N’CHIFUKWA CHIYANI KUCHITA ZIMENEZI N’KOFUNIKA? Anthu amene akuphunzira Baibulo ayenera kudzipereka komanso kubatizidwa ngati akufuna kuti Yehova aziwakonda. (1 Pet. 3:21) Ndipo munthu amakhala wotetezeka mwauzimu akabatizidwa n’kumachita zimene analonjeza Yehova pamene ankadzipereka. (Sal. 91:1, 2) Mkhristu amadzipereka kwa Yehova osati kwa munthu, ntchito kapena bungwe linalake. Choncho kuti tithandize munthu kuti adzipereke ndi kubatizidwa, choyamba tiyenera kumuthandiza kuti azikonda kwambiri Yehova.—Aroma 14:7, 8.

KODI TINGACHITE BWANJI ZIMENEZI?

• Mukamaphunzira ndi munthuyo, muzikambirana mfundo zomwe zingamuthandize kudziwa bwino Yehova. Mulimbikitseni kuti aziwerenga Baibulo tsiku lililonse komanso kuti azipemphera kwa Yehova “mosalekeza.”—1 Ates. 5:17; Yak. 4:8

• Mulimbikitseni kuti akhale ndi cholinga choti azadzipereke kwa Yehova kenako n’kubatizidwa. Muthandizeninso kukwaniritsa zolinga zing’onozing’ono, monga kuyankha pamisonkhano kapena kulalikira kwa anthu oyandikana nawo nyumba kapenanso kwa anzake a kuntchito. Kumbukirani kuti Yehova sakakamiza munthu kuti azimutumikira. Choncho, munthu ayenera kusankha yekha kuti azimutumikira.—Deut. 30:19, 20

• Mulimbikitseni wophunzira wanuyo kuti ayesetse kusintha makhalidwe ake n’cholinga choti azikondweretsa Yehova komanso kuti adzabatizidwe. (Miy. 27:11) Popeza makhalidwe ena amakhala ovuta kuwasiya, mufunika kupitirizabe kuthandiza wophunzira wanuyo kuti avule umunthu wake wakale n’kuvala watsopano. (Aef. 4:22-24) Mungachitenso bwino kumakambirana naye nkhani za mu Nsanja ya Olonda za mutu wakuti, “Baibulo Limasintha Anthu”

• Mufotokozereni madalitso amene mwapeza chifukwa chotumikira Yehova.—Yes. 48:17, 18