20 JANUARY, 2022
RUSSIA

Abale ndi Alongo a mumzinda wa Karpinsk Ali ndi Chikhulupiriro Cholimba Chifukwa Chodalira Yehova

YAMBANI

Khoti la mumzinda wa Karpinsk, m’chigawo cha Sverdlovsk, posachedwa lipereka chigamulo pa mlandu wa Mlongo Darya Dulova ndi Venera Dulova, M’bale Aleksandr Prianikov ndi mkazi wawo, Mlongo Anastasiya Prianikova ndi Mlongo Svetlana Zalyaeva. Loya woimira boma sananenebe kuti akufuna kuti anthuwa apatsidwe chilango chotani.

Nthawi Komanso Zimene Zinachitika

27 January, 2020

Khoti linanena kuti linapeza M’bale Aleksandr Prianikov, Mlongo Darya Dulova ndi Mlongo Venera Dulova kuti ndi olakwa pa mlandu winanso
February 2020

M’bale Aleksandr Prianikov, Mlongo Darya Dulova ndi Mlongo Venera Dulova, anawatsegulira mlandu wachiwiri
30 March, 2020

Apolisi anakafufuza zinthu m’nyumba za anthuwa ndipo analanda zinthu ngati mafoni, matabuleti ndi malaputopu
19 May, 2020

Mlongo Anastasiya Prianikova ndi Mlongo Svetlana Zalyaeva anaphatikizidwanso pamlanduwo. Alongo awiriwa anauzidwa kuti sakuloledwa kuchoka m’dera lawo
29 April, 2021

Mlandu unayamba kuweruzidwa

Zokhudza Anthuwa

Venera Dulova

Chaka chobadwa:1968 (Ku Karpinsk, M’chigawo cha Sverdlovsk)

Mbiri yake: Analeredwa ndi mayi ake komanso agogo ake aakazi. Amakonda kuluka, kuwerenga komanso kuphunzira zinthu. Mayi ake ndi agogo ake aakazi anamwalira asanakwanitse zaka 17. Anakwatiwa mu 1990 ndipo ali ndi ana atatu

Ankadabwa kuti n’chifukwa chiyani anthufe timafa komanso ankadera nkhawa za tsogolo la ana ake. Anayamba kuphunzira Baibulo ndi a Mboni za Yehova ali ndi zaka 28 ndipo anabatizidwa mu 1998

Zimene Ananena

Yehova wakuthandizani bwanji pa nthawi yovutayi?

Achibale anga omwe poyamba ankatitsutsa ine ndi mwamuna wanga, tsopano amachita nafe zinthu mokoma mtima. Mwamuna wanga amandilimbikitsa kuti ndisagonje. . . . Timaonanso Yehova akutilimbikitsa pogwiritsa ntchito abale ndi alongo athu omwe amatiuza mawu olimbikitsa.

Apolisi atakafufuza zinthu m’nyumba mwathu kwa nthawi yoyamba, chinthu choyamba chomwe chinabwera m’maganizo mwanga, ndi nkhawa yoti ‘ndayamba kuonedwa ngati munthu wophwanya malamulo, zinandikhumudwitsa kwambiri.’ Koma mnzanga wina anandilimbikitsa kuti ndione nkhaniyo mwanjira ina. Anati ndikhoza kugonjedza dziko ngati mmene Yesu anachitira.

Aleksandr Prianikov

Chaka chobadwa: 1987 (Ku Udinsk, M’chigawo cha Khabarovsk)

Mbiri yake: Amakonda kwambiri nyimbo moti amaimba kodiyoni. Ankagwira ntchito yokonza zipangizo zamagetsi pa fakitale ina. Pano amagwira ntchito yopanga matailosi

Kuyambira kale, wakhala akukhulupirira kuti Mulungu aliko. Anachita chidwi ndi lonjezo la Mulungu lakuti anthu sadzafanso ndipo anabatizidwa mu 2004. Mu 2011, anakwatira Anastasiya

Zimene Ananena

Kodi abale akulimbikitsani bwanji pa nthawi yovutayi?

M’bale wina anandithandiza pondiuza kuti ndiganizire lemba la Salimo 139:1. Kenako anandiuza kuti: “Yehova amakukonda kwambiri ndipo amadziwa zomwe umaganiza, mmene umamvera, zomwe umalankhula komanso kuchita. . . . Mfumu Davide anazindikira mmene Yehova amachitira chidwi ndi anthufe aliyense payekhapayekha. . . . Yehova amadziwa zinthu zomwe tinakumana nazo pa moyo wathu zomwe zimatichititsa kuti tichita zinthu mwanjira inayake. Tisamadzione kuti tili tokhatokha.” Zomwe anandiuzazi, zinandigwira mtima kwambiri moti tsiku lililonse ndimamva kuti Yehova ali pambali panga.

Anastasiya Prianikova

Chaka chobadwa: 1987 (Ku Karpinsk, M’chigawo cha Sverdlovsk)

Mbiri yake: Anastasiya ndi mchimwene wake wamkulu, analeredwa ndi mayi awo. Iye amakonda kuimba ndi kusoka

Anachita chidwi ndi lonjezo la m’Baibulo loti dzikoli lidzakhala lamtendere. Anaona kuti mfundo za m’Baibulo ndi zothandiza komanso zopatsa nzeru ndipo anabatizidwa mu 2002. Mu 2011, anakwatiwa ndi Aleksandr

Zimene Ananena

Kodi ubwenzi wanu ndi Yehova walimba bwanji pa nthawi yovutayi?

Kwa pafupifupi zaka zitatu zomwe ndakhala ndikuzengedwa mlandu, chikhulupiriro changa chalimba kwambiri. Panopo ndimadalira kwambiri Yehova. Ndikudziwa kuti nthawi zonse, Yehova amasamalira anthu ake. Ndipo nthawi zina zikaoneka kuti tilibiretu mtengo wogwira, iye amatithandiza kuti tipirire. Ndaonanso kuti pamene ndikuzunzidwa kwambiri, m’pamenenso ndimafunitsitsa kuchita zambiri potumikira Yehova.

Ngakhale kuti abale ndi alongo athu akupitirizabe kumangidwa m’dziko la Russia, ndi zolimbikitsa kwambiri tikaona mmene Yehova akuwathandizira komanso kuwalimbikitsa. Chikhulupiriro chawo chomwe chikuyesedwa, chikuthandiza kuti dzina la Yehova lipatsidwe “ulemerero ndi ulemu.”—1 Petulo 1:7.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI