2 AUGUST, 2022
RUSSIA

Ndikunyadira Kuti “Ndapanga Nawo Mbiri ya Gulu Lathu”

YAMBANI

Pa 26 July 2022, Khoti la Mzinda wa Snezhinskiy m’Chigawo cha Chelyabinsk linapeza kuti M’bale Ilya Olenin ndi wolakwa. Loya woimira boma anapempha khotili kuti lipatse M’bale Olenin chilango chokakhala kundende zaka 6 ndi hafu. Koma m’malo mwake, khoti linagamula kuti m’baleyu alipire ndalama za ku United States zokwana madola 8,150.

Nthawi Komanso Zimene Zinachitika

17 April, 2017

Apolisi a FSB anasokoneza Mwambo wa Chikumbutso. Panthawiyi apolisiwa ananena kuti M’bale Olenin ali ndi mlandu “wogwira ntchito yaumishonale.” Komabe mlanduwo unatsekedwa
30 November, 2020

Apolisi anakafufuza zinthu kunyumba kwa M’bale Olenin
28 September, 2021

M’bale Olenin anamutsegulira mlandu
28 October, 2021

Apolisi anabweranso kachiwiri kudzafufuza zinthu m’nyumba mwake. Pa nthawiyi anatenganso M’bale Olenin kuti akamufunse mafunso komanso anamuletsa kuti asapange ulendo uliwonse wochoka m’deralo
23 May, 2022

Khoti linayamba kuzenga mlandu

Zokhudza M’baleyu

Ilya Olenin

Chaka chobadwa: 1977 (Ku Chelyabinsk, m’Chigawo cha Chelyabinsk)

Mbiri yake: Ali wamng’ono ankakonda kuchita masewera osiyanasiyana. Mu 1993, banja lawo linachita ngozi yoopsa zomwe zinachititsa kuti akhale m’chipatala kwa nthawi yaitali. Amagwira ntchito ngati injiniya wopanga ndege.

Pambuyo pangozi ija anayamba kudzifunsa za cholinga cha moyo ndipo anayamba kuwerenga Baibulo. Mu 1998 anakumana ndi a Mboni za Yehova. Atawona m’mene Baibulo limalongosolera zinthu, anakhutira kuti muli malangizo othandiza ndipo anabatizidwa mu 2006.

Mu 2015 anakwatira Natalya ndipo ali ndi ana atatu

Zimene Ananena

Kodi mumamva bwanji chifukwa cha kuzunzidwa komwe munakumana nako?

Ndimaona kuti kuzunzidwako unali mwayi waukulu. Ndikutero chifukwa tsopano ndapanga nawo mbiri ya gulu lathu. Koma mwayiwu umabweranso ndi udindo. Ndingati Yehova nayenso anali nawo pamlanduwo ndipo anandilola kuti nditenge nawo mbali poteteza dzina lake. Kuyambira nthawi imeneyo, mapemphero anga amakhala achindunji komanso okhudza nkhani zofunika kwambiri.

Mwakhala ndi mwayi wotani wochitira umboni pa nthawi ya mlandu wanu?

Pomwe ndinkakambirana ndi wapolisi amene ankafufuza za mlandu wanga, nthawi zambiri ndinkamuuza zomwe ndimakhulupirira. Kenako, anayamba kumandifunsa mafunso okhudza zinthu zauzimu. Ulendo womaliza womwe tinacheza, chifukwa chodziwa kuti sitikumananso, ndinamulimbikitsa kuti akayambe kuphunzira Baibulo. Koma ndinadabwa akundiuza kuti akaiganizira nkhaniyo mofatsa. Anandifunsa kuti akayambe ndikufufuza nkhani yanji yokhudza Baibulo.

Nkhani ina yochititsa chidwi ndi ya loya amene ankandiimira kukhoti. Pa nthawi yomwe khoti linkamvetsera mlandu wanga pa ulendo wachiwiri, anabwera kukhoti atatenga Baibulo lachikuto chachikopa, m’mbali mwake mwagolide komanso lokhala ndi zilembo zachitsulo pachikutopo. Anandiuza kuti ndimufufuzire vesi lomwe panalembedwa dzina la Mulungu. Pa nthawi yomvetsera mlanduwo, loya wangayo anafika pomwe panali wapolisi amene anali mboni yaboma n’kumuuza kuti awerenge pa Ekisodo 15:3. Onse anawerenga vesilo mokweza. Izi zinachititsa kuti jaji komanso wapolisi uja atsimikizire kuti dzina la Mulungu limapezekadi m’Baibulo.

Tikusangalala kwambiri kuti M’bale Olenin komanso abale ndi alongo athu onse akuyesetsa kuchita zinthu mogwirizana ndi dzina lathu poyesetsa kuchitira umboni za Mulungu wathu wamkulu Yehova.—Yesaya 43:10.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI