14 DECEMBER 2023
RUSSIA

“Kukhulupirira Yehova Kwandithandiza Kwambiri”

YAMBANI

Posachedwapa, khoti la m’boma la Samarskiy lilengeza chigamulo chake pa mlandu wokhudza abale otsatirawa: Aram Danielyan, Denis Kuzyanin, Sergey Polosenko, ndi Nikolay Vasiliyev. Loya woimira boma pamlanduwu akuyembekezeredwa kusankha chigamulo chimene akufuna kuti abalewa apatsidwe.

Zokhudza Abalewa

Aram Danielyan

Chaka chobadwa: 1990 (ku Armenia)

Mbiri yake: Banja lawo linasamukira ku Russia iye ali ndi miyezi 6

Ankagwira ntchito yazomangamanga komanso yogula zinthu

Anaphunzira zokhudza Baibulo kuchokera kwa mayi ake aang’ono komanso mayi ake omubereka. Anayamba kukonda kwambiri Yehova ataona kuti Yehova akuyankha mapemphero ake. Mu 2011 anabatizidwa n’kukhala wa Mboni za Yehova

Mu 2017 anakwatirana ndi Elina ndipo pano ali ndi mwana wamwamuna mmodzi

Zimene Ananena

N’chiyani chimakuthandizani kuti musamakhumudwe kwambiri?

Nthawi zina ndimakhumudwadi kwambiri chifukwa cha zimene zikundichitikirazi. Koma ndikayamba kumva choncho, ndimangokumbukira kuti paja ndinasankha kukhala mtumiki wa Yehova. Ndiye ndimadzifunsa kuti nditati ndisankhe kusiya kumutumikira chifukwa choopa kuzunzidwa ndipindulapo chiyani? Ndimasangalala kudziwa kuti ndikuthandiza kuti dzina la Yehova liyeretsedwe komanso kuti anthu ena alidziwe. Ndine wofunitsitsa kusonyeza Satana kuti ndi wabodza komanso kuti sindidzasiya kutumikira Yehova ngakhale nditauzidwa kuti ndiphedwa kapenanso kuikidwa m’ndende.

Denis Kuzyanin

Chaka chobadwa: 1984 (ku Norilsk, M’chigawo cha Krasnoyarsk)

Mbiri yake: Amagwira ntchito yodzilamulira

Denis limodzi ndi mayi ake anayamba kuphunzira Baibulo ndi a Mboni za Yehova pa nthawi imene Denis anali ndi zaka 10 zakubadwa. Anabatizidwa mu 2001

Mu 2012 anakwatirana ndi Yelena. Ali ndi mwana wamkazi mmodzi

Zimene Ananena

Ndi nkhani ya m’Baibulo iti imene inakuthandizani kuti mukhalebe ndi maganizo oyenera ngakhale kuti mukukumana ndi mavuto?

Buku la Yobu lakhala likundilimbikitsa kwambiri. Kuyambira chaputala 38, Yehova akukambirana ndi Yobu zokhudza mphamvu zake zazikulu zomwe anagwiritsa ntchito polenga zinthu. Choncho ndikamaganizira zimene Yehova anachita kale komanso zimene adzachite m’tsogolo zimandithandiza kuzindikira zinthu zomwe ndi zofunika kwambiri pa moyo wanga. Ndimaona kuti chofunika kwambiri ndi kumvera Yehova. Ngati ndili pa ubwenzi wolimba ndi Yehova ndiye kuti andithandiza pa mavuto anga onse.

Sergey Polosenko

Chaka chobadwa: 1968 (Uzbekistan)

Mbiri yake: Anali bwana pa saluni inayake

Mu 1993 anakwatirana ndi Lydia

Analeredwa ndi makolo a Mboni za Yehova ndipo anabatizidwa mu 1982

Zimene Ananena

N’chiyani chinachitikira ubwenzi wanu ndi Yehova pa nthawi imene munali m’ndende poyembekezera kuti mlandu wanu uzengedwe?

Pa nthawi imene ndinali m’ndende, palibe chimene ndikanachita kuti zinthu zisinthe. Yehova yekha ndi amene anali nane pafupi kwambiri. Ndinaona mmene Yehova ananditetezera, kundithandiza koma koposa zonse ndinkamuona kuti ndi mnzanga wapamtima. Sindinkakayikira kuti anali nane nthawi zonse. Popeza kuti ndinali naye pa ubwenzi wolimba chonchi, ndinkadzimva kuti ndine wotetezeka ndipo sindinkadera nkhawa chilichonse chomwe chingandichitikire. Panopa ndikukumanabe ndi mavuto koma m’pamenenso ndikupitiriza kumudziwa bwino kwambiri Yehova ndi makhalidwe ake. Ndimamuthokoza nthawi zonse pokhala nane pafupi.

Nikolay Vasiliyev

Chaka chobadwa: 1984 (ku Aisha, Republic of Tatarstan)

Mbiri yake: Ankagwira ntchito yopanga mapulogalamu apakompyuta

Poyamba sankakhulupirira Mulungu. Ataphunzira Baibulo anayamba kumvetsa zomwe limaphunzitsa ndipo anayamba kukhulupirira kuti Mulungu alipodi. Anabatizidwa mu 2005

Zimene Ananena

N’chiyani chinakuthandizani kuti musasiye kukhulupirira Yehova?

Mungadabwe kuti ndisanaikidwe m’ndende yoyembekezera, ndinkaopa kwambiri kupita kundende. Koma popeza kuti panopa ndadziwa kuti moyo wakundende ndi wotani komanso ndaona mmene Yehova anandithandizira, mantha ajanso atheratu. Ngakhale kuti sindikudziwa kuti mlandu wanga utenga nthawi yaitali bwanji komanso kuti ndipatsidwa chigamulo chotani, ndikudziwa kuti Yehova sangandisiye. Kukhulupirira Yehova kwandithandiza kwambiri kuti ndikhale ndi mtendere wam’maganizo komanso kuti ndizikhulupirira kuti iye adzathetsa nkhaniyi m’njira yabwino kwambiri.

Sitikukayikira kuti Yehova apitiriza kutonthoza atumiki ake onse amene akukumana ndi mavuto chifukwa cha chikhulupiriro chawo ndipo iye ‘awalimbikitsa kuti nthawi zonse azichita komanso kulankhula zinthu zabwino.’—2 Atesalonika 2:16, 17.

Nthawi ndi Zochitika

14 December 2021

Denis, Nikolay, ndi Sergey anaganiziridwa kuti apalamula mlandu
15 December 2021

Apolisi anafufuza m’nyumba ya Nokolay ndi Sergey. Kenako abalewa anamangidwa ndi kukasungidwa kundende yongoyembekezera
16 December 2021

Denis, Nikolay, ndi Sergey anasamutsidwa n’kupita nawo kundende yomwe anthu amakhala poyembekezera kuzengedwa mlandu
6 January 2022

Aram anaganiziridwa kuti wapalamula mlandu ndipo anamumanga ali kubwalo la ndege
7 January 2022

Aram anaikidwa m’ndende yomwe anthu amakhala poyembekezera kuwazenga mlandu
12-14 December 2022

Abale onse 4 anatulutsidwa m’ndende ndipo analetsedwa kuchita zinthu zina
16 June 2023

Khoti linayamba kuwazenga mlandu

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI