5 FEBRUARY 2024
RUSSIA

“Lola Kuti Yehova Akutsogolere Panjira Yako”

YAMBANI

Posachedwapa, khoti la m’boma la Shadrinskiy m’chigawo cha Kurgan, lilengeza chigamulo chake pa mlandu wokhudza M’bale Aleksandr Lubin. Loya woimira boma pa mlanduwu akuyembekezereka kunena chilango chimene akufuna kuti m’baleyu apatsidwe.

Zokhudza M’baleyu

Aleksandr Lubin

Chaka chobadwa: 1956 (ku Ogonek m’chigawo cha Kurgan)

Mbiri yake: Asanapume pa ntchito, ankagwira ntchito monga injiniya mudipatimenti yopewa ngozi pakampani ya zamagetsi

Anakwatira Tatyana mu August 2001. Ali ndi ana awiri

Tatyana anayamba kuphunzira Baibulo ndi a Mboni za Yehova. Pamene ankadwala matenda a sitiroko, Aleksandr ankamuwerengera Baibulo ndipo anayamba kuchita chidwi ndi zimene ankaphunzira. Kenako mu 2003, iwo anabatizidwa limodzi ndi ana awo

Aleksandr amadwala matenda a nyamakazi moti amayendera ndodo. M’baleyu anapezekanso ndi matenda oopsa omwe chitetezo cha m’thupi chimalimbana ndi ziwalo zina

Zimene Ananena

N’chiyani chinakuthandizani kuti muzisangalalabe mutaikidwa m’ndende poyembekezera kuzengedwa mlandu?

Nthawi imeneyi inali yovuta kwambiri. Ndimavutika kwambiri ndi nyamakazi koma sindinkaloledwa kulandira mankhwala aliwonse othandiza kuchepetsa ululu. Poyamba ndinkapemphera kwa Yehova kuti nditulutsidwe mwamsanga. Kenako, ndinayamba kumupempha kuti andithandize kukhala woleza mtima komanso kuti ndisamade nkhawa kwambiri. Ndinkakondanso kupempherera abale ndi alongo ena amene anaikidwa m’ndende. Ndinkadzikumbutsa kuti, ‘Mavuto angawa ndi a kanthawi kochepa chabe.’ Kenako ndinkaganizira kwambiri za madalitso amene Yehova akundipatsa. Zimenezi ndi zimene zinandithandiza kuti ndizisangalalabe. Patapita nthawi, ndinatulutsidwa m’ndende. Lemba la Salimo 37:5 ndi limene linkandilimbikitsa. Lembali limati: “Lola kuti Yehova akutsogolere panjira yako, uzimudalira ndipo iye adzakuthandiza.” Ndaona kuti Yehova samaloladi kuti tikumane ndi mayesero oposa amene tingakwanitse kuwapirira. Nthawi zonse adzatithandiza kupirira mavuto ena aliwonse, nafenso tikapitiriza kumudalira ndiponso kumukhulupirira ndi mtima wathu wonse.

Sitikukayikira kuti tonsefe tingakwanitse kupirira mokhulupirika mavuto aliwonse amene tingakumane nawo ngati tingadalire Yehova mofanana ndi M’bale Aleksandr.—Yesaya 38:14.

Nthawi ndi Zochitika

13 July 2021

Anamutsegulira mlandu
14 July 2021

Nyumba 8 za a Mboni za Yehova zinafufuzidwa. M’bale Aleksandr anamangidwa, kufunsidwa mafunso komanso kutsekeredwa m’ndende poyembekezera mlandu wake
16 July 2021

Anamusamutsira kundende ina poyembekezera kuzenga mlandu wake
19 July 2021

Anachita apilo chifukwa choti ankadwala kwambiri
28 August 2021

Pambuyo pomva pempho lochokera ku Khoti Loona za Ufulu wa Anthu ku Europe komanso kwa anthu omenyera ufulu, Aleksandr anatulutsidwa m’ndende ndipo anapatsidwa chigamulo choti asamachoke m’dera limene amakhala
14 July 2023

Khoti linayamba kuzenga mlandu
7 September 2023

Khoti linaimitsa kaye kumvetsera mlanduwu chifukwa choti Aleksandr anagonekedwa m’chipatala

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI