24 JANUARY, 2022
RUSSIA

M’bale Aleksandr Polozov ndi M’bale Stepan Shevelev Akudalitsidwa Ngakhale Akuzunzidwa

YAMBANI

Khoti la Mumzinda wa Norilsk m’Chigawo cha Krasnoyarsk, posachedwapa lipereka chigamulo chake pa mlandu wa M’bale Aleksandr Polozov komanso M’bale Stepan Shevelev. Loya woimira boma pa nkhaniyi sananene chilango chimene akufuna kuti abalewa apatsidwe.

Nthawi ndi Zochitika

20 October, 2019

Apolisi anapita kumsasa wina mumzinda wa Norilsk ndipo a Mboni oposa 50 anamangidwa
26 October, 2019

Aleksandr anamangidwa ndipo anaikidwa m’ndende poyembekezera kuzengedwa mlandu
21 January, 2020

Aleksandr anamasulidwa atakhala pafupifupi miyezi itatu m’ndende
19 February, 2020

Aleksandr anaikidwa pa mndandanda wa anthu ochita zoopsa ndipo maakaunti ake a ku banki anatsekedwa
6 May, 2021

Stepan ankaimbidwa mlandu “wolowa mu mgwirizano wochita zaupandu” ndi Aleksandr. Stepan ankaimbidwa “milandu” chifukwa chakuti ankapemphera komanso kulalikira

Zokhudza Abalewa

Aleksandr Polozov

Chaka chobadwa: 1970 (ku Torzhok, m’Chigawo cha Tver)

Mbiri yake: Ali wachinyamata ankakonda kusewera hoke komanso kusambira. Anagwirapo ntchito yopulumutsa anthu pa ngozi zadzidzidzi. Anakwatira Svetlana mu 1998. Onsewa amakonda kukwera njinga komanso kupita ku malo osiyanasiyana

Anayamba kuphunzira Baibulo ndi a Mboni za Yehova cha m’ma 1990. Anabatizidwa mu 1995

Zimene Ananena

Kodi Yehova anakuthandizani bwanji pamene munali m’ndende?

Atamaliza kundifunsa mafunso koyamba ananditengera mu selo. . . . Munthu amene ndinali naye mu selomo anandifunsa chifukwa chake ndinamangidwa. Ndinamuuza kuti ndikuimbidwa mlandu chifukwa choti ndimakhulupirira Mulungu. . . . Anandiuza kuti: “Tayang’ana pansi pa tebulopo.” Nditayang’ana ndinaona kuti pali Mabaibulo awiri. Sindinakhulupirire zimene ndinaonazi. . . . Kungoyambira tsiku limene ndinafika m’ndende, ndinali ndi Baibulo. Ndimathokoza kwambiri Yehova kuti anandithandiza m’njira yodabwitsa kwambiri.

Kodi abale ndi alongo akuthandizani bwanji?

Abale ndi alongo andithandiza komanso andilimbikitsa kwambiri m’njira yoti sindingathe kufotokoza. Tsiku lina m’mawa kunja kukuzizira kwambiri abale ndi alongo anandiombera m’manja pamene ndinkadutsa kuchoka kundende kupita kukhoti. Kenako cha m’ma 6 koloko madzulo anandiomberanso m’manja pamene ndinkabwerera kundende. Kwa ine zimenezi zinali zapadera kwambiri ndipo zinachitira umboni.

Stepan Shevelev

Chaka chobadwa: 1982 (ku Maslyanino, m’Chigawo cha Novosibirsk)

Mbiri yake: Amagwira ntchito ya zamagetsi. Anakwatira Oksana mu 2013. Amakonda kuwerenga komanso kupita ku malo osiyanasiyana

Mu 1996, mayi ake ndi mchemwali wake anayamba kuphunzira Baibulo. Ngakhale kuti iwo sanakhale a Mboni za Yehova, Stepan anayamba kuphunzira Baibulo ndipo anasangalala ndi zimene a Mboni za Yehova amaphunzitsa. Anasangalala ataphunzira kuti Baibulo limasintha moyo wa anthu. Anabatizidwa mu 2001

Zimene Ananena

Kodi kuchita zinthu zauzimu nthawi zonse kwakuthandizani bwanji?

Timakonda kulambira kwa pabanja. Zaka zambiri zapitazo, tinasankha tsiku loti tizichita kulambira kwa pabanja, ndipo sitimalola kuti chilichonse chitisokoneze. Chifukwa cha zimenezi, ndikukhulupirira kuti mkazi wanga apitirizabe kulimbitsa chikhulupiriro chake. Kuwonjezera pamenepa, nthawi zonse ndimayesetsa kuti kuwerenga Baibulo kwanga kuzikhala kosangalatsa. Mwachitsanzo, nthawi ina ndinawerenga Baibulo lonse kuyambira chikuto mpaka chikuto kwa chaka chimodzi. Kenako m’chaka chotsatira, ndinaliwerenga motsatira nthawi imene zinachitika. Kenako ndinaliwerenga potengera amene analemba, ndi zina zotero. Ndikamachita zimenezi, sindimangowerenga Baibulo mwachizolowezi, koma nthawi zonse kumakhala kosangalatsa chifukwa ndimapeza mfundo zatsopano.

Kodi panopa mukuwaona bwanji anthu amene akukuzunzani?

Yehova akundithandiza kuti ndiziwaona moyenera. Nthawi zambiri, ine ndi mkazi wanga timaona kuti amenewa ndi anthu amene akungogwira ntchito yawo basi. Nawonso akukumana ndi mavuto awo, ndipo akufunika kumva uthenga wopatsa chiyembekezo umene timalalikira.

Tikukhulupirira kuti Yehova apitirizabe kuthandiza abale athuwa amene mwachikhulupiriro, ‘akuthamangabe’ panjira yachilungamo ngakhale akuzunzidwa.—Oweruza 8:4.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI