Kuyambira pa 11 September 2024, Mphepo yamkuntho ya Boris inachititsa kuti m’mayiko ena a ku Central Europe kugwe mvula yambiri komanso kuwombe mphepo yamphamvu kwambiri. Pamene mphepoyi inkawomba kum’mwera kwa dziko la Poland pa 12 September, madera ena analandira mvula yambiri yokwana masentimita 20 m’nthawi yosakwana maola 24, ndipo madzi anasefukira m’madera ambiri. Mvula yamphamvu yomwe inagwa kwa nthawi yaitaliyi, inawononganso zinthu zambiri moti anthu masauzande ambiri anakhala opanda magetsi. Tsiku lotsatira pa 13 September, mphepo ya Boris inachititsa kuti madera akumpoto kwa dziko la Czech Republic alandire mvula yochuluka kwambiri yokwana masentimita oposa 50, ndipo nyumba, misewu komanso mabuliji zinawonongeka kwambiri.

Kenako pa 14 September, m’midzi yambiri ya ku Romania kunasefukira madzi pamene kunagwa mvula yochuluka kukwana masentimita 25. Nyumba 5,000 zinawonongeka komanso madamu awiri anaphulika chifukwa cha kuchuluka kwa madzi ku Galați County. Pa 18 September, mphepo ya Boris inafika kumpoto kwa dziko la Italy. M’madera ambiri munagwa mvula yokwana pafupifupi masentimita 30 m’maola 48 okha ndipo mitsinje yambiri inasefukira.

Mphepo yamphamvu kwambiriyi inachititsa kuti anthu masauzande ambiri achoke m’nyumba zawo m’mayiko onse 4 amenewa ndipo anthu 19 anafa.

Ku Czech Republic

• Palibe m’bale kapena mlongo wathu aliyense amene anavulala kapena kufa

• Ofalitsa 79 anasowa pokhala

• Nyumba 12 zinawonongeka kwambiri

• Nyumba ziwiri zinawonongeka pang’ono

• Nyumba ya Ufumu imodzi inawonongeka kwambiri

• Nyumba ya Ufumu imodzi inawonongeka pang’ono

Ku Italy

• Palibe m’bale kapena mlongo wathu aliyense amene anavulala kapena kufa

• Ofalitsa 63 anasowa pokhala

• Nyumba 7 zinawonongeka kwambiri

• Nyumba 21 zinawonongeka pang’ono

• Nyumba ya Ufumu imodzi inawonongeka kwambiri

• Nyumba za Ufumu 4 zinawonongeka pang’ono

Ku Poland

• Palibe m’bale kapena mlongo wathu aliyense amene anavulala kapena kufa

• Ofalitsa 87 anasowa pokhala

• Nyumba 61 zinawonongeka kwambiri

• Nyumba 85 zinawonongeka pang’ono

• Nyumba za Ufumu ziwiri zinawonongeka kwambiri

• Nyumba za Ufumu 8 zinawonongeka pang’ono

Ku Romania

• Palibe m’bale kapena mlongo wathu aliyense amene anavulala kapena kufa

• Ofalitsa mmodzi anasowa pokhala

• Nyumba ziwiri zinawonongeka kwambiri

• Nyumba 5 zinawonongeka pang’ono

• Palibe Nyumba ya Ufumu imene inawonongeka kapena kugwa

• Panakonzedwa Makomiti Othandiza Pakachitika Ngozi Zamwadzidzidzi okwana 6 kuti atsogolere pa ntchito yothandiza anthu

• Oyang’anira madera komanso akulu akulimbikitsa anthu amene akhudzidwa pogwiritsa ntchito Baibulo komanso kuwathandiza m’njira zina

Pamene tikupitiriza kupempherera anthu amene akhudzidwawa, tikukhulupirira kuti, mwachikondi, Yehova awathandiza komanso kuwalimbikitsa.​—Yesaya 40:11.