1. 95 C.E. nahalzhiishgo yilʼaadii John éí haitʼéego bił hooʼaʼ?

95 C.E. binaagi nahalzhiishgo yilʼaadii John bichʼįʼ nahwiiʼná. Éí hajistih, Pátmos hoolyéedi hoʼdótąʼ, áádóó bééhózinígo yilʼaadii danilínę́ę tʼáá hó tʼéiyá jidziih. (Rev. 1:9) Akʼijįʼ danilíinii éí congregations yóóʼadeiniiʼáahgo ałtsʼáʼáldahgo ádayiilaago hoł bééhózin. Oodlání tʼah áłtsʼísígo dah yikah yę́ę kʼadę́ę ábiʼdildįįh nahalin.—Jude 4; Rev. 2:​15, 20; 3:​1, 17.

2. Revelation 7:​9-14 bikʼehgo John éí haʼátʼíí jiiłtsą́? (Naaltsoos bikááʼdę́ʼígíí níníłʼı̨́.)

² John éí kótʼéego hoł hooʼaʼ ndi, náasdi ádahodooníiłii hachʼįʼ yitʼíní ályaa. Diyingo ndaalʼaʼí great tribulation bitsʼą́ą́dóó níyol tʼą́ą́ʼ deínóhtąʼ dabiʼdooʼniid, éí Diyin bá ndaalʼaʼí bídaʼdiidlííd ííłtsojįʼ. (Rev. 7:​1-3) Díí dah yikahígíí 144,000 ánéelą́ą́ʼ, éí yáʼąąshdi Jesus yił dahwéeʼaah doo. (Luke 12:32; Rev. 7:4) John éí ayóó ánéelą́ąʼgo łaʼ dah náánáákah ní, áko kóní: ‘Náádéshgal, ałʼąą dineʼé bił dah nidahazʼą́ą́dę́ę́ʼ tʼáá ałtso, índa bizaad ałʼąą ádaatʼéii tʼáá ałtso dabitahdę́ę́ʼ, doo wóoltaʼ ánéelą́ą́ʼgóó tʼóó ahayóí áłah nilı̨́, bikááʼdóó nahatʼáii índa Dibé Yázhí bidááhdóó naazı̨́.’ (Revelation 7:​10-14 yíníłtaʼ; 7:9) John éí ayóó átʼéego hoł hóózhǫǫd, háálá náasdi diné tsʼídá tʼóó ahayóí Diyin deidísin doogo hoł bééhoozin!

3. (a) John éí bichʼįʼ yitʼíní ályaa yę́ę haitʼéego niheʼoodląʼ bidziil íidoolííł? (b) Haʼátʼíí baa nídadíitʼįįł?

³ John kótʼéego hachʼįʼ yitʼíní ályaago beʼoodląʼ bidziil áyiilaa. Nihí éí díí yitʼíní ályaaígíí kʼad nihitah áhoonííł, áko haitʼéego niheʼoodląʼ bidziil íidoolííł? Tsʼídá tʼóó ahayóí diné nihinááł áłah áálnííł, éí great tribulation yiiʼ  chʼíhidookahgo nahasdzáán bikááʼ hoolʼáágóó kéédahatʼı̨́į doo. Jiihóvah éí diné tʼóó ahayóí bidiʼnínígíí éí 80dóó baʼaan nááhai yę́ędą́ą́ʼ bidineʼé yichʼįʼ ííshjání áyiilaagi baa nídadíitʼįįł. Áádóó díí dah yikáhígíí éí (1) ánéelą́ąʼgi índa (2) daʼníłtsʼą́ą́dę́ę́ʼ deíkáahgi ałdóʼ dadíníilʼįįł. Díí binahjįʼ niheʼoodląʼ bidziil íidoolííł.

4. (a) Doo tʼáá aaníí oodląʼ yee dah yikahii éí Diyin Bizaad yee naʼnitinii háiidígíí doo yikʼidaʼdiitįįh da? (b) Bible Students éí haitʼéego łah ádaatʼé?

⁴ Akʼeh dahółʼíinii nahasdzáán bikááʼ hoolʼáágóó kéédahatʼı̨́į doo níigo Diyin Bizaad yee naʼnitingi éí doo tʼáá aaníí oodląʼ yee dah yikahii doo yee nidaʼnitin da. (2 Cor. 4:​3, 4) Éí yáʼátʼéehgo ááníiłii daatsaahgo yáʼąąshgóó bá ahóótʼiʼ daaní. Ndi, Bible Students * éí łah átʼéego yikʼidaʼdiitą́, éí 1879 yę́ędą́ą́ʼ Watch Tower ádeiłʼı̨́ı̨́ ńtʼééʼ. Éí yikʼidaʼdiitįįhgo Diyin éí nahasdzáán ayóó ánoolingo ánéidoodlíiłgo ákʼeh dahółʼíinii yikááʼ kéédahatʼı̨́į doo, yáʼąąshdi éí ndagaʼ. Ndi háí éí akʼeh dahółʼíinii ádaatʼínígíí éí tʼahádóó índa bił béédahoozin.—Matt. 6:10.

5. Bible Students éí 144,000 haʼníigi haitʼéego yikʼidaʼdiitą́?

⁵ Bible Students éí Diyin Bizaad yikʼidaʼdiitįįhgo éí łaʼ “nahasdzáán bitsʼą́ą́dóó náádabiʼdiizniiʼígíí” yáʼąąshdi Jesus yił dahwéeʼaah doo. (Rev. 14:3) Díí éí nahasdzáán bikááʼ yídaneedlı̨́įgo Diyin yaa ádaʼdeestʼą́ągo yá ndaalʼaʼ, éí 144,000 ánéelą́ą́ʼ. Ákoshąʼ diné tʼóó ahayóígíí?

6. Bible Students éí diné tʼóó ahayóígíí haʼníigi haitʼéego yikʼidaʼdiitą́?

⁶ John bił yitʼíní ályaa yę́ę éí diné tʼóó ahayóígíí “bikááʼdóó nahatʼáii índa Dibé Yázhí nilíinii bidááhdóó naazı̨́įgo,” yiyiiłtsą́. (Rev. 7:9) Bible Students éí saadígíí binahjįʼ yikʼidaʼdiitą́ągo tʼáá 144,000 átʼéego, diné tʼóó ahayóígíí ałdóʼ yáʼąąshdi kéédahatʼı̨́į doo. Díí tʼáá áłah éí yáʼąąshdi kéédahatʼı̨́įgo haʼátʼíí bee ałʼąą ádajítʼée doo? Bible Students ádeiznízingo diné tʼóó ahayóígíí tʼah nahasdzáán bikááʼ kéédahojitʼínę́ędą́ą́ʼ éí Oodlání ídlı̨́įgo Diyin doo ayóó bikʼeh dahojíłʼı̨́į da ńtʼééʼ. Áádóó łaʼ Christendom tʼahdii daʼjítah, ndi Diyin Bizaad bikʼehgóó hweʼiinaʼ joołtʼih, áko éí diné tʼóó ahayóígíí ałdóʼ daʼjítah. Jesus bił hootʼáał dooleełgi doo há dabíighah da. Háálá Diyin ayóóʼádajóʼníigi biʼoh dajílı̨́, éí yáʼąąshdi bikááʼdóó nahatʼáii bidááhdóó nijizı̨́, ndi éí doo bikááʼ dah nijíiztą́ą da doo.

7. (a) Bible Students éí nahasdzáán bikááʼ Christ hooʼáałgo háí ákwíí kééhatʼı̨́į doo daaníí ńtʼééʼ? (b) Christ tʼah doo yíghááhgóó hastóí Jiihóvah yá ndaasʼaʼ yę́ę haitʼéego yaa hadaasdzííʼ?

⁷ Bible Students kótʼéego daʼoodlą́ą́ʼ ńtʼéeʼgi éí 144,000 ánéelą́ą́ʼígíí dóó diné tʼóó ahayóígíí yáʼąąshgóó aheeskaidóó bikʼijįʼ náánáłaʼ ląʼí míiltsoh ázhnéelą́ąʼgo nahasdzáán bikááʼ 1,000 nááhaijįʼ Christ hooʼáał dooleełígíí biyáádóó bikʼidahozhdoodliił. Áádóó Christ hodooʼáałgi tʼah doo bee hahalzhishgóó díí ląʼí míiltsoh ánéelą́ʼígíí Jiihóvah doo yá ndaalʼaʼ da. Ndi, díí dahikahígíí éí 1,000 nááhai Christ hooʼáałgo éí Jiihóvah náhodínóotı̨́ı̨́ł. Jiihóvah bikʼehgóó ádajiidzaaígíí éí nahasdzáán bikááʼ hoolʼáágóó kééhojitʼı̨́į doo, ndi doo akʼeh dahółʼínígíí éí ádooldįįł. Łaʼ éí nahasdzáán bikááʼ “princes” danílı̨́į doo, éí Christ tʼah doo yíghááhgóó hastóí Jiihóvah yá ndaasʼaʼ yę́ę náábiʼdiiljéeʼgo  ałdóʼ daʼatah doo. Áádóó éí Christ hooʼáałgo 1,000 nááhaigo éí yáʼąąshdi iiná baa dahididootʼááł.—Ps. 45:16.

8. Táaʼgo dah oonéłígíí Diyin haʼátʼíí há yinízin, hwiindzin ńtʼééʼ?

⁸ Bible Students éí tááʼ ałʼąą dah oonééł danízin ńtʼééʼ, éí: (1) 144,000ígíí yáʼąąshdi Jesus yił dahwéeʼaah doo; (2) diné tʼóó ahayóígíí éí Oodlání ídlı̨́įgo Diyin doo ayóó bikʼeh dahojíłʼı̨́į dago yáʼąąshdi Jesus bikááʼdóó nahatʼáii bidááhdóó naazı̨́į doo; áádóó (3) 1,000 nááhai Christ hooʼáałgo ląʼí míiltsoh ázhnéelą́ʼígíí Jiihóvah bikʼehgo nídadínóotįįł. * Ndi, tʼahádóó Jiihóvah díí hazhóʼó hoł ííshjání áyiilaa.—Prov. 4:18.

9. (a) Diné tʼóó ahayóígíí éí haitʼéego “bikááʼdóó nahatʼáii índa Dibé Yázhí nilíinii bidááhdóó” naazı̨́? (b) Revelation 7:9 éí haitʼéego hazhóʼó ił ííshjání áyiilaa?

⁹ 1935 yę́ędą́ą́ʼ éí diné tʼóó ahayóígíí John bił yitʼíní ályaago ádaatʼínígíí bééhoozin. Jiihóvah Yá Dahalneʼé yaa ákodaniizı̨́įʼgo éí diné tʼóó ahayóígíí doo tʼáá aaníígóó yáʼąąshdi “bikááʼdóó nahatʼáii índa Dibé Yázhí nilíinii bidááhdóó” nijizı̨́į da. Nahasdzáán éí bikááʼ kéédahojitʼı̨́į doo, áko éí “bikááʼdóó nahatʼáii” bidááhdóó nijizı̨́įgo éí Jiihóvah binahatʼaʼ baa ákodazhnízin. (Isa. 66:1) “Dibé Yázhí bidááhdóó” nijizı̨́įgo éí Jesus náánihiisniiʼgi dajoodlą́ą doo. Matthew 25:​31, 32 ánínígi éí “ałʼąą dineʼé tʼáá ałtso,” éí doo yáʼádaashóonii tʼáá bił, Jesus bidááhdóó áłah ádoolnííł. Áko bééhózinígo díí dadineʼé doo yáʼąąshdi da, ndi nahasdzáán bikáaʼgi naazı̨́. Díí éí 1935 yę́ędą́ą́ʼ hazhóʼó ííshjání ályaago éí bohónéedzą́. Diyin Bizaad áníigo éí diné tʼóó ahayóígíí yáʼąąshgóó doo aheeskai da. Ndi łaʼ dah náánáákahgo éí yáʼąąshdi hoolʼáágóó dahiináa doo, éí 144,000ígíí Jesus yił “nahasdzáán yikʼi bídahólníihgo nidantʼáa doo.”—Rev. 5:​10, NW.

10. Haʼátʼíí biniyé diné tʼóó ahayóígíí éí Christ tʼáadoo hodiʼáhí Jiihóvah bikʼehgo naʼnitinii bídahwiizhdoołʼááł?

¹⁰ 1935dóó wóshdę́ę́ʼ diné tʼóó ahayóígíí John yiyiiłtsánę́ę éí Oodlání doo Jiihóvah yitsʼá daakáahii ádaatʼı̨́įgo Jiihóvah Yá Dahalneʼé yikʼidaʼdiitą́. Díí éí nahasdzáán bikááʼ hoolʼáágóó kéédahatʼı̨́į dooleełgo bá chohooʼı̨́. Great tribulation bitsʼąą yisdázhdookahgo éí Christ tʼah doo hodiʼaahgóó Jiihóvah bikʼehgo naʼnitinii bídahwiizhdoołʼááł. Áko éí ‘díí ádahodooníłígíí bitsʼąą dazhdoohdzihgo’ éí 1,000 nááhaijįʼ Christ tʼáadoo hodiʼáhí hweʼoodląʼ dabidziil doo.—Luke 21:​34-36.

11. Haʼátʼíí biniyé Bible Students łaʼ ádeinízin ńtʼéeʼgo łaʼ éí Christ hooʼáłígíí 1,000 nááhaigo yáʼąąshgóó iiná baa dadoolyééł?

¹¹ Christ hooʼáłígíí 1,000 nááhaigo éí łaʼ yáʼátʼéehii ááníiłgo éí yáʼąąshgóo dooleeł haʼníigo baa nitsáhákees yę́ęshąʼ? The Watch Tower, February 15, 1913 yę́ędą́ą́ʼ ályaa yę́ę kóníí ńtʼééʼ. Kótʼéego nitsáhákeesgo éí, ‘Ałkʼidą́ą́ʼ hastóí Jiihóvah dayoodlánę́ę éí haʼátʼíí biniyé nahasdzáán daabííʼ dooleeł, ndi Oodlání éí doo ayóó Jiihóvah dayoodlą́ą da ńtʼéeʼgo éí yáʼąąshdi iiná baa dadoolyééł?’ Naakigo kótʼéego nitsáhákeesii éí tʼóó daastiʼ hwiindzinii átʼé: (1) éí diné tʼóó ahayóígíí éí yáʼąąshdi kéédahatʼı̨́į doo, áádóó (2)  éí doo ayóó Jiihóvah dayoodlánígíí ádaatʼı̨́.

12-13. Anoint ádaalyaaígíí dóó diné tʼóó ahayóígíí haʼátʼíí yaa ákodanízin?

 ¹² 1935dóó wóshdę́ę́ʼ Jiihóvah Yá Dahalneʼé yikʼidaʼdiitą́ągo éí Armagédan yitsʼąą yisdáhaaskaiígíí diné tʼóó ahayóígíí John yiyiiłtsánę́ę éí bí ádaatʼı̨́. Éí great tribulation ‘yiiʼdę́ę́ʼ chʼíhidookah,’ áádóó ‘ayóó íitsʼaʼgo ádaaníi doo, NihiDiyin God éí bikááʼdóó nahatʼáii yikááʼdóó dah sidáii índa Dibé Yázhí nilíinii, éí bee yisdáʼiildéehii bee bóhólnííh.’ (Rev. 7:​10, 14) Diyin Bizaad naʼnitingo ałdóʼ éí yáʼąąshgóó náábiʼdiiljéʼígíí éí ałkʼidą́ą́ʼ hastóí Jiihóvah dayoodlánę́ę éí biláahdi “yáʼátʼéehii” baa dadeestʼą́. (Heb. 11:40) Áko éí binahjįʼ nihibrothers éí nahasdzáán bikááʼ hoolʼáágóó iináago Jiihóvah bá naʼaʼaʼ daaníigo diné wóshdę́ę́ʼ deiłníigo yaa nídiikai.

¹³ Diné tʼóó ahayóígíí bá ił chohooʼíinii yaa bił dahózhǫ́. Jiihóvah éí bá ndaalʼaʼí haaígi shı̨́ı̨́ bá ndaalʼaʼ, éí yáʼąąshdi doodaiiʼ nahasdzáán bikááʼ daatsʼí dooleełgi bee bóhólníihgo bił béédahózin. Anoint ádaalyaaígíí dóó diné tʼóó ahayóígíí yaa ákodanízingo Jiihóvah bibee ajoobaʼ, éí Jesus Christ nááʼádiisniiʼgi tʼéiyá binahjįʼ haa dadoolyééł.—Rom. 3:24.

14. 1935 bikééʼdóó éí diné tʼóó ahayói dooleeł haʼníigi ląʼí éí haitʼéego bohodoolníił danízin ńtʼééʼ?

¹⁴ 1935 yę́ędą́ą́ʼ hazhóʼó ííshjání ályaa ndi, ląʼí ádeinízingo nahasdzáán bikááʼ iináa dooleełgo bił chodahooʼínígíí éí haitʼéego tsʼídá tʼóó ahayói dooleeł? Ronald Parkin éí diné tʼóó ahayóígíí ííshjání ályaa yę́ędą́ą́ʼ 12 honááhai. Éí ájíní: “Íídą́ą́ʼ nahasdzáán bikááʼ tʼáá 56,000 jiltʼéhégo nidahojilneʼ, ląʼígo éí anoint ádaalyaaígíí ádaatʼı̨́. Áko diné tʼóó ahayóígíí doo ląʼí da nahalin.”

15. Diné tʼóó ahayóí haitʼéego tʼahdii áłah áálnííł?

¹⁵ Áádóó wóshdę́ę́ʼ hodeeshzhiizhgo missionaries kéyah daʼníłtsʼą́ą́ʼgóó adahasʼaʼ, éí Jiihóvah Yá Dahalneʼé kʼeeʼąą dínéestʼą́. 1968go The Truth That Leads to Eternal Life wolyéego éí Diyin Bizaad bee naʼnitingo hahoolzhiizh. Éí doo nantłʼagóó Diyin Bizaad bee naʼnitingo tʼóó ahayóí yitsʼą́ą́dóó yídahoołʼaahgo yaa nídiikai. Dı̨́ı̨́ʼ nááhaijįʼ 500,000dóó baʼaan baptize ádaalyaa. Latin America dóó náánáłaʼ kéyah daabiiʼ éí Catholic Church doo ayóó bóhólníih da silı̨́ı̨́ʼ. Áádóó Eastern Europe dóó Africadi kéyah łaʼ ndahwiilneʼgóó nihitsʼą́ą́ʼ neʼ ádayiilaa yę́ęgóó  nihichʼįʼ ąą áńdaalyaago ląʼí míiltsoh baptize ádaalyaa. (Isa. 60:22) Tʼah ániidídóó Jiihóvah bidineʼé éí Diyin Bizaad bee nidínóotı̨́įłgi éí ląʼí bee niʼdoonishii dahólǫ́ǫgo ádayiilaa. Bééhózinígo kʼad éí diné tʼóó ahayóí, éí 8 milliondóó baʼaan áłah áálnííł.

16. Diné tʼóó ahayóígíí éí háádę́ę́ʼ deíkáahgo áłah áálnííł?

¹⁶ John éí diné tʼóó ahayóígíí ‘ałʼąą dineʼé bił dah nidahazʼą́ą́dę́ę́ʼ tʼáá ałtso, índa bizaad ałʼąą ádaatʼéii tʼáá ałtso dabitahdę́ę́ʼ,’ áłah ádoolnííł ní. Halneʼé Zekaráíyah ałdóʼ tʼáá ákóní: “Éí yoołkáałdi ałʼąą dineʼé bizaad ałʼąą ádaatʼéii bitahdę́ę́ʼ diné neeználtʼéego yíkaigo Jew dineʼé nilíinii biʼééʼ dayótąʼgo ádadidooniił, Haaʼíshąʼ nił yiikah dooleeł, háálá Diyin God nił hólǫ́ǫgo naa dahosidiitsʼą́ą́ʼ.”—Zech. 8:23.

17. Diné daʼníłtsʼą́ą́ʼdę́ę́ʼ deíkáahii haitʼéego bíká anáʼáwoʼ?

¹⁷ Jiihóvah Yá Dahalneʼé yaa ákódanízingo saad ałʼąą ádaatʼéii éí bee diné áłah áálníił doogo éí haneʼ yáʼátʼéehii tʼáá bí dabizaad yee deididootsʼı̨́ı̨́ł. Diyin Bizaad bee naʼnitingi naaltsoos bił danéiidéhígíí  náánáłahjįʼ saad bee ánálʼįįhgo 130dóó baʼaan nááhai. Ndi kʼad éí 900dóó baʼaan saad ałʼąą ádaatʼéego bee áńdaalneʼ. Díí Jiihóvah bibee adziilii bee diné daʼníłtsʼą́ą́ʼdę́ę́ʼ tʼóó ahayóí áłah áyoolííł. Diyin bitsʼą́ą́dóó binaʼnitinii saad daʼníłtsʼą́ą́ʼdę́ę́ʼ bee áńdaalyaago dahólǫ́, éí bee łáʼí ídlı̨́įgo Jiihóvah bichʼįʼ hodílzin. Áko bidineʼé éí nahaneʼgi ayóó yídaneedlı̨́ índa ayóóʼádaʼahóʼníigo béédahoʼdílzin. Díí bee oodląʼ bidziil!—Matt. 24:14; John 13:35.

18. (a) Isaiah 46:​10, 11 bikʼehgo Jiihóvah éí diné tʼóó ahayóí dooleeł nínę́ę haitʼéego yiʼiilaa? (b) Nahasdzáán bikááʼ kéédahatʼı̨́į dooleełígíí éí haʼátʼíí biniyé shí yeeʼ shaa hoyoosnah doo danízin da?

¹⁸ Diné tʼóó ahayóígíí baa chʼíhootʼą́ągi baa hózhǫ́! Háálá nihił béédahózingo Jiihóvah éí ádahodoonííł nínę́ę yiʼiilaa. (Isaiah 46:​10, 11 yíníłtaʼ.) Diné tʼóó ahayóíjí atah danilínígíí éí Jiihóvah ił chohooʼı̨́ beiníláhígíí yichʼįʼ yaa ahééh danízin. Éí yáʼąąshdi Jesus bił hweeshʼáał dooleełgo Diyin tʼáadoo anoint áshiilaa da, áko éí biniinaa shaa hoyoosnah doo danízin da. Diyin Bizaad biiʼ baa haneʼgo hastóí dóó sáanii éí níłchʼi diyinii ayóó átʼéego biiʼ nidaashnish ndi, éí 144,000ígíí doo yił daʼatah da. John Taah Iiníiłii éí łaʼ. (Matt. 11:11) David ałdóʼ. (Acts 2:34) Éí bí dóó ląʼí yiltʼéego éí nahasdzáán ayóó ánoolingo ánályaago bikáaʼjįʼ náábidiʼdooljah. Tʼáá ájítʼé, diné tʼóó ahayóígíí bił, éí Jiihóvah bikééʼ asdzı̨́įgi índa bí aláahdi bóhólníihgo átʼéego bee nijizı̨́į doo.

19. John éí diné tʼóó ahayóí áłah nílı̨́įgo bichʼįʼ yitʼíní ályaago kʼad éí bohoolníiłgo haitʼéego nihídéétʼiʼ?

¹⁹ Diyin éí diné daʼníłtsʼą́ą́dę́ę́ʼ tʼóó ahayóí dabidósin doo biniyé tsʼídá índa kótʼéego áʼiilaa. Yáʼąąshgóó doodaiiʼ nahasdzáán bikááʼ háájí shı̨́ı̨́ nihá chohooʼı̨́į ndi, tʼáá háíshı̨́ı̨́ “dibé náánáłaʼ,” diné tʼóó ahayóígíí atah dooleełgi bee bíká adiijah. (John 10:16) Jiihóvah éí great tribulation yaa chʼíhoníʼánę́ę bichʼįʼ hoolzhish, éí diné atíyoolíiłii bílaʼashdlaʼii binahatʼaʼ índa oodląʼ bił nahazʼą́ą́góó ałtso íidoołdįįł. Diné tʼóó ahayóígíí éí baa hózhóonii hadáahdi naazlá, éí nahasdzáán bikááʼ hoolʼáágóó Jiihóvah bá naʼaʼaʼ doo!—Rev. 7:14.