Salimo 145:1-21
Nyimbo ya Davide yotamanda Mulungu.
א [Aleph]
145 Ndidzakukwezani, inu Mfumu ndi Mulungu wanga,+Ndidzatamanda dzina lanu kwamuyaya.+
ב [Beth]
2 Ndidzakutamandani tsiku lonse.+Ndidzatamanda dzina lanu kwamuyaya.+
ג [Gimel]
3 Yehova ndi wamkulu komanso woyenera kutamandidwa kwambiri,+Palibe amene angamvetse ukulu wake.+
ד [Daleth]
4 Anthu adzatamanda ntchito zanu ku mibadwomibadwo.Adzanena za ntchito zanu zamphamvu.+
ה [He]
5 Iwo adzanena za mphamvu zanu zodabwitsa+Ndipo ndidzaganizira mozama za ntchito zanu zodabwitsa.
ו [Waw]
6 Anthu adzanena za zochita zanu zochititsa mantha,*Ndipo ine ndidzalengeza za ukulu wanu.
ז [Zayin]
7 Iwo azidzalankhula mosangalala akadzakumbukira ubwino wanu wochuluka,+Ndipo adzafuula mosangalala chifukwa cha chilungamo chanu.+
ח [Heth]
8 Yehova ndi wokoma mtima* komanso wachifundo,+Wosakwiya msanga ndiponso wodzaza ndi chikondi chokhulupirika.+
ט [Teth]
9 Yehova ndi wabwino kwa aliyense,+Ndipo ntchito zake zonse zimasonyeza kuti ndi wachifundo.
י [Yod]
10 Ntchito zanu zonse zidzakutamandani, inu Yehova,+Ndipo okhulupirika anu adzakutamandani.+
כ [Kaph]
11 Iwo adzalengeza za ulemerero wa ufumu wanu+Komanso adzalankhula za mphamvu zanu,+
ל [Lamed]
12 Kuti anthu adziwe za ntchito zanu zamphamvu+Ndiponso kukula kwa ulemerero wa ufumu wanu.+
מ [Mem]
13 Ufumu wanu ndi ufumu wamuyaya,Ndipo ulamuliro wanu udzakhalapo ku mibadwo yonse.+
ס [Samekh]
14 Yehova amathandiza anthu onse amene atsala pangʼono kugwa+Ndipo amadzutsa onse amene awerama chifukwa cha mavuto.+
ע [Ayin]
15 Zamoyo zonse zimayangʼana kwa inu mwachiyembekezo.Mumazipatsa chakudya pa nyengo yake.+
פ [Pe]
16 Mumatambasula dzanja lanuNʼkukwaniritsa zolakalaka za chamoyo chilichonse.+
צ [Tsade]
17 Yehova ndi wolungama mʼnjira zake zonse,+Ndipo ndi wokhulupirika pa chilichonse chimene amachita.+
ק [Qoph]
18 Yehova ali pafupi ndi onse amene amamuitana,+Onse amene amamuitana mʼchoonadi.*+
ר [Resh]
19 Amakwaniritsa zolakalaka za anthu amene amamuopa.+Amamva kufuula kwawo kopempha thandizo ndipo amawapulumutsa.+
ש [Shin]
20 Yehova amayangʼanira onse amene amamukonda,+Koma oipa onse adzawawononga.+
ת [Taw]
21 Pakamwa panga padzalankhula zotamanda Yehova.+Zamoyo zonse zitamande dzina lake loyera mpaka kalekale.+
Mawu a M'munsi
^ Kapena kuti, “zochita zanu zamphamvu.”
^ Kapena kuti, “wachisomo.”
^ Kapena kuti, “moona mtima.”
