Yeremiya 43:1-13
43 Yeremiya atamaliza kuuza anthu onse mawu onsewa ochokera kwa Yehova Mulungu wawo, mawu onse amene Yehova Mulungu wawo anamutuma kuti akawauze,
2 Azariya mwana wa Hoshaya, Yohanani+ mwana wa Kareya ndi anthu onse odzikuza anauza Yeremiya kuti: “Zimene ukunenazo ndi zabodza! Yehova Mulungu wathu sanakutume kuti udzatiuze kuti, ‘Musapite ku Iguputo kuti mukakhale kumeneko.’
3 Koma Baruki+ mwana wa Neriya ndi amene akukulimbikitsa kuti unene zinthu zofuna kutipweteketsa nʼcholinga choti mutipereke mʼmanja mwa Akasidi kuti atiphe kapena atitenge kupita ku ukapolo ku Babulo.”+
4 Choncho Yohanani mwana wa Kareya, akuluakulu onse a asilikali ndi anthu onse sanamvere mawu a Yehova oti apitirize kukhala mʼdziko la Yuda.
5 Mʼmalomwake, Yohanani mwana wa Kareya ndi akuluakulu onse a asilikali anatenga anthu onse amene anatsala ku Yuda amene anabwerera kuchokera ku mitundu yonse ya anthu kumene anathawira kuti adzakhale mʼdziko la Yuda.+
6 Anatenga amuna, akazi, ana, ana aakazi a mfumu ndiponso aliyense amene Nebuzaradani+ mkulu wa asilikali olondera mfumu anawasiya mʼmanja mwa Gedaliya+ mwana wa Ahikamu,+ mwana wa Safani.+ Anatenganso mneneri Yeremiya ndi Baruki mwana wa Neriya.
7 Iwo anapita mʼdziko la Iguputo chifukwa sanamvere mawu a Yehova ndipo anakafika ku Tahapanesi.+
8 Ndiyeno pamene Yeremiya anali ku Tahapanesi, Yehova anamuuza kuti:
9 “Tenga miyala ikuluikulu ndipo ukaibise mʼdothi limene anamangira masitepe a njerwa amene ali pakhomo la nyumba ya Farao ku Tahapanesi. Ukachite zimenezi amuna onse a Chiyuda akuona.
10 Kenako ukawauze kuti, ‘Yehova wa magulu ankhondo akumwamba, Mulungu wa Isiraeli wanena kuti: “Ine ndikuitana Nebukadinezara* mfumu ya Babulo mtumiki wanga,+ ndipo ndidzaika mpando wake wachifumu pamwamba penipeni pa miyala imene ndaibisayi. Iye adzamanga tenti yake yachifumu pamwamba pa miyala imeneyi.+
11 Nebukadinezara adzabwera nʼkuukira dziko la Iguputo.+ Woyenera kufa ndi mliri adzafa ndi mliri. Woyenera kutengedwa kupita ku ukapolo adzatengedwa kupita ku ukapolo ndipo woyenera kufa ndi lupanga adzafa ndi lupanga.+
12 Nyumba za milungu* ya ku Iguputo ndidzaziwotcha ndi moto.+ Nebukadinezara adzawotcha nyumbazo nʼkutenga milunguyo kupita nayo kudziko lina. Mʼbusa savutika kuvala chovala chake. Mofanana ndi zimenezi, Nebukadinezara sadzavutika kugonjetsa dziko la Iguputo nʼkuchokako mwamtendere.*
13 Iye adzaphwanyaphwanya zipilala za ku Beti-semesi,* mzinda umene uli ku Iguputo. Ndipo nyumba za milungu* ya ku Iguputo adzaziwotcha ndi moto.”’”
Mawu a M'munsi
^ Mʼchilankhulo choyambirira, “Nebukadirezara.” Kameneka ndi kalembedwe kena ka dzinali.
^ Kapena kuti, “Akachisi a milungu.”
^ Kapena kuti, “osavulazidwa.”
^ Kapena kuti, “Nyumba ya (Kachisi wa) Dzuwa,” kutanthauza Heliyopolisi.
^ Kapena kuti, “akachisi a milungu.”
