TʼÁÁ nináháhááh bikʼeh ląʼí Jiihóvah yaa náhákááh. Łaʼda Jiihóvah yaa nádáahgo ‘yáʼąąshdi ayóó átʼéego hózhǫ́ǫ’ łeh. (Luke 15:7, 10) Congregationgi atah néínídzáhígíí éí Jiihóvah, Jesus, dóó diyingo ndaalʼaʼí tʼáá íiyisíí yaa bił dahózhǫ́. Jiihóvah baa néínídzáa ndi, daʼníłtłʼaii ląʼí nichʼą́ą́h hólǫ́ǫ doo. Éí haʼátʼíí ádaatʼé? Haʼátʼíí níká adoolwołgo átʼé?

Jiihóvah yaa nádzáhígíí łahda doo yáʼátʼééhgóó ádaa nitsékees łeh. Naatʼáanii David yéigo asiihgo ákótʼéego nitsékees ńtʼééʼ. David asiihígíí bá yóóʼadootʼą́ą ndi, ‘Asésiihígíí shide ádzaa,’ ní. (Ps. 40:12; 65:3) Łaʼda Jiihóvah yaa nádáahgo, áátʼįįd yę́ę bide átʼé yileeh doodaiiʼ áátʼįįdígíí binahjįʼ baaʼihgo ádaa nitsékees yileeh. Isabelle éí disfellowship áhoʼdiilyaadóó 20 nááhai. * Ájíní: “Asésiihígíí Jiihóvah shá yóóʼiidííʼą́, ákondi shá ádzaii doo bą́ą́h nishłı̨́į da nisin łeh.” Hąąh nááhákaʼgo éí diyin kʼehgo joogááł yę́ę doo bidziil da náádoodleeł. (Prov. 24:10) Ákónééh lágo.

Łaʼ éí Jiihóvah yił kʼé náʼahididooʼniiłgi ayóó baa naanish hasingo yaa nitsídaakees. Congregationgi atah nádzáago Antoine ání: “Diyin kʼehgo hinishná yę́ę ałtso beisénah lá.” Kótʼéego nitsídaakeesígíí éí diyin kʼehgo naanish yichʼįʼ daastiʼ, áko tʼą́ą́ʼ kódaatʼé.

Łaʼda bighan nizhóní yę́ę tó bitsʼą́ą́dóó níyoltsoh yiyííłchxǫʼgo, hashtʼéédoolníiłgi ayóo baa naanish hasin nízin łeh. Tʼáá ákótʼéego, yéigo asínísihgo Jiihóvah bił kʼé  náʼahididííʼniiłgi ná nantłʼa doo. Ndi, níká aʼdoowołii hólǫ́, áko doo tʼáá sáhí chʼééh ánítʼı̨́į da doo.

Jiihóvah éí “hágo haaʼíshąʼ díí baa nídíitʼįįł,” niłní. (Isa. 1:18) Tʼáá íídą́ą́ʼ yéigo binanilnishgo ‘Jiihóvah bił baa nísínítʼįįd.’ Kwíinidzaaígíí binahjįʼ Jiihóvah ayóóʼánóʼní. Baa nitsíníkees: Jiihóvah éí Séítan [biyoochʼíidii] yichʼįʼ hadoodzihgi bá bohónéedzą́ągo íinilaa!—Prov. 27:11.

Kónítʼı̨́įgo éí Jiihóvah áhánígo bił honílǫ́, áko bídę́ę́ʼ ałdóʼ nił honishłǫ́ǫ doo niłní. (Jas. 4:8) Jiihóvah éí Nizhéʼé dóó Nikʼis íínísingo, ayóóʼííníʼníigi bidziil dooleeł. Kótʼéego éí doo tʼóó congregationgi atah nánídáahgo naa nitsáhákees da doo. Haitʼéego ádíínííł?

Bíninilʼánígíí binanilnish. Jiihóvah náasdi áhodoonííł yee nihwiizʼánę́ę éí binahjįʼ neʼoodląʼ bidziil silı̨́ı̨́ʼ, éí shı̨́ı̨́ łaʼ tʼahdii béénílniih. Haneʼ yáʼátʼéehii tʼáá ahą́ą́h baa nahólneʼ, índa nibrothers dóó sisters tʼáá ahą́ą́h bił ahínéikahgo éí diyin kʼehjí iiná bił danítʼiʼígíí bidziilgo áńdíídlííł. Binanilnish dooígíí łaʼ dadíníilʼįįł.

Nisodizin bee tʼáá ahą́ą́h Jiihóvah bichʼįʼ yáníłtiʼ. Ajisihígíí tʼéiyá baa nitsíjíkeesgo éí Jiihóvah bichʼįʼ sozdilzin yę́ę hatsʼą́ą́ʼ neinółtłʼah łeh. (Rom. 8:26) Jiihóvah, nikʼis deeshłeełgi tʼáá íiyisíí bíká laanaa nisin, diníigo ‘tʼáá áłahjįʼ sodílzin.’ (Rom. 12:12) Andrej kótʼéego bééjílniih: “Asésiihígíí biniinaa dóó yáʼáníshtʼééhgóó ádaa nitséskees. Ákondi sodiszįįh bikéédóó éí shitah yáʼáhootʼééh índa shíniʼ hashtʼedítʼé yileeh.” Bíká sodidíilzįįłígíí doo nił bééhózingóó éí Psalms 51 dóó 65gi Naatʼáanii David sodoolzin yę́ę dínííłʼįįł.

Diyin Bizaad tʼáá ahą́ą́h yíníłtaʼ dóó naniłkaah. Kónítʼı̨́įgo éí neʼoodląʼ bidziilgo íidoolííł áádóó Jiihóvah ayóóʼííníʼníigi nooséeł doo. (Ps. 19:7-11) Felipe ání: “Diyin Bizaad doo tʼáá ahą́ą́h yíníshtaʼ daaígíí biniinaa sheʼoodląʼ doo bidziil da silı̨́įʼgo Jiihóvah doo bił hózhǫ́ǫ́góó íishłaa. Doo ánáádeeshníił da niizı̨́ı̨́ʼ, áko bíhooshʼaahígíí shichʼą́ą́h hólǫ́ǫgo baa nitséskees.” Ni ałdóʼ ákódííníiłgo átʼé. Bíhwiidííłʼáałii łaʼ chʼééh hanítáago, nikʼis beʼoodląʼ bidziilígíí shíká anilyeed bididííniił.

Diyin kʼehgo nikʼéí danilíinii kʼé nábididííʼniił. Ániid atah nináhaaskai éí brothers dóó sisters doo yáʼátʼééhgóó shaa nitsídaakees danízin łeh. Larissa ání: “Shibrothers dóó sisters atídaashłaa nahalin, áko doo yáʼátʼééhgóó ádaa nitséskees. Kótʼéego nitséskeesgo nízaadgóó ahoolzhiizh.” Elders dóó Oodlání beʼoodląʼ dabidziilii éí níká adoojahgo Jiihóvah bił kʼé náʼahididííʼniił. (“ Elders éí Haitʼéego Áká Adoojah?” níníłʼı̨́.) Jiihóvah baa néínídzáago yaa bił dahózhǫ́, ni ałdóʼ nił hózhǫ́ǫ doo danóʼní!—Prov. 17:17.

Haitʼéego éí congregationgi áhánígo bił honílǫ́ǫ doo? Brothers dóó sisters tʼáá ahą́ą́h bił nidahólneʼ índa áłah nádleehgóó ałnáánídááh. Felix ání: “Shibrothers dóó sisters nihitah nízhdoodááł dashóʼní, áko ayóóʼáshidóʼníí lá niizı̨́ı̨́ʼ. Asésiihígíí Jiihóvah shá yóóʼiidííʼą́, kʼad éí bá nináánáshʼaʼ, áko hooghangi nánísdzá nisin.”—“ Jiihóvah Baa Néínídzáago Haa Díínííł?” níníłʼı̨́.

Séítan éí níyoltsoh nahalingo, Jiihóvah bił kʼé náʼahididííʼniił yę́ę nitsʼą́ą́ʼ neinółtłʼah doo. (Luke 4:13) Díí kʼé bidziilgo ádíílííł, háálá Séítan éí doo nikʼi didoogáał da.

Jiihóvah badaʼolíhígíí ííłní: “Yóóʼádahaaskaii hadínéeshtaał; tʼą́ą́ʼ anáhaazhjéeʼii nináhideeshʼish, nidaʼniłhodii dadiniihgóó bá bikʼídaʼdideesdis, doo bitah dahwiináanii bitah dahółdzilgo áńdadeeshdlííł.” (Ezek. 34:16) Jiihóvah tʼóó ahayóí diné yíká eelwodgo yił kʼé náʼahidooʼniid. Jiihóvah éí níká adeeshwoł, áko kʼé ahidiiʼnínígíí bidziil doo, nóʼní.