́įdi Christ tʼahdii Oodlání yá Ooʼishii nilı̨́. Jiihóvah biorganization kótʼéego níigi doo hazhóʼó bikʼidiitįįhgóogo nahdę́ę́ʼ Christ éí Jiihóvah bidineʼé yiníʼeezh yę́ęgi baa nitsíníkees. Jáshowa doodaiiʼ daalʼaadii bídayééłkaahdą́ą́ʼ, Christ éí hódzą́ yee naʼnitingo Jiihóvah bidineʼé yee yaa áhályą́ą́ ńtʼééʼ. Díí éí hweʼoodląʼ bidziil áyósin áádóó łáʼí ídlı̨́ı̨́ ńtʼééʼ.—Hebrews 13:8.

14-16. “Baʼahódlíigo índa hóyą́ągo naalʼaʼí” kótʼéego níigi haitʼéego niheʼoodląʼ bidziil doogo Christ nihá áyósin?

¹⁴ Dííshjı̨́įdi éí “baʼahódlíigo índa  hóyą́ągo naalʼaʼí” kótʼéego daaníigo danihéeʼéésh. (Matthew 24:45) Áko díí binahjįʼ bééhózingo Jesus éí tʼáá aaníí nihaa áhályą́. Marc joolyéego haʼáłchíní dı̨́įʼgo ájíní: “Séítan éí Oodlání dah yikahgi doo dahadziil da doo nízingo hooghan nahazʼą́ą́góó yaatįįh nádááh. Áko haghangi á ndajizíinii éí tʼáá damóo náʼoodleeł bikʼeh family worship ádaałʼı̨́ haʼníigo éí Séítan bitsʼąą bee ádaa ádahojilyą́!”

¹⁵ Christ nihooʼishgi hazhóʼó baa nitsíikeesgo éí niheʼoodląʼ bidziil dooleełgo yee nihíká análwoʼgo átʼéegi baa ákoniidzin doo. Elder léiʼ Patrick wolyéego halneʼ: “Weekends góneʼ nahaneʼ biniyé tʼáá díkwíhígo ahínáohkah dooleeł hoʼdooʼniidgo tʼóó áłtsé łaʼ doo bił yáʼádaatʼéeh da.” Ájíníigo éí kótʼéego bee nihá hooʼaʼígíí Oodlání tʼáá ájíłtso Jesus haa áhályą́ągi bee bééhózin. Nihibrothers dóó nihisisters łaʼ ayóó yádanízin, łaʼ éí nahaneʼgóó doo aghą́ą́h ndaakai da yę́ę éí shídį hwiindzin lá danízin. Áko hweʼoodląʼ bidziil daazlı̨́ı̨́ʼ.

¹⁶ Nidahwiilneʼgóó áłtsé ádeíníilzin dooígi ałdóʼ Christ yee nihíká análwoʼ. Díí éí naanish ílíinii átʼé. (Mark 13:10 yíníłtaʼ.) Elder léiʼ André wolyéego éí Jiihóvah biorganization bitsʼą́ą́dóó nahatʼá hahwiileehii bikʼehgóó ájítʼé. Kójíní: “Branchdi nidaalnishii tʼáá díkwíhígo ályaago éí nihodoogááł bílátah dah hashzhiizh áádóó nahaneʼgi áłtsé siilʼą́ą dooígi bee baa nitsáhákees.”

17, 18. Adaʼalʼínę́ęgi łah átʼı̨́įgo, haitʼéego nihá yáʼátʼééh?

¹⁷ Kótʼéego haʼníinii éí kʼad áádóó náasdi nihíká adoolwoł éí nihiNaatʼáanii  Jesus Christ bitsʼą́ą́dę́ę́ʼ. Ániidígo kótʼéego náádanihidooʼniidgo áádóó éí bikʼehgóó íinidzaago haitʼéego éí níká eelwodgi hazhóʼó baa nitsíníkees. Áłah néidleehgi índa ndahwiilneʼgóó łah átʼéego ánáádaalʼı̨́įgo éí nił hazʼą́ą́dóó haitʼéego nihíká eelwod? Díí éí family worship ándaałʼįįhgi baa nídadóotʼįįł.

¹⁸ Jiihóvah biorganization bikʼeh honiilʼı̨́įgo éí yáʼádaatʼéehii bee nihikʼi hadleeʼ. Ákóniitʼéego éí náásgóó nihił hózhǫ́ǫ doo. Kʼad éí naaltsoos doo ayóó hahinidéehgo ádeilneʼ da, áko béeso doo ląʼí chooʼı̨́į da. New technologies chooʼı̨́įgo ląʼí diné haneʼ yáʼátʼéehii bee bił dahaneʼ. Electronic bee naaltsoos wóltaʼígíí dóó ndaalkidígíí choiníłʼı̨́įgoósh ná bíighah? Díí éí bee Christ bikééʼ siidzı̨́į doo, háálá baa honiidzą́ągo díí organization yee yilwołígíí hazhóʼó choiniilʼı̨́į doo nihóʼní.

19. Christ kótʼéego níigi haʼátʼíí biniyé bikééʼ siidzı̨́į doo?

¹⁹ Christ ánihiłníinii bikʼehgo ánítʼéego nihibrothers dóó nihisisters beʼoodląʼ bidziilgo ííníilzin, áádóó łáʼí bił niidlı̨́. André éí daaBéthelgóó nidaalnishii ayáhígo ádaalyaa yę́ę yeinítʼı̨́įgo ání: “Bétheldi nidaalnish ńtʼééʼ yę́ę éí łahdi náádadeeshnishgo ił ídlı̨́ bee danéshʼı̨́. Jiihóvah biorganization tʼáá yíighah deíjeehgo naanish baa dahiditʼaahígíí yaa bił dahózhó.”

20, 21. (a) Nihooʼishii Christ haʼátʼíí biniyé badaʼííníidlíi doo? (b) Díí bikéédóó haʼátʼíí naʼídíkid shı̨́ı̨́ baa nídadíitʼįįł?

²⁰ Nihooʼishii Jesus Christ éí “akʼeh hididleeh doo,” áádóó “tʼóó bikʼee tsízdólyésígi ádaatʼéii” łaʼ yidoolíiłgo bichʼįʼ hoolzhish. (Revelation 6:2; Psalm 45:4) Kéyah ániidíii bikááʼ dahiniiʼnáa doo, índa nihinaanish dadooleełii biniyé hanihidilééh. Daneeznánę́ę náábiʼdiiljéeʼgo nidaniitin doo, áádóó nahasdzáán nizhónígo ándoolníiłgi łahdóó bee áká ádiijah.

²¹ Azhą́ haada hoodzaa ndi, nihiNaatʼáanii dóó nihiHooʼishii badaʼííníidlíigo éí kéyah ániidíjįʼ chʼínihidooʼish. (Psalm 46:​1, 2 yíníłtaʼ.) Dííshjı̨́įdi łah átʼéego nihił hooʼaahgo tʼáá nantłʼago átʼé, tʼáadoo naólnínę́ęgi áhootʼįįhgo éí tsíkʼeh. Kóhootʼéego nihił hooʼaahgo éí nihintsékees hashtʼedítʼée dooleełgi, índa Jiihóvah badaʼííníidlíigi haitʼéego bidziilgo ííníilzin doo? Díí bikéédóó baa nídadíitʼįįł.