M’kalata yake youziridwa yopita kwa Tito, mtumwi Paulo ananena kuti achinyamata, kuphatikizapo Tito, ayenera kuyesetsa kuti akhale “chitsanzo pa ntchito zabwino.” (Tito 2:6, 7) Chakumapeto kwa chaputala chomwecho, Paulo anasonyeza kuti Yesu anapereka moyo wake n’kuyeretsa anthu a Yehova kuti akhale “odzipereka pa ntchito zabwino.” (Tito 2:14) Imodzi mwa ntchito zabwino zimenezi ndi kulalikira komanso kuphunzitsa anthu za Ufumu wa Mulungu. Ngati ndinu wachinyamata, kodi mungagwiritse ntchito mphamvu zanu pochita upainiya wothandiza kapena wokhazikika?​—Miy. 20:29.

Ngati mukufuna kukhala mpainiya, muyenera kusintha zinthu zina kuti muzipeza mpata woti mukwaniritse cholinga chimenechi. (Luka 14:28-30) Mwachitsanzo mungadzifunse kuti, kodi ndizidzapeza bwanji ndalama zogulira zinthu zofunika ndikamadzachita utumiki wa nthawi zonse? Kodi ndizidzakwanitsa bwanji maola ofunika? Mungachite bwino kumufotokozera Yehova nkhani imeneyi m’pemphero. (Sal. 37:5) Mukhozanso kukambirana nkhaniyi ndi makolo anu komanso abale ndi alongo omwe akhala akuchita utumikiwu kwa nthawi yaitali. Kenako yesetsani kuti mukwaniritse cholinga chanucho. Mukatero Yehova adzakudalitsani kwambiri chifukwa chodzipereka kuti muzimutumikira.

ONERANI VIDIYO YAKUTI ACHINYAMATA AMENE AKULEMEKEZA YEHOVA, KENAKO YANKHANI MAFUNSO OTSATIRAWA:

• Kodi ena analimbana ndi mavuto otani kuti akwanitse kuchita upainiya, nanga anakwanitsa bwanji kuchita zimenezi?

• Kodi makolo angathandize bwanji ana awo kuti akhale apainiya okhazikika?

• N’chifukwa chiyani mpainiya ayenera kukhala ndi ndandanda yabwino?

• Kodi Akhristu ena onse mumpingo angalimbikitse komanso kuthandiza apainiya m’njira zotani?

• Kodi apainiya amapeza madalitso otani?