Ntchito yomanga ofesi ya nthambi yatsopano ili mkati ku Lubumbashi m’dziko la Republic of the Congo. Imeneyi ndi imene idzakhale ofesi yaikulu m’dzikolo. Atumiki a Pabeteli okwana 260, akuyembekezeka kudzasamukira ku ofesi yatsopanoyi cha mu May 2022. Atumiki ena okwana 131 adzapitirizabe kukhala ku ofesi yakale yomwe ili ku Kinshasa. a Ntchito yomanga nyumba zogonamo komanso maofesi owonjezera pa nthambi yakale ya ku Kinshasa, inayambika. Atumiki a pabeteli okwana 48 adzayamba kukhala m’nyumba zatsopanozi cha kumapeto kwa January 2024. Maofesi awiri onsewa adzathandiza kupititsa patsogolo ntchito za Ufumu zomwe zikuwonjezereka m’dziko la Congo.

M’chaka chautumiki cha 2021, abale a ku Democratic Republic of the Congo anachititsa maphunziro a Baibulo opitirira 250,000. Anthu oposa 1 miliyoni anapezeka pa Mwambo Wokumbukira Imfa ya Khristu. Panopo, abale ndi alongo okwana 394, ndi omwe akutumikira pabeteli ya ku Kinshasa.

Popeza sizikanatheka kuwonjezera ofesi ya nthambi ya ku Kinshasa, abale anayamba kufufuza malo m’mizinda ina kuti amangepo. Pamapeto pake anapeza malo aakulu bwino ku Lubumbashi okwanira kumangapo ofesi ya nthambi yatsopano komanso maofesi ena owonjezera ngati angadzafunike m’tsogolo.

Malo a ku Lubumbashi ali pamtunda wa makilomita 2,300 kuchokera ku Kinshasa. Malowa ndi okwana mahekitala 12 ndipo padzakhala nyumba zogonamo, maofesi, nyumba yosungiramo katundu, chipinda chokhala ndi malo odyera chomwe chizidzagwiritsidwanso ntchito kuchitiramo zinthu zosiyanasiyana komanso malo osewerera.

Ntchito yomanga pamalowa inayamba mu November 2020, komabe yakhala ikukumana ndi mavuto ena chifukwa cha mliri wa COVID-19.

M’bale Robert Elongo amene akutumikira mu Komiti ya Nthambi ya Congo (Kinshasa), anafotokoza kuti: “Maboda anali otseka ndipo zimenezi zinakhudza kwambiri ntchito yoitanitsa zipangizo zomangira. Chifukwa cha vutoli, chigawo choyamba cha ntchitoyi chitenga nthawi yaitali kuti chithe.”

Ngakhale zinali choncho, M’bale Elongo ananena kuti: “M’chaka chimodzi choka pafupifupi hafu ya chigawo choyamba cha ntchitoyi chinamalizidwa.”

N’zoonekeratu kuti Yehova akudalitsa ntchitoyi. Ndi pemphero lathu kuti Ofesi yatsopanoyi ithandiza poperekera umboni kwa anthu a m’dzikoli komanso kuthandiza kuti dzina la Yehova lilemekezedwe.—Mateyu 24:47.