1. Łaʼda baptize áhoʼdilyaago haʼátʼíí ájooníił doo?

BAPTIZEÍSH ániʼdiilyaa? Aooʼ ládą́ą́ʼ, Jiihóvah yinídlą́ągi tʼáá íídą́ą́ʼ shı̨́ı̨́ ííshjání íinilaa. Éí bidineʼé dah yikahígíí bił nidaashʼaʼ doo ninizı̨́ı̨́ʼ. Jiihóvah yinídlą́ągi nooséeł doo. Jiihóvah bidineʼé yooʼishgi yinídlą́ągo bidziil áálííł.

2-3. Jiihóvah éí bidineʼé haitʼéego yikʼidéezʼı̨́ı̨́ʼ? Łaʼ chʼíníʼaah.

² Jiihóvah éí bíniʼ yee átʼéiigi, yihodeezʼáanii, índa yee hasʼáanii yikʼehgo bidineʼé dah yikahígíí yikʼidéezʼı̨́ı̨́ʼ. Táaʼgo Jiihóvah yee átʼéii bidineʼé yee yooʼishgi baa nídadíitʼįįł.

³ Áłtsé éí, “Diyin éí doo ałʼohgo diné yaa nitsékees da.” (Acts 10:34) Jiihóvah ayóóʼóʼóʼníigo bąą biYeʼ éí diné tʼáá ałtso yikʼé nináʼdoodlééł biniyé nihá niiníłtı̨́. (1 Tim. 2:6; John 3:16) Jiihóvah éí bidineʼé choyoołʼı̨́įgo, éí bíistsʼą́ąʼ dooleełii nizhónígo baa haneʼii yee yił dahalneʼ. Áko ląʼí diné éí nihikʼé nináʼílyáagi bíká adoolwoł. Naaki góneʼ éí, Jiihóvah éí Diyin hashtʼehodítʼéego bił hazʼáanii nilı̨́. (1 Cor. 14:33, 40) Áko bichʼįʼ dahodísinii ałdóʼ tʼáá ákótʼéego hodéesyéelgo bił nahazʼą́ą doo. Tááʼ góneʼ éí, Jiihóvah “Nanihinitinii” nilı̨́. (Isa. 30:20, 21) Bidineʼé éí áłah náʼádleehgi índa nahaneʼgóó Diyin Bizaad íiyisíí yee nidaʼnitingo bił hazʼą́. Díí táaʼgo Jiihóvah yee átʼéii éí ałkʼidą́ą́ʼ Oodlání dah yikah ńtʼééʼ yę́ę ałdóʼ Jiihóvah haitʼéego yikʼidéezʼı̨́ı̨́ʼ ńtʼééʼ. Kʼad éí haitʼéego tʼáá díí átʼéego yee nihikʼidéezʼı̨́ı̨́ʼ? Áádóó níłchʼi diyinii nihíká análwoʼgo Jiihóvah bidineʼé haitʼéego bił nideilnish?

4. Acts 1:8 áníigi éí Jesus bikééʼ deíkáhígíí haʼátʼíí yidííniid, áádóó haʼátʼíí éí háká análwoʼ doo?

⁴ First century yę́ędą́ą́ʼ. Jesus yee naʼneeztą́ą́ʼ yę́ę éí bílaʼashdlaʼii bá ił chohooʼı̨́įgi yił ííshjání áyiilaa. (Luke 4:43) Díí nahaneʼ hayííłtʼiʼ yę́ę éí bídahoołʼaahii yę́ę éí “nahasdzáán nidahoneesʼą́ą́góó” baa nidahołneʼ doo yidííniid. (Acts 1:8 yíníłtaʼ.) Kótʼéego nahodoonihgo éí tʼáá bí bibee dabidziil doo yee yídaneelʼą́ą da. Ndi níłchʼi diyinii “áká análwoʼii” Jesus nihaa doolyééł nínę́ę háká análwoʼ doo.—John 14:26; Zech. 4:6.

5-6. Jesus bikééʼ naakai yę́ę éí níłchʼi diyinii haitʼéego bíká análwoʼ ńtʼééʼ?

⁵ Jesus bikééʼ ndaakai yę́ę éí Péntekast 33 C.E. yę́ędą́ą́ʼ níłchʼi diyinii baa daasyá. Níłchʼi diyinii bíká análwoʼgo tʼáá ákǫ́ǫ́ nídadíʼníitą́ą́ʼ. Áádóó tʼáadoo hodíínaʼí tsʼídá tʼóó ahayóí éí nizhónígo baa haneʼii nídeidiilá. (Acts 2:41; 4:4) Bikʼijįʼ asdlı̨́įʼgo tʼáadoo nídaasdzíid da, ndi kódaaníigo Diyin yichʼįʼ sodadoolzin: “Tsʼídá tʼáadoo náhoniyésí nizaad bee yádeiltiʼgo ádanihíleʼ.” Áádóó níłchʼi diyinii hwiiʼ hadadéébįįdgo “Diyin Bizaad tʼáadoo náhoniyésí bee dahojilneʼ ńtʼééʼ.”—Acts 4:18-20, 29, 31.

⁶ Jesus bídahoołʼaahii éí ndaʼnółtłʼaii ałdóʼ bichʼą́ą́h dahólǫ́ǫ́ ńtʼééʼ. Diyin Bizaad béédaʼalyaii doo ląʼí dahólǫ́ǫ da. Nihí átʼéhígi átʼéego binahjįʼ íhooʼaahii doo dahólǫ́ǫ da. Ląʼí diné tʼáá bí bizaad kʼehjí bił ndahojisneʼ. Azhą́ kótʼéego adinółtłʼaii dahólǫ́ǫ ndi, ídahoołʼaahii yídaneedlı̨́įgi doo bohónéedzą́ą da shı̨́ı̨́ nahalin ndi, 30 daatsʼí nááhaijįʼ “yá biyaagi nihokááʼ dineʼé tʼáadoo łaʼ doodaií” haneʼ yáʼátʼéehii baa ndahojisneʼ.—Col. 1:6, 23.

7. 100dóó baʼaan nááhai yę́ędą́ą́ʼ Jiihóvah bá naʼaʼaʼ dooleełgi haitʼéego bił béédahózin, áádóó haitʼéego yedaʼiilaa?

⁷ Dííshjı̨́įdi. Jiihóvah éí bidineʼé tʼahdii dabidziilgo áyósingo yooʼish. Yikʼehgo yooʼishígíí éí Diyin Bizaad. Éí Jesus nahasneʼ yę́ęgi áádóó nahaneʼgi hayííłtʼiʼ yę́ę éí ídahoołʼaahii ádaałeʼ níigo bídahoołʼaahii yichʼįʼ haadzíiʼgo biiʼ baa haneʼ. (Matt. 28:19, 20) July 1881 yę́ędą́ą́ʼ The Watchtower ání: “Nihaa dahaʼniihgo áádóó daʼdiitįįł doo biniyé nihíká ádahodooʼniid da. Ndi tʼáá ałtsojįʼ bee ániitʼéii choiniilʼı̨́įgo bee nahwiilneʼ doo.” 1919 yę́ędą́ą́ʼ naaltsoos To Whom the Work Is Entrusted wolyéego ání: “Díí naanish ayóó áníłtsxo nahalin, ndi Bóhólníihii binaanish átʼé, áko éí bí bibee adziil binahjįʼ nideiilnish.” Díí ałkʼidą́ą́ʼ Oodlání yę́ęgi átʼéego díí brothers naanish yéigo yaa ádaʼdeetʼą́ągo níłchʼi diyinii yadaʼólíigo diné tʼáá ałtso bił hodoonihgo dayoodlą́. Nihí tʼahdii tʼáá ákótʼéego níłchʼi diyinii badaʼííníidlí.

8-9. Jiihóvah bidineʼé haʼátʼíí chodayoołʼı̨́įgo nidahalneʼ?

⁸ Jiihóvah bidineʼé éí tsʼídá yáʼátʼéehii bee niʼdoonishii hólǫ́ǫgo nizhónígo baa haneʼii baa haneʼ. Éí naaltsoos bikááʼ ádaalneʼgo hahinidééh, “Photo-Drama of Creation,” phonographs, sound cars, radio broadcasts, áádóó kʼad éí computers dóó Internet bee nahaneʼgo hólǫ́. Náánáłahjįʼ saad ánídaalneʼgo boʼoonishgo éí kótʼéego nahaneʼgo tsʼídá tʼah doo áhánéeh da. Háálá diné tʼáá ałtso tʼáá bí dabizaad kʼehjí nizhónígo baa haneʼii deididootsʼı̨́ı̨́ł. Jiihóvah éí diné doo ałʼohgo yaa nitsékees da. Éí “ałʼąą dineʼé bił nidahazʼáanii áádóó ałʼąą dineʼé áádóó bizaad ałʼąą ádaatʼéii nihokááʼ dineʼé danilíinii tʼáá ałtso” díí  nizhónígo baa haneʼii deididootsʼı̨́ı̨́ł níigo yee haadzííʼ. (Rev. 14:6, 7) Diné tʼáá ałtso deididootsʼı̨́ı̨́ł nízin.

⁹ Baaʼdoodáałgi bichʼįʼ nidahonitłʼaiígíí, éí apartment bichʼą́ą́h dánidaʼditʼı̨́ı̨́hgóó, bił dahodoonihgo éísh baa nitsáhákees? Jiihóvah bidineʼé éí ałʼąą ádaatʼéego nahaneʼ dooleełgo ádeileʼ. 2001 yę́ędą́ą́ʼ Governing Body éí Francedi áádóó náádaałahgóó carts bee áádóó náánáłah átʼéego naaltsoos bóʼoolkąąhgo yee lą́ daʼasłı̨́ı̨́ʼ. Kótʼéego éʼélyaago bitsʼą́ą́dóó nizhónígo ádaʼiilaa. Áádóó 2011 yę́ędą́ą́ʼ New York Citygi ląʼí diné dahólǫ́ǫ́góó carts bee nahaneʼgo hanáánáátʼiʼ. Tʼóó áłtsé éí 102,129 ánéelą́ą́ʼ booksígíí naasʼniiʼ áádóó 68,911 magazinesígíí naasʼniiʼ. Áádóó 4,701 éí Diyin Bizaad bíhwiideeshʼááł daaníigo dayííkeed. Bééhózinígo níłchʼi diyinii díí boʼoonishgi áká análwoʼ. Áko díí átʼéego carts áádóó náánáłaʼ átʼéego naaltsoos bóʼoolkąąhgo boʼoonishgo tʼáá náhwiistʼą́ą́ ńtʼééʼ álʼı̨́į dooleełgo Governing Body yee lą́ daʼasłı̨́ı̨́ʼ.

10. Haʼátʼíí íiʼníiłgo nahwiilneʼ dóó naʼniitin?

¹⁰ Kódíínííł. Oodlání áłah nádleehgi Jiihóvah yee naʼnitinii yéigo bíhoołʼaah. Field service group yéigo bił nidanilnish. Éí nahaneʼgi biʼoh nílínígíí áádóó nizhónígo ádaʼoolíłígíí yee níká anájah. Nahólneʼgi haʼíínílní. Zechariah 4:6 ánínígi átʼéego Diyin íinízinii łaʼdoolníiłgi éí doo niheʼadziil bee łaʼdooníił da. Níłchʼi diyinii beego tʼéiyá. Háálá Diyin binaanish bideiiníilníísh.

11. First century yę́ędą́ą́ʼ governing body éí haitʼéego Diyin bidineʼé hashtʼehodítʼéego hazʼą́ągo ádayósin ńtʼééʼ?

¹¹ First century yę́ędą́ą́ʼ. Governing body éí Jerúsalemdi Diyin bidineʼé ahił nidaalnishgo hashtʼehodítʼéego hazʼą́ągo ádahósin ńtʼééʼ. (Acts 2:42) 49 C.E. nahalzhiishgo ląʼí Oodlání éí ąą náhinilgish baa saad hólǫ́ǫgo biniinaa governing body éí níłchʼi diyinii bíká análwoʼgo yaa nídaastʼįįd. Díí biniinaa ałtsʼá áldahgo  nahaneʼgi yidínóołtłʼah ńtʼééʼ. Daalʼaadii dóó daʼoodlání yá aląąjįʼ naazíinii éí Jew danilı̨́, ndi ąą náhinilgish éí Jew dineʼé bibee éʼélʼı̨́ átʼéegi doodaiiʼ yéigo yiniyé naazíinii tʼáadoo dabineestłʼah da. Ndi Diyin Bizaad dóó níłchʼi diyinii yichʼįʼ dadéezʼı̨́įʼgo yikʼehgo ádaʼiilaa. (Acts 15:1, 2, 5-20, 28) Áádóó Jiihóvah bikʼi hasdliʼ. Díí yindahazʼą́ągo hodéesyéél náhásdlı̨́įʼgo nahaneʼ yę́ęgi náás ádzaa.—Acts 15:30, 31; 16:4, 5.

12. Jiihóvah bidineʼé dah yikahígíí éí hashtʼehodítʼéego bił hazʼą́ągo haʼátʼíí bee bééhózin?

¹² Dííshjı̨́įdi. Jiihóvah bidineʼé dah yikahígíí éí hashtʼehodítʼée dooleełgo yá ndahasʼą́. 1895 yę́ędą́ą́ʼ November 15 Zionʼs Watch Tower biiʼ 1 Corinthians 14:40 binahjįʼ “Decently and in Order” wolyéego ályaa. Éí ání: “Daalʼaadii éí congregation ląʼí yichʼįʼ ádaʼiilaago éí hashtʼehodítʼée dooleełgi yichʼįʼ chʼídeizʼą́. Áko díidí kótʼéego bee haʼoodzíʼígíí bee ádaa áhwiilyą́ą doo. Háálá éí ání: ‘Tʼáá shiidą́ąʼdi Diyin bizaad bee akʼedaʼashchíinii nanihinitin biniyé bee akʼedaʼashchı̨́.’” (Rom. 15:4) Áko dííshjı̨́įdi Jiihóvah bidineʼé tʼáá ákótʼéego nitsídaakees. Díí baa nitsíníkees: Bee Haʼídéesʼı̨́įʼii bíhooʼaahgo éí azhą́ náánáłaʼ kéyahdi congregationgi yíníyáa ndi, éí baa náhódóotʼįįłii tʼáá íídą́ą́ʼ nił bééhózin. Áko éí tʼáá congregation náshdáahgi áshtʼı̨́ı̨́ lá nínízin doo! Diyin biníłchʼi diyinii binahjįʼgo tʼéiyá kótʼéego hashtʼehodítʼéego hazʼą́ą doo.—Zeph. 3:9.

13. James 3:17 haitʼéego baa nitsíikees doo?

¹³ Kódíínííł. Jiihóvah éí bidineʼé ‘łáʼí danilı̨́įgo kʼé bee daʼahíjótą́ʼ’ doo yóʼní. (Eph. 4:1-3) Áko díí baa nitsíníkees: ‘Congregationgi hashtʼehodítʼé índa kʼé hwiindzingoósh íínísin? Nihá alą́ąjįʼ naazíinii, éísh bikʼehgóó áníshtʼé? Congregation góneʼ naanish łah shą́ą́h siláá ládą́ą́ʼ, éísh bee shaʼahódlí? Dooísh ayóó late náshdleeh da? Áádóó índa áká anáshwoʼ dooísh nisin?’ (James 3:17 yíníłtaʼ.) Háiidígíí lá bindeeshnishgo átʼéé lá nínízingo níłchʼi diyinii bíká sodílzin.  Ánítʼéiigi áádóó ááníiłgi níłchʼi diyinii yee níká análwoʼgo brothers dóó sisters ayóóʼádanóʼní doo. Áádóó anílı̨́ danízingo naa nitsídaakees doo.

14. Colossians 1:9, 10 bikʼehgo ałkʼidą́ą́ʼ Oodlání yę́ę Jiihóvah haitʼéego neineeztą́ą́ʼ?

¹⁴ First century yę́ędą́ą́ʼ. Jiihóvah éí bidineʼé neinitingo ayóó yaa bił hózhǫ́. (Ps. 32:8) Éí baʼáłchíní ayóóʼáyóʼníigo shéédahósin, ayóóʼádahóʼní, áádóó hoolʼáágóó dahináa doo yá yinízin. Doo neinitingóó éí doo kótʼéego bá bohónéedzą́ą da doo. (John 17:3) Jiihóvah éí ałkʼidą́ą́ʼ Oodlání yę́ę choyoołʼı̨́įgo bidineʼé neineeztą́ą́ʼ. (Colossians 1:9, 10 yíníłtaʼ.) Níłchʼi diyinii “áká análwoʼii” Jesus yee haadzííʼ yę́ę íiyisíí bíká aalwod. (John 14:16) Níłchʼi diyinii éí ídahoołʼaahii Diyin Bizaad hazhóʼó yee yikʼidaʼdiitą́. Áádóó ląʼígo Jesus yee hahasdzíiʼii índa áátʼįįd yę́ęgi yéédaalniihgo yee bíká aalwod. Éí ląʼígo Gospels biyiʼ bikʼi nidahaasdzoh, áko éí binahjįʼ ałkʼidą́ą́ʼ Oodlání yę́ę Diyin dóó biYeʼ ayóóʼádayóʼní índa ahidiníłnáago ayóóʼádaʼahóʼníigi bidziil daazlı̨́ı̨́ʼ.

15. Isaiah 2:2, 3 éí Jiihóvah ádííniidgi haitʼéego bohoolnííł?

¹⁵ Dííshjı̨́įdi. Jiihóvah éí “nihodoogáałjįʼ ayííłką́ągo” ałʼąą dineʼé tʼáá átʼé dził nahalingo siʼą́ągo áajįʼ ahikáahgo neinitin doo, ní. (Isaiah 2:2, 3 yíníłtaʼ.) Dííshjı̨́įdi díí bohoolníiłgo baa ákodaniidzin. Díí éí náánáłahjįʼ doo tʼáá aaníí oodląʼ ádaatʼéii bilááh átʼéego siʼą́. Jiihóvah éí bidineʼé tsʼídá tʼóó ahayóígóó Diyin Bizaad yee neinitin! (Isa. 25:6) “Baʼahódlíigo hóyą́ągo naalʼaʼí” éí tʼóó ahayói ałʼąą átʼéego yee nidanihinitin. Éí naaltsoos bikááʼ ádaalyaa áádóó talks ádaatʼéii índa ndaalkidígíí, łaʼ éí cartoons béédaʼalyaago  ndaalkid. (Matt. 24:45) Job bikʼis Iiláíhu ádííniid yę́ęgi átʼéego ádaniitʼé. “Diyin God naʼnitinígi átʼéego háishąʼ łaʼ ákótʼéego nazhʼnitin?”—Job 36:22.

16. Haʼátʼíí ááníiłgo bee neʼoodląʼ bidziil doo?

¹⁶ Kódíínííł. Diyin biníłchʼi diyinii éí Diyin Bizaad yíníłtaʼ dóó bíhoołʼaahgo binahjįʼ bikʼehgóó ááníił dooleełgo níká análwoʼ. Psalmist sodoolzin yę́ęgi átʼéego sodiilzin doo. Jiihóvah “nílíinii, nikʼehgo áhootʼéii bínashiníłtin, nitʼáá aaníinii bee hinishnáa doo, nízhiʼ dinísin doo biniyé shijéí biiʼdóó tʼááłáʼí nitséskeesgo áshílééh.” (Ps. 86:11) Éí bąą Jiihóvah Bizaad índa bidineʼé dah yikahígíí biiʼdóó binaʼnitinii nihá yisłáhígíí yéigo ádíyiiʼníił doo. Tʼóó íhwiideeshʼááł éí doo hwiindzin da doo. Díí tʼáá aaníinii bee naʼnitinii tʼáá aaníí átʼé nínízingo bikʼehgóó yínááł. Jiihóvah biníłchʼi diyinii níká análwoʼgo beʼíłʼı̨́. Áádóó brothers dóó sisters bee bíká anánílwoʼ. Háálá éí nifamily átʼé. (Heb. 10:24, 25) Áádóó Diyin biníłchʼi diyinii bíká sodílzingo éí áłah néidleehgi nijéí naniiłnáago comment éʼéłʼı̨́ áádóó talk naanídítʼáahgo éí níká análwoʼ doo. Kótʼéego íʼíłʼı̨́įgo éí Jiihóvah dóó biYeʼ ‘bidibé’ ayóóʼííníʼníigo ííshjání áníłʼı̨́.—John 21:15-17.

17. Jiihóvah bidineʼé dah yikahígíí bikééʼ sínízı̨́įgi haitʼéego ííshjání áníłʼı̨́į doo?

¹⁷ Bichʼįʼ hoolzhishgo éí tsʼídá tʼááłáʼí organization hólǫ́ǫ dooleeł, éí Diyin biníłchʼi diyinii yee yooʼish doo. Áko bínindlı̨́įgo Jiihóvah bidineʼé dah yikahígíí bił nidanilnish. Diyin éí diné ayóóʼáyóʼnínígi átʼéego diné tʼáá ałtso nizhónígo baa haneʼii bee bił hólneʼ. Hashtʼehodítʼé ayóóʼáyóʼnínígi átʼéego congregationgi łáʼí ídlı̨́į dooleełgo bee sínízı̨́. Áádóó Ayóó Átʼéii Nanihinitinii yee nanihinitinígíí yéigo bóhoołʼaah. Áko Séítan bił hoogáłígíí bił niitʼéehgi baa hoolzhishgo doo nił yéeʼ da doo. Ndi, Jiihóvah bidineʼé dah yikahjí bikééʼ naazíinii bitahdóó doo nił yééʼgóó sínízı̨́į doo.