1. Diyin Bizaad éí bidziilgo inaalnishgo átʼéegi haʼátʼíí bee yinídlą́? (Áłtsé eelkidígíí níníłʼı̨́.)

JIIHÓVAH éí bílaʼashdlaʼii haneʼ yee níláhígíí “hiná, áádóó bidziilgo” inaalnishgi bidineʼé dayoodlą́. (Hebrews 4:12) Diyin Bizaad éí tʼáá nihí dóó náánáłaʼ beʼiinaʼ yinaashnishgi baa ádahoniidzı̨́ı̨́ʼ. Łaʼ éí tʼah doo Jiihóvah Yá Halneʼé daaleeh yę́ędą́ą́ʼ aniʼįįhii, azééʼ doodaiiʼ naʼageh yee tsiʼnidaaskai. Łaʼ éí ayóó bee dahodílzin doodaiiʼ béeso yee daʼatʼı̨́, azhą́ ákódajítʼée ndi, haʼátʼíí shı̨́ı̨́ tʼahdii hwee ádaadin nahalingo nitsídajikees. (Ecclesiastes 2:​3-11) Ląʼí ił chohooʼı̨́ bee ádaadin yę́ę, kʼad ił chohooʼı̨́ bee dahazlı̨́ı̨́ʼ. The Watchtower biiʼdę́ę́ʼ “The Bible Changes Lives” wolyéego bóhoneedlı̨́įgo ląʼígo ádaa haneʼgo baa daʼííníiltaʼ. Jiihóvah Yá Halneʼé jileehdóó bikʼijįʼ Diyin Bizaad bee Jiihóvah bił kʼé háníigi bidziilgo bee ájoolíił doo.

2. Ałkʼidą́ą́ʼ diné éí Diyin Bizaad bibee adziilii haitʼéego binahjįʼ hashtʼeʼnináhaskai?

² Nihił béédahózingo ląʼí éí Diyin Bizaad tʼáá aaníí  binaʼnitinii yídahołʼą́ąʼgo ląʼígóó hashtʼeʼnináhaskai. Ałkʼidą́ą́ʼ nihibrothers dóó nihisisters danilínę́ę yáʼąąshiigóó bá ił chodahooʼínę́ę hashtʼeʼnináhaskai. (1 Corinthians 6:9-11 yíníłtaʼ.) Paul éí God biNahatʼaʼ doo nihiiʼ dadooleeł da níigo yee haadzííʼdóó bikʼijįʼ ání: “Łah nihí łaʼ ákódanohtʼéé nítʼééʼ.” God biníłchʼi diyinii dóó Bizaad éí diné yíká eelwodgo hashtʼeʼnináhaskai. Łaʼ Oodlání daazlı̨́į ndi ayóó átʼéego ádił daʼasiihgo biniinaa Jiihóvah yił kʼé daʼahidiʼnínę́ęgi dayííłchxǫʼ. Diyin Bizaad biiʼ łaʼ baa haneʼgo nihibrother anoint ályaa ńtʼéeʼgo disfellowship ályaa. Áko Oodlání dah yiikahjįʼ béédideeshdááł jinízingo hweʼiinaʼ hashtʼééjiidlaa. (1 Corinthians 5:1-5; 2 Corinthians 2:5-8) Bee hadaʼííníilníigo nihibrothers dóó nihisisters Diyin Bizaad bibee adziilii binahjįʼ bidaʼiinaʼ hashtʼéédayiidlaa.

3. Haʼátʼíí baa nídadíitʼįįł?

³ Diyin Bizaad ayóó ábóodziil. Jiihóvah nihá niiníʼą́, áko hazhóʼó choolʼı̨́į doo. (2 Timothy 2:15) Díí baa nídadíitʼįįł, Diyin Bizaad bibee adziilii chooʼı̨́į dooígi éí (1) niheʼiinaʼ siláagi, (2) nahwiilneʼgóó, áádóó (3) áłah néidleehgi bee naʼnitin. Díí baa ídahwiilʼaahgo éí yáʼátʼééhgóó yiidáałgo yínanihiniłtinii yáʼąąshiidę́ę́ʼ Nihizhéʼé ayóóʼádeíyíníiʼníigo bichʼįʼ ahééh daniidzingo ánihósin doo.—Isaiah 48:17.

4. (a) Diyin Bizaad shíká adoolwoł niidzingo haa díínííł? (b) Diyin Bizaad néíníłtahgo, haitʼéego bá náhoołʼaah?

⁴ Diyin Bizaad shíká adoolwoł niidzingo tʼáá ałhąąh yíníiltaʼ doo, bíighah ládą́ą́ʼ tʼáá ákwíí jı̨́. (Joshua 1:8) Nihinaanish daaląʼí, ndi tʼáadoo leʼé biniinaa, nihindaanish ádaatʼéii, Diyin Bizaad yídóoltah yę́ęgi neʼ óólééh lágo. (Ephesians 5:15, 16 yíníłtaʼ.) Éí tʼah ahbínígoda, jı̨́įgoda, doodaiiʼ iʼííʼą́ągoda yídíilta. Psalm ánínę́ęgi ałdóʼ ákwiiniidzin: “Dooládóʼ nibee hazʼáanii ayóóʼóóshʼníi da! Shá bíighah nabikʼítséskeesgo shee eʼeʼááh.”—Psalm 119:97.

5, 6. (a) Haʼátʼíí biniyé hazhóʼó naʼakʼísiilkees doo? (b) Hazhóʼó naʼákʼítsídzílkeesgo haitʼéego áká adoolwoł? (c) Diyin Bizaad yíníiltaʼgo hazhóʼó nabikʼítsíníłkeesgo haitʼéego níká eelwod?

⁵ Ákondi Diyin Bizaad tʼóó jółtaʼgo éí doo bíighah da. Yíníiltaʼígíí hazhóʼó nabikʼísiilkees doo. (Psalm 1:1-3) Tsʼídá ákótʼéego tʼéiyá Diyin Bizaad hódzą́ yee nanitinígíí bikʼeh ániitʼée doo. Naaltsoos doodaiiʼ electronic biiʼdę́ę́ʼ Diyin Bizaad yíníiltaʼgo, bíniʼdii hashtʼeʼnitsínánihiiłkees dóó nanihiiłnáago ánihósin doo.

⁶ Hazhóʼó naʼákʼítsídzílkeesgo haitʼéego nihíká adoolwoł? Diyin Bizaad yíníiltaʼgo áłtsé neʼ ánéílʼįįhgo díí baa nitsíikees doo: ‘Díí lá haʼátʼíí níigo Jiihóvah yee shił halneʼ? Díí haitʼéego tʼáá íídą́ą́ʼ bikʼehgóó áníshtʼé? Haʼátʼíí lá  tʼahdii hashtʼedeeshłííł lá?’ Kótʼéego hazhóʼó nabikʼísiilkees dóó yíníiltaʼígíí baa sodiilzingo bikʼehgóó áníshtʼé niidzin doo. Áko Diyin Bizaad bibee adziilii nihinaalnishgo baa ákoniidzin doo.—2 Corinthians 10:4, 5.

7. Nahwiilneʼgóó haitʼéego Diyin Bizaad yáʼátʼéehgo choiniilʼı̨́į doo?

⁷ Nahwiilneʼgóó dóó naʼnitingi Diyin Bizaad choiniilʼı̨́į doo. Nihibrother łaʼ ání: “Hootahgóó Jiihóvah bił nahólneʼgo, tʼáásh ni tʼéiyá yáníłtiʼ doo doodaiiʼ Jiihóvah daastiʼ yáłtiʼgo bá hosíníłʼą́ą doo?” Łaʼda Diyin Bizaad bichʼįʼ yíníiltaʼgo éí Jiihóvah bichʼįʼ yáłtiʼgo íilʼı̨́į doo. Diyin Bizaad yíníiltaʼgo éí tʼáá nihí nihizaadígíí biláahdi bidziil. (1 Thessalonians 2:13) Nahólneʼgóó, tʼáásh ałhąąh Diyin Bizaad diné bichʼįʼ néíníłtah?

8. Nahwiilneʼgóó haʼátʼíí biniyé Diyin Bizaad doo tʼóó yíníiltaʼ da doo?

⁸ Nahwiilneʼgóó Diyin Bizaad diné tʼóó bichʼįʼ yíníiltaʼgo doo bíighah da. Ląʼí diné éí Diyin Bizaad doo hazhóʼó yikʼidaʼdiitįįh da łeh. Díí tʼáá níléídę́ę́ʼ ákótʼé, dííshjı̨́įdi ałdóʼ. (Romans 10:2) Diyin Bizaad diné bichʼįʼ yíníiltaʼgo yikʼiʼdiitą́ą́ lá, doo tʼóó niidzin da doo. Éí yee nítʼínígíí hazhóʼó bee bił hodiilnih. Áko kótʼéego íilʼı̨́įgo éí Diyin Bizaadígíí diné bíniʼ siláagi dóó bijéí yidadilchid doo.—Luke 24:32 yíníłtaʼ.

9. Łaʼda Diyin Bizaad bichʼįʼ biʼííníiltaʼgo, áłtsé bee hadiidzihgi éí haitʼéego Diyin Bizaad bee bił nilı̨́įgo ádiilnííł? Łaʼ chʼíníʼaah.

⁹ Łaʼda Diyin Bizaad bichʼįʼ biʼííníiltaʼgo áłtsé bee hadiidzihii éí bee Diyin Bizaad bił nilı̨́įgo íidoolííł. Kótʼéegoda hadiidzih: “Ííshją́ą́ shı̨́ı̨́ Ánihiilaii kweʼé éidí haʼátʼíí níigo yee haadzííʼ.” Doodaiiʼ Diyin Bizaad doo yoodlą́ą́góó kótʼéegoda hadiidzih: “Diyin éí azhéʼé ayóóʼóʼóʼnínígi átʼéego nizhónígo nanihinitin. Bizaad éí hózhǫ́ǫgo oodáał dooígi nihił ííshjání ííłʼı̨́.” Áádóó łaʼda tʼáadoo yiyoodlánídago kótʼéegoda hadiidzih: “Díí tʼáá ałkʼidą́ą́ʼ áháʼnínę́ęsh t’áá disínítsʼą́ą́ʼ?” Diné t’áá ałtso tʼáá bí bibee ádaʼoolʼįįłii dóó beʼoodląʼ bee dahólǫ́ǫgi bá baa nitsíikeesgo Diyin Bizaad bichʼįʼ ííshjání ádiilníiłgi yíneedlı̨́įgo bá ádiilnííł.—1 Corinthians 9:22, 23.

10. (a) Nihibrother łaʼ haitʼéego halneʼ? (b) Nahólneʼgóó haitʼéego Diyin Bizaad bidziilii átʼéego baa ákoninizı̨́ı̨́ʼ?

¹⁰ Diné bił nahaneʼgóó Diyin Bizaad bichʼįʼ jółtaʼgo ayóó átʼéego bidziilgo átʼée lágo ląʼí yaa ádahoniizı̨́ı̨́ʼ. Łaʼ kótʼéego baa haneʼ. Nihibrother łaʼ hastiin náás silı̨́ı̨́ʼ léiʼ yaa níyá, éí naaltsoos ádeilneʼígíí yółtaʼgo ląʼí nááhai. Baa náájídzáago naaltsoos doo tʼóó baa dééstsoos da, ndi Diyin Bizaad biiʼdóó łaʼ bichʼįʼ yídéeshtah jiniizı̨́ı̨́ʼ. 2 Corinthians 1:3, 4 bichʼįʼ jííłtaʼ: “Éí aTaaʼ aa aʼááh nízinii índa  diné tʼáá ałtsojįʼ hayiʼiyoołníihii, . . . éí tʼáá ałtsojįʼ atínihiʼdilʼı̨́įgo [ayiʼdę́ę́ʼ] hanihiʼiyoołnííh.” Díí ayóó átʼéego bidiisnáaʼgo shichʼįʼ náánéíníłtaʼ hodííniid. Ńtʼééʼ hastiin éí beʼasdzą́ą́ yił díí átʼéego hanihiʼdiyoolnih niidzin hałní. Diyin Bizaad hachʼįʼ yééltaʼgo binahjįʼ hazhóʼó bíhwiideeshʼááł jiniizı̨́ı̨́ʼ. Áko nahwiilneʼgóó Diyin Bizaad yíníiltaʼgo bidziilii átʼéego átʼé.—Acts 19:20.

11. Brothers danilínígíí áłah náʼádleehgi nidazhʼnitinígíí haʼátʼíí hąąh naazlá?

¹¹ Áłah nídeidleehgóó ałnáádeiikahgo ayóó baa nihił dahózhǫ́. Biniyé ałnáádeiikahígíí éí Jiihóvah bichʼįʼ hodílzin. Ákwii bídahwiilʼaahígíí nihíká análwoʼ. Éí bąą nihibrothers ákwii nidaʼnitinígíí yáʼátʼéehii naanish ílíinii átʼéego bąąh ńdaasyá. (James 3:1) Éí Diyin Bizaad biiʼdóó bee nidazhʼnitin dooígi baa ákodazhnízin doo. Díí átʼéego naanish nąąh niilyáago daʼíistsʼą́ʼígíí haitʼéego Diyin Bizaad bidziilii átʼéegi bijéí bee dabidiyííłnááł?

12. Áłah náʼádleehgi naʼnitinii nilı̨́įgo éí Diyin Bizaad biiʼdóó haitʼéego yee naʼnitin doo?

¹² Diyin Bizaad íiyisíí bitsʼą́ą́dóó bee naʼnitin. (John 7:16) Áko naʼnitingi dóó haneʼ ádaatʼéii choiníłʼı̨́įgi bee  ádaa áhólyą́, tʼáá éí tʼéiyá tʼáadoo Diyin Bizaad biláahdi choiníłʼíní. Ałdóʼ béénílniih, Diyin Bizaad jółtaʼgo dóó bitsʼą́ą́dóó bee nizhdíʼnóotı̨́įłgi doo aheełtʼée da. Diyin Bizaad biiʼdóó ląʼígóó yíníłtaʼgo éí yíníłtaʼ yę́ę doo bééhániih da doo. Áko Diyin Bizaad biiʼdóó yídéeshtah nínízinígíí hazhóʼó bitsʼádíínił. Áádóó tʼáadoo baa tsı̨́ı̨́ł nílı̨́įgo yíníłtaʼí, hazhóʼó áhyiłníigi, haneʼ bee akʼidiʼdootı̨́įłii choiníłʼı̨́, áádóó hazhóʼó binahjįʼ bee naʼnitin. (Nehemiah 8:8) Outline bitsʼą́ą́dóó bee nidiʼnintą́ąʼgo éidíígíí hazhóʼó dínííłʼįįł áádóó Diyin Bizaad biiʼ saad hadasdzohgo choidooʼįįłígíí baa íídííłtah. Díí hazhóʼó ałkééʼ nínilgo hadilyaaígíí dóó Diyin Bizaad biiʼdę́ę́ʼ hadasdzooígíí hazhóʼó nidííłkah. Áádóó binahjįʼ Diyin Bizaad choiníłʼı̨́įgo bee nidiʼníítı̨́ı̨́ł. (Benefit From Theocratic Ministry School Education bíhooʼaah 21, 22, dóó 23 bikʼehgo áʼdoolníłígíí łaʼ dabikááʼ.) Jiihóvah bińtsékeesígíí Bizaad biiʼdę́ę́ʼ bee shíká anilyeed bididiiʼniiłgo bichʼįʼ sodidiilzįįł.—Ezra 7:10; Proverbs 3:13, 14 yíníłtaʼ.

13. (a) Nihisister łaʼ éí áłah náʼádleehgi níyáago Diyin Bizaad łaʼ yidiiztsʼą́ąʼgo haitʼéego bidiisnááʼ? (b) Áłah náʼádleehgi Diyin Bizaad chooʼínígi haitʼéego níká análwoʼ?

¹³ Australiadę́ę́ʼ nihisister łaʼ tʼah atʼééd nilı̨́įgo ląʼígóó atíbiʼdoolʼįįd.  Azhą́ tʼahádóó Jiihóvah yił áhééhooszįįd ndi, Jiihóvah yeeʼ doo ayóóʼáshóʼníi da jinízin. * (Footnote níníłʼı̨́.) Áłah nááʼádleehgi jiníyáago Diyin Bizaad łaʼ ayóó átʼéego hodiisʼnááʼ. Éí hazhóʼó baa nitsíjíkees dóó nizhdiiłkááʼ, áko Diyin Bizaad biiʼ saad łaʼ dah naazhjaaʼígíí jółtaʼgo baa nízhdiidzá. Éí binahjįʼ Jiihóvah ayóóʼáshóʼníí lá jiniizı̨́ı̨́ʼ. Áłah náʼádleehgi Diyin Bizaad biiʼdóó kótʼéégóósh łah nidiisʼnááʼ?—Nehemiah 8:12.

14. Haitʼéego éí Jiihóvah Bizaad ílı̨́įgo dóó ayóóʼííníiʼníigo ííníilzin doo?

¹⁴ Diyin Bizaadísh ayóó átʼéego Jiihóvah bichʼįʼ baa ahééh hwiindzingo átʼé? Hoolʼáágóó hólǫ́ǫ doo níigo yee haadzííʼ yę́ę tʼáá aaníí bohoolyaa. (1 Peter 1:24, 25) Áko Bizaad tʼáá ałhąąh dayíníiltaʼ, bikʼeh ádaniitʼé, dóó náánáłahjįʼ diné bee bíká ánéilwoʼ. Kwíitʼı̨́įgo éí ayóó átʼéii ílíinii ayóóʼííníiʼníigo baa ahééh niidzingo ániitʼée doo, ndi tsʼídá aláahdiígíí éí Diyin Bizaad Áyiilaii, Diyin Jiihóvah.