2 NOVEMBER 2021
RUSSIA

Anthu 5 Amene Akuimbidwa Mlandu ku Sakhalin Akudalira Yehova

YAMBANI

Nthawi ndi Zochitika

Khoti la mu Mzinda wa Nevelskiy M’chigawo cha Sakhalin, posachedwapa lipereka chigamulo chake pa mlandu wa M’bale Vyacheslav Ivanov, M’bale Aleksandr Kozlitin, M’bale Sergey Kulakov, Mlongo Tatyana Kulakova, ndi M’bale Yevgeniy Yelin. * Woimira boma pa mlanduwu, sanatchule chilango chimene akufuna kuti anthuwa apatsidwe.
July 2020

A Vyacheslav, a Aleksandr, a Sergey, ndi a Tatyana anawalamula kuti asatuluke m’dzikolo
2 April, 2020

A Yevgeniy analamulidwa kuti asatuluke m’dzikolo
20 January, 2019

Apolisi a gulu la FSB, omwe ndi apolisi amene amafufuza zinthu mwachinsinsi ku Russia, anakachita chipikisheni pafupifupi nyumba 11 za nzika za m’dzikolo zomwe ankaziganizira kuti ndi za Mboni za Yehova. Apolisiwo anachita zinthu mwankhanza ndipo anafunsa mafunso ana ang’onoang’ono a m’mabanjawa. Zimenezi zinachitika patangopita kanthawi kochepa kuchokera pamene a pulezidenti a ku Russia, a Vladimir Putin, analonjeza kuti achitapo kanthu pa nkhani ya kuzunzidwa kwa a Mboni za Yehova.

Zokhudza Abalewa ndi Mlongoyu

Sergey Kulakov

Chaka chobadwa: 1961 (ku Nevelsk, M’chigawo cha Sakhalin)

Mbiri yake: Ankakhala kusukulu yogonera konko kuyambira ali ndi zaka 14. Ali mwana ankakonda kusewera mpira wa miyendo komanso tchesi. Anamaliza maphunziro ake ku sukulu yophunzitsa ntchito zamanja, ndipo anaphunzira ntchito yokonza sitima. Pano anapuma pantchito

Cha m’ma 2000, iye ndi mkazi wake Tatyana anayamba kuphunzira Baibulo. Mu 2008 anabatizidwa ataona chikondi chimene a Mboni za Yehova amasonyeza. Ali ndi ana awiri

Zimene Ananena

Kodi Yehova wakuthandizani kupirira mavuto ati?

Zinali zovuta kwambiri kuti ndikhalebe wodekha komanso wosangalala. Koma chifukwa chotanganidwa kwambiri ndi kuphunzira Baibulo komanso kulambira Yehova, ndinayamba kukonda mawu a Mulungu omwe amati: “Munthu wokhulupirika, mudzamuchitira mokhulupirika.” (2 Samueli 22:26) Ndinayamba kukonda komanso kukhulupirira kwambiri Yehova. Zinandithandizanso kuti ndisamade nkhawa ndi zinthu zimene zichitike kutsogoloku, chifukwa ndikudziwa kuti zivute zitani, iye adzandisamalira.

Tatyana Kulakova

Chaka chobadwa: 1973 (ku Nevelsk, M’chigawo cha Sakhalin)

Mbiri yake: Kuyambira ali mwana, amakonda kuwerenga, kujambula komanso nyimbo. Anagwirapo ntchito yopanga pulasitala komanso yopenta. Anakwatiwa ndi Sergey mu 1996 ndipo ali ndi ana awiri

Anaona kuti Baibulo ndi lothandiza kwambiri ataphunzira zimene limanena zokhudza cholinga cha dzikoli komanso zimene zimachitika munthu akamwalira. Anabatizidwa n’kukhala wa Mboni za Yehova mu 2003

Zimene Ananena

Kodi ndi lemba liti limene lakuthandizani kuti mukhalebe wolimba mtima kapena kupirirabe mosangalala?

Atachita chipikisheni nyumba yathu, komanso kutitsegulira mlandu, tinkafunika kuti tizipita ku maofesi a FSB. Panthawi yonseyi, mawu amene Elisa anauza mtumiki wake anandilimbikitsa kwambiri, omwe amati: “Popeza ife tili ndi ambiri kuposa amene ali ndi iwowo.” Ndinkaona m’maganizo mwanga kuti Yehova Wamphamvuyonse, Yesu komanso angelo ambirimbiri, ali kumbali yanga. Mawu amphamvu a palembali anandithandiza kuti ndikwanitse kuchita zomwe ndinkafunikira kuchita m’malo momada nkhawa kwambiri.

Yevgeniy Yelin

Chaka chobadwa: 1974 (ku Yuzhno-Sakhalinsk, M’chigawo cha Sakhalin)

Mbiri yake: Kuyambira ali wachinyamata amakonda kujambula. Anagwirapo ntchito yokongoletsa nyumba. Ali ndi kampani yakeyake yokonzanso nyumba. Amapanganso zinthu za m’nyumba

Anayamba kuphunzira Baibulo ali kusukulu. Cha m’ma 1990 anakumana ndi a Mboni za Yehova ndipo anawalemekeza chifukwa choti amagwiritsa ntchito mfundo za m’Baibulo nthawi zonse. Anabatizidwa mu 1992. Anakwatira Anastasia mu 2017

Zimene Ananena

Kodi ndi malangizo ati amene mungapereke kwa anthu ena kuti azikonzekera chizunzo?

Malangizo anga kwa ena ndi akuti adzazitse maganizo komanso mitima yawo ndi mfundo za m’Baibulo. N’zofunika kwambiri kuti azitsatira malangizo amene gulu likupereka. Tikuyembekezera mwachidwi kukwaniritsidwa kwa maulosi okhudza dziko latsopano, koma chizunzo ndi mbalinso ya maulosi amene akuyenera kukwaniritsidwa ndithu. Ngati tikuzunzidwa, ndiye kuti akutigwiritsa ntchito pokwaniritsa ulosi. Umenewu ndi mwayi wapadera.

Tikudziwa kuti Yehova apitiriza kusamalira abale ndi alongo athu okondedwawa, pamene akuvomereza mawu amene mneneri Yesaya ananena akuti: “Mulungu ndiye chipulumutso changa. Ndidzamukhulupirira ndipo sindidzaopa chilichonse.”—Yesaya 12:2.

^ Tsiku lenileni lopereka chigamulo nthawi zina silimadziwikiratu.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI