▪ Munthu angafunse funso limeneli poona kuti m’Baibulo mulibe lamulo lonena za fodya. Koma kodi zimenezi zikutanthauza kuti sitingathe kudziwa mmene Mulungu amaionera nkhaniyi? Ayi.

Baibulo limanena kuti, “Malemba onse anauziridwa ndi Mulungu.” (2 Timoteyo 3:16) M’Malemba muli mfundo zimene zimafotokoza momveka bwino mmene Mulungu amafunira kuti tizisamalira thanzi lathu. Choyamba, tiyeni tione zimene akatswiri ofufuza zinthu apeza ponena za mmene fodya amawonongera thanzi la munthu. Kenako tikambirana mmene mfundo za m’Baibulo zimagwirizanirana ndi zimene akatswiriwa anapeza.

Kusuta fodya kumawononga thanzi la munthuyo komanso kumabweretsa imfa zoti zikanatha kupewedwa. Ku America, munthu mmodzi pa anthu asanu alionse amafa chifukwa chosuta fodya. Lipoti limene bungwe lina linatulutsa linanena kuti m’dzikoli, chiwerengero cha anthu amene amafa chaka chilichonse chifukwa cha kusuta fodya n’chokwera kwambiri kuposa kuphatikiza pamodzi ziwerengero za anthu amene amafa chifukwa cha “kumwa mowa mwauchidakwa, kugwiritsa ntchito mankhwala osokoneza bongo, kuphedwa, kudzipha, kufa pa ngozi zapamsewu komanso kufa ndi edzi.”​—National Institute on Drug Abuse.

Anthu osuta fodya amawononganso thanzi la anthu ena. Utsi wa fodya umawononga thanzi la munthu ngakhale utakhala wochepa kwambiri. Anthu omwe sasuta fodya akapuma utsi wa fodya amakhala pa ngozi yoti akhoza kudwala matenda a mtima kapena khansa ya m’mapapo. Posachedwapa, madokotala apezanso kuopsa kwina kwa utsi wa fodya. Iwo apeza kuti mu utsi wa fodya mumakhala tinthu tina timene timatsalira pazovala, kalapeti komanso pazinthu zina. Tinthu timeneti n’toopsa ndipo timawononga thanzi makamaka la ana, ndipo tingachititse kuti anawo akhale opanda nzeru kusukulu.

Munthu akayamba kusuta fodya zimamuvuta kuti asiye. Munthu wosuta amakhala kapolo wa khalidweli. Ndipotu akatswiri ofufuza zinthu amakhulupirira kuti chikonga chimene chimakhala mu fodya ndi chimodzi mwa zinthu zimene zimachititsa kuti anthu amene amasuta azilephera kusiya kusuta.

Kodi zimene ofufuza apezazi zikugwirizana bwanji ndi mfundo za m’Baibulo pa nkhaniyi? Taonani mfundo zotsatirazi:

Mulungu amafuna tiziona kuti moyo ndi wamtengo wapatali. M’Chilamulo chimene Mulungu anapatsa Aisiraeli, munali lamulo losonyeza kuti anthu amene amafuna kumusangalatsa ayenera kuona kuti moyo ndi wamtengo wapatali. (Deuteronomo 5:17) Aisiraeli ankafunika kumanga kampanda padenga la nyumba yawo. Iwo ankachita zimenezi chifukwa madenga a nyumba zawo ankakhala afulati ndipo ankatha kukhalapo n’kumacheza. Choncho kampandako kankateteza anthuwo kuti asagwe n’kuvulala kapena kufa kumene. (Deuteronomo 22:8) Komanso Aisiraeli ankafunika kuonetsetsa kuti ziweto zawo sizikuvulaza anthu. (Ekisodo 21:28, 29) Munthu wosuta fodya amachita zosemphana ndi mfundo za m’malamulo amenewa chifukwa amawononga mwadala moyo wake komanso wa anthu ena.

Mulungu amafuna kuti tizimukonda komanso tizikonda anthu ena. Yesu Khristu ananena kuti otsatira ake ayenera kutsatira malamulo awiri akuluakulu. Iwo ayenera kukonda Mulungu ndi mtima wawo wonse, moyo wawo wonse, maganizo awo onse, ndi mphamvu zawo zonse komanso ayenera kukonda anzawo ngati mmene amadzikondera okha. (Maliko 12:28-31) Popeza moyo ndi mphatso yochokera kwa Mulungu, munthu amene amasuta fodya amasonyeza kuti saona kuti mphatso imeneyi ndi yamtengo wapatali ndipo sakonda Mulungu. (Machitidwe 17:26-28) Kusuta fodya kumawononga thanzi la ena, choncho munthu wosuta fodya sanganene kuti amakonda anthu ena.

Mulungu amafuna kuti tizipewa makhalidwe amene angawononge thanzi lathu. Baibulo limalangiza Akhristu kuti azidziyeretsa kuti achotse “chinthu chilichonse choipitsa thupi kapena mzimu.” (2 Akorinto 7:1) Munthu wosuta fodya amaipitsa thupi lake. Munthu amene akufuna kusangalatsa Mulungu amaona kuti ayenera kusiya kusuta fodya ngakhale kuti kuchita zimenezi kumakhala kovuta kwambiri. Koma Mulungu angamuthandize kuti asiye chizolowezi choipachi.