Bible Students kótʼéego nidahojilneʼ doogo éí doo hoł daayéeʼ da doo. Aʼohgo ádaatʼéii éí “haneʼ yáʼátʼéehii” índa doo yáʼádaashóonii éí Diyin “kʼéédidooʼnííł baa hodoolzhishígíí” bee bił dahojilneʼ doo.

Brother J. H. Hoskin, Canadadi haghan, éí hakʼijįʼ ídlı̨́į ndi, doo hoł yééʼgóó nahojisneʼ. Dąągo 1921 yę́ędą́ą́ʼ Methodistdóó minister bił ałdááh jítʼáázh. Brother Hoskin áłtsé ájíní: “Diyin Bizaad hazhóʼó bee ahił nahodiilnih. Łahgóó shı̨́ı̨́ doo aheełtʼéego baa nitsíikees da ndi, kʼé bee tʼóó hazhóʼó ahił nahodíilnihgo tʼáá ałkʼis niidlı̨́į doo.” Ndi, doo ákódzaa da. Brother Hoskin ání: “Tʼóó kóníshgháníjįʼ ahił hwiilneʼ, minister bidáádílkał yéigo néidííłtsʼin, bidáádílkał tsésǫʼ biiʼ siʼánígíí neʼjįʼ hánii nałdaas nisin.”

“Doo Oodlání danilínígíí bił naholneʼ,” níigo shichʼįʼ dilwosh. Brother Hoskin éí tʼáadoo kótʼé jidííniid da. Éí tʼóó dah nízhdiidzáago kwíizhniizı̨́ı̨́ʼ, ‘Éii yeeʼ łaʼ bichʼįʼ yáshtiʼ!’

Biiskání díí minister sermon ííléehgo Brother Hoskin tʼóó baaʼihgo yaa yáłtiʼ. Brother Hoskin ání: “Diné kwííłní, éii diné ayóó biyoochʼíidgo nihitah naaghá, áádóó bíniʼdii hodiʼyoolyééł.” Ndi, díí biniinaa tʼáadoo neʼ ájiidzaa da, tʼóó diné bił dahojilneʼgo baa joogááł. Ájíní: “Tʼáá ákwii nahashneʼgo ayóó bíneeshdlı̨́. Diné łaʼ ádaaníigo éí ‘Shił bééhózingo ni éí Diyin binaanishii binanilnish.’ Áádóó haʼátʼíí lá bídin nilı̨́ daaníigo shíká anájah ńtʼééʼ.”

Diyin Bizaad yíhoołʼaahii tʼáá yéigo progress ádooníiłgo Bible Students éí bikʼehgo naʼnitin dooleełii The Golden Age * wolyéhígíí biiʼ łaʼ hólǫ́ǫgo ádayiilaa. Azhéʼé dóó amá éí Diyin Bizaad bąąh naʼídíkidii éí baʼáłchíní yił yikʼídahinitáahgo yee yíká anájahgo ályaa. Díí átʼéego naʼídíkid ádaatʼéii: “Diyin Bizaad éí díkwíí naaltsoos bee siʼą́?,” díí binahjįʼ doo nantłʼagóó íhooʼaah. Łaʼ náánááígíí éí “Oodlání tʼáá ałtsoósh atídoolníiłgo naaódlí?,”  áko ániid ndaakaii yiniyé hashtʼedítʼéego doo bił daayééʼgóó nidahalneʼ doo.

Diyin Bizaad tʼáá íídą́ą́ʼ ayóó bił bééhózinii éí bináʼídíkidii áádóó bee ił náhaneʼgo bá ádaalyaa. Naaltsoos Studies in the Scriptures áłtsé siʼánígíí biiʼdóó ił náhálneʼgo ályaa. Tsʼídá tʼóó ahayóí kótʼéego yitsʼą́ą́dóó ídahoołʼą́ą́ʼ. Ndi The Golden Age, December 21, 1921 éí kótʼéego naʼnitin yę́ęgi neʼ ádoolnííł ní. Éí haʼátʼíí biniinaa?

Brothers á naazíinii yaa ákodaniizı̨́įʼgo Diyin Bizaad bíhwiidooʼáałgo éí hazhóʼó ałkééʼ honíʼą́ągo baa íhwiidooʼááł. Áko November 1921 yę́ędą́ą́ʼ naaltsoos The Harp of God wolyéego ályaa. Díí bitsʼą́ą́dóó íhwiideeshʼááł danízinígíí éí study course ajítahgo tʼáá sahdii áńjiilʼįįh doo. “Diyin éí bílaʼashdlaʼii hoolʼáágóó dahináa dooleełgo” átʼéegi baa nitsídajíkeesgo díí study course háká análwoʼgo baa íhooʼaah. Díí haitʼéego éʼélʼı̨́ı̨́ ńtʼééʼ?

Díí naaltsoos łaʼda baa íhwiideeshʼááł nízingo néidiiʼą́ągo éí card bikáaʼgi kweʼé yídííłtah bidiʼníigo bił beiʼnił. Áádóó damóodóó bikʼijįʼ éí baa ajííłtaʼ yę́ę bínáhodíkidgo card łaʼ hachʼįʼ álʼįįh. Áádóó náádamóogo baa nááʼízhdoołtahígíí łaʼ há bikááʼ ánáánálʼįįh.

Díí éí 12 damóojįʼ congregationdóó card hachʼįʼ áńdayiilʼįįh ńtʼééʼ. Congregationdóó náás daazlı̨́įʼii doodaiiʼ dahooghangóó nahodoolnihgi bá nidantłʼaii éí bí card achʼįʼ ádeiłʼı̨́ı̨́ ńtʼééʼ. Łaʼ éí Anna K. Gardner, Millvale, Pennsylvaniadóó naaghá, éí ání: “The Harp of God tʼóó haníídeeʼ yę́ędą́ą́ʼ shádí Thayle dahooghangóó nahaneʼgi doo bá bíighah daígíí éí naʼídíkid cards dabikáaʼgo ádaalyaaígíí tʼáá damóo náʼoodleeł bikʼeh ídahoołʼaahii bichʼįʼ ájiłʼı̨́įgo yéigo honaanish silı̨́ı̨́ʼ.” Course ałtso ájíłʼı̨́įgo éí łaʼda haiigháahgo hazhóʼó Diyin Bizaad baa íhojiiłʼááh.

Náhahgo J. F. Rutherford éí congregations tʼáá ałtso yichʼįʼ áʼiilaa. Baa ákonisingo “díí yihahígíí biiʼ Diyin biNahatʼaʼ baa nahaneʼgo kʼeeʼąą deeshzhiizh áádóó nahdę́ę́ʼ yihah yę́ę biláhídi átʼéego diné ląʼí bee nanitingo bee bíká aʼoowod.” Áádóó ánáádíʼní: “Tʼah ląʼí naanish dahólǫ́. Díí naanish ayóó átʼéii náánáłaʼ yináádidoodáałgo bee bíká anájah.” Áko Bible Students díí yikʼehgóó ádaadzaa. 1922 yihahgo doo bił daayééʼgóó Diyin biNahatʼaʼ baa nahaneʼgo yéigo yidadeeshnish.