1. Haʼátʼíí biniyé Jiihóvah tʼéí bá neiilʼaʼ doo?

JIIHÓVAH ánihiilaa, áko tʼáá bí tʼéí bichʼįʼ nidahwiidláa doo. (Rev. 4:11) Ázhą́ Jiihóvah ayóóʼádeíníiʼní áádóó nihił nilı̨́į ndi, łahgo éí nantłʼaii hólǫ́. Éí bitsʼánihidiʼdoodlóosgo átʼé. Tʼáá bítséedi ákóhodooníiłgi nihił béédahózin doo. Áłtsé éí Jiihóvah bá naʼaʼaʼ haʼníigi baa nídadíitʼįįł.

2. Exodus 20:5 haʼátʼíí nihiłní?

² God ayóóʼájóʼníigo bá nijilʼaʼ doo ní Diyin Bizaad. Tʼáá bí tʼéí díníilzin doo. Tʼáá háida índa tʼáá haʼátʼíhída éí doo nihijéí biiʼ bá hosiilʼą́ą da doo.—Exodus 20:5 yíníłtaʼ.

3. Haʼátʼíí biniyé Jiihóvah bá neiilʼaʼ?

³ Jiihóvah béédahosiilzįįdígíí bikʼehgo bá nideilʼaʼ. Yee átʼéii ayóóʼádeíníiʼní dasiidlı̨́ı̨́ʼ. Bił yáʼátʼéehii índa doo bił yáʼátʼéehii nihí ałdóʼ tʼáá ákotʼéego baa nitsídeikees. Bílaʼashdlaʼii hoolʼáágóó bił dahózhǫ́ǫgo dahináa doogo nahaʼáagi nihił danilı̨́. Bikʼis niidlı̨́į dooígi nihá yee hasʼą́, áko éí baa ahééh daniidzin. (Ps. 25:14) Ánihiilaa áádóó ląʼígóó béédahosiilzįįd. Éí biniinaa God áhánígo nihił hólǫ́.—Jas. 4:8.

4. (a) Devil éí haʼátʼíí choyoołʼı̨́įgo Jiihóvah bá neiilʼaʼ yę́ęgi doo bíniilʼą́ą́góó ánihiiłʼįįh? (b) Díí biiʼdóó haʼátʼíí baa nídadíitʼįįł?

⁴ Devil éí nihokááʼ bił nidahaztʼiʼii yee ádíhólnííh. Áko doo ákogi ádazhdoonííł nízingo éí bídin daniidlíinii  índa atsʼíís yidánoolníinii neiloʼ. (Eph. 2:​1-3; 1 John 5:19) Jiihóvah yitsʼánihidoolóós yiniyé átʼı̨́. Kótʼínígi naakigo dadíníilʼįįł. Áłtsé éí ayóó áshtʼı̨́į doo niidzin doogo ánihidoolííł. Naaki góneʼ éí bee ákʼihwiiltaʼ dooleełii doo yáʼádaatʼéhígíí bidázhnoolníi doo nihóʼní.

5. Béeso ayóóʼííníiʼní diidleełgi haʼátʼíí biniyé bitsʼąą ádaa áhwiilyą́ą doo?

⁵ Tʼáá áníiltso éí doodı̨́įłii, nihiʼééʼ, índa yáʼátʼéehgo nihighan dooleeł daniidzin. Ákondi béeso ayóóʼííníiʼní diidleełgi bitsʼąą ádaa áhwiilyą́ą doo. Séítan bił hoogááłjí éí naadeełii shóidootʼeełgi índa ‘béeso bíchą́ hwiidéeniʼ.’ (2 Tim. 3:2) Jesus bił bééhózingo éí bikééʼ deíkáahii béeso ayóóʼóóʼní bee bídahodínóotah. Éí ání: “Doo tʼáá łahjįʼ naatʼáanii naaki bá nijólʼaʼ átʼée da, háálá łaʼ bikʼeezhdiniih doo, łaʼ éí ayóóʼájóʼníi doo, éí doodaléiʼ łaʼ doo nahdi jóʼníi da doo, łaʼ éí jijoołáa doo. Diyin God índa atʼı̨́ doo tʼáá łahjįʼ bá nijólʼaʼ átʼée da.” (Matt. 6:24) Ashtʼı̨́į doo jinízingo áádóó Jiihóvah bá nijilʼaʼgo éí naatʼáanii naaki bá joolnish nahalin. Kójítʼı̨́įgo éí doo Jiihóvah tʼéi bá nijilʼaʼ da.

6. Jesus éí Leiyodisíyagi áłah nádleehígíí yichʼįʼ haadzííʼ yę́ę bitsʼą́ą́dóo haʼátʼíí bíhooʼaah?

⁶ Leiyodisíyagi áłah nádleehígíí ádaa dahaʼníigo ádaaní: “Ashtʼı̨́, asistʼįįd, tʼáadoo bídin nishłíní da.” Ákondi Jiihóvah dóó Jesus éí ‘hojoobaʼ ádajítʼé, hąąh yíní, téʼéʼı̨́ dajílı̨́, doo daʼjooʼı̨́į da, índa tʼáá dajilchíʼígo nijikaigo’ yee honéłʼı̨́. Kódajítʼéhígíí Jesus yee hachʼįʼ haadzííʼ, háálá Jiihóvah bił kʼé daʼahizhdiʼnínę́ę dazhdoołchxǫǫł.  (Rev. 3:​14-17) Nihijéí biiʼ béeso ayóóʼóóʼní hazlı̨́įʼgo, tsı̨́įłgo nihintsékees hashtʼediilnííł. (1 Tim. 6:​7, 8) Doo íidzaagóó éí haʼátʼíí shı̨́ı̨́ ałdóʼ ayóóʼííníiʼníi doo áádóó Jiihóvah bichʼįʼ nahwiidláagi doo nihá yinízin da doo. “Diyin God łeʼnízinii nilı̨́,” áko tʼáá bí tʼéi bá neiilʼaʼ doo. (Deut. 4:​24, NW) Haitʼéego éí béeso ayóóʼájóʼní jileeh?

7-8. Elder léiʼ David jolyéego haajiidzaa?

⁷ United States biiʼ kééhojitʼı̨́įgo elder léiʼ David jolyéego baa haneʼ. Nijilnishgi yéigo bizhdiilkaalgo ádaa nitsíjíkees. Bá nijilnishígíí éí naanish yáʼátʼéehii béeso ląʼí bee álʼínígíí haa nideidiʼáahgo yéigo bee hwééhoʼdooszįįd. “Díí shinaanish éí Jiihóvah shikʼi hadlíigi átʼé nisin,” jiní. Daʼ tʼáásh aaníí Jiihóvah hakʼi hasdliʼ?

⁸ David éí Jiihóvah bił kʼé ahizhdiʼnínę́ęgi doo alą́ąjįʼ ájósin dago bee ádaa ákozhniizı̨́ı̨́ʼ. “Áłah náʼádleehdi áádóó nahashneʼgóó éí naanishdi anídahaztʼiʼii baa nitséskees łeh. Ląʼí béeso áshʼı̨́į ndi, shidaʼdiiłʼáhígíí shide ánátʼįįh áádóó shichʼooní doo bił ahídinéeshnáa da sélı̨́ı̨́ʼ,” jiní.

9. David haajiidzaa áádóó haʼátʼíí bitsʼą́ą́dóó bíhooʼaah?

⁹ David éí alą́ąjįʼ ájósin dooleełii baa tsízdeezkééz. Kójíní: “Tʼáá kʼad hashtʼedeeshłííł niizı̨́ı̨́ʼ.” Kweʼé oolkiłígi tʼéí naashnish doo jiníigo bá nijilnishí bił hojoolneʼ. Haa hoodzaa? Tʼáá ákǫ́ǫ́ naanish haa náádiilyá. Áko David haajiidzaa? Ájíní, “Tʼáá éí biiskání tʼáá náhidizííd auxilliary pioneer nishłı̨́į doo biniyé haʼdiishłaa.” David dóó beʼasdzą́ą́  éí kin dantsaaígíí clean ájiłʼı̨́įgo bee ákʼinízhdiildzil. Ląʼí kótʼéii naanish doo deinízin da, ákondi hó éí díí binaʼanishii tʼóó naanish átʼé jinízin. Tʼahádóó éí David regular pioneer jizlı̨́ı̨́ʼ, áádóó hweʼasdzą́ą́ ałdóʼ regular pioneer silı̨́ı̨́ʼ. Kʼad éí béeso doo ląʼí ájíłʼı̨́į da, ndi tʼáá náhidizííd bikʼeh béeso há bíighah nádleeh. Jiihóvah éí alą́ąjįʼ ííníilzin doo jinízin áádóó Bí bee bóhólníihgo bił hazʼáanii alą́ąjįʼ ádayósinii éí yaa áhályą́ągo hoł bééhoozin.—Matt. 6:​31-33.

10. Nihijéí haitʼéego baa áhwiilyą́ą doo?

¹⁰ Nihee hólóonii áłchʼı̨́dí doodaiiʼ ląʼí ndi, nihijéí éí íiyisíí baa áhwiilyą́ą doo. Díí éí haitʼéego? Béeso tʼáadoo ayóóʼííníʼníní. Jiihóvah bá nanilʼaʼgo éí ninaanish tʼáadoo alą́ąjįʼ siníłʼání. Kwíitʼı̨́įgo éí haitʼéego nihił bééhózin doo? Díí ndaʼídíkid baa nitsíníkees: Áłah néidleehgo doodaiiʼ nahashneʼgo, éísh shinaanish áłahjįʼ baa nitséskees? Naanish bíighah aséłı̨́įʼgo, éísh shibéeso tʼáá hólǫ́ǫ dooleełgo áłahjįʼ baa nitséskees? Béeso índa naadeełii biniinaa, éísh shichʼooní bił saad náhádleehgo ííłʼı̨́? Jiihóvah tʼéí baa naashʼá doogo, éísh naanish tʼáá aʼohígíí bá hoséłʼą́? (1 Tim. 6:​9-12) Díí béédeilniihgo Jiihóvah éí tʼáá áníiltso ayóóʼánihóʼní, áko bá nidaalʼaʼígíí ííłní: “Tsʼídá doo nihikʼi dínéeshchéeł da; tsʼídá doo yóóʼanihidideeshʼáał da.” Éí biniinaa yilʼaadii Paul kótʼéego akʼeʼashchı̨́: “Béeso tʼáadoo bíchą́deídółniʼgo dahinohnání.”—Heb. 13:​5, 6.

11. Bee ákʼihaltaʼii haaʼdoolííł?

¹¹ Jiihóvah éí nihił dahózhǫ́ǫgo dahiniiʼnáa doo nihóʼní, áko bee ákʼidahwiiltaʼii yee nihíká análwoʼ. Diyin Bizaad ání: “Diné ayą́ áádóó adlą́ índa binaanish yaa bił hózhǫ́ǫgo yaa naagháhígíí biláahgo bá yáʼánáánátʼéeh dooleełii ádin.” (Eccl. 2:24) Ákondi, nihookááʼ bił nidahaztʼiʼii bitsʼą́ą́dę́ę́ʼ bee ákʼidahaltaʼii doo nihá yáʼádaatʼéeh da. Éí yáʼátʼéehgo iiná doo ílı̨́ı̨́góó ádayósin, áádóó Diyin Bizaad éí haʼátʼíí shı̨́ı̨́ joodláa doo nínę́ę, éí ayóóʼádajóʼníi doo nihiʼdóʼní.

12. 1 Corinthians 10:​21, 22 éí haʼátʼíí biniyé bee ákʼihwiiltaʼii hazhóʼó baa nitsíikees doo nihiłní?

¹² Jiihóvah tʼéí bá neiilʼaʼ doo, áko “Jiihóvah bibikááʼadání áádóó demons  bibikááʼadání” éí doo tʼáá áłah bikááʼdóó ajiyą́ą da doo. (1 Corinthians 10:​21, 22 yíníłtaʼ, NW.) * Hakʼis nilı̨́įgo éí bił ajiyą́ą łeh. Atéʼélʼı̨́, spiritism, ił ashtéézh, atsʼíís yidánoolníinii, doodaiiʼ doo yitsʼííd ádaatʼéii bee ákʼihwiiltaʼgo éí God biʼanaʼí chʼiyáán ádayiilaago bił daʼjiyą́ nahalin. Díí nihihodidoołtʼih áádóó Jiihóvah bił kʼé ahidiʼnínę́ę nihitsʼą́ą́ʼ yidoołchxǫǫł.

13-14. James 1:​14, 15 bikʼehgo bee ákʼihwiiltaʼ dooleełii haʼátʼíí biniyé hazhóʼó bee ádaa áhwiilyą́ą doo? Łaʼ baa chʼíhoníʼaah.

¹³ Bee ákʼihwiiltaʼii éí chʼiyáán nahalin. Chʼiyáán nihizééʼ ahiiʼníiłgi bee nihíhólnííh. Éí chʼiyáán iilnaʼígíí nihitsʼíís bitah yileeh. Chʼiyáán yáʼátʼéehii jiyą́ągo éí hatah yáʼáhootʼééh, doo yáʼátʼéehii jiyą́ągo éí doo hatah hwiináa da łeh. Jiyánę́ę bikʼehgo hatah áhootʼéegi bee bééhózin yileeh.

¹⁴ Tʼáá ákótʼéego bee ákʼihwiiltaʼii nihíniʼ biiʼ hiiʼníiłgi bee nihíhólnííh. Áko nihíniʼ índa nihijéí biih hiiʼníłígíí yaa nídóotʼįįł. Bee ákʼihaltaʼii yáʼátʼéhígíí éí nihá yáʼátʼééh, doo yáʼátʼéhígíí éí atínihidoolííł. (James 1:​14, 15 yíníłtaʼ.) Atíhoolaago éí tʼahádóó bééhóziní íidoolííł. Éí biniinaa Diyin Bizaad ánihiłní: “Nihidaʼdódleeh lágo; Diyin God doo bá nahatʼiʼ da. Diné tʼáá haʼátʼíhída kʼizhdííláhígíí tʼáá éí ałdóʼ áłah ázhdoolííł. Háálá tʼáá háiida tʼáá hó hatsʼíís yidánoolníinii kʼizhdííláhígíí tʼáá éí áhodoołdįįłii ádá shóizhdoołtʼeeł.” (Gal. 6:​7, 8) Baa hastiʼii átʼé, áko Jiihóvah yijoołáhígíí tʼáá ałtso bitsʼą́ąjįʼ kódiiʼnííł!—Ps. 97:10.

15. Jiihóvah éí haʼátʼíí baa hózhóonii nihá niiníʼą́?

¹⁵ Jiihóvah bidineʼé ląʼígo éí JW Broadcasting^® bił danizhónígo deinéłʼı̨́. Nihisister Marilyn wolyéego ání: “JW Broadcasting néshʼı̨́įgo éí yáʼátʼéehgo nitséskeesgo áshósin, áádóó ndaalkidígíí tʼáá ałtso yáʼádaatʼééh. Doo shił hatsʼíídgóó éí haneʼ yáʼátʼéehii, doodaiiʼ Morning Worship néshʼı̨́į łeh. Kótʼéego éí Jiihóvah índa biorganization áhánígo bił honishłǫ́. JW Broadcasting nihá hólónígíí beego tʼáá íiyisíí sheʼiinaʼ yáʼátʼééh silı̨́ı̨́ʼ.” Niísh ałdóʼ níká análwoʼ? Tʼáá nínádíziʼ bikʼeh haneʼ łaʼ ánáánálʼįįh, áádóó jíistsʼą́ąʼ dooleełii, hanááł nidoolkiłii índa sin bee ił hózhóonii tʼáá áłahjįʼ dahólǫ́.

16. Haanízahjįʼ ákʼihwiiltaʼ dooleełgi haʼátʼíí biniyé bee ádaa áhwiilyą́ą doo?

¹⁶ Bee ákʼihaltaʼii ádaatʼéii áádóó haanízahjįʼ bee ákʼihwiiltaʼ dooleełgi bee ádaa áhwiilyą́ą doo. Doo ákwíitʼı̨́ı̨́góó éí Jiihóvah bá neiilʼaʼ doo yę́ęgi, bee ákʼihaltaʼii alą́ąjįʼ ííníilzin doo. Ląʼí díí bá ndantłʼah. Abigail, nihisister 18 binááhaigo kóní: “Naashnishdę́ę́ʼ náshdáahgo hanáshyı̨́ı̨́h biniyé TV nánéshʼįįh. Oolkił doo baa áháshchįįhgóó éí TV bidááhdóó ląʼídi shee ahéʼnínáʼálkiʼ.” Nihibrother ániid naagháii Samuel ání: “Internet biiʼ videos ndaalkidígíí ląʼí nééłʼı̨́ı̨́ʼ lágo bee ádaa ákoniisdzįįh. Tʼááłaʼí dinéeshʼįįł niisįįh yę́ę tʼáadoo baa áháshchįįhí tááʼ doodaiiʼ dı̨́įʼdi ahééʼílkid lá.”

17. Haanízahjįʼ ákʼihwiiltaʼ dooleełgi haitʼéego bee ádaa áhwiilyą́ą doo?

¹⁷ Díí baa náhátʼínígíí haitʼéego doo  baa ninádiniidáah da doo? Áłtsé éí damóojįʼ díí haanízahjįʼ bee ákʼihóltaʼgi bee ádaa ákoniizįįh. Éí haanízahjįʼ nee ahééʼiilkeed TV doodaiiʼ Internet níníłʼı̨́įgi áádóó mobile games bee naninéegi nináhidizídí bikááʼ ádadííliił. Kónítʼı̨́įgo éí schedule łaʼ ádíílííł. Éí ílı̨́įgo ádadoolníiłii áłtsé, áádóó áadi índa bee ákʼihołtaʼ dooleełii bikááʼ ádadííliił. Náá ákóneʼ éí Jiihóvah díí bee shíká anánílwoʼ bididííniił. Kótʼéego éí Diyin Bizaad yíníłtaʼgi, family worship, áłah néiidleehgóó índa nahólneʼgóó nitah hwiináago tʼáá ałtsojįʼ ná bíighah doo. Kónítʼı̨́įgo éí bee ákʼihóltaʼii baa nił hózhǫ́ǫ doo, háálá Jiihóvah tʼáá íídą́ą́ʼ bá nisínílʼaʼ doo.

18-19. Jiihóvah tʼéí bá nideilʼaʼgi haitʼéego ííshjání íilʼı̨́į doo?

¹⁸ Séítan hooʼáłígíí bił yóóʼahodoogááł áádóó nahasdzáán ániidí ánályaa dooleeł níigo yilʼaadii Peter yee akʼeʼashchı̨́ı̨́dóó bikʼijįʼ ání: “Ayóóʼánihóshʼníinii, díí bíká dadínóhʼı̨́įʼgo Diyin God binááł doo nihąąh daahchinígóó, áádóó tʼáadoo bee nihikʼídahótʼahígóó haleebee ádaahtʼı̨́įgo Diyin God bił kʼé daʼahíínóhʼníi” doo. (2 Pet. 3:14) Doo yáʼádaatʼéehii doo baa neidáágóó áádóó diyin kʼehgo yiidáałgo éí yilʼaadii Peter ánínée bikʼeh honiilʼı̨́ doo. Kwíitʼı̨́įgo éí tʼáá aaníí Jiihóvah tʼéí baa neiilʼaʼgi ííshjání ííníilzin doo.

¹⁹ Séítan dóó bił nidaaztʼiʼii éí daʼílíinii áłtsé óolzin yę́ęgi nihitsʼą́ą́ʼ niyiiłchxǫǫhgo yee nanihínítaah doo. (Luke 4:13) Azhą́ nantłʼa ndi, Jehovah tʼéí nihijéí biiʼ bá hosiilʼą́ą doo, náánáłahdę́ę́ʼ doodaiiʼ tʼáá haʼátʼíhída éí dooda. Tʼáadoo neʼ kódeiʼnehé bá nideilʼaʼgo tʼáá Bí tʼéí yą́ą́h nilíinii baa dadiilyééł!