Pa 26 October 2020, Khoti la m’Boma la Lgov linakana kutulutsa M’bale Dennis Christensen m’ndende. Iye wakhala ali m’ndende kwa zaka zoposa zitatu. Koma ali ndi masiku 10 oti apange apilo za nkhaniyi. M’bale Christensen akuyembekezeka kudzamaliza ukaidi wake mu May 2022. Detili laphatikizidwa ndi nthawi imene anakhala kale m’ndende pamene ankayembekezera kuzengedwa mlandu. Ngakhale zili choncho, mwezi watha oyang’anira ndende ananena kuti m’baleyu “anaphwanya mwadala” malamulo ena a ndende. Chifukwa cha zomwe akumuganizirazi, zikhoza kudzachititsa kuti ukadzafika mwezi wa May 2022 adzakhalebe m’ndende kwa nthawi yoposera pamenepa.

M’bale Christensen ndi mkazi wake Irina, akhala akupirira mavuto osiyanasiyana monga nkhanza komanso zachipongwe zambiri kungochokera pamene m’baleyu anamangidwa pa 25 May 2017. Komabe, onse awiri akuyesetsa kukhalabe achimwemwe komanso olimba mtima pamene chikhulupiriro chawo chikuyesedwa chonchi. Chinthu china chimene chikuwathandiza kukhala olimba ndi mapemphero amene abale ndi alongo athu mamiliyoni ambiri padziko lonse akupereka.