29 MARCH 2024 | INAKONZEDWANSO PA: 10 JULY 2024
RUSSIA

NKHANI YOKHUDZA M’BALE YEMWE WAPEZEDWA WOLAKWA | “Sindikudandaula Kapena Kuchita Mantha”

YAMBANI

Pa 10 July, 2024, Khoti la m’boma la Khabarovsk linapeza kuti M’bale Valeriy Rabota ndi wolakwa ndipo linagamula kuti kwa zaka 6, azitsatira malamulo enaake ali panyumba. M’baleyu sakufunika kupita kundende panopa.

Zokhudza M’baleyu

Valeriy Rabota

Chaka chobadwa: 1961 (ku Ukraine)

Mbiri yake: Ankagwira ntchito yoyendetsa galimoto yoperekera katundu

Anapemphera kwa Mulungu kuti amuthandize kumudziwa. Anakumana ndi a Mboni za Yehova tsiku lotsatira ndipo anayamba kumuthandiza kupeza mayankho a mafunso omwe anali nawo. Anabatizidwa mu 1995

Anakwatirana ndi Elvira mu 2018

Zimene Ananena

N’chiyani chinakuthandizani kukhalabe wodekha akuluakulu a boma atabwera kudzafufuza m’nyumba mwanu?

Ine ndi mkazi wanga tinali titangomaliza kudya chakudya chamasana pamene tinangomva kugogoda mwamphamvu pachitseko. Zinkamveka ngati munthu wina wagenda chitsekocho ndi mwala waukulu. Nthawi yomweyo ndinazindikira zomwe zinkachitika. Ndinakumbukira chithunzi chomwe chimasonyeza mngelo wamphamvu ali pamwamba pa nyumba n’kumayang’ana banja limene lakhala pansi m’nyumbayo ndipo likupemphera, pomwe asilikali amfuti atsala pang’ono kulowa. Ndinauza mkazi wanga kuti: “Yehova, Yesu ndiponso angelo ambiri akutiyang’anira.” Ndinapemphera mwachidule n’kukatsegula chitseko. Sindingafotokoze bwinobwino mmene ndinalili wodekha komanso mmene ndinamvera kuti ndili pafupi kwambiri ndi Yehova pa nthawiyo komanso pambuyo pake. Chifukwa chodalira Yehova, sindikudandaula kapena kuchita mantha komanso ndili ndi mtendere wamumtima.

Timayamikira M’bale Rabota chifukwa cha chitsanzo chake pa nkhani ya chikhulupiriro komanso tikudziwa kuti Yehova akhala naye ndipo akhalanso ndi onse amene apitirize kukhala okhulupirika.—Salimo 37:28.

Nthawi Komanso Zimene Zinachitika

1 March 2022

Anamutsegulira mlandu
3 March 2022

Akuluakulu a boma anafufuza m’nyumba yake. M’baleyu anafunsidwa mafunso ndipo anamumanga n’kumutsekera kaye poyembekezera kumuzenga mlandu
5 March 2022

Anamusamutsira kundende yodikirira kuti mlandu uzengedwe
29 June 2022

Anamutulutsa n’kumuika pa ukaidi wosachoka panyumba
7 October 2022

Anamumasula pa ukaidi wosachoka panyumba n’kumuika pa ukaidi wosapita m’madera ena
11 May 2023

Anayamba kumuzenga mlandu

Onaninso

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI