Kwa zaka zoposa 20, abale athu ku Colombia akhala akuphunzitsa akaidi Baibulo kwaulere. Pa 30 November, 2018, a Mboni anapatsidwa satifiketi kuchokera ku Paulo Freire Educational Center powayamikira chifukwa chogwira ntchito yophunzitsa Baibulo kundende ya mumzinda wa Valledupar. Panopa akaidi 50 a kundendeyo amaphunzira Baibulo.

M’dziko la Colombia, a Mboni za Yehova amaphunzitsa akaidi Baibulo m’ndende 65 ndipo amachititsa maphunziro a Baibulo 782. Kuyambira mu 1996, anthu okwana 60 aphunzira Baibulo mpaka kufika pobatizidwa.

A Néver Antonio Cavadía anaphunzira Baibulo ali m’ndende ndipo anabatizidwa mu 1998. Kenako anatulutsidwa m’ndende ya Valledupar mu 2007. Pofotokoza mmene kuphunzira Baibulo kunawathandizira, iwo anati: “Mfundo za m’Baibulo zinanditeteza komanso zinandithandiza kuti ndizichita zinthu mwanzeru pa nthawi yomwe ndinali m’ndende. Zinandilimbikitsanso kuti ndisinthe kwambiri moyo wanga komanso kukhalabe ndi chiyembekezo.”

Kuzungulira padziko lonse, a Mboni za Yehova timayesetsa kulalikira kwa akaidi chifukwa timadziwa kuti zimenezi n’zogwirizana ndi cholinga cha Yehova choti “anthu, kaya akhale a mtundu wotani, apulumuke ndi kukhala odziwa choonadi molondola.”—1 Timoteyo 2:4.