Yobu 10:1-22
10 “Moyo wanga ndikunyansidwa nawo.+
Ndinena madandaulo anga mwamphamvu.
Ndilankhula mopwetekedwa mtima.*
2 Ndimuuza Mulungu kuti: ‘Musanene kuti ndine wolakwa.
Ndiuzeni chifukwa chake mukulimbana nane.
3 Kodi mukupindula chilichonse mukamandizunza,Mukamanyoza ntchito ya manja anu,+Pamene mukugwirizana ndi zolinga za oipa?
4 Kodi maso anu ali ngati a munthu,Kapena kodi mumaona ngati mmene munthu amaonera?
5 Kodi masiku anu ali ngati masiku a anthu,Kapena kodi zaka zanu zili ngati za munthu,+
6 Kuti muzifufuza zolakwa zangaKomanso kuti muzifunafuna tchimo langa?+
7 Inu mukudziwa kuti ndine wosalakwa,+Ndipo palibe amene angandipulumutse mʼmanja mwanu.+
8 Manja anu ndi amene anandiumba ndiponso kundipanga,+Koma tsopano mukufuna kundiwonongeratu.
9 Chonde kumbukirani kuti munandiumba ndi dongo,+Koma tsopano mukufuna kundibwezera kufumbi.+
10 Kodi simunandikhuthule ngati mkakaNʼkundichititsa kuti ndiundane ngati tchizi?*
11 Munandiveka khungu ndiponso mnofu,Ndipo munandiluka ndi mafupa komanso mitsempha.+
12 Mwandipatsa moyo komanso mwandisonyeza chikondi chokhulupirika,Ndipo mumanditeteza* pondisamalira.+
13 Koma inu mukufuna kuchita zinthu zimenezi mwachinsinsi.*
Ndikudziwa kuti zimenezi zachokera kwa inu.
14 Ndikanachimwa mukanandiona,+Ndipo simukanandikhululukira zolakwa zanga.
15 Ngati ndili wolakwa, tsoka kwa ine!
Ndipo ngakhale nditakhala wosalakwa, sindingadzutse mutu wanga,+Chifukwa ndili ndi manyazi kwambiri ndipo ndikuvutika.+
16 Ndikakweza mutu wanga, mumandisaka ngati mmene umachitira mkango+Ndipo mumasonyezanso mphamvu zanu polimbana nane.
17 Mumabweretsa mboni zatsopano kuti zinditsutseNdipo mumawonjezera mkwiyo wanu pa ine,Moti mavuto anga akungotsatizanatsatizana.
18 Ndiye nʼchifukwa chiyani munanditulutsa mʼmimba mwa mayi anga?+
Zikanakhala bwino ndikanafa diso lililonse lisanandione.
19 Zikanakhala ngati sindinakhaleko.Ndikanangochokera mʼmimba nʼkupita kumanda.’
20 Kodi si paja masiku a moyo wanga atsala ochepa?+ Iye andisiye,Asiye kundiyangʼanitsitsa kuti ndipumuleko pangʼono*+
21 Ndisanapite kumalo amene sindidzabwerako,+Kudziko lamdima wandiweyani,*+
22 Kudziko lamdima waukulu,Dziko lamdima wandiweyani komanso lachisokonezo,Kumene ngakhale kuwala kumafanana ndi mdima.”
Mawu a M'munsi
^ Kapena kuti, “Ndilankhula chifukwa cha kuwawa kwa moyo wanga.”
^ Tchizi ndi chakudya chopangidwa kuchokera ku mkaka.
^ Kapena kuti, “mumateteza moyo wanga; mumateteza mpweya wanga.”
^ Mʼchilankhulo choyambirira, “Ndipo zinthu zimenezi mwazibisa mumtima mwanu.”
^ Kapena kuti, “ndisangalaleko pangʼono.”
^ Kapena kuti, “Kudziko lamdima komanso mthunzi wa imfa.”
