22 JULY, 2022
RUSSIA

Amboni a ku Shuya Akupirira Zinthu Zopanda Chilungamo

YAMBANI

Posachedwa khoti la Mzinda wa Shuya m’Chigawo cha Ivanovo lipereka chigamulo pa mlandu wokhudza M’bale Aleksey Arkhipov, Dmitriy Mikhaylov ndi mkazi wake Yelena komanso wokhudza Mlongo Svetlana Ryzhkova ndi Mlongo Svetlana Shishina. Loya waboma sananene kuti anthuwa apatsidwe chilango chotani.

Nthawi Komanso Zimene Zinachitika

21 September, 2017

Jaji anavomereza kuti apolisi akafufuze ndi kumvetsera zomwe M’bale Mikhaylov ankalankhulana ndi anthu pa mafoni ake
15 January, 2018

Jaji anavomereza kuti apolisi akafufuze ndi kumvetsera zomwe Mlongo Svetlana Ryzhkova ankalankhula ndi anthu pa foni yake. Komanso kuti akaone mavidiyo omwe kamela yapanyumba pa mlongoyu inajambula
20 April, 2018

Apolisi anakafufuza zinthu m’nyumba za Amboni onse okwana 5
29 May, 2018

Apolisi anamanga M’bale Mikhaylov ndipo anamutsegulira mlandu wothandiza komanso kuyendetsa gulu lochita zinthu zoopsa. Kenako anamutsekera m’ndende poyembekezera kumuzenga mlandu
22 June, 2018

M’bale Arkhipov anamuphatikizanso pa mlanduwu ndipo analamulidwa kuti asatuluke m’dera lomwe amakhala
27 June, 2018

Mlongo Yelena Mikhaylova, Svetlana Ryzhkova ndi Mlongo Svetlana Shishina anawaphatikizanso pa mlanduwu
15 November, 2018

Khoti la apilo linalamula kuti M’bale Mikhaylov amutulutse m’ndende momwe anakhalamo pafupifupi miyezi 6
10 August, 2021

Mlandu unayamba kuzengedwa
16 September, 2021

Mlandu unabwezedwa kwa loya waboma kuti akauwonenso bwinobwino
25 May, 2022

Mlandu unayambiranso kuzengedwa

Zokhudza Anthuwa

Aleksey Arkhipov

Chaka chobadwa: 1960 (Ku Arkhangelsk, m’Chigawo cha Arkhangelsk)

Mbiri yake: Anali msilikali. Anagwiraponso ntchito yoyendetsa basi

Anakwatira Natalya mu 1984 ndipo ali ndi ana awiri. Atapuma pa ntchito, anasamukira ku Shuya kuti azikasamalira makolo ake a Natalya omwe ndi okalamba

Anaphunzira choonadi cha m’Baibulo kwa mnzake wakuntchito. Ndipo mu 2017 anabatizidwa kukhala wa Mboni za Yehova

Zimene Ananena

Ndi mavesi a m’Baibulo ati omwe akuthandizani kuti musafooke pa nthawi yovutayi?

Malangizo opezeka pa 1 Akorinto 10:24 anandithandiza kwambiri. Palembali pamati: “Aliyense asamangodzifunira zopindulitsa iye yekha basi, koma zopindulitsanso wina.” Zimenezi zimandikumbutsa kuti ndisamangokhalira kuganizira za mavuto anga koma ndiziganiziranso kwambiri zokhudza anthu ena.

Mawu a Yesu opezeka pa Mateyu 5:10-12 amandilimbikitsanso kwambiri. Palembali pamati: “Odala ndi anthu amene akuzunzidwa chifukwa cha chilungamo, . . . Ndinu odala pamene anthu akukunyozani ndi . . . kukunamizirani zoipa zilizonse chifukwa cha ine. Kondwerani, dumphani ndi chimwemwe, chifukwa mphoto yanu ndi yaikulu kumwamba, pakuti umu ndi mmenenso anazunzira aneneri amene analipo inu musanakhaleko.” Mavesi amenewa amandilimbikitsa kwambiri kuti ndipirire komanso kuti ndisataye chiyembekezo changa.

Dmitriy Mikhaylov

Chaka chobadwa: 1977 (Ku Kupchanovka, m’dziko la Kazakhstan)

Mbiri yake: Anaphunzira kukonza zipangizo zamagetsi. Anagwirapo ntchito yoyang’anira zamakompyuta. Amakonda kujambula zithunzi komanso kukonza mavidiyo

Anaphunzira choonadi ali wachinyamata ndipo anabatizidwa mu 1993. Mu 2003 anakwatira Yelena

Zimene Ananena

Munkatha bwanji kulimbikitsana ndi mkazi wanu ngakhale kuti simunkaonana mutamangidwa?

Nditamangidwa, mkazi wanga ankandilembera makalata omwe ankandilimbikitsa kwambiri. Si kuti makalatawa anali apadera chifukwa choti ankalembedwa ndi munthu amene ndimamukonda ayi, koma chifukwa chachikulu chinali chakuti ankandilimbikitsa kukonda Yehova komanso kuti ndikhalebe wokhulupirika. Zinali ngati kuti Yehova akuthandiza Yelena kusankha mawu abwino oti andilimbikitse nawo komanso kuti ndisamade nkhawa kwambiri. Kenako Yelena anandiuza zomwe ankachita kuti makalatawo azikhala amphamvu choncho. Anafotokoza kuti asanayambe kulemba makalatawo, ankapemphera kwa Yehova, kufufuza m’mabuku athu komanso ankaganizira mozama mfundo za m’Baibulo.

Inenso ndinkalimbikitsa Yelena poyankha makalata ake ndipo ndinkamulembera mfundo zomwe ndapeza powerenga Baibulo. Ndinkamuuza mmene Yehova ankandilimbikitsira. Ndinkamuuza za madalitso omwe Yehova wandipatsa komanso ndinkamuthokoza chifukwa chondisonyeza chikondi, kudzipereka kwake komanso chifukwa choyesetsabe kukhala wokhulupirika kwa Atate wathu ngakhale pa nthawi yovuta.

Yelena Mikhaylova

Chaka chobadwa: 1983 (Ku Shuya)

Mbiri yake: Atamaliza sukulu yasekondale anayamba kugwira ntchito yophunzitsa masamu komanso phunziro lasayansi

Bambo ake anamwalira iye ali ndi zaka 9 zokha. Anayamba kufufuza kuti adziwe ngati Mulungu alikodi komanso zomwe zimachitika munthu akamwalira. Atapeza mayankho okhutiritsa kuchokera m’Baibulo, anabatizidwa mu 1999. Mu 2003 anakwatiwa ndi Dmitriy Mikhaylova

Zimene Ananena

Mwakumana ndi mavuto otani pa nthawi imene mwamuna wanu anali kundende?

Ndinkafunika kugwira ntchito zolimba kuti ndizikwanitsa kusamalira apongozi anga aakazi azaka 80. Mwamuna wanga atamangidwa, apongozi nawonso anayamba kudwaladwala. Kundende komwe mwamuna wanga anali, kunali pamtunda wamakilomita 35 kuchokera kwathu. Choncho pankafunikira khama kuti ndiyende mtunda wonsewo. Kuwonjezera pamenepo, apolisi ankandikakamiza kuti ndizipitako pafupipafupi kuti ndikakumane nawo. Tikakumana ankandipanikiza komanso kundiopseza. Pambuyo pake nanenso ananditsegulira mlandu.

N’chiyani chinakuthandizani kuti mupirire mavuto onsewa?

Ndinkapemphera kwa Yehova ndipo ndinkamuuza mwachindunji kuti ndikufuna andipatse mphamvu kuti ndithe kupirira mavuto aliwonse omwe ndinkakumana nawo. Sindinkagona mokwanira chifukwa chovutika ndi nkhawa. M’mawa kukacha, ndinali ndi zinthu zambiri zoti ndichite. Komabe mothandizidwa ndi Yehova ndinkakwanitsa kuchita zinthu zambiri zomwe pandekha sindikanakwanitsa kuzichita.

Svetlana Shishina

Chaka chobadwa: 1975 (Ku Orenburg, m’Chigawo cha Orenburg)

Mbiri yake: Amagwira ntchito yophoda anthu

Anakwatiwa mu 1995 ndipo ali ndi ana awiri, wamwamuna ndi wamkazi

Ana awo atakwanitsa zaka 6, anawapezera Baibulo la ana. Patatha zaka, anaphunzira kuti Mulungu ali ndi dzina ndipo anaganiza zoyamba kuphunzira Baibulo ndi Mboni za Yehova. Mu 2002 anabatizidwa

Zimene Ananena

Kodi mayeserowa anakhudza bwanji mwamuna wanu amene si Wamboni?

Apolisi atabwera kudzafufuza zinthu kunyumba kwathu, ndinali ndi nkhawa kuti adzandikwiyira. Koma ndinadabwa kwambiri kuti mwamuna wanga anandihaga n’kundiuza kuti: “Usadandaule, zonse zikhala bwino. Tili limodzi ndipo tithana nazo.” Iye sankamvetsa kuti n’chifukwa chiyani apolisi ankandizunza chonchi. Ndinamva kupepukidwa kwambiri mumtimamu nditazindikira kuti iye ali kumbali yanga. Zinali ngati kuti ndatula chimtolo cholemera.

Mwamuna wanu anakhudzidwa bwanji ndi thandizo lomwe Akhristu anzanu ankakupatsani?

Yehova ndi amene analimbikitsa Akhristu anzanga kuti azitipatsa zinthu. Tinkalandiranso zinthu zofunika za tsiku lililonse. Mwamuna wanga sankamvetsa kuti zikutheka bwanji kuti abale ndi alongowa azitipatsa zinthuzo mwaulere. Ndinkamuuza monyadira kuti Yehova ndi amene akuchititsa zonsezi. Iye amadziwa zomwe tikufunikira ndipo amasamalira atumiki ake okhulupirika.

Timasangalala kwambiri tikaganizira kulimba mtima komanso kupirira komwe abale ndi alongo athu ku Russia akusonyeza.—1 Atesalonika 2:20.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI