ROME—Lachisanu pa 24 November, 2017, madokotala, oona zinthu zoyenera ndi zosayenera pa nkhani ya zamankhwala, komanso akatswiri a zamalamulo, anakumana pa Yunivesite ya Padua yomwe ndi imodzi mwa mayunivesite akale kwambiri ku Italy kuti apange msonkhano womwe mutu wake unali woti “Kodi Pali Njira Ziti Zothandizira Odwala Akuluakulu Omwe Akana Kuikidwa Magazi?—Kupulumutsa Magazi mu 2017.” Unduna wa Zaumoyo ku Italy komanso mabungwe a sayansi oposa 25 a ku Italy ndi amene anapereka thandizo loyendetsera msonkhanowu.

Anthu akhala akukhulupirira kuti kuika munthu magazi kulibe vuto lililonse ndipo ndi njira yokhayo yopulumutsira moyo wa anthu omwe adwala kwambiri kapena omwe akufunika kupangidwa opaleshoni. Koma anthu ambiri omwe anayankhula pamsonkhanowu, sanagwirizane ndi maganizo amenewa. Mmodzi mwa akatswiri omwe anali pamsonkhanowu, a Dr. Luca P. Weltert, omwe amapanga maopaleshoni aziwalo zapachifuwa pa European Hospital ku Rome, anati: “Msonkhano walerowu watithandiza kuzindikira kuti kuika munthu magazi n’koopsa ndipo nthawi zambiri kumakhala kosafunika.”

Madokotala enanso omwe anali pamsonkhanowu anagwirizana ndi zimene a Weltert ananenazi. Iwo anagwirizana ndi mfundoyi potengera zimene akhala akukumana nazo pothandiza odwala komanso zimene kafukufuku wina wasayansi anapeza kuti odwala ambiri omwe aikidwa magazi amamwalira, amadwala matenda ena, amakhala nthawi yayitali m’chipatala, komanso amapezeka ndi mavuto ena aakulu. a

Zimene asayansi anapezazi, komanso kuchuluka kwa ndalama zomwe zimagwiritsidwa ntchito pa nkhani yoika anthu magazi, zinachititsa kuti mu 2010 Bungwe Loona za Umoyo pa Dziko Lonse lipeze njira yothandiza kugwiritsira ntchito bwino magazi a odwala. Bungweli linaona kuti, kuti zimenezi zitheke, pakufunika kuti akatswiri osiyanasiyana pa nkhani zaumoyo azigwira ntchito limodzi komanso azigwiritsa ntchito njira zosiyanasiyana pothandiza odwala, zomwe cholinga chake ndi kuteteza moyo wa odwala, kuthandiza kuti ntchito yopanga maopaleshoni iziyenda bwino kwambiri, komanso kuchepetsa kwambiri kuika anthu magazi akamathandizidwa. Kenako bungweli linauza mayiko onse 193 omwe ndi mamembala a bungwe la United Nations kuti ayambe kutsatira njira zosiyanasiyana zothandiza kugwiritsa bwino ntchito magazi a odwala.

Pofotokoza zokhudza njira yatsopano yogwiritsa ntchito bwino magazi a odwala, Pulofesa Stefania Vaglio, yemwe ndi mkulu woona za kuika anthu magazi pa chipatala cha Sant’Andrea University ku Rome, ananena kuti poyamba kuthandiza odwala kunkadalira kugwiritsa ntchito magazi amene anthu ena apereka, koma panopa “odwala akuthandizidwa pogwiritsa ntchito magazi awo omwewo.” Cholinga chimodzi chogwiritsira ntchito njira yogwiritsa ntchito bwino magazi a odwala ndi “kuchepetsa kutaika kwa magazi pochita zinthu mosamala kwambiri pothandiza wodwalayo,. . . mwa kukhala tcheru komanso kuchita chilichonse chofunika n’cholinga chofuna kupulumutsa magazi a wodwalayo.” Pulofesa Vaglio ananenanso kuti njira yopulumutsa magazi a wodwala pamene wodwalayo akuthandizidwa, “ndi yothandiza kuti wodwalayo alandire thandizo labwino kwambiri.”

Dr. Campagnaro, omwe amachita maopaleshoni osiyanasiyana pachipatala cha Verona University, anatsimikizira kuti kugwiritsa ntchito njira zosaika munthu magazi n’kothandiza. Atamaliza kuunika zomwe zinachitika pamene odwala ena ankachitidwa maopaleshoni ovuta kwambiri a m’mimba kuyambira chakumapeto a zaka za m’ma 1990, anati: “Panali mavuto ochepa popanga opaleshoni odwala omwe sanaikidwe magazi komanso chiwerengero cha omwalira chinali chochepa, kusiyana ndi odwala omwe anaikidwa magazi.”

Dr. Campagnaro komanso anthu ena ambiri amene anayankhula pamsonkhanowu, anayamikira a Mboni za Yehova pamaso pa anthu onse chifukwa chochititsa madokotala kuti apeze njira zothandizira odwala popanda kuwaika magazi. Wachiwiri kwa pulofesa wa za malamulo a zachipatala pa Yunivesite ya Padua, a Anna Aprile anati: “Tikuyamikira a Mboni za Yehova chifukwa choyambitsa nkhani ya ufulu wokana kuikidwa magazi, ndipo zimenezi zithandiza aliyense kuti aganizire nkhaniyi komanso kuti tizitha kuthandiza odwala pogwiritsa ntchito magazi ochepa.”

Anthu omwe analankhula pamsonkhanowu anali akatswiri ochita zinthu zosiyanasiyana zachipatala monga zokhudza kugonetsa munthu popanga opaleshoni, zokhudza mtima, matenda a azimayi okhudza ziwalo zoberekera, zamagazi, zotupa komanso zamafupa. Komabe, uthenga waukulu kwambiri pamsonkhanowu unali wofanana, womwe unali woti mabungwe azachipatala, opanga malamulo, komanso anthu onse ayenera kumagwiritsa ntchito njira yogwiritsira ntchito bwino magazi a wodwala poganizira zimene zafalitsidwa pa nkhaniyi komanso zimene akatswiri azachipatala akhala akukumana nazo pogwira ntchito yawo.

Dr. Weltert anawonjezeranso kuti: “Kupanga opaleshoni yong’amba mtsempha waukulu kwambiri wa mtima, ndi opaleshoni yaikulu kwambiri imene ingachitike m’thupi mwa munthu. . . . Ndiye ngati opaleshoni imeneyi imatha kuchitika popanda kuika munthu magazi, zikutanthauza kuti n’zotheka kupanga opaleshoni iliyonse popanda kumuika munthu magazi.”