8 APRIL 2024 | INAKONZEDWANSO PA: 1 JULY 2024
RUSSIA

ZOKHUDZA ABALE NDI ALONGO OMWE ANAMANGIDWA | Amaona Kuti Yehova Amawasamalira Pamene Ali M’ndende Yoyembekezera Kuti Mlandu Wawo Uzengedwe

YAMBANI

Pa 26 June 2024, khoti lamumzinda wa Novocherkassk m’chigawo cha Rostov linapeza kuti Mlongo Lyubov Galitsyna, M’bale Garegin Khachaturyan ndiponso M’bale Gevorg Yeritsyan ndi olakwa. Mlongo Galitsyna anagamulidwa kuti akakhale kundende kwa zaka ziwiri ndi miyezi itatu, koma khoti linaona kuti anagwira kale ukaidi wake potengera kutalika kwa nthawi yomwe anakhala kundende yodikirira kuti azengedwe mlandu. Sakufunika kupita kundende panopa. M’bale Khachaturyan anagamulidwa kuti akakhale m’ndende kwa zaka 6 ndi miyezi 6, pomwe M’bale Yeritsyan anagamulidwa zaka 6 ndi miyezi iwiri. Abale onsewa apita kundende.

Zokhudza Mlongoyu

Lyubov Galitsyna

Chaka chobadwa: 1959 (ku Plastunovskaya ku Krasnodar)

Mbiri yake: Anali injiniya pa fakitale ina asanapume ntchito

Anayamba kufuna kuphunzira Baibulo atadziwa za chiyembekezo choti sikudzakhalanso matenda komanso imfa. Anabatizidwa n’kukhala wa Mboni za Yehova mu 1995

Mwamuna wake anamwalira mu 2015

Zimene Ananena

Kodi munaona kuti Yehova anakuthandizani bwanji pamene munali m’ndende yodikirira kuzengedwa mlandu kwa chaka ndi miyezi 4?

Zinali zovuta kwambiri kukhala m’ndende limodzi ndi anthu ogwiritsa ntchito mankhwala osokoneza bongo, akuba komanso ena omwe anapalamula milandu yosiyanasiyana. Sizinali zophweka ngakhale pang’ono. Ndinkapemphera kwa Yehova, nthawi zina usiku wonse, kuti andithandize kudziwa zoyenera kuchita. Pa nthawi yonse imene ndinali m’ndende, ndinakhala muselo limodzi ndi anthu osiyanasiyana okwana 25. Mothandizidwa ndi Yehova, ndinakwanitsa kukhala bwino ndi anthu onsewo. Pogwiritsa ntchito zimene zinandichitikirazi, iye anandithandizanso kuti ndikonze zinthu zina zomwe sindichita bwino. Ndinayamikira kukhala ndi mwayi wokonza makhalidwe anga kuti ndikhale Mkhristu wabwino.

Garegin Khachaturyan

Chaka chobadwa: 1967 (ku Azerbaijan)

Mbiri yake: Ankagwira ntchito ya ukalipentala. Anasamukira ku Russia mu 1995 atakhala ku Poland ndi ku Germany

Anachita chidwi ataona kuti Baibulo limanena zoona komanso ubwino wotsatira mfundo zake. Anabatizidwa mu 1994

Anakwatirana ndi Kseniya mu 2008. Ali ndi mwana mmodzi wamwamuna

Zimene Mkazi wa Garegin, Kseniya Ananena a

N’chiyani chikuthandiza inuyo komanso mwamuna wanu kuti muzipirira?

Garegin anandilembera izi: “Ndimayamikira Yehova chifukwa chondithandiza. Makalata omwe anzanga a mumpingo amandilembera amakhala ndi mfundo zambiri za m’Baibulo zimene zimandilimbikitsa. Ndipo kudziwa kuti amandiganiziranso kumandithandiza kuti ndisamade nkhawa. Kuposa kale lonse, panopa ndimamva kuti ndili pafupi kwambiri ndi Yehova.” Ndikuvomereza zimene Garegin anandilemberazi. Tonsefe timamva kuti tili pafupi kwambiri ndi Yehova ndipo timadzionera tokha mmene akutithandizira tsiku lililonse.

Sitikayikira kuti ngakhale kuti anthu otsutsa amafuna kutichitira zoipa, Yehova apitiriza kudalitsa atumiki ake okhulupirika komanso kuwathandiza kuti zinthu ziwayendere ‘bwino.’—Genesis 50:20.

Nthawi Komanso Zimene Zinachitika

11 August 2022

Anatsegulira mlandu Lyubov, Garegin, ndi Gevorg. Nyumba zawo zinafufuzidwa. Garegin ndi Gevorg anaikidwa kundende ina yongoyembekezera
12 August 2022

Garegin ndi Gevorg anasamutsidwira kundende yoyembekezera kuti mlandu wawo uzengedwe
16 August 2022

Lyubov anaikidwa kundende ina yongoyembekezera
17 August 2022

Lyubov anasamutsidwira kundende yoyembekezera kuti mlandu wake uzengedwe
20 September 2023

Mlandu wawo unayamba kuzengedwa
25 December 2023

Lyubov anatulutsidwa kundende yoyembekezera kuti mlandu uzengedwe ndipo anaikidwa pa ukaidi wosachoka panyumba

a b Pamene nkhaniyi inkalembedwa, sizinali zotheka kuti tilankhule ndi M’bale Khachaturyan komanso M’bale Yeritsyan chifukwa choti anali kundende yoyembekezera kuti mlandu wawo uzengedwe.

Onaninso

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI