6 MAY 2024 | INAKONZEDWANSO PA: 11 JULY 2024
RUSSIA

ZOKHUDZA ANTHU OMWE ANAGAMULIDWA KUPITA KUNDENDE | “Yehova Atithandiza Kupirira Vuto Lililonse”

YAMBANI

Pa 10 July 2024, Khoti la m’Boma la Khorolskiy m’chigawo cha Primorye linapeza kuti M’bale Boris Andreyev, M’bale Anatoliy Li ndiponso Mlongo Nataliya Sharapova ndi olakwa. M’bale Andreyev anagamulidwa kuti akakhale kundende kwa zaka 6, M’bale Li anamugamula zaka 6 ndi miyezi pomwe Mlongo Sharapova anamugamula zaka zitatu. Onsewa anali kale mundende yoyembekezera kuzengedwa mlandu ndipo apitiriza kukhala m’ndende.

Zokhudza M’baleyu

Boris Andreyev

Chaka chobadwa: 1951 (ku Monastyrishche m’chigawo cha Primorye)

Mbiri yake: Ankagwira ntchito pa kampani yothandiza pakachitika ngozi zadzidzidzi

A Mboni atamuyankha mafunso ake kuchokera m’Baibulo anatsimikiza kuti wapeza choonadi. Anabatizidwa n’kukhala wa Mboni za Yehova mu 2004

Anakwatirana ndi Aleksandra mu 2020

Zimene Mkazi wa Boris, Aleksandra Ananena a

Kodi mwamuna wanu wakuthandizani bwanji kuti mupirire pa nthawi yovutayi?

Ndikukumbukira tsiku lina pambuyo poti Boris wamangidwa, pamene zinthu zinavuta kwambiri. Ndinkavutika maganizo ndipo ndinayamba kulira. Ndinalembera kalata Boris ndipo ndinamufotokozera zimene zinachitika komanso mmene ndinkamvera. Iye anandiyankha mondilimbikitsa komanso anasonyeza kuti ankandimvetsa. Koma chofunika kwambiri n’chakuti anandikumbutsa mavuto onse amene tinali titakumana nawo komanso kukwanitsa kuwagonjetsa mothandizidwa ndi Yehova. Ndinkafunikiradi kumva zimenezi ndipo zinandithandiza kuti ndisamakaikire ngakhale pang’ono kuti Yehova sadzatitaya.

Anatoliy Li

Chaka chobadwa: 1985 (Uzbekistan)

Mbiri yake: Anapempherako matchalitchi osiyanasiyana koma anali ndi mafunso ambiri omwe mayankho ake analibe. Anayamba kuphunzira Baibulo ndi a Mboni za Yehova ndipo anasangalala ataphunzira mfundo zoona kuchokera m’Baibulo. Anabatizidwa mu 2010

Anakwatirana ndi Raisa mu 2011

Zimene Mkazi wa Anatoliy, Raisa, Ananena b

Kodi Yehova anathandiza bwanji inuyo komanso mwamuna wanu?

Patangopita nthawi yochepa kuchokera pamene anaikidwa m’ndende yoyembekezera kuzengedwa mlandu, Anatoliy anandiuza kuti ankada nkhawa kwambiri akaganizira kuti ndatsala ndekha. Asanamangidwe, tinkachitira limodzi zinthu zokhudza kulambira tsiku lililonse. Koma anasiya kuda nkhawa atadziwa kuti Yehova akundipatsa chilichonse chomwe ndikufunikira pogwiritsa ntchito abale ndi alongo athu. Ine ndi Mwamuna wanga taona umboni woti Yehova amatiganizira ndipo sadzatitaya ngakhale pang’ono.

Nataliya Sharapova

Chaka chobadwa: 1972 (Kazakhstan)

Mbiri yake: Anakumana ndi a Mboni mu 1995 ndipo anavomera kuti aziphunzira Baibulo. Anatsimikizira kuti Baibulo ndi Mawu a Mulungu. Anabatizidwa mu 2012

Zimene Mayi Ake a Nataliya, a Nina, Ananena c

Kodi n’chiyani chikuthandiza Nataliya kuti asamade nkhawa pamene ali m’ndende yoyembekezera kuzengedwa mlandu?

Mwana wanga akukumana ndi mavuto osiyanasiyana pamene ali m’ndende. M’ndendemo ndi mozizira kwambiri komanso amadwala mutu pafupipafupi. Ngakhale kuti nthawi zina amakumana ndi zofooketsa, iye sakayikira kuti Yehova akhoza kumuthandiza kupirira mavuto ake onse. Iye anati: “Ndikudziwa kuti sindidzakhala muno mpaka kalekale. Yehova akundithandiza kukhala woleza mtima ndipo ndine wokonzeka kudikira.” Mavuto amene Nataliya wakumana nawo, amuthandiza kulimbitsa ubwenzi wake ndi Yehova. Zikungokhala ngati Yehovayo wamuika m’manja mwake.

Mofanana ndi mmene wathandizira Anatoliy, Boris ndiponso Nataliya, sitikukayikira kuti nafenso Yehova apitiriza kuyankha mapemphero athu pa nthawi imene takumana ndi mavuto ndipo azitipatsa mphamvu kuti tipirire.—Salimo 20:1.

Nthawi Komanso Zimene Zinachitika

28 July 2022

Anawatsegulira mlandu
6 October 2022

Nyumba 12 zinafufuzidwa m’mudzi wa Yaroslavsky. Boris ndi Nataliya anaikidwa m’ndende ina yongoyembekezera
7 October 2022

Boris ndi Nataliya anasamutsidwira kundende yoyembekezera kuzengedwa mlandu
12 October 2022

Anatoliy anaikidwa m’ndende kwa kanthawi
1 October 2022

Anatoliy anasamutsidwira kundende yoyembekezera kuzengedwa mlandu
5 October 2023

Anayamba kuwazenga mlandu

a b c Pamene nkhaniyi inkakonzedwa, M’bale Andreyev, M’bale Li ndiponso Mlongo Sharapova anali ali m’ndende yoyembekezera kuzengedwa mlandu, choncho sizinali zotheka kuti timve zimene anganene.

Onaninso

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI