JUNE 27, 2019
ITALY

Madokotala ku Italy Anasonyeza Chidwi pa Nkhani Yothandiza Odwala Popanda Kuwaika Magazi

YAMBANI

Akatswiri a zachipatala ali pamalo athu apadera omwe anakhazikitsidwa ku msonkhano wa SIAARTI ku Palermo

Madokotala ambiri akusangalala ndi zimene gulu lathu likuchita padziko lonse pokhazikitsa njira zosiyanasiyana zothandiza azachipatala kudziwa zomwe angachite pothandiza odwala kapenanso kupanga opaleshoni popanda kugwiritsa ntchito magazi. Dipatimenti Yoyang’anira Zachipatala (Italy), yomwe ili pa ofesi ya nthambi ya Mboni za Yehova ku Rome, ndi imodzi mwa njira zomwe zinakhazikitsidwa pofuna kuthandiza azachipatala. Kuyambira pa 10 mpaka 13 October, 2018, mumzinda wa Palermo ku Siciliy, kunachitika msonkhano wa akatswiri osiyanasiyana azachipatala. (National Congress of the Italian Society of Anesthesia, Analgesia, Resuscitation, and Intensive Care, SIAARTI) Pamsonkhanowu, abale ena amene ali mu Dipatimenti Yoyang’anira Zachipatala (Italy) komanso mu Komiti Yolankhulana ndi Achipatala, anakhazikitsa malo apadera pomwe ankasonyeza ndi kufotokozera azachipatala njira zosiyanasiyana zothandizira odwala popanda kugwiritsa ntchito magazi. Msonkhanowu utatha, abalewa anakakhazikitsanso malo ngati omwewa kumsonkhano wa akatswiri enanso azachipatala (Joint Congress of the Scientific Societies of Surgery) womwe unachitikira ku Rome “La Nuvola” Convention Center.

Misonkhano yotereyi imathandiza kuti pa nthawi imodzi, akatswiri ambiri azachipatala adziwe njira zatsopano zokhudza kuthandiza odwala popanda kugwiritsa ntchito magazi. Pamsonkhano womwe unachitikira ku Palermo panali madokotala 2,800 omwe amapereka mankhwala opangitsa dzanzi odwala akamafuna kupangidwa opaleshoni. Pamsonkhano wa madokotola opanga maopaleshoni womwe unachitika ku Rome, panali madokotala 3,500. Zikuoneka kuti msonkhanowu unali waukulu kwambiri pa misonkhano yonse ya madokotala opanga maopaleshoni yomwe yakhala ikuchitika ku Italy. Madokotala enanso ochokera m’zipatala zosiyanasiyana zodziwika bwino anabwera pamsonkhanowu. Ena mwa madokotalawa anali ochokera m’mabungwe onse a madokotala opanga maopaleshoni ku Italy komanso ochokera ku sukulu yophunzitsa madokotala ya Italy Chapter of the American College of Surgeons. Mabungwe enanso ambiri a m’dzikoli monga Unduna wa Zaumoyo anapezeka kumsonkhanowu.

Dokotala wina wochokera ku chipatala cha Policlinico Hospital of Catania ku Sicily, dzina lake Vincenzo Scuderi, anapezeka pamalo apadera omwe abale anakhazikitsa ku Palermo. Pa 18 January, 2019, dokotalayu anathandiza wa Mboni wina yemwe mtsempha wake waukulu wa mtima unaphulika. Iye anakwanitsa kupanga opaleshoni yovuta kwambiri imeneyi popanda kugwiritsa ntchito magazi. Dokotalayu anafotokoza kuti: “[Malo apadera] omwe munakhazikitsa pamsonkhano wa SIAARTI wa 2018, anali othandiza kwambiri. Zinthu zimene munatipatsa zofotokoza njira zosiyanasiyana zothandizira odwala popanda kugwiritsa ntchito magazi zinatithandiza kwambiri.”

Panopa, madokotala opitirira 5,000 ku Italy avomereza kuti azithandiza odwala omwe ndi a Mboni za Yehova powapatsa mankhwala komanso kuwapanga opaleshoni popanda kugwiritsa ntchito magazi. Chaka chilichonse ku Italy, odwala a Mboni pafupifupi 16,000 amathandizidwa popanda kugwiritsa ntchito magazi.

Misonkhanoyi itatha, madokotala opanga maopaleshoni anafotokozera abale ndi alongo zomwe akhala akukumana nazo akamagwira ntchito ndi a Mboni za Yehova.

“Ndakhala ndikuthandiza odwala a Mboni za Yehova kwa zaka zambiri. Bungwe la SIAARTI lili ndi gulu la anthu omwe amalemba nkhani zokhudza anthu omwe akana kuikidwa magazi. Kwa zaka zingapo zapitazo, gululi lakhala likupereka malangizo kwa madokotala a zimene angachite pamene wodwala akufunika kupangidwa opaleshoni yovuta kwambiri. Zimenezi zimathandiza madokotalawo kudziwa mmene angathandizire wodwalayo m’njira yabwino kwambiri. Zomwe gululi limalemba zimafotokoza momveka bwino kuti ufulu wodzisankhira thandizo la mankhwala limene munthu angavomere, ndi ufulu wofunika kwambiri umene unaperekedwa m’Malamulo Oyendetsera Dziko (Gawo 2, 13, ndi 32), m’chikalata cha mfundo za ufulu wachibadwidwe cha Universal Declaration of Human Rights, pamsonkhano wa ku Oviedo, komanso ndi bungwe la Charter of Fundamental Rights of the European Union.”—Antonio Corcione, coordinator of the regional transplant center for the Campania region, director of anesthesia and intensive care units at the Monaldi Hospital, former president of the Italian Society of Anesthesia, Analgesia, Resuscitation, and Intensive Care (SIAARTI)

“Ndakhala ndikuthandiza odwala a Mboni za Yehova ndipo zimenezi zathandiza ineyo komanso madokotala anzanga ndi manesi kuti tipititse patsogolo njira zomwe timagwiritsa ntchito n’cholinga choti tisamataye magazi tikamapanga maopaleshoni komanso kuti tizithandiza odwala tikamaliza kupanga opaleshoni zomwe zingathandize kuti pasamakhale chifukwa chowaikira magazi. Kugwiritsa ntchito njira zimenezi kwathandizanso anthu ena omwe amakana kuikidwa magazi komanso zathandiza ifeyo kuti tizipewa kuika magazi odwala omwe amafuna kuikidwa magazi.”—Ugo Boggi, full professor of general surgery at the University of Pisa (Italy), adjunct associate professor of surgery at the University of Pittsburgh (USA), president-elect of the Italian Society for Organ Transplantation (SITO)

“Kuchita opaleshoni yoika chiwindi ndi kovuta kwambiri kuposa maopaleshoni oika ziwalo ena onse. Opaleshoniyi ndi yovuta kuwirikiza kawiri, katatu kapena ka 4 tikayerekezera ndi maopaleshoni oika ziwalo zina ndipo wodwala amakhala pachiopsezo chotaya magazi ambiri. Ngakhale zili choncho, tinganene kuti tikudziwa njira zodalirika zothandiza kuti magazi asamatayike chifukwa tili ndi umboni wotsimikizika wa maopaleshoni ambirimbiri oika chiwindi omwe anapangidwa padziko lonse. Choncho tikudziwa mmene tingapewere kuika odwala magazi. Maopaleshoni ambiri a chiwindi omwe timapanga, amatheka popanda kugwiritsa ntchito magazi. Panopa tikamachita opaleshoni ya chiwindi, nthawi zambiri sitiika magazi chifukwa tikayerekezera ndi mmene tinkachitira zaka zingapo m’mbuyomu, masiku ano timagwiritsa ntchito njira yabwino kwambiri yoonetsetsa kuti mtsempha uliwonse wa magazi uli bwino. Ndikuthokoza a Mboni za Yehova chifukwa chotulukira njira yopulumutsa magazi yomwe sitinkaigwiritsa ntchito zaka 10 kapena 15 zapitazo.”—Umberto Cillo, full professor of general surgery and director of the hepatobiliary and liver transplant unit at the University of Padua, president of the Italian Society for Organ Transplantation (SITO)

“Ndikuyamikira kwambiri odwala a Mboni chifukwa cha chikhulupiriro chawo cholimba. Chimenechi ndi chimodzi mwa zifukwa zimene zandichititsa kuti kwa zaka zingapo ndiziyesetsa kuchita zomwe iwo akufuna n’cholinga choti ndiwasangalatse. Ndikuona kuti anthu amenewa ndi ofunika kumawalemekeza kwambiri. Sikuti a Mboni za Yehova amafuna kufa kapena kutchuka kuti ndi anthu ofera chikhulupiriro ayi, koma iwo ndi anthu omwe amafuna thandizo labwino la chipatala.”—Francesco Corcione, full professor of surgery at the University of Naples Federico II, president emeritus of the Italian Society of Surgery (SIC), honorary member of the Académie Nationale de Chirurgie, Paris, France

“Zomwe ndaona pa nthawi imene ndakhala ndikugwira ntchito ndi a Mboni za Yehova zandipangitsa kuona kuti madokotala ndi manesi onse ayenera kulemekeza kwambiri mfundo zachikhalidwe komanso zachipembedzo zimene odwala amakhulupirira. Ndikuganiza kuti zimenezi zavomerezedwanso posachedwapa kuno ku Italy mu lamulo 219 lomwe linapangidwa mu December 2017, lomwe limanena kuti dokotala kapena nesi angayambe kupereka chithandizo kwa wodwala pokhapokha ngati wodwalayo akumvetsa bwino ndiponso kugwirizana ndi mtundu wa chithandizo cha mankhwala chomwe akufunika kupatsidwa. Ngati dokotala atafotokozera wodwala momveka bwino zokhudza mtundu wa chithandizo chimene akufuna kumupatsa, dokotalayo komanso wodwalayo amakhala ndi udindo pa zilizonse zimene zingachitike, ndipo wodwala akhoza kukhala ndi ufulu wambiri wosankha zimene akufuna. Zimenezi zingathandize kuti chithandizocho chikhale chabwino kwambiri.”—Luca Ansaloni, director of general and emergency surgery unit at the Bufalini Hospital of Cesena, president of the Italian Society of Surgical Physiopathology (SIFIPAC)

“A Mboni za Yehova athandiza kwambiri kuti tipeze njira zabwino kwambiri zothandizira odwala popanda kuwaika magazi. Njira zatsopano zimathandiza madokotala akamapanga opaleshoni kuti azilemekeza maganizo a odwala omwe sakufuna kuikidwa magazi. Kuthandiza odwala popanda kuwaika magazi ndi kotchipa ndipo n’kwabwino kwambiri.”—Diego Piazza, president of the Italian Medical Association of Catania, director of oncological surgery at the Garibaldi-Nesi-ma Hospital of Catania, former president of the Italian Association of Hospital Surgeons (ACOI)

“Anthu ena amaganiza kuti kuika magazi odwala si koopsa. Iwo amakonda njirayi chifukwa magazi amapezeka mosavuta, safuna ndalama zambiri, komanso sizivuta kupereka. Iwo amakondanso kugwiritsa ntchito magazi chifukwa akhoza kuwonjezera mwamsanga pulotini wam’magazi wotchedwa himogulobini m’thupi mwa odwala. Chifukwa cha zimenezi madokotala ambiri amakonda kuika magazi odwala. Komabe, chaka chilichonse pakumakhala maumboni ambiri osonyeza kuti kuika odwala magazi kaya akhale maselo ofiira kapena zigawo zina zamagazi, kumabweretsa mavuto oopsa. Ndipotu kafukufuku wosiyanasiyana wasonyeza kuti odwala omwe amaikidwa magazi amakumana ndi mavuto ambiri kuposa omwe sanapatsidwe magazi. Odwala omwe amaikidwa magazi amakhala pachiopsezo chomwalira kapena kudwala komanso kugonekedwa m’chipatala kwa nthawi yaitali chifukwa cha matenda oumitsa ziwalo, matenda a impso, kuundana kwa magazi, kapena kulephera kupuma bwinobwino. Ndikuganiza kuti zimene madokotala akhala akuchita pothandiza odwala omwe ndi a Mboni za Yehova kwa zaka 50 zapitazo zachititsa kuti adziwe njira zopulumutsira magazi popanga maopaleshoni komanso mmene angachitire maopaleshoni popanda kugwiritsa ntchito magazi.”—Giandomenico Biancofiore, director of the complex operative unit of anesthesia and resuscitation in transplants at the Pisa University Hospital, associate professor of anesthesiology and resuscitation at the University of Pisa

Mwina Mungakondenso Kudziwa Izi

NKHANI

Msonkhano Wofunika Kwambiri Wokambirana Zimene Zachitika pa Nkhani Yothandiza Odwala Popanda Kuwaika Magazi Unachitikira ku Yunivesite ya Padua

Anthu akhala akukhulupirira kuti kuika munthu magazi kulibe vuto lililonse ndipo ndi njira yokhayo yopulumutsira moyo wa anthu omwe adwala kwambiri kapena omwe akufunika kupangidwa opaleshoni. Koma anthu ambiri omwe anayankhula pamsonkhanowu, sanagwirizane ndi maganizo amenewa.

MAFUNSO OFUNSIDWA KAWIRIKAWIRI

N’chifukwa Chiyani Mumakana Kuikidwa Magazi?

Anthu ambiri amaganiza zinthu zosiyanasiyana zolakwika pa nkhani ya zifukwa zimene a Mboni za Yehova amakanira kuikidwa magazi. Werengani nkhaniyi kuti mudziwe zoona zake.

NKHANI