12 SEPTEMBER, 2022
RUSSIA

M’bale Aleksandr Shutov Akupitirizabe Kudalira Yehova Kuti Azimutsogolera

YAMBANI

Posachedwapa khoti la m’Boma la Lazo m’Chigawo cha Khabarovsk lipereka chigamulo chake pa mlandu wokhudza M’bale Aleksandr Shutov. Loya waboma sananene chilango chimene akufuna kuti khoti lipereke kwa m’baleyu.

Nthawi Komanso Zimene Zinachitika

26 July, 2021

Anawatsegulira mlandu
30 July, 2021

Apolisi anakafufuza zinthu m’nyumba mwawo. Pambuyo pake anamanga a Shutov, n’kukawafunsa mafunso kenako anamasulidwa koma anawalamula kuti asatuluke m’dziko lawo.
3 August, 2021

Analembedwa pa mndandanda wa anthu ochita zinthu zoopsa
28 April, 2022

Mlandu unayamba kuzengedwa

Zokhudza M’baleyu

Aleksandr Shutov

Chaka chobadwa: 1952 (ku Pionerskiy, m’chigawo cha Irkutsk)

Mbiri yake: Anayamba ulimi ali ndi zaka 15 koma panopa anapuma.

Anakwatira Rosa mu 1973. Ali ndi ana 4, zidzukulu 11 komanso zidzukulutudzi zitatu.

Amayi awo anaphunzitsidwa choonadi ndi a Mboni za Yehova omwe anathawira ku Siberia. A Shutov anabatizidwa mu 1975. Kenako, mu 1976 anagamulidwa kuti akakhale m’ndende kwa chaka chimodzi chifukwa chokana kulowa usilikali.

Zimene Ananena

Kodi munaphunzirapo chiyani pa nthawi imene munamangidwa koyamba mu 1976?

Ndimakumbukira zinthu zina zomwe zinachitika nthawi imeneyo. Pomwe ankanditengera kundende, wapolisi wina anena kuti: “Ulendowu ndi wautali, kodi zingatheke kuti tizicheza?” Nditamuyankha mafunso ake onse anati: “Ndikakuyang’ana ukuoneka wodekha kwambiri, zikungokhala ngati ndikukuperekeza kunyumba kwanu osati kundende.” Ndinazindikira kuti ukamadalira Yehova ndi chikhulupiriro chonse komanso ukamamupempha kuti akuthandize umakhala wodekha. Ndinkangomva ngati palibe choipa chilichonse chomwe chikuchitika. Panopa ndikufunikira kuti ndipitirizebe kudalira Yehova komanso kumamupempha kuti azinditsogolera.

Pamene tikuzunzidwabe, panopa tiyeni tonse tipitirizebe kulimbitsa chikhulupiriro chathu komanso tikhale otsimikiza kuti ‘tidzakhulupirira kukoma mtima kosatha kwa Mulungu mpaka kalekale, ndithu mpaka muyaya.’—Salimo 52:8.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI