9 JANUARY 2024 | INAKONZEDWANSO PA: 3 JULY 2024
NKHANI ZA PADZIKO LONSE

ZOKHUDZA ABALE OMWE ANAPEZEDWA NDI MLANDU | Anatsimikiza Mtima Kuti Sasiya Kudalira Yehova

YAMBANI

Pa 1 July 2024, Khoti la m’Boma la Krasnogvardeyskiy ku Republic of Crimea linapeza kuti M’bale Yuriy Gerashchenko komanso M’bale Sergey Parfenovich ndi olakwa. Aliyense anagamulidwa kuti azitsatira malamulo enaake ali kunyumba kwawo kwa zaka 6 ndipo sakufunika kupita kundende panopa.

Zokhudza Abalewa

Yuriy Gerashchenko

Chaka chobadwa: 1979 (ku Ukraine)

Mbiri yake: Amagwira ntchito zamagetsi

Anachita chidwi ataona kuti Baibulo ndi lolondola ndiponso mmene limasonyezera kuti Mulungu amakonda anthu. Anabatizidwa n’kukhala wa Mboni za Yehova mu 2000

Anakwatirana ndi Irina mu 2002

Zimene Ananena

Kodi zimene zakuchitikiranizi zakuthandizani kudziwa zinthu ziti zokhudza Yehova?

Ndamvetsa kuti Yehova ndi wanzeru. Amadziwa zinthu zenizeni zomwe ndikufunikira ndipo ndi wokonzeka kundithandiza. Ndikaganizira zimene zachitika pa moyo wangazi, ndimaona kuti Yehova wakhala akundithandiza. Ndimadziona kuti ndine chida m’dzanja lake. Munthu waluso amaonetsetsa kuti zida zimene amagwiritsa ntchito zili bwino ndipo amazinola komanso kuzisamalira n’cholinga choti azitha kuzigwiritsa ntchito nthawi iliyonse imene zikufunikira. Ndaona kuti pa nthawi yonseyi Yehova wakhala akundichitira zinthu ngati zimenezi. Izi zimandichititsa kuti ndizifunitsitsa kukhala naye pa ubwenzi ndipo sindifuna kumusiya ngakhale pang’ono.

Sergey Parfenovich

Chaka chobadwa: 1972 (Ku Mirnoye ku Crimea)

Mbiri yake: Ankagwira ntchito yosamalira bwalo la masewera

Anakhudzidwa mtima ataphunzira zimene Ufumu wa Mulungu udzachite m’tsogolomu. Anabatizidwa mu 1993 pamsonkhano wamayiko womwe unachitika ku Kyiv ku Ukraine

Anakwatirana ndi Marina mu 1997. Ali ndi ana aamuna 4 komanso aakazi awiri

Zimene Ananena

Kodi ndi chitsanzo cha munthu uti wotchulidwa m’Baibulo chimene chinakulimbikitsani?

Pa Afilipi 3:10, Paulo analemba kuti: “Cholinga changa nʼchoti ndimudziwe komanso kuti ndidziwe mphamvu za amene anamuukitsa kwa akufa. Ndikufunanso kuti ndivutike ngati mmene iye anavutikira.” Ndakhala ndikuganizira mmene Paulo ankakondera Yesu. Ankamukonda kwambiri moti anali wokonzeka kukumana ndi mavuto ngati mmene zinalili ndi Yesuyo. Ndakhala ndikupemphera kuti inenso ndifanane ndi Paulo pa nkhani yokhala wotsimikiza mtima. Zimenezi zandithandiza kuti ndisinthe mmene ndimaonera zinthu. M’malo momadziona ngati munthu yemwe wakumana ndi tsoka, ndimadziona ngati munthu amene wasankha ndi mtima wonse kuti azitumikira Yehova, kaya akumana ndi mavuto otani chifukwa chosankha zimenezi.

Tikudziwa kuti Yehova apitiriza kuthandiza Yuriy ndi Sergey kuti apitirizebe kukhala okhulupirika, pamene ‘akuwabisa mumthunzi wa mapiko ake.’—Salimo 17:7, 8.

Nthawi Komanso Zimene Zinachitika

19 September 2022

Mlandu wa Sergey unatsegulidwa
28 September 2022

Apolisi agulu lachitetezo (FSB) anakafufuza kunyumba ya Sergey ndi nyumba zinanso 8 kenako anamutsekera kundende kwa nthawi yochepa
30 September 2022

Sergey anaikidwa m’ndende poyembekezera kuzengedwa mlandu
15 November 2022

Sergey anatulutsidwa m’ndende kenako anaikidwa pa ukaidi wosachoka panyumba
22 March 2023

M’bale Yuriy anamutsegulira mlandu. Anamangidwa, kufunsidwa mafunso n’kuikidwa m’ndende kwa nthawi yochepa
24 March 2023

Yuriy anatulutsidwa m’ndende kenako anaikidwa pa ukaidi wosachoka panyumba
12 July 2023

Sergey ndi Yuriy anamasulidwa pa ukaidi wosachoka panyumba n’kuuzidwa kuti asamapite m’madera ena
28 July 2023

Mlandu unayamba kuzengedwa. Loya woimira boma ananena kuti a Sergey ndi a Yuriy akupitiriza “kuchita zinthu zophwanya malamulo komanso kuopseza mboni za khoti.” Ngakhale kuti sipanapezeke umboni uliwonse, woweruza anagamula kuti onse akhalenso pa ukaidi wosachoka panyumba

Onaninso

NKHANI

Anamangidwa Chifukwa Chotsatira Zimene Amakhulupirira—Crimea

Ku Crimea, a Mboni za Yehova anamangidwa chifukwa chotsatira zimene amakhulupirira. Onani nkhani zawo komanso mndandanda umene mungapulinte wosonyeza a Mboni omwe panopa ali m’ndende.

NKHANI