1-2. Ecclesiastes 11:6 dóó nahaneʼgi haitʼéego ahídéétʼiʼ?

ŁAʼ daakéyahgóó diné éí nizhónígo baa haneʼii hazhóʼó shił bééhodoozįįł danízin. Díí átʼéego haneʼ tsʼídá dideestsʼı̨́ı̨́ł danízin. Náánáłahgóó éí Diyin doodaiiʼ Diyin Bizaad doo ayóó yaa nitsídaakees da. Kééhótʼı̨́įgi nizhónígo baa haneʼii diné bił dahólneʼgo, haitʼéego yaa nitsídaakees? Háájí shı̨́ı̨́ diné nitsídaakees shı̨́į ndi, Jiihóvah éí kʼadí nihidííniidjįʼ tʼáá nidahwiilneʼ doo nihóʼní.

² Jiihóvah éí tʼáá íídą́ą́ʼ díí nahaneʼígíí kojįʼ nidootʼih níigo yee nihoníʼą́, áádóó éí “áadi índa nihodoogááł.” (Matt. 24:​14, 36) Áko nihí éí kʼad haʼátʼíí ádeiʼníiłgo nahaneʼgi Jiihóvah kʼadí nihidííniidgo índa doo neʼ ádadiilníił da?—Ecclesiastes 11:6 yíníłtaʼ.

3. Haʼátʼíí baa nídadíitʼįįł?

³ Yáʼátʼéehgo “łóóʼ hayiileehí” ídlı̨́įgi dı̨́ı̨́ʼ ałʼąą átʼéego tʼáá íídą́ą́ʼ baa nídasíitʼįįd. (Matt. 4:19) Azhą́ ndaʼnółtłʼaii dahólǫ́ǫ ndi, nahaneʼgi éí tááʼ hazʼą́ągo haitʼéego bidiilkaal doo. Haʼátʼíí biniyé díí ílíinii átʼéego baa nídadíitʼįįł: (1) nahaneʼgi áłtsé óolzin, (2) haʼahóní, áádóó (3) oodląʼ bidziilgo óolzin.

4. Jiihóvah naanish nihaidiníʼánígíí haitʼéego áłtsé siilʼą́ą doo?

⁴ Jesus éí nihoogháahjįʼ yoołkáałgo ádahooníłígíí yaa chʼíhoníʼą́, áko éí biniinaa nahaneʼ biʼoonish yę́ęgi ndaʼnółtłʼaii dahólǫ́ǫ ní. Bídahoołʼaahii kwííłní:  “Hadaʼísídółʼı̨́ı̨́ʼ.” (Matt. 24:42) Nóah bíyoołkááł yę́ędą́ą́ʼ Nóah éí diné hadaʼísídółʼı̨́ı̨́ʼ chʼééh jiníigo bił hojilneʼ, doo dahwíistsʼą́ąʼ da. Dííshjı̨́įdi diné tʼáá ákódaatʼé. (Matt. 24:​37-39; 2 Pet. 2:5) Áko Jiihóvah naanish nihaidiníʼánígíí áłtsé nisiilʼą́ągo ádeíníilzin doo.

5. Acts 1:​6-8 nahaneʼígíí haanizáádgóó baa nahodoonih, ní?

⁵ Diyin biNahatʼaʼ baa haneʼgi áłtsé siilʼą́ą doo. Jesus éí díí nahaneʼígíí daʼníłtsʼą́ą́ʼgóó índa dajiztsą́ą́dóó bikʼijįʼ tʼáá biʼoonish doo ní. Jesus daaztsą́ą́dóó bikʼijįʼ bídahoołʼaahii éí łóóʼ hadayiileehgi binaanish yę́ęjįʼ anáhaaskai. (John 14:12) Jesus náábiʼdiilzáádóó bikʼijįʼ éí miracle áʼjiilaago hódahoołʼaahii łóóʼ tʼóó ahayóí bił hadajiizloʼ. Áádóó Jesus éí nahaneʼgi dóó íhoołʼaahii álnéehgi éí áájígo naanish ílíinii átʼé hałní. (John 21:​15-17) Tʼah doo yáʼąąshgóó dah nízhdiidááhgóó Jesus éí bídahoołʼaahii ííłníigo éí nahaneʼgi hajííłtʼiʼ yę́ę éí Ízrel bilááhgóó shá nidahołneʼ doo yidííniid. (Acts 1:​6-8 yíníłtaʼ.) Áádóó tʼahádóó yilʼaadii John éí “Lordʼs Day” * yoołkáałdi kóhootʼée doo níigo yichʼįʼ yitʼíní áyiilaa. John éí díí ałdóʼ jiiłtsą́: Diyingo ndaalʼaʼí bikʼehgo éí “haneʼ yáʼátʼéehii doo ninítʼiʼii” baa dahaneʼgo “ałʼąą dineʼé bił nidahazʼáanii áádóó ałʼąą dineʼé áádóó bizaad ałʼąą ádaatʼéii índa nihokááʼ dineʼé danilíinii tʼáá ałtso” yił dahalneʼ. (Rev. 1:10; 14:6) Áko tʼáá bahatʼaadígo ayóó átʼéego nahaneʼgo biʼoonishígíí bee aniitah doogo Jiihóvah nihá yinízinii átʼé.

6. Nahaneʼgi haitʼéego áłtsé ííníilzin doo?

⁶ Nahaneʼgi áłtsé ííníilzingo Jiihóvah tʼáá ałtsojįʼ nihíká análwoʼgi baa nitsíikees doo. Éí ląʼígóó naaltsoos  bikáaʼjįʼ, digital, audio, videos, índa JW Broadcasting^® biiʼ ndaʼalkidgo ádaalyaa. Díí baa nitsíníkees: Website jw.org biiʼ éí tʼóó ahayóígóó bee ił hodoolnihii 1,000dóó baʼaan saad ałʼąą bee yádaatiʼígíí bee dahólǫ́ǫgo ádaalyaa. (Matt. 24:​45-47) Political, religion, dóó wealth bee diné ałtsʼákah ndi, 8 million Jiihóvah yá ndaalʼaʼí éí tʼááłaʼ háájéeʼgo łáʼí danilı̨́įgo dah yikah. April 19, 2019 yoołkááł yę́ędą́ą́ʼ Jiihóvah Yá Dahalneʼé éí nahasdzáán tʼáá siʼą́ą́ ńtʼééʼ bikááʼgóó daily text baa haneʼgo binááł nídaaskid. Áádóó tʼáá éí bee iʼííʼaní 20,919,041 ánéelą́ą́ʼ Jesus daaztsánígíí Bééhániih áʼdoolnííł yiniyé ahíikai. Kódaatʼéhígíí bee daʼniitahgo baa hózhǫ́, áko Jiihóvah biNahatʼaʼ tʼáá baa dahwiilneʼ doo daniidzin.

7. Jesus áátʼįįdgi haitʼéego éí binahjįʼ nahaneʼgi áłtségo ádeíníilzin?

⁷ Náánáłahgo nahaneʼgi áłtsé ííníilzin doogo éí Jesus áʼiilaa yę́ęgi bikʼehgóó yiidáał doo. Éí ndaʼnółtłʼáii ádin íínísingo tʼáá aaníinii baa nahashneʼ doo nízin ńtʼééʼ. (John 18:37) Séítan éí “nahasdzáán bikáaʼgi bee ídahólníihgo bił nahazʼáanii áádóó yee ayóó ádaatʼéii” hachʼįʼ yitʼíní áyiilaa ndi, tʼáadoo yidánoosníiʼ da. Áádóó naatʼáanii jidooleeł hodóʼníi ndi, doo jiniizı̨́įʼ da. (Matt. 4:​8, 9; John 6:15) Ajitʼı̨́į dooleełgi ndi, tʼáadoo bee ádaa tsízdeezkéez da. Yéigo hakʼijįʼ ídlı̨́į ndi, doo béédzíldzid da. (Luke 9:58; John 8:59) Niheʼoodląʼ bóhonítahgo Paul yee achʼįʼ haadzíiʼii bénéiilniihgo yéigo nahwiilneʼ doo. Éí Oodlání ííłníigo Jesus áʼiilaa yę́ę bikʼehgóó yínáałgo éí ‘haʼíinilníi doo.’—Heb. 12:3.

8. Haʼahóní haʼátʼíí óolyé, éí haʼátʼíí biniyé kʼad íiyisíí ákónítʼée doo?

⁸ Doo yáʼátʼééhgóó hoł hooʼaahgo tsı̨́įłgo nidootʼih jinízingo, éí doodaiiʼ haʼátʼíí shı̨́ı̨́ yáʼátʼéehii bibaʼ ájítʼéego éí bichʼįʼ haʼahóníi łeh. Júdahgi tsʼídá doo yáʼáhootʼééhgóó hazʼą́ągo biniinaa Habákak éí tsı̨́įłgo nidootʼih chʼééh jinízin. (Hab. 1:2) Jesus bídahoołʼaahii éí Diyin biNahatʼaʼ “kʼad yidooltsééł danízin,” áko Rome binahatʼaʼ biyáádóó hazhdookah dazhnízin. (Luke 19:​11, New World Translation) Diyin biNahatʼaʼ éí doo yáʼádaashxóonii nahjįʼ kwíidoolíiłgo ániidígo chʼééʼdooldahgo íidoolíiłgo bíká dadíníitʼı̨́ı̨́ʼ. (2 Pet. 3:13) Ndi, Jiihóvah kʼad niizı̨́ı̨́ʼ góneʼ áajįʼ hadaʼííníilníi doo. Jiihóvah éí haʼahóní yee nanihinitingi baa nídadíitʼįįł.

9. Jiihóvah éí haitʼéego nihinááł haʼólní?

⁹ Jiihóvah éí nihinááł tsʼídá nizhónígo haʼólní. Nóah éí “tsʼídá tʼáá ákogi éʼétʼé yaa halneʼii” nilı̨́įgo Jiihóvah haʼólníigo tsinaaʼeeł ájiilaa. (2 Pet. 2:5; 1 Pet. 3:20) Jiihóvah éí Sádam dóó Gomárahgi diné tsʼídá doo yáʼáshxónígi yeikahígíí ádeeshdįįł níigo Éíbraham éí ląʼídi Jiihóvah ninábízhdíłkiʼgo hwíistsʼą́ą́ʼ ńtʼééʼ. (Gen. 18:​20-33) Jiihóvah éí Ízrel dineʼé tsʼídá yéigo yił haʼólníigo ląʼí nááhai. (Neh. 9:​30, 31) Kʼad ndi Jiihóvah éí “tʼáá ádzíłtso łah átʼéego tsíńdazdookosgo habąąhági átʼéii bitsʼáhizhdookah” hóʼníigo haʼólní. (2 Pet. 3:9; John 6:44; 1 Tim. 2:​3, 4) Jiihóvah nihinááł haʼólníigo binahjįʼ nidahwiilneʼ dóó nidaʼniitingi doo neʼ ádeilnéeh da. Bizaad biiʼdóó éí haneʼ bee akʼidiʼdootı̨́įłii nihá áyiilaago éí binahjįʼ haʼahóní bóhooʼaah.

10. James 5:​7, 8 éí kʼééʼdídléehii haitʼéego bitsʼą́ą́dóó íhooʼaah?

 ¹⁰ James 5:​7, 8 yíníłtaʼ. Kʼééʼdídléehii baa haneʼgi haʼííníilníi doogi yee nanihinitin. Kʼizhdííláhígíí éí tʼáadoo hodinaʼí hadanisééh. Ndi, aneestʼąʼ bąąh nídahoodleełígíí éí tʼáá hodinaahgo índa nitʼı̨́ı̨́h. Ízrel biiʼ éí hastą́ą́ nínádízíʼgóó kʼéédaʼdilyééh. Kʼééʼdídléehii éí aakʼeedgo kʼiʼdílééh, áádóó dąąjįʼ ahalzhishgo ániłtʼı̨́ı̨́h. (Mark 4:28) Kʼééʼdídléehii kʼiidííláhígíí yibaʼ haʼólnínígi átʼéego nihí ałdóʼ tʼáá ákótʼéego honiidzą́ągo abaʼ ániitʼée doo.

11. Haʼííníilníigo éí nahwiilneʼgi haitʼéego nihíká análwoʼ?

¹¹ Bílaʼashdlaʼii éí yinaashnishii tsı̨́įłgo yidooltsééł danízin łeh. Kʼiʼdiilyéego éí ayóó binaʼanishii átʼé, níʼjígeed, náhojigod, índa tó baa jiikaah. Íhoołʼaahii álnéehgi ayóó binaʼanish. Naniitinígíí ajoodlá biiʼ hólǫ́ǫgo éí chʼil agháanii nahalingo hahaʼníish doo. Łahgóó diné doo danihíistsʼą́ą́ʼgóogo éí bił haʼííníilníigo éí tʼáadoo bikʼee haadaniitʼéhí da doo. Íhwiideeshʼááł danízinígíí ałdóʼ bił haʼííníilníi doo. Diyin Bizaad bee naniitinígíí éí beʼoodląʼ dínóoséełgi doo bee bíniilchéeh da doo. Jesus bídahoołʼaahii yę́ę éí Jesus yee nahonitin yę́ę łahdóó doo hąąh yikʼidaʼdiitįįh da ńtʼééʼ. (John 14:9) Béédeilniih doogo éí nihí kʼidadiilyé dóó tó ił nidahiikaah, ndi Diyin éí yidínísééh.—1 Cor. 3:6.

12. Nihikʼéí doo Jiihóvah Yá Dahalneʼé danilínígíí Diyin Bizaad bił hodiilnihgo haitʼéego bił haʼííníilníi doo?

¹² Nihikʼéí doo Jiihóvah Yá Dahalneʼé danilínígíí Diyin Bizaad bił hodiilnihgi ayóó nanitłʼah, áko díí éí náánáłahgo ałdóʼ hanááʼííníilníi doo. Ecclesiastes 3:7 nihíká adoolwoł, éí ání: “Adéesyéél baa hwiilzhíísh áádóó yátiʼ baa hwiilzhíísh.” Íiʼníiłgi índa ániitʼéegi nihikʼéí  yee hadanihisíidgo binahjįʼ kʼad nihíídeestsʼįįł dadínóozįįł, ndi bił nahodiilnihgi ashjaʼiilaa ládą́ą́ʼ éí hadiidzih. (1 Pet. 3:​1, 2) Bíniidlı̨́įgo nahwiilneʼ dóó naʼniitingo diné tʼáá ałtso, éí nihikʼéí ałdóʼ bił haʼííníilníi doo.

13-14. Háí éí hadaʼólníí ńtʼéʼígíí bedaʼiilʼı̨́į doo?

¹³ Beʼoodląʼ dabidziilii Diyin Bizaad biiʼ índa dííshjı̨́įdi baa dahaneʼígíí haʼahóní bitsʼą́ą́dóó íhooʼaahgo átʼé. Habákak éí doo yáʼáshxóonii nidootʼih chʼééh jinízin, ndi kójíní: “Yaʼiitłʼin bikááʼdóó haʼasíidgo sézı̨́į dooleeł.” (Hab. 2:1) Yilʼaadii Paul éí nahaneʼgi shaa deetʼánígíí ‘łaʼdeeshłíiłgo’ baa shił hózhǫ́ ní. Ndi, éí “haneʼ yáʼátʼéehii baa hashneʼgo naashʼaʼ,” níigo yee haʼólníí ńtʼééʼ.—Acts 20:24.

¹⁴ Brother dóó sister nilı̨́įgo Gilead óltaʼdóó niʼníłtaʼ áádóó kéyahgóó Jiihóvah Yá Dahalneʼé doo ląʼí hólǫ́ǫ́góó hoʼdoolʼaʼ. Éí kéyah biiʼ tʼáá bí bedaʼoodląʼ dahólǫ́. Ląʼí éí Diyin Bizaad bíhwiidooʼáałgi doo ayóó deinízin da. Ndi, Gileadi bił daʼjííłtaʼ yę́ę éí náánáłah kéyahdi nidahalneʼídi éí tʼáá ałtso Diyin Bizaad yee nideinitingo éí Dahalneʼé nidahaleeh daaníigo yee hoł dahalneʼ. Azhą́ hó nahojilneʼgi éí diné doo ayóó dahwíistsʼą́ąʼ da ndi, tʼóó haʼjólníigo nahojilneʼ. Éí 8dóó baʼaan nááhai chʼééh nahojilneʼ shı̨́ı̨́ nahalin ndi, ńtʼééʼ baa hózhǫ́ǫgo nazhnitinígíí łaʼ baptize ályaa. Ałkʼidą́ą́ʼ índa dííshjı̨́įdi nidahalneʼígíí haʼátʼíí bitsʼą́ą́dóó bóhooʼaah? Éí tʼáadoo neʼ ádaanéhí wołí bee yídaneedlı̨́įgo nidahasneʼ, áádóó éí hadaʼólníigo Jiihóvah hakʼihasdliʼ. Áko nihí éí “daʼoosdląądgo hadaʼólníigo Diyin God aidiníʼáanii bííʼ dadooleełígíí” bedaʼiilʼı̨́į doo.—Heb. 6:​10-12.

15. Baa nidahwiilneʼígíí deiniidlą́ągo haitʼéego baa nidahwiilneʼ?

¹⁵ Baa nidahwiilneʼígíí deiniidlą́ągo baa nidahwiilneʼ, áko ląʼí diné deididootsʼı̨́ı̨́ł daniidzin. Diyin Bizaad yee hahadziihii deiniidlą́. (Ps. 119:42; Isa. 40:8) Diyin Bizaad kódahodoonííł nínę́ę nihinááł ádahoonííł. Diné éí Diyin Bizaad bínaʼniltinii bikʼehgo hashtʼeʼ nináhákáahgo baa ákodaniidzin. Áko díí binahjįʼ daníilʼı̨́įgo Diyin biNahatʼaʼ nizhónígo baa haneʼii diné tʼáá altso deididootsʼı̨́ı̨́ł hwiindzin.

16. Psalm 46:​1-3 éí Jiihóvah dóó Jesus yéigo deiniidlą́ągi haitʼéego nihíká análwoʼ?

¹⁶ Jiihóvah biNahatʼaʼ yiNaatʼáanii áyiilaii Jesus índa bitsʼą́ą́dóó haneʼgo baa nidahwiilneʼígíí Jiihóvah éí ałdóʼ deiniidlą́. (John 14:1) Tsʼídá haitʼéego shı̨́ı̨́ nihił náhooʼaah ndi, Jiihóvah éí bineʼ iʼniichéehii índa bee adziilii nihá nilı̨́. (Psalm 46:​1-3 yíníłtaʼ.) Áádóó ałdóʼ Jesus éí Jiihóvah bibee adziil dóó óhólnííh bee diníʼánígíí yee yáʼąąshdę́ę́ʼ díí nahaneʼígíí kótʼéego níigo yikʼidéezʼı̨́ı̨́ʼ.—Matt. 28:​18-20.

17. Haʼátʼíí biniyé nahwiilneʼgi doo neʼ ádiilníił da?

¹⁷ Niheʼoodląʼ bidziilgo éí nahwiilneʼgi Jiihóvah nihikʼijidlíi doo. (Eccl. 11:6) Tʼáá ákwíí jı̨́ tables bikááʼdóó doodaiiʼ carts bee literature bídaʼiiniilkąąhgo diné yiighá nídadikah. Kótʼéego nahaneʼgoósh yáʼátʼééh? Aooʼ! Universitygi ániid naagháii ółtaʼígíí łaʼ éí Jiihóvah Yá Dahalneʼé baa haneʼgo essay bee ádeeshłííł ní. Kingdom Hall tʼáadoo łaʼ bikʼízhníyáa da, ndi campusgi literature biʼoolkąąhgo łaʼ bikʼízhníyáago ákwii essay bikʼehgo ázhdoolíłígíí łaʼ nízhdiiłtsooz.  Áko ńtʼééʼ tʼahádóó Jiihóvah Yá Halneʼé jizlı̨́įʼgo baptize áhoʼdilyaa, éí kʼad regular pioneer jílı̨́. Kótʼéego nahaneʼgo éí yéigo bíniidlı̨́įgo nahwiilneʼ, háálá díí bee bééhózingo Diyin biNahatʼaʼ deididootsʼı̨́įłii tʼah doo ałtso bikʼíhiikáah da.

18. Diyin biNahatʼaʼ baa nahaneʼgi éí tʼáá áajįʼ ahoolzhiizhgo neʼ ádoolníiłgo haʼátʼíí biniyé deiniidlą́?

¹⁸ Diyin biNahatʼaʼ baa nahaneʼgi éí tʼáá áajįʼ ahoolzhiizhgo neʼ ádoolníiłgo deiniidlą́. Haʼátʼíí biniyé díí tʼáá aaníí daniidzin? Nóah bíyoołkáałgo ádahóótʼįįd yę́ę baa nitsíníkees. Éí 120 nááhai tʼáá bílą́ąjįʼ kweʼé hoolzhishgo tó dooląął níigo Jiihóvah yee haadzííʼ. Ląʼí nááhaigo Jiihóvah éí Nóah tsinaaʼeeł ádíílííł yidííniid. Éí tsinaaʼeeł ájíléehgo 40 doodaiiʼ 50 daatsʼí nááhai. Nóah éí diné chʼééh bił hojilneʼ, áádóó Jiihóvah éí kʼad naaldlooshii yah adííʼish hodííniid. Áádóó Jiihóvah “hadádiʼníłkaal.” (Gen. 6:3; 7:​1, 2, 16) Díí bee bééhózingo éí Jiihóvah kótʼée dooleeł níigi áajįʼ ahalzhishgo éí tʼáá aaníí ákótʼįįh.

19. Nahaneʼgi yéigo bidadiilkaalgo tʼáadoo neʼ ádeinéhígo haʼátʼíí bee nihikʼihozhdoodliił?

¹⁹ Bichʼįʼ hoolzhish Jiihóvah éí díí nahaneʼígíí niidoołtʼih, áádóó Séítan bohootʼááł ‘yidádiʼdółkaałgo’ ániidígo chʼééʼdooldahgo bee chʼíhodoolzhish. Áko Nóah, Habákak, índa náádaałaʼ nahaneʼgi yidadiilkaal ńtʼééʼ yę́ę bedaʼiilʼı̨́į doo. Jiihóvah índa yee ádee hahasdzíiʼii baa nahwiilneʼgo áłtsé siilʼą́, haʼííníilní, áádóó niheʼoodląʼ bidziilgo ádeíníilzin doo.