Yehova adzathetsa mavuto onse amene Satana anayambitsa ndipo anasankha Yesu kuti akhale Mfumu ya dziko lonse. Yesu akadzayamba kulamulira dzikoli, lidzakhala paradaiso.​—Danieli 7:13, 14; Luka 23:43.

Yehova anatilonjeza zinthu zotsatirazi:

• PADZAKHALA CHAKUDYA CHAMBIRI: “Dziko lapansi lidzapereka zipatso zake. Mulungu, ndithu Mulungu wathu, adzatidalitsa.” “Padziko lapansi padzakhala tirigu wambiri. Pamwamba pa mapiri padzakhala tirigu wochuluka.”​—Salimo 67:6; 72:16.

• SIPADZAKHALANSO NKHONDO: “Bwerani anthu inu, onani ntchito za Yehova, onani mmene wakhazikitsira zinthu zodabwitsa padziko lapansi. Akuletsa nkhondo mpaka kumalekezero a dziko lapansi.”​—Salimo 46:8, 9.

• SIPADZAKHALANSO ANTHU OIPA: “Pakuti ochita zoipa adzaphedwa. Koma oyembekezera Yehova ndi amene adzalandire dziko lapansi. Patsala kanthawi kochepa, woipa sadzakhalakonso. Udzayang’ana pamene anali  kukhala, ndipo sadzapezekapo.”​—Salimo 37:9, 10.

• SIPADZAKHALANSO MATENDA, KUVUTIKA KOMANSO IMFA: “Pa nthawi imeneyo, maso a anthu akhungu adzatsegulidwa, ndipo makutu a anthu ogontha adzayamba kumva. Pa nthawiyo, munthu wolumala adzakwera phiri ngati mmene imachitira mbawala yamphongo. Lilime la munthu wosalankhula lidzafuula mokondwa.”​—Yesaya 35:5, 6.

  “Mulunguyo adzakhala nawo. Iye adzapukuta misozi yonse m’maso mwawo, ndipo imfa sidzakhalaponso. Sipadzakhalanso kulira, kapena kubuula, ngakhale kupweteka. Zakalezo zapita.”​—Chivumbulutso 21:3, 4.

Yehova amanena zoona zokhazokha koma Satana ndi ziwanda ndi abodza. Yehova amachita chilichonse chimene walonjeza. (Luka 1:36, 37) Iye amakukondani ndipo akufuna kuti mudzakhale m’Paradaiso. A Mboni za Yehova angakuthandizeni kudziwa zinthu zabwino zimene zili m’Mawu a Mulungu. Mukamatsatira mfundo za m’Baibulo simudzanamizidwa, simudzaopa mizimu ndipo mudzakhala ozindikira. M’tsogolomu, tonse sitidzakhalanso akapolo a uchimo ndi imfa. Paja Yesu ananena kuti: “Mudzadziwa choonadi, ndipo choonadi chidzakumasulani.”​—Yohane 8:32.